Engtin Nge Kingdom Hall Library Chu Kan Hlâwkpui Theih?

I Bible hriatna tihpun nân zir chîkna engemaw neih chu i duh em? Bible châng khawi lai emaw, Bible-a târ lan mihring emaw, hmun emaw, thil emaw hriat châk riau i nei em? A nih loh leh, rilru buaina i neihte chungchânga Pathian Thuin a ṭanpui theih leh theih loh che i ngaihtuah em? Chutiang i nih chuan Kingdom Hall library tlawh ang che.

Chutah chuan zir bingna neih nân hmanraw ṭangkai tak tak a awm. In ṭawnga hmuh theih Jehova Thuhretute tihchhuah Bible ṭan chhan thu leh hla chhuah zawng zawng chu i nei kim vek lo mai thei a. Mahse, Kingdom Hall library-ah chuan tûn hnaia tihchhuah thu leh hla zawng zawng deuhthaw chu a awm a ni. Chu bâkah, Bible lehlin chi hrang hrang te, dictionary ṭha tak te, leh lehkhabu râwn tûr ṭangkai dangte pawh a awm mai thei bawk. Chûngte chu inkhâwm hma leh inkhâwm bân hnuah i hmang thei a. Computer dah a nih chuan, Watchtower Library pawh hman theihin a awm ngei bawk ang. Chutah chuan kan thu leh hla chhuah tam tak a awm a, a thu hriat duh emaw, thu mal hriat duh emaw, a nih loh leh Bible châng hriat duh emawte zawn hmuh zung zung theihin a awm a ni.

Nun leh Rawngbâwlna Inkhâwma tel zirlaite tân a ṭangkai. I chanvo atâna i inbuatsaih hunah Kingdom Hall library chu i hmang ṭangkai thei a. Nun leh Rawngbâwlna Inkhâwm overseer chuan library a enkawl a ni. Ani chu thu leh hla chhuah tharte a awm kim vek tih leh ṭha taka rem a ni tih chungchânga mawhphurtu a ni a. Amah emaw, Bible zirpuitu che emaw chuan i thu hriat duhte i hmuh theih dân an hrilh thei ang che. Mahse, lehkhabute chu Kingdom Hall aṭanga lâk chhuah âwih a ni lo. Ṭha taka enkawl a, engmah ziah rân loh tûr a ni.

Bible chuan “Pathian hriatna ... chhar chhuak” tûr chuan “ro phûm rûk anga” zawn kan inhuam a ngaih thu min hrilh a. (Thufingte 2:1-5) Kingdom Hall library chuan chu ro chu zawng ṭan tûrin a ṭanpui thei che a ni.

• Eng zir chîkna hmanruate nge Kingdom Hall library-ah awm?

• Tuin nge library hmang ṭangkai tûra ṭanpui thei che?