Chanchin Ṭha I Ring Tak Zet Em?
“Pathian ram . . . a lo hnai ta; sim ula chanchin ṭha hi ring rawh u.”—MARKA 1:15.
1, 2. Engtin nge Marka 1:14, 15 hi i hrilhfiah ang?
A HUN chu C.E. 33 a ni a. Isua Krista chuan Galili-ah a rawngbâwlna pawimawh tak a ṭan tawh a. “Pathian chanchin ṭha” a hril a, Galili mi tam tak chu a thusawi: “Hun chu a lo thleng ta a, Pathian ram pawh a lo hnai ta; sim ula chanchin ṭha hi ring rawh u,” tih avâng chuan an phûr êm êm a ni.—Marka 1:14, 15.
2 Isua’n a rawngbâwlna a ṭan hun tûr leh mipuiin Pathian pawm zâwng nihtîr tûr thutâwp an siam hun tûr, ‘hun ruat’ chu a lo thleng ta a. (Luka 12:54-56) Lal-Ruat Isua chu an zînga a awm tawh avângin, “Pathian ram pawh a lo hnai ta” a ni. A thuhrilhna chuan mi thinlung ṭhate chu inlamlêt tûrin a chêttîr a. A nih leh engtin nge ‘chanchin ṭha an rinzia’ chu an lantîr a, keini pawhin engtin nge kan lantîr ang?
3. Eng tihna hmangin nge mite’n chanchin ṭha an rinzia an lantîr?
3 Isua ang bawkin, tirhkoh Petera pawhin mite chu inlamlêt tûrin a ngên a. C.E. 33, Pentikost nîa Jerusalema Judate hnênah Petera chuan: “Sim ula, in sual ngaihdam nân Isua Krista hmingin baptisma chang ṭheuh rawh u; tichuan thlarau thianghlim pêk hi in hmu ang,” a ti a. Mi sâng tam tak chuan inlamlêtin baptisma an chang a, Isua hnungzuitu an lo ni ta a ni. (Tirhkohte 2:38, 41; 4:4) C.E 36-ah Jentail inlamlêtte pawhin chutiang bawk rahbi chu an rap ve a ni. (Tirhkohte 10:1-48) Kan hunah pawh hian, chanchin ṭha rinna chuan mi sâng tam takte chu an sual ata inlamlêt a, Pathian hnêna inpumpêk a, baptisma chang tûrin a chêttîr a ni. Anni chuan chhandamna chanchin ṭha chu an pawm a, Isua tlanna inthâwinaah rinna an lantîr bawk a ni. Chu bâkah, felna an zâwm a, Pathian Lalram lamah ṭanhmun an kuar tawh bawk a ni.
4. Rinna chu eng nge ni?
4 A nih leh rinna chu eng nge ni? Tirhkoh Paula chuan: “Rinna hi thil beiseite awm ngeia hriatna, thil hmuh theih lohte hriatfiahna a ni,” tiin a ziak a. (Hebrai 11:1) Kan rinna chuan Bible-a Pathian thil min tiam zawng zawngte hi thleng famkim der tawh ang hiala rinna min neihtîr a ni. Ram khawi emaw lai kan nei ngei a ni tih fiahna, pass nei ang hi kan ni. Rinna chu thil hmuh theih lohte “hriatfiahna,” a nih loh leh kan rinzia târ lanna a ni bawk. Chûng thilte chu hmu thei lo mah ila, rilrua kan hriatna leh thinlunga lâwmna chuan a tak a nihzia rin tlatna min pe a ni.—2 Korinth 5:7; Ephesi 1:18.
Rinna Kan Mamawh!
5. Engvângin nge rinna chu a pawimawh êm êm?
5 Thlarau lam mamawh neisaa piang kan ni a, rinna neisaa piang erawh kan ni lo. Dik tak chuan, “mi zawng zawng chuan rinna an nei vek . . . lo” a ni. (2 Thessalonika 3:1, 2) Nimahsela, Kristiante chuan Pathian thutiamte an dawn theihna tûrin, rinna an nei ngei tûr a ni. (Hebrai 6:12) Rinna lama entawn tlâk mi tam tak a târ lan hnuah, Paula chuan: “Chutichuan chhûmpui nasa tak ang thlîrtuten min hual vêl avâng hian, min tihnawk apiang leh sual keimahnia bet tlat chu i dah ve ang u, tin, Isua, kan rinna siamtu leh tifamkimtu lam chu enin, kan hmaa intlânsiakna tûr awmah hian chhel takin i tlân zêl ang u,” tiin a ziak a ni. (Hebrai 12:1, 2) “Sual keimahnia bet tlat” chu eng nge ni? Chu chu rinna tlâkchhamna, tûn hmaa rinna neih hloh pumhlûmna a ni. Rinna chak tak nei reng tûr chuan, ‘Isua chu kan en tlat’ tûr a ni a, a entawn tûr siam chu kan zui tûr a ni. Tin, nungchang khawlohna kan hnâwl tûr a ni a, tisa thiltihte kan do tûr a ni bawk a; tin, hausak âtchilhna te, khawvêl lam finna te, leh Bible kalh hnam dân te kan pumpelh tûr a ni. (Galatia 5:19-21; Kolossa 2:8; 1 Timothea 6:9, 10; Juda 3, 4) Chu bâkah, Pathian chu kan hnênah a awm tih leh a Thua a zilhna thute chu a ṭangkai tak zet tih kan ring tlat tûr a ni.
6, 7. Engvângin nge rinna dîla ṭawngṭai chu a inâwm?
6 Kan duh thu mai chuan rinna chu kan insiam thei lo. Rinna chu Pathian thlarau thianghlim, a nih loh leh Pathian chakna chevêl reng rah pakhat a ni. (Galatia 5:22, 23) A nih leh kan rinna chu tihchak ngai se, engtin nge ni ang? Isua chuan heti hian a sawi: “Nangni . . . mahin in fate thil ṭha pêk nachâng in hriat chuan, in Pa vâna mi chuan a dîltute chu thlarau thianghlim a va pe dâwn êm!” tiin. (Luka 11:13) Ni e, thlarau thianghlim dîlin i ṭawngṭai ang u; chu chuan dinhmun khirh ber hnuai pawha Pathian duhzâwng tih nâna mamawh rinna chu min pe thei si a.—Ephesi 3:20.
7 Rinna neih belh tûra ṭawngṭaia dîl chu a âwm a ni. Isua’n naupang kawchhûnga ramhuai a hnawhchhuah dâwn khân, a pa chuan: “Ka ring e, ka rinhlelhnaah hian mi pui ang che,” tiin a ngên a. (Marka 9:24) Isua zirtîrte pawhin, “Kan rin tiphui deuh vang che,” an ti bawk. (Luka 17:5) Chuvângin, Pathianin chutiang ṭawngṭaina chu a chhâng tih ring tlat chungin, rinna dîlin i ṭawngṭai ang u.—1 Johana 5:14.
Pathian Thua Rinna Neih A Pawimawh
8. Engtin nge Pathian Thu rinna neih hian min ṭanpui theih?
8 Inthâwi nâna a thih hma lawk khân, Isua chuan a hnungzuitute hnênah: “In thinlung mangang suh se; Pathian in ring e, kei pawh mi ring ve rawh u,” tiin a hrilh a. (Johana 14:1) Kristian kan nih angin, Pathian leh a Fapaah rinna kan nei a ni. A nih leh Pathian Thu chungchâng hi eng nge ni ve? Pathian thu chuan zilhna leh kaihhruaina ṭha ber min pe tih ring tlat chunga kan zir a, kan nunpui bawk chuan, Pathian Thu chuan kan nunah hian nghawng ṭha a nei thei a ni.—Hebrai 4:12.
9, 10. Jakoba 1:5-8-a rinna chungchâng sawi hi, engtin nge i hrilhfiah ang?
9 Ṭha famkim lo kan hringnun hi buaina hlîrin a khat a. Mahse, Pathian Thu rinna chuan min ṭanpui thei tak zet a ni. (Joba 14:1) Entîr nân, fiahna engemaw chu hmachhawn dân lo hre lo ta ila. Pathian Thu chuan he zilhna thu hi min pe a ni: “In zînga tupawhin finna a tlâkchham chuan mi zawng zawng hnêna hau lo leh ui lova pe ṭhîntu Pathian chu dîl rawh se, chutichuan a hnênah pêk a ni ang. Nimahsela ringhlel hauh lovin rinna neiin dîl rawh se, ringhleltu chu tuifinriat fâwn thli chhêm len leh vawrh ang a ni si a. Chutiang mi, rilru bulbâl nei lo, a thil tih zawng zawnga nghet lo mi chuan Lalpa hnênah engmah hmuh inring suh se,” tih hi.—Jakoba 1:5-8.
10 Pathian Jehova chuan finna kan tlâkchham a, kan dîl avângin min hau dâwn lo va. Fiahna chu thlîr thiam tûrin min ṭanpui zâwk ang. Bible châng ṭangkai takte chu kan rinpuite aṭangin emaw, Bible kan zir hunah emaw kan hre chhuak thei a ni. A nih loh leh kawng dangin Jehova thlarau thianghlim chuan min kaihruai pawh a ni thei. Kan Pa vâna mi chuan ‘ringhlel hauh lo leh rinna nei chunga kan dîl’ phawt chuan fiahna hmachhawn thei tûrin finna min pe dâwn a ni. Tuipui fâwn thli lênvêl ang mai kan nih chuan, Pathian hnên aṭangin engmah hmuh kan inbeisei thei lo. Engvâng nge? A chhan chu, chutianga kan awm chuan rilru bulbâl nei lo leh ṭawngṭaina kawng emaw, kawng dang emawah—a ni, Pathian kan rinna kawngah pawh—kan nghet lo tihna a ni dâwn si a. Chuvângin, Pathian Thuah leh a kaihhruaina pêkahte chuan rinna nghet tak kan neih a ngai a ni. Tûnah chuan Pathian Thuin ṭanpuina leh kaihhruaina a pêk dân entîrna kawng ṭhenkhat i lo en ang u.
Rinna leh Mamawh Châkkhai
11. Pathian Thua rinna neihna chuan kan nî tin mamawh châkkhai chungchângah eng thutiam nge min pêk?
11 A nih leh, tûnah hian mamawh châkkhai nei lo emaw, rethei tak emaw ni ta ila? Pathian Thua rinna chuan Jehova’n kan nî tin mamawh min phuhrûk ang tih leh nakinah chuan amah hmangaihtute tân ei tûr tam tak a siam ang tih beiseina nghet tak min pe a ni. (Sâm 72:16; Luka 11:2, 3) Ṭâm tlâk chhûnga Jehova’n Elija a châwm dân ngaihtuahna chuan min hnêm hle thei ang. Chu mi hnuah, Pathianin hmeithai pakhat, a fapa, leh Elija te chhangphut leh sahriakin mak tak maiin a châwm leh a ni. (1 Lalte 17:2-16) Chutiang bawkin, Jehova chuan zâwlnei Jeremia chu Babulon hovin Jerusalem an hual chhûng zawngin a châwm bawk. (Jeremia 37:21) Jeremia leh Elija te chuan hnianghnâr taka ei tûr nei lo mah se, Jehova’n anmahni a enkawl a ni. Tûn laia amah ringtute chungah pawh chutiang bawk chu a ti a ni.—Matthaia 6:11, 25-34.
12. Engtin nge rinna chuan nî tin ei tûr nei tûrin a ṭanpui?
12 Rinna leh Bible thu bulte nunpuina ṭangkawp chuan tisa lama hausakna min pe lo vang; mahse, nî tina kan mamawh tâwk erawh nei tûrin min ṭanpui ang. Entîr nân: Bible chuan mi rinawm tak, rin tlâk, leh hna thawkrim mi ni tûrin min fuih a. (Thufingte 22:29; Thuhriltu 5:18, 19; 2 Korinth 8:21) Hnathawktu hming ṭha nih hlutna chu i ngainêp ngai lo vang u. Hna ṭha hmuh a har êm êmna hmunahte pawh, mi rinawm tak, themthiam tak, leh taima takte chuan mi dangte aiin chan ṭha an chang tlângpui ṭhîn. Hnathawktu chutiang mite chuan hausa lêm lo mah se, an nî tin mamawh bulpui an nei tlângpui ṭhîn a, mahni thawh chhuah ei avânga lungawina an nei bawk ṭhîn.—2 Thessalonika 3:12.
Rinna Chuan Lusûnna Tuar Chhuak Tûrin Min Ṭanpui
13, 14. Engtin nge rinna chuan lusûnna tuar chhuak tûra min ṭanpui?
13 Pathian Thu chuan hmangaihte an thih huna lungngaih chu thil nihphung pângngai a nihzia a târ lang chiang hle a. Thlahtu rinawm Abrahama chuan a nupui hmangaih tak mai, Sari chu a sûn êm êm a ni. (Genesis 23:2) Davida pawhin a fapa Absaloma thi chu nasa takin a sûn bawk. (2 Samuela 18:33) Tin, mi ṭha famkim Isua meuh pawh a ṭhian Lazara a thih khân a ṭap a ni. (Johana 11:35, 36) Hmangaih takte an thih hunah chuan, nasa takin kan sûn ngei ang; mahse, Pathian Thua thutiamte rinna chuan chutiang lusûnna chu tuar chhuak thei tûrin min ṭanpui thei a ni.
14 Paula chuan: “Mi felte leh fel lote thawhlehna a awm ang tih Pathian lamah ka beisei a,” a ti. (Tirhkohte 24:15) Mi sâng tam takte lo thawhleh nâna Pathian ruahmanna siam chu kan rin a ngai a ni. (Johana 5:28, 29) Chûng mite zîngah chuan Abrahama leh Sari te, Isaaka leh Rebeki te, Jakoba leh Leaii te—tûna thihnaa muhîl mêk, Pathian khawvêl thara thawhlehna nghâktu zawng zawngte—pawh an tel dâwn a ni. (Genesis 49:29-32) Hmangaih thi tawhte thihnaa an muthilhna ata he leia nung tûra an lo thawh leh hunah chuan kan va hlim dâwn êm! (Thu Puan 20:11-15) Chu mi lo thlen hma chuan, rinna chuan kan lusûnna zawng zawng a tikiang dâwn lo va; mahse, lusûnna tuar chhuak tûra min ṭanpuitu, Pathian chu min hnaihtîr dâwn a ni.—Sâm 121:1-3; 2 Korinth 1:3.
Rinna Chuan Lungngaite A Tichak
15, 16. (a) Engvângin nge rinna lantîrtute tân lungngaihna chu thil awm ngai lo a ni lo kan tih theih? (b) Lungngaihna tuar chhuak thei tûrin eng nge tih theih awm?
15 Pathian Thu chuan rinna lantîrtute pawhin lungngaihna an tuar dâwn tih a târ lang a. Fiahna nasa tak a tawh chhûngin, Joba chuan Pathianin a kalsan ta niah a ngai hial a ni. (Joba 29:2-5) Jerusalem leh a kulh bang chhiate chuan Nehemia chu a tilungngai hle bawk. (Nehemia 2:1-3) Isua a phatsan hnua a lungchhiat êm avângin, Petera chu “a ṭap . . . zawih zawih a.” (Luka 22:62) Tin, Paula pawhin Thessalonika kohhrana a rinpuite chu “rilru tête [“lungngaite,” NW] fuih” tûrin a ngên a ni. (1 Thessalonika 5:14) Chuvângin, tûn laia rinna lantîrtute lungngaihna tawn chu thil awm ngai lo a ni lo. A nih leh lungngaihna tuar chhuak thei tûrin eng nge kan tih theih?
16 Buaina khirhkhân tam tak kan tawh avângin kan lungngai a ni thei a. Chûngte chu buaina lian tak pakhat anga ngaih aiin, Bible thu bulte nunpuina hmangin a mal malin kan tikiang thei a ni. Chu chuan kan lungngaihna chu a tiziaawm mai thei. Inbûk tâwk taka hnathawh leh mamawh tâwka chawlh hun neih pawh a ṭangkai thei bawk. Thil pakhat chiang êm êm mai a awm a: Pathian leh a Thu rinna chuan thlarau lama hausakna a awmtîr a ni; ani’n min ngaihsak tak zet tih kan rin tlatna a tihngheh avângin.
17. Engtin nge Jehova’n min ngaihsak tih kan hriat theih?
17 Petera chuan he thutiam thlamuanawm tak hi min pe a ni: “A hun têah chuan a chawimawi theihna tûr che uin Pathian kut chak tak hnuaiah chuan intihnuai ula, anin a ngaihsak ṭhin che u avângin in manganna zawng zawng ama chungah nghat vek rawh u,” tiin. (1 Petera 5:6, 7) Fakna hla phuahtu pawh: “LALPA chuan tlute zawng zawng chu a chelh reng ṭhîn a, kun ngawih ngawiha awm zawng zawngte chu a kaitho ṭhîn,” tiin a zai bawk. (Sâm 145:14) Chûng thutiamte chu Pathian Thua awm a nih avângin kan ring tûr a ni. Lungngaihna chu awm zui zêl mah se, kan lungngaihna zawng zawng chu kan Pa vâna mi chungah kan nghat vek thei a ni tih hriat chuan rinna a va tichak tak êm!
Rinna leh Fiahna Dangte
18, 19. Engtin nge rinna chuan natna tuar thei tûr leh kan rinpui damlote thlamuan thei tûrin min ṭanpui?
18 Keimahniin emaw, kan hmangaih takte’n emaw natna khirh tak an tuar hian kan rinna fiahna nasa tak kan tawng thei a ni. Bible chuan Epaphodita te, Timothea te, leh Trophima te ang Kristiante chu thilmak tih hmanga tihdam an nih thu engmah sawi lang lo mah se, tuar chhuak thei tûrin Jehova’n a ṭanpui hlawm tih chu rinhlelh rual a ni lo. (Philippi 2:25-30; 1 Timothea 5:23; 2 Timothea 4:20) Chu bâkah, “retheite ngaihtuah mi” chungchâng chu, fakna hla phuahtu chuan heti hian hlain a sa a ni: “LALPAN a chauhna mut hmunah chuan a tichak ang a: nangin a dam loh laiin a mutna i siamsak vek ṭhîn,” tiin. (Sâm 41:1-3) Engtin nge fakna hla phuahtu hla thute chuan, kan rinpui damlote thlamuan tûra min ṭanpui theih?
19 Thlarau lam ṭanpuina kan pêk theih dân kawng khat chu, damlote tân leh anmahni nêna ṭawngṭai hi a ni. Tûn laiah tihdamna dîl lo mah ila, an natna tuar thei tûra anmahni thuam tûr leh an chak loh chhûnga an tuar chhuah theih nâna an mamawh thlarau lam chakna pe tûrin Jehova hnênah kan ṭawngṭaisak thei a ni. Jehova chuan anni chu a enkawl ang a; tin, ‘chu mi khuaa awmte chuan “Ka dam lo ve,” an tih tawh loh’ hun an thlîrna chuan an rinna chu a tichak ang. (Isaia 33:24) Kaihthawhleh Isua Krista leh Pathian Lalram hmangin thuâwih mihring zawng zawngte’n sualna te, natna te, leh thihna te ata chatuana zalênna an dawng dâwn tih hriat chu a va thlamuanthlâk êm! Hêng beiseina ropui takte avâng hian, ‘kan natna zawng zawng tidamtu tûr,’ Jehova hnênah lâwmthu kan hrilh a ni.—Sâm 103:1-3; Thu Puan 21:1-5.
20. Engvângin nge rinna chuan tar avânga lo awm “ni ṭha lote” tuar chhuak thei tûrin min ṭanpui kan tih theih?
20 Rinna chuan hrisêlna leh chakna a tlâk hniam hun, tar avânga lo awm “ni ṭha lote” tuar chhuak thei tûrin min ṭanpui bawk a. (Thuhriltu 12:1-7) Chuvângin, kan zînga tarte chu: “Aw Lalpa PATHIAN, nang chu ka beiseia chu i ni . . . Ka tar hunin mi paihthla suh la; ka tha a ṭhum hunin mi kalsan suh ang che,” tia fakna hla phuahtu upa tawh tak ang hian an ṭawngṭai ve thei a ni. (Sâm 71:5, 9) Fakna hla phuahtu chuan, Jehova chhawmdâwlna a mamawh tih a inhria a; chutiang bawkin, kan Kristianpui Pathian rawngbâwlnaa inhmang tar tam takte pawhin an inhre bawk. Anni chuan an rinna avângin, Jehova chatuan bân ṭanpuina an nei reng tih an ring tlat thei a ni.—Deuteronomy 33:27.
Pathian Thu-ah Rinna Nei Reng Rawh
21, 22. Rinna kan neih chuan, chu chuan Pathian nêna kan inlaichînna chu engtin nge a nghawng?
21 Chanchin ṭha leh Pathian Thu zawng zawng rinna chuan Jehova hnaih lehzual tûrin min ṭanpui a. (Jakoba 4:8) Ni e, ani chu kan Lal Chungnung ber a ni a, kan Pa leh min Siamtu pawh a ni. (Isaia 64:8; Matthaia 6:9; Tirhkohte 4:24) “Nang chu ka pa, ka Pathian, ka inchhandamna lungpui i ni” tiin fakna hla phuahtu chu a zai a ni. (Sâm 89:26) Jehova leh a thâwk khum Thu kan rin chuan, keini pawhin amah chu kan “inchhandamna lungpui” angin kan ngai ve thei a ni. Chanvo ropui a va ni êm!
22 Jehova chu thlarauva hrin Kristiante leh an ṭhian, lei lam beiseina neite tân Pa a ni a. (Rom 8:15) Tin, kan Pa vâna mi rinna chuan min tibeidawng ngai lo. Davida chuan: “Ka nu leh ka pa chuan mi kalsan ta si a, nimahsela LALPA chuan mi la pawm ang,” a ti. (Sâm 27:10) Chu bâkah, he thutiam hi kan nei bawk: “A hming ropui tak avâng hian LALPA chuan a mite chu a hawisan dâwn si lo va,” tih hi.—1 Samuela 12:22.
23. Jehova nêna inlaichînna tluantling nei tûrin eng nge kan tih ngai?
23 Dik takin, Jehova nêna inlaichînna tluantling nei tûr chuan, chanchin ṭhaah rinna kan nei tûr a ni a; tin, Pathian Lehkha Thute nihna dik tak—Pathian Thu—ang ngeiin kan pawm tûr a ni. (1 Thessalonika 2:13) Jehova chungah rinna pumhlûm kan nei tûr a ni a, a Thu chu kan kawng kan tihêntîr tûr a ni. (Sâm 119:105; Thufingte 3:5, 6) A khawngaihna te, a zahngaihna te, leh a ṭanpuina te ring tlat chunga a hnêna kan ṭawngṭai chuan, kan rinna lo pung ang.
24. Rom 14:8-ah eng thu thlamuanthlâk tak nge chuang?
24 Rinna chuan Pathian hnêna chatuan atâna inpumpêk tûrin min chêttîr a. Rinna chak tak kan neih chuan, thi mah ila, thawhleh beiseina nei a chhiahhlawh inpumpêkte kan ni ang. A ni, “kan nun pawhin, kan thih pawhin, Lalpa ta kan ni.” (Rom 14:8) Pathian Thua kan rinna kan nghah zêl leh chanchin ṭhaa rinna kan neih zêl rualin, chu thlamuanna thu chu i vawng reng ang u. (w03 1/15)
Engtin Nge I Chhân Ang?
• Rinna chu eng nge ni a, engvângin nge chu chu kan mamawh?
• Engvângin nge chanchin ṭhaah leh Pathian Thu zawng zawngah rinna kan neih a pawimawh?
• Engtin nge rinna chuan fiahna chi hrang hrangte tuar thei tûrin min ṭanpui?
• Rinna nei reng tûrin engin nge min ṭanpui ang?
[Phêk 22-naa milemte]
Jehova chuan Jeremia leh Elija chu rinna an neih avângin a châwm
[Phêk 23-naa milemte]
Joba te, Petera te, leh Nehemia te chuan rinna chak tak an nei
[Phêk 25-naa milemte]
Jehova nêna inlaichînna tluantling nei tûr chuan, chanchin ṭhaah rinna kan nei tûr a ni