Marzo

Je xtindsʼe̱ Jefté jtike koan kʼoa koanchi̱ni̱ke. Tsakʼaonsje kjoanʼio ya ʼnde xi je Jefté bʼakaole tsakai (Juec. 11:1-3). Tonga je Jefté tsakasenkao je chjotajchíngale naxinandá Israel kʼianga kisijéle nganʼio kʼoa kao kjoatsjoa tsakasenkao (Juec. 11:4-11). ʼNdele nga to yaole sikjaʼaitsjen tosa kui ngisa kitsjoale kjoandosin nga kisitoánntjai je jaʼaínle Jeobá kao naxinandále. Ñaki kʼoatsakʼé kon nga kixi koaitʼale je Jeobá. Kʼoa nga kʼoakisʼin, je Niná kisichikontʼain, je kʼoa kao naxinandále (Heb. 11:32, 33). Jósʼin chjénngilee choa̱le je Jefté. Si̱kjaʼaitsjenla jebi: Jósʼiaan kʼiatsa jngo ndsʼee josikaoná xi tsín nda kʼoee tokoán kʼoa tsa kʼoasʼin nikjaʼaitsjeen nga tsín kixi jmeni xi síkaoná. Tjínnele kʼoasʼiaan jokisʼin je Jefté kʼoa si̱chjén je kjoafaʼaitsjen xi faʼaitʼa Biblia nga jchaa jmeni xi sʼiaan. Ninga sakʼoa aon sʼe tokoán tosi tonda si̱xálee je Jeobá. Kʼoati likui si̱chaa je kjoajtín xi satíoná kʼoa likui si̱kjinlee je ndsʼee. Si̱tjosoán jmeni xi tsoná je Jeobá. Kui xi koasenkaoná nga chókjoajinná tsa jme kjoa xi ñʼai tjín kuitjátojiaan kʼoa nga nda choa̱ kʼoéjnalee xi kjaʼaí (Rom. 12:20, 21; Col. 3:13). w16.04 1:7, 9, 10

Nʼio machjén nga ska̱ná saʼnda nga kjoaʼaí je kjoafetʼa. Si̱kjaʼaitsjenla tsa jngo chitso tíkasʼenngindá. Tsa mele kuitjontjaile yaole je chjota xi tjíoya, ninga kuijtale tjínnele koaijin nandá saʼnda nga kuicho ya ndainandá. Tikʼoasʼinni tsanda ñá, tsa mená kuiyoaa ya ʼNdenaxó, tjínnele ska̱ná je kjoa xi kuitjátojiaan saʼnda nga kjoaʼaí kjoafetʼa. Kʼoati sʼiaan jokisʼin je pastro Pablo, nga tsínkʼia kisikinroajen kon (2 Cor. 4:16). Joni je Pablo, alikui jao tjínná nga je Jeobá koasenkaoná nga ska̱ná saʼnda nga kjoaʼaí kjoafetʼa. Je Pablo i kitso: “Ngayije je kjoa jebi ngisa nʼio kʼoasʼiansaa kaoni tsa je xi síkinje, xi totʼatsʼe je xi koantsjoakená. Tokui jebi ñaki tjíjngole koan, nga nikjoabiyajin, nikjoabijnachonjin, niʼánkjejin, ni xi ngʼajko̱lejin, nijejin xi tjínle nganʼio, ni xi ndʼaibijin, nije xi sʼa nroajin, ni xi ngʼajin, ni xi nangijin, nitojngojinsa xi xá kisʼendani xi koa̱n kjoaʼaxinná je kjoatjaochale Niná nga tiyokoaa Cristo Jesús Nainá” (Rom. 8:37-39). w16.04 2:17, 18

Si̱jélee je Jeobá nga katatsjoáná kjoachjine ánni nga jchasíñá tsa jmeni xi ñʼai kʼoeená nga tsín kjoasi nojiaan yaoná. Kʼoa si̱jélee nga katabasenkaoná nga kui kʼoasʼiaan xi kixi tíjna. Tsakui nichxin ndoyá si̱kasénná kʼoa tsa kjaʼaísa kjoañʼai kʼoainá nga kixi timangíntʼalee Niná. Tsa kʼoakoa̱ntʼeen si̱jélee je Jeobá nga katatsjoáná kjoanʼiojin josʼin kʼuínyaa anni nga tsín kjoasi nojinñá yaoná. ʼYañá nga je Jeobá koasenkaoná nga ska̱ná kʼoa xi kʼoati koasenkaoná kui je kjoabʼetsʼoa (Hech. 4:27-31). Je Jeobá kui xá kitsjoaniná je Biblia nga tsjoánganʼioná. Tjín testole Biblia xi koasenkaoná nga tsín kjoasi kuinójiaan yaoná. Tjínnele kʼoéyaa kjoafaʼaitsjenná testo jebi nga̱ koa̱nchjénná tsa tsín Biblia kichʼá. Je Biblia kʼoati basenkaoná nga ngisa makjainná jmeni xi tso Niná tʼatsʼe nichxin xi nroaján. Kjoachoya jebi kui xi koasenkaoná nga ska̱ná kʼianga ʼya xi koaitjenngikená (Rom. 8:25). Chjoéjiaan je testo xi kui nchja̱ni jokoa̱nchon ya ʼndenaxó kʼoa si̱kjaʼaitsjeen jmeni xi mená sʼiaan nga jeya tiyoaa. w16.04 4:14, 15

Je xi nyatítjonle relijión xi chjotale Cristo tsole yaole alikui kui énnda chjotse xi tʼatsʼe Chjotaxále Niná tsoyason. Kʼoa tsakui kuinchja̱ni kʼoatso nga ya tíjnajin ni̱ma̱ná (Luc. 17:21). Alikui kui tsoya nga ya ngʼajmi tíjna je Chjotaxále Niná kʼoa nikuijinla tsoya nga je Jesús xi Rey sʼin tíjna. Tokʼiaa nchja̱ni tʼatsʼe Jesús kʼianga Navidad kʼoa tsa kʼianga Nichxin Xkón. Tsínkui tsoya nga je Chjotaxále Niná kʼoendajin je kjoa xi tjínle ngatsʼi chjota kʼoa nga jeme kjoaʼaxin je kjoatsʼen (Apoc. 19:11-21). Likui be jmeni xi sʼin je Jesús kʼianga Rey sʼin tíjnale je Chjotaxále Niná. Kʼoati tsín be ánni nga tjínnenile kuitsoyason. Alikui tjínnele nga tao̱n kʼoéñaa, nga síxkónkjoan ndʼia kʼoéndaa kʼoa nga negosio si̱koaa je Énle Niná (2 Cor. 2:17). Je xi tsoyason tʼatsʼe Chjotaxále Niná alikui machjíle (Hech. 20:33-35). w16.05 2:7, 8

Tobʼelañá, tsa nʼio tsjoachaa jokji jngo najño. Tonga tsa ʼyaa nga tsín sa̱sén kʼale je ndsʼee tsakui chʼa̱kjá, kʼoa tsa tsín jotso Biblia tʼatsʼe najño xi kʼoakjoan, jósʼin jchañá josʼin síkjaʼaitsjen je Jeobá. Je Biblia itso: “Je xi yánchjín katabʼakjá najño xi nda xi bakinle. Katasʼe i̱tséle kjoasoatakon nga nda katafikao yaole. Ali toséxkónjin bʼénʼio ntsja̱jko̱. Ali tao̱nsinejin, ali tofangichjíjin, ali chʼótjichjíjin síchjén. Tosa josʼin bakinle yánchjín xi tso nga bexkón Niná” (1 Tim. 2:9, 10). Kjoafaʼaitsjen jebi kʼoati bakinle xi xʼin. Machjén nga kuenta sʼiaan josʼin síkjaʼaitsjen je ndsʼee tʼatsʼe jokjoan najño xi chʼakjá kʼoa josoyoaa. Kʼoa nga tsjoachaa je ndsʼee, bʼenelee yaoná nga tsínkui kʼoanʼia xi chʼao kʼoee kon (1 Cor. 10:23; Filip. 3:17). w16.05 3:14

Kʼianga tsín tikisitjosonnile Jeobá je Adán, alikui tiʼndíle Niná koanni. Tonga nʼio nkjín chjota xi ya kinroani Adán xi koanmele nga je Jeobá koatexomale (Heb. 12:1). Nangitokon koan kʼoa kisitjosonle je Jeobá. Tsakʼasjengi je Na̱i kʼoa tsakakó nga koanmele nga je Jeobá xi Nʼaile koa̱n kʼoa nga je sikixiya (Juan 8:44). Nga kixi kitʼale je Niná kui síkjaʼaitsjenjinná jotso je testo xi kamaxkia ndʼaibi. Nichxin xi tiyoaa ndʼaibi, ñá xi choʼndale Niná maa, tibʼenelee yaoná nga kʼoati tinʼia jokisʼin je chjota israelita xi kʼoakoannile je jéele kʼoa kao kjoanangitokon tinitjosonlee je Jeobá. Nʼio tse kjoanda tjínná nga Nʼainá mani je Jeobá. Kʼoati mená nga je sindayaná. Kuinga chjónangisínilee yaoná jebi: “A tsjoaʼndeña nga sindayana je Jeobá nga ya koa̱nngósoan jngo tii xi nʼio chjíle. A kʼoasʼin sikjaʼaitsjen xi tʼatsʼe ndsʼe nga tojo sʼa tísíndaya je Jeobá”. w16.06 1:2, 3

Ndʼaibi jenʼio chrian tiyolee je sonʼnde chjotse kʼoa kʼoati tíchotʼayakao je kjoamakjainná. Nʼio machjén nga taja katasʼejna kjoamakjainná. Si̱kjaʼaitsjeen jmeni xi kitso je Jesús ya Mateo 6:33 kʼoa chjónangilee yaoná jebi. “Jmeni xi mena kuichotjenngia kʼoa jme xi sʼian, a bakó nga makjainna jmeni xi kitso je Jesús. A sichaña je kjoajtínná kʼoa a tsín tikjuíxinyasonña tojoni nga nʼio tse tao̱n kuinje̱na. Jméni xi sʼian tsa nʼio tse nganʼio kʼoa nʼio tse nichxin faʼáxinna je xána. A tsjoaʼndeña nga kʼoati sʼian josʼín chjota xi tjín sonʼnde kʼoa tsa saʼnda tsín tikʼoakoa̱nnina nga je Jeobá sixále”. A nitjosonñá ngantsjai jmeni xi tso je Biblia tʼatsʼe nga tsín je si̱miyoaa chjota xi tsín nda sʼín, jotso tʼatsʼe xi bichonsjejin naxinandále Niná kʼoa tʼatsʼe kjoasʼetsaojin. Tsa tsín kʼoanʼia kui xosikaoná nga koa̱ntaja ni̱ma̱ná. Kjitʼa si̱kjaʼaitsjenjiaan jñani nda tinʼia kʼoa jñani chʼao tinʼia kʼoa kui Biblia si̱chjén nga si̱ndayaa yaoná. w16.06 2:8, 9

Nichxin xi tiyoaa ndʼaibi jngo jtín mani chjota xi tsjoake je Niná kʼoa mele nga sixále. Testigole Jeobá ʼmi. Ninga sakʼoa saténgi chjota jebi, je Jeobá kao nganʼiotsjele bándiaanile kʼoa síchikontʼain. Kʼianga nó 1914 tochoa mani je chjota xi je Jeobá bexkón. Tonga nga je Jeobá tísíchikontʼain chjota jebi nga tjíotsoyason, jemiyón mani chjota xi tjíobe jotso je Biblia kʼoa testigole Jeobá kjima. Je Jeobá i kitso tʼatsʼe naxinandále: “An Jeobá, ansoa sixátíyale nga kuichoka nichxin”. Én jebi jetíbitjoson nichxin xi tiyoaa ndʼaibi. Je naxinandále Jeobá nʼio je kji, tsʼato jin miyón mani chjotale. Tjín naxinandá xi saʼnda tsín jin miyón mani chjotale. w16.06 4:1, 2

Je Jesús be nga je Jeobá síkuinda je ʼndínise kʼoa nga kʼoati síkuinda je chjota (1 Ped. 5:6, 7). Tonga tojo sʼín je ʼndínise, nga je fikásjai jme xi kjine, ñá xi chjotaa tjínnele nga si̱xá. Tjínnele nga kʼoéntjé je tsojmi xi chi̱nee kʼoa tsa maije̱ si̱xá nga kuindá. Tsa kʼoasʼiaan, je Jeobá sichikontʼainná. Tsa tsínná tao̱n kʼoa tsa tsínná xi tichinee, je Jeobá tsjoáná jme xi machjénná. Tobʼelañá, tsakui nichxin tjín xi tsjoáná jme xi machjénná. Xi ijngosani, je Jeobá kʼoati tsjoále je ʼndínise jñani batio. Kʼoasʼin kisinda nga male bʼénda je tjéle. Kʼoati je Jeobá kisinda jme xi síchjén je ʼndínise nga bʼénda tjéle. Tikʼoasʼinni tsanda ñá, je Jeobá koasenkaoná nga so̱koná jngo ʼnde jñani koa̱n kuiyoaa kao familianá. Tojo tso testo xi kamaxkia ndʼaibi, je Jesús kʼoakitsole chjotale nga je Jeobá síkjen je ʼndínise (kʼoati me tso én xi koa̱nsjaili ya Lucas 12:6, 7). Kʼianga kʼoakitso je Jesús tsakui nichxin kui tísíkjaʼaitsjen nga tojeme tsjoá kjoabijnachonle xi totʼatsʼe chjotasonʼnde. Ñá kʼienntjainá nga koa̱n kuiyoaa ngantsjai nichxin (Mat. 20:28). Nga kʼoakisʼin Jesús, a tsíkui bakóná nga ngisa chjílee ñá tikʼoajinni ʼndínise. w16.07 1:11-13

Ánni nga bijnyijéeñá kʼoa biyañá. Je Biblia kʼoatso nga je “kjoabiya tsakatéxoma” nga tsakajngijée Adán. Nga ntje̱le maa, kui jée batéxomaná ngatsʼiaa kʼoa kuinga biyañá (Rom. 5:12, 14, 17). Ninga kʼoalani, koaan nga tsín kʼoaiʼndee nga kui jée koatexomaná. Jósʼiaan. Kʼiaa nga sʼe̱ná kjoamakjain nga kʼienntjainá je Cristo. Kʼoasʼin kʼoaiʼndee nga kjoandale Niná koandiaaná (Rom. 5:20, 21). Ninga chjotajée maa, alikui tjínnele nga kui jée koatexomaná. Kuinga nijénilee kjoanichatʼa je Jeobá kʼianga kui kʼoanʼia xi chʼaotjín. Jmé kjoanda xi sʼe̱ná tsa kʼoaiʼndee nga kjoandale Niná koatexomaná. Je Pablo kʼoakitso nga chja̱ʼaxinlee “yaoná ngayije kjoa xi tsín bexkón Niná, kʼoa jméni nga chjaʼaxinsínilee yaoná ngayije kjoachi̱nga̱le sonʼnde, kʼoa jméni nga nda kuiyosínía sonʼndebi ndʼaibi. Tíbakóyaná jméni nga nda kjuinkaosínía yaoná, jméni nga chjotakjoakixi koa̱nsínía” (Tito 2:11, 12). w16.07 3:5, 6

Kʼianga tsín tikisitjosonnile Jeobá je Adán kao Eva, likui tinda tsakationi. Je Na̱i, xi “ye̱ jchínga” ʼmile, tsakʼanachale je Eva kʼoa kʼoakitsole nga tse kjoankjíntokon sʼe̱le tsakui ski̱ne je tole “yá xi tsʼe kjoankjíntokon xi ndatjín kao xi chʼaotjín”. Kʼoakitsole je Eva nga koa̱n je kʼoakuitso jmeni xi ndatjín kʼoa jmeni xi chʼaotjín. Je Eva kʼoakisʼin jokitsole je Na̱i kʼoa alikui je Adán kiskonangile. Kʼianga kʼoakisʼin je Eva alikui tsakakóle kjoaxkóntokon je Adán, xi jko̱ sʼin tsakʼejnale. Kʼoa je Adán kʼoati kiskine je to xi kitsjoale Eva. Kʼianga kʼoakisʼin, tsín kisitjosonle je Niná (Apoc. 12:9; Gén. 2:9, 16, 17; 3:1-6). Kʼianga kiskonangile Jeobá je Adán kao Eva jmeni xi kisʼin, je Eva jé tsakánele je ye̱ nga je tsakʼanachale (Gén. 3:12, 13). Tojmee xi tsakʼangini yaole je Adán kao Eva. Alikui kisitjoson kʼoa xíjin koan. Kuinga kʼoakitsoni je Jeobá nga kjoañʼai tsjoále. Jméni xi bakóyaná je choa̱le Adán kao Eva. Kui tsoyaná tsa mele ndasʼin koatio xi jechixan, tjínnele sitjosonle je Jeobá kʼoa tsín tojme xi kʼoangini yaole jmeni xi sʼin. w16.08 1:1, 4, 5

Ánni nga nʼio tse kjoa tjínkʼasínile xi jechixan. Tjínkʼa xi tsínni tsjoa tjíokon nga̱ tsínni kʼoasʼin tjío josʼin kisikjaʼaitsjen. Kuinga kjoa sʼenile nga kjaʼaí kjaʼaísʼin koanjchínga kʼoa kjaʼaí kjoaʼaísʼín nga jngó jngó. Kʼoa sakʼoaa kjoa sʼele tʼatsʼe xínkjín, tʼatsʼe tao̱n kʼoa tsakuije̱ josʼin sijchá ʼndíxtile. Tonga me ngatsʼi je chjotale Cristo xi kjimale tjíobʼéndajin je kjoa xi tjíosʼele nga̱ tsjoáʼndee nga je Niná bándiaale. Kʼianga kjoa tjínle je chjotale Cristo tjínnele nga sijéle nganʼio je xi chjotajchínga sʼin tjío. Je ndsʼee jebi nʼio tse kjoafaʼaitsjen tjínle kʼoa koaan kuinyakao xi jechixan nga koaitjenngi je kjoafaʼaitsjen xi tsjoá Niná. Tsa je xi jechixan sijéle Jeobá je nganʼiotsjele, kui xi kuinyakao nga koaitjenngi kjoafaʼaitsjen xi tsjoá Biblia kʼoa nga kʼoakoa̱nkjoan josʼin mele Niná (Gál. 5:22, 23). w16.08 2:11-13

Ninga tsín ale je Jesús, kisikʼayale nichxin je chjota xi koanmele kinrʼoéle kʼoa nʼio nkjín koya xi kitsoyale. Tobʼelañá, ñandia kʼianga nʼio nkjín chjota kichonrʼoe ya ndainandá. Je Jesús jngo chitso kikin kao Pedro kʼoa yaa tjen tsakakóyanile je chjota. Xijekoan, kʼoati tsakakóyale je Pedro. Jngo kjoaxkón tsakʼéjna je Jesús kʼianga tsakasenkao je Pedro nga nʼio nkjín jti̱ tsakʼéxkó. Xijekoan, kʼoakitsole jotso je testo xi kamaxkia ndʼaibi. Je Biblia kʼoatso nga je Pedro kao xi kʼoati ya tjío kjitʼanangi “kisikatío ngayije, kitjenngile Jesús” kʼoa chjotale koan (Luc. 5:1-11). Jngo chjota xi Nicodemo tsakʼin kʼoati koanmele nga tsabesa xi tʼatsʼe Jesús. Tonga yaa tíjnajinle je chjota Sanedrín. Kʼoa kui kisikjaʼaitsjen jokuitso je chjota tsa skoe̱ nga je Jesús tífákao. Kuinga kʼia kikonnile nga njio. Je Jesús kisikʼayale nichxin je Nicodemo kʼoa tsakakóyale jmeni xi nʼio chjíle xi tʼatsʼe Niná (Juan 3:1, 2). Je Jesús kisikʼayantsjaile nichxin je chjota kʼianga kitsoyale xi tʼatsʼe Niná kʼoa nga kisitaja kjoamakjainle. Ñá kʼoati tjínnele kjuinchónlee chjota jme orani nga skénndiaale kʼoa si̱kʼayalee nichxin nga kuinyakoaa ánni koa̱njinsínile jme xi tso je Biblia. w16.08 4:10, 11

Nangitokon katamaa nga̱ ʼyañá nga nʼio tsje je Jeobá kʼoa nga nʼio basenkaoná je kjoafaʼaitsjen xi tsjoáná. Tsa tjínná kjoanangitokon tosi tonda si̱tjosoán kjoatéxomale kʼoa kui xi koasenkaoná nga koakolee kjoaxkóntokon je xi kjaʼaí. Je najño xi chʼakjá tjínnele koako nga testigole Jeobá maa. Je kjoatéxomale Jeobá nʼio ngʼa tíjna kʼoa kao kjoatsjoa nitjosoán. Bʼailee kjoanda je ndsʼee kao tichjaa nga nʼio nda fayo kʼoa nga nda fikao yaole. Kʼianga kʼoasʼín, bʼasjengʼa je Jeobá, báyatsjoa ni̱ma̱le kʼoa je chjota xi ndatjío ni̱ma̱le nrʼoé je Énle Niná. w16.09 3:18-20

Je Jacob ñaki kʼoatsakʼé kon nga kjoanʼio so̱kole je kjoanichikontʼainle Jeobá (Gén. 32:24-26). Kʼoa nga kʼoasʼin tsakʼénele yaole, je Jeobá kisichikontʼain. Kuinga Israel sʼin kitsjoajaʼaínnile, xi “Kao Niná Kiskan” sʼin tsoyanile. Kʼoa je Jeobá kisichikontʼain kʼoa ndasʼin tsabekon nga kʼoakisʼin. Kʼoati kui xi mená tsanda ñá. Je Raquel, xi chjoónle koanni je Jacob kʼoati nʼio koanmele nga skoe̱ jósʼin sitjoson je Jeobá jmeni xi kitsole je xʼinle. Tonga je Raquel likui kisʼele ʼndí, kʼoa nga kui nichxin nʼio tse kjoaʼaon tsakatiojin je yánchjín xi tsín kisʼele xti. Jméni xi kisʼin je Raquel. Tsínkʼia kisikʼajenle kon. Kjitʼaa tsakʼétsʼoale je Jeobá nga kisijéle nganʼio nga tsín kisikinroajen kon. Je Jeobá kinrʼoéle kʼoa nga jeki nichxin kui kjoanichikontʼain kitsjoale nga koan kisʼele xti (Gén. 30:8, 20-24). w16.09 2:6, 7

Kʼoati machjén nga kʼuínyalai je ʼndíxtili nga̱ nʼio tsjoa sa̱tío kon kʼiatsa sitjoson jmeni xi tso je Biblia (Sal. 1:1-3). Tobʼelañá, koaan kʼoakʼuínlai nga katasíkjaʼaitsjen tsa yalani koaikatio ʼnde xi tjíojin nandá kʼoa tsa je skoéjin ʼyani xi mele nga kʼoati ya koatio. Kʼoa i̱ tʼinlai: “ʼYá chjotani xi chjoéjion xi nda koatiokao xínkjín”. Xijekoa̱n, tʼexkialai Gálatas 5:19-23 ánni nga skoe̱ni jókjoan chjota xi mele Jeobá nga koatio ya sonʼnde chjotse. Tsa kʼoasʼiain, nʼio chjíle jmeni xi tiʼmiyalai je ʼndíxtili. Xi títjon, kui tiʼmiyalai nga je Jeobá kui títsoyaná josʼin nga tsjoa sa̱tío tokoan kʼoa nga nyʼán sʼin kuiyokoaa xíngiaa nichxin xi tiyoaa ndʼaibi. Kʼoa xi majaoni, tiʼmiyalai nga kui títsoyaná josʼin kuiyoaa ya sonʼnde chjotse (Is. 54:13; Juan 17:3). Kʼoati koa̱n kʼuínyalai jósʼin tjíobinyakao je ndsʼee jmeni xi tso je Biblia. Jebi yaa faʼaitʼa je xo̱n xi síkasénná naxinandále Niná, jolani je xi faʼaitʼa je Xo̱n xi Bájinkonná ya jñani “Je Biblia síkʼantjaiyaa chjota” tso. w16.09 5:13, 14

Ninga nʼio tse xá tjínná, machjén nga chʼa̱sjeʼaa nichxin nga chótʼayá toñá kʼoa nga chótʼayajtián kao familianá (Efes. 5:15). Kʼianga chótʼayá ali tsa tokuijin xi sʼiaan nga nʼio nkjín pájina kʼoéxkiaa tsa Biblia kʼoa tsa xo̱n xi kjioná kʼoa tsa tokui kʼoéndaa jme xi kuixoán ya jinjtín. Je xi mená kuinga katakajin ni̱ma̱ná je Énle Niná kʼoa nga katasítaja je kjoamakjainná. Kʼianga chótʼayá tjínnele si̱kjaʼaitsjeen jmeni xi machjénná ñá kʼoa tsín tokui si̱kjaʼaitsjeen jmeni xi machjénle xi ngikʼa (Filip. 1:9, 10). Ánni nga kʼoasʼianñá. Kuinga sakʼoa likui nikjaʼaitsjeen jósʼin koasenkaoná jme xi tichotʼayá kʼianga tibiyondalee jme xi kuixoán nga mangínkʼinyasoán, nga tibiyondalee kjoajtínná, kʼoa tsa kʼiaje̱ nga bʼendaa kjoanokjoaya xi bʼakaoná. Tobʼelañá, jngo chjota xi tsojmi bʼénda, ninga kotʼa jochine tsojmi xi bʼénda, alikui tokui koa̱nskini nga toskótʼa, tsa mele nga tsín so̱kochʼinle tjínnele nga kjitʼa kʼoendale yaole je tsojmi xi ski̱ne. Tikʼoasʼinni tsanda ñá. Tsa mená nga tosi tonda miyoná koa̱n je Jeobá, tjínnele nga kjitʼa chótʼayá Biblia ánni nga koasenkaoniná jñani machjénná. w16.10 2:10, 11

Ya Hebreos 11:1, jao koya tsoya xi tʼatsʼe kjoamakjain. Xi títjon, kʼoatso nga je kjoamakjain “kui xi nda nʼiotʼatakoán, nga kjoakixi nga tjío je kjoa xi choyalee”. Je xi choyalee kui jmeni xi tso je Niná nga sʼin nichxin xi nroaján. Tobʼelañá, tsín jao tjínná nga tjóxin ngayeje xi chʼaotjín kʼoa nga jngo sonʼnde chjotse kjoaʼaí. Kʼoa xi majaoni, je Biblia kʼoatso nga je kjoamakjain kui xi bakó nga ñaki tjío “kjoa xi tsín matsen”. Je xi tínchja̱ni kui jmeni xi tjío kjoaixi tonga xi tsín ʼyañá kao xkoaan. Tobʼelañá, Jeobá, Jesucristo, ánkje kao Chjotaxále Niná xi tíjna ngʼajmi. Jósʼin bakoá nga makjain kjoaixiná jmeni xi tso je Niná kʼoa nga kʼoati makjainná tʼatsʼe jmeni xi tsín ʼyañá kao xkoaan. Kao kui bakoñá josʼin mangínkoaa yaoná, jmeni xi bixoán kʼoa jmeni xi nʼia. w16.10 4:6

Chjenngilee Jeobá kao Jesús. Je ndsʼee nʼio bechjí nga bʼainganʼiolee, ninga tsín kʼoamaná nga kʼoakji bisenkoaa jokji mená tsakai (Luc. 21:1-4; 2 Cor. 8:12). Tobʼelañá, je ndsʼee xi jejchínga nʼio bʼénele yaole nga fi kjoajtín kʼoa nga tsoyason ngantsjai. A ninʼiojinñá kʼoa a kʼoaʼmilee nga nda tjíosʼín. Si̱nʼioá kon xíngiaa ngantsjai. Kʼianga jme xi nda sʼín je ndsʼee kʼoakʼuínlee nga ndatjín jmeni xi tísʼín. Kʼianga tsakatio je Pablo kao Bernabé ya Antioquía de Pisidia, je chjota xi nyatítjonle je yo̱ngo̱ i kitsole: “ʼNdíndsʼe, tsa tjínno jmebe én xi kʼoénelao [xi sinʼiojin] naxinandá, tinókjoao”. Nga kʼia, je Pablo kisinʼio kon je xi ya tjío (Hech. 13:13-16, 42-44). Tsa si̱nʼioá kon xíngiaa, kʼoajinti sʼin tsanda je, sinʼiojin tokoán (Luc. 6:38). w16.11 1:3, 15, 16

Nʼio tse kjoanda tjínná nga ya tiyojiaan jtínle Jeobá kʼoa nga ʼyaa jmeni xi mele nga sʼiaan. Nga ʼyaa jmeni xi sasénle je Jeobá, kui xá kjinená nga si̱tjosonlee kʼoa nga kui kʼoasʼiaan xi ndatjín. Nʼio nkjín chjota xi kui tsjoake xi chʼaotjín. Tonga ñá tjínnele jticha koaan je xi chʼaotjín josʼin jtike je Jeobá (Sal. 97:10). Alikui kʼoati sʼiaan josʼín je “chjota xi kʼoatso nga chʼaotjín je xi ndatjín kʼoa nga ndatjín je xi chʼaotjín” (Is. 5:20). Kui xi mená nga ndasʼin kuiyoaa kao Jeobá. Kuinga ñaki kʼoabʼeñá tokoán nga tsje sʼiaan, tsje kjuinkoaa yaoná kʼoa tsje sʼin jchaxkoán (1 Cor. 6:9-11). ʼYañá nga kjoanda tsaanñá jmeni xi tsoná je Jeobá. Tsjoachañá kʼoa mená nga kixi koanngíntʼalee. Kuinga nitjosonñá je kjoatéxomale ya niʼyaná, ya jinjtín, ya jñani nixá, ya ndʼiaskuela kʼoa tojñani tiyoaa. w16.11 3:13

Tjín jñani koanchjénsale nga kisindaya yaole je naxinandále Niná. Kjesa ñaki nda majinjinle josʼin tsoyanile nga kʼoatso je Jeobá nga tjínnele si̱tjosonlee je chjotaxá. Alikui ñaki tongóson kisʼin ngatsʼi, tjínkʼa xi kijin kjoajchán. Tobʼelañá, kʼianga 30 sá mayo nó 1918, kʼianga kʼoakitso je presidente xi tsʼe Estados Unidos nga katabʼétsʼoa je chjota nga katasʼe kjoanyʼán, je The Watch Tower kʼoakitsole je xi tjíokotʼaya Biblia nga kʼoati katabʼétsʼoa tsanda je. Tjínkʼa je ndsʼee xi kao tao̱n kitsjoanganʼio nga kisʼejna kjoajchán. Kʼoa tjínkʼa xi saʼnda sondado koan kʼoa kijin kjoajchán. Ningalani koanchjénle nga kinikixiyanda, tsínjin kixi tíjna tsa kʼoakuixoán nga kuinga Babilonia xi nʼioje kisikatíonʼioni. Nga kʼia, je ndsʼee tosaa toje tjíobitjojinni relijión ndiso (Luc. 12:47, 48). w16.11 5:9

Ánni nga kʼoakitsosínile Pablo je chjotale Cristo xi ya ngʼajmi koai nga tsín kʼoakatasʼín josʼin mele yaole. Kuinga tsínkui títjon sikatío jme xi mamekon. Tobʼelañá, je Pablo kʼoakitso nga tjínkʼa je chjotale Cristo xi ya tsʼe Roma xi kui kʼoatjíosʼín jme xi mele yaole. Tsakui nichxin kui ngisa tjíofitʼale je kjoachajngi, tsojmi xi kjine kao xi kjaʼaísanile (Rom. 16:17, 18; Filip. 3:18, 19; Jud. 4, 8, 12). Kʼoa ya naxinandá Corinto, jngo chjotale Cristo tsakʼejna xi je kisichajngikao je chjoónle nʼaile (1 Cor. 5:1). Kuinga koanchjénnile je chjotale Cristo xi tsakatio nga siglo 1 je kjoafaʼaitsjen xi kitsjoale Pablo nga tsínkui kʼoakatasʼín josʼin mele yaole (Rom. 8:5, 6). Kʼoati machjénná tsanda ñá je kjoafaʼaitsjen xi tsakʼaile je chjotale Cristo. w16.12 2:5, 8, 9

Je xi koasenkaoná nga tsín nʼio si̱kjáojiaan kuinga kʼoéyanajmílee tsa ʼyani xi nʼiotʼaa jmeni xi kjimakjáojinná kʼoa jotjín tokoán. Tsa je chjoónná kʼoa tsa xʼinná, tsa jngo miyoná kʼoa tsa je xi chjotajchínga sʼin tíjna ya jinjtín koaanle koasenkaoná. Kʼoa tsín ndasʼin bichómani jmeni xi bʼendajiaan kʼiatsa tsín chjónangiaa josʼiaan (Prov. 15:22). Je kjoajtín xi satíoná kʼoati koasenkaoná nga tsín nʼio si̱kjáojiaan. Nga xki̱ xomana chjakaonajmíñá je ndsʼee kao tichjaa, mandosinle tʼatsaan kʼoa tsjoánganʼioná (Heb. 10:24, 25). Nga kʼoainganʼiongañálee xíngiaa kui xi tsjoánganʼioná kʼoa koasenkaoná nga koa̱nná kuitjátojiaan tojme kjoa xi sʼe̱ná (Rom. 1:12). w16.12 3:17, 18

Kʼiatsa chʼin tjínná kʼoa tsa jmesa kjoani xi tsín ñá kʼoakoa̱nná kʼoéndajiaan, jméni xi sʼiaan. Je Jeobá si̱kʼamiaa ngayeje nga̱ mandosinle xi tʼatsaan (1 Ped. 5:6, 7). Kʼoénelee yaoná nga kjuian je kjoajtín xi satíoná kʼoa si̱chjén jmesani xi tsjoáná je naxinandále Niná (Heb. 10:24, 25). Jméni xi koa̱n sʼin je xijchá xi tsín ti Jeobá síxánile je xtile. Koasenkao je choa̱le profeta Samuel. Je Samuel alikui kjoanʼio tsakʼénele je xtile nga jejchínga kjoan nga kixi katafitʼale Jeobá (1 Sam. 8:1-3). Kuinga je Jeobá kisikʼamini ngayeje kjoa xi jaʼatojin. Tonga tsakʼénele yaole nga kixi kitʼale Jeobá kʼoa nga nda tsakʼejna ngixko̱n (Prov. 27:11). Nʼio nkjín xijchá xi kʼoati kui kjoa tjíofaʼatojin je kjoa xi jaʼatojin Samuel. Xijchá jebi kui síkjaʼaitsjen nga tíjnanda je Jeobá nga skoéya ijngokʼa je xi kʼoakoa̱nnile jéele (Luc. 15:20). Je xijchá jebi tosi tonda kixi fitʼale Jeobá kʼoa koyale nga kui choa̱le xosikao je xtile nga kuicho ijngokʼani ya jinjtín. w17.01 1:15, 16

Jngo chjota xi nangitokon, be nga tsín toje kʼoakoa̱nle ngayeje kʼoa kʼoatso jñani chʼao sʼín. Xi ijngosani, nrʼoé je kjoafaʼaitsjen xi tsjoále xi kjaʼaí. Je Jeobá nʼio sasénle jngo chjota xi nangitokon. Kʼianga kui síkʼaxki̱ ya Biblia je kjoanangitokon, kʼoati kui nchja̱ni jngo chjota xi be jmeni xi koa̱nle kʼoasʼin kʼoa jmeni xi mai kʼoa jmeni xi tsín tiʼndele nga kʼoasʼin. Kʼoa jebi kui xi basenkao nga bexkón xi ngikʼa kʼoa bakóle kjoanda. Tsa tsín si̱kuindaa yaoná, tsakui nichxin saʼnda tsín jchaa tsa kjoangʼakon tíbʼetʼaná. Jméni xosikaoná. Tsakui nichxin kʼoasʼin si̱kjaʼaitsjeen nga ngisa ngʼa tiyolee xi ngikʼa nga tjín xi kjinená ya jinjtín kʼoa tsakuije̱ nga miyoná mani xi tjín xi kjinele ya jinjtín (Rom. 12:16). Kʼoa tsa toñá si̱kʼaxkiaaje̱ yaoná jme xi nʼia (1 Tim. 2:9, 10). Tsakui nichxin saʼnda ñá kʼoakʼuínlee xi ngikʼa jmeni xi tjínnele kʼoasʼin kʼoa jmeni xi mai (1 Cor. 4:6). w17.01 3:6-8

Je naxinandále Niná kui tísíchjén jmeni xi sʼa kjibʼatsen ndʼaibi nga tíʼmiyason énnda chjotse kʼoa nga ngisasa nkjín chjota tíʼmiyale. Kʼoa je ndsʼee xi jejchínga sakʼoa ñʼai male nga tíbʼantjaiya josʼin kjimaxá ndʼaibi (Luc. 5:39). Kʼoa nga jemajchíngaa toxá likui tikʼoakji nganʼio sʼeniná joni ngasʼa xtiaa. Kuinga ndatjínsíni nga je ndsʼee xi jejchínga katatsoyale je xi sʼa xti nga ngisasa tse xá sʼe̱nele (Sal. 71:18). Je ndsʼee xi xá kjinele jinnaxinandále Niná, sakʼoaa likui tso kon nga kjaʼaí xi bánele je xá xi sʼín. Tjínkʼa ndsʼee xi ba male nga kui síkjaʼaitsjen nga tsín tikui xá xi nʼio tsjoake kʼoasʼinni. Kʼoati tjínkʼa xi aon male nga kui síkjaʼaitsjen nga kjaʼaí xi kʼoasʼin je xá xi jenʼio kitsjentʼale. Tsakui nichxin kui makjáojinle nga tsín nda koa̱nxá tsa tsín je koandiaa. Kʼoa tsa kʼoasʼin síkjaʼaitsjenje̱ nga tsín maʼale nga kjaʼaí xi kuitsoyale. Kʼoa xi ijngosani, je xi sʼa xti tjínnele tsejta koa̱n kʼiatsa tsín ndi̱to̱n bʼaile xá ya jinjtín. w17.01 5:3, 4

Je Jeobá jé Jesús kisikasén, je ʼNdíle xi títjon kisinda. Jé Niná xokisʼin nga jo chjota sʼin kitsin je ʼNdíle i̱ Sonʼnde (Juan 1:14). Je Jesús ñaki chjotatsje koan joni Adán nga chjotatsje tsakai. Tonga alikui koanngóson kao Adán. Ánni. Kuinga kisitjoson je kjoatéxomale Niná josʼin tjínnele kisʼin tsakai je Adán. Ningalani nʼio tse kjoa jaʼatojin je Jesús, kisitjoson ngantsjai je kjoatéxomale Niná. Nga kʼienntjainá, koaan ndái kuiyolee je jée kao kjoabiya. Je Adán tjínnele kʼoakisʼin tsakai jokisʼin je Jesús. Je Jesús chjotatsje koan, ñaki kixi kitʼale Niná kʼoa kisitjosonle (1 Tim. 2:6). Nga kʼienntjainá, tiʼndele ngatsʼi chjota nga koa̱n koatio ngantsjai nichxin, xi xʼin, xi yánchjín kao xtiʼndí (Mat. 20:28, TNM). Tojosʼin tiʼyaa, nga kuitjoson jme xi tjínndajinle Niná, koanchjén nga kitsjoa kjoabijnachonle Jesús (2 Cor. 1:19, 20). w17.02 1:15, 16

Tobʼelañá, tsa nʼio kjin jña tiʼmi kʼoa tsa saʼnda koa̱nnyaonni kuichui, tjínnejinle kuitómjai kʼoajnda nitje̱n. Ninga chon njio njio ngakjijnda ʼyaní nga chan koa̱nʼisen kʼoa nga chan kuichui jñani tiʼmi. Jebi yaa mangóson je kjoabijnachonná. Tsakui nichxin sakʼoa ñʼai tjín kjoa bitjatojiaan kʼoa nʼio nikjáojiaan. Tsakui nichxin saʼnda kʼoakoanle je Jesús. Kʼianga yá kisʼetʼa nga kinikʼien, totaon tsaʼya kʼoa tse kjoañʼai kinikjaʼá. Nga kui nichxin nʼio tse kjoañʼai jaʼatojin (Heb. 12:3). Je Jesús kui kisikjaʼaitsjen nga ndasʼin kuichomani nga ska̱le je kjoa xi kjoaʼatojin. Nga̱ kʼoasʼin kuitjotsjeni je jaʼaínle Niná kʼoa koako nga toje Niná xi tiʼndele koatexoma. Be nga tokjoaʼato je kjoañʼai tonga nga sʼe̱jna ngantsjai nichxin je kjoanda xi kʼoaile ya ngʼajmi. Kʼianga ñʼai tjín kjoa bitjatojiaan, chjénngilee je Jesús. Si̱kjaʼaitsjeen nga ndasʼin bichómani nga kaná kʼoa nga tofaʼato je kjoa xi bitjatojiaan. w16.04 2:10

Nichxin xi tiyoaa ndʼaibi, nʼio nkjín chjota xi tsín chʼao satío kon kʼianga bajngijée. Kuinga tsín majinnile nga machjénle je kjoabʼechjíntjai xi kitsjoa je Jesús. Tonga nga fákaonajmí je testigole Jeobá tjínkʼa xi majinle jmeni xi jée ʼmi, josʼin bʼetʼale kʼoa jme xi tjínnele sʼin nga tsín tichoʼndale jée koa̱nni. Tsa nda tjío ni̱ma̱le, tsjoá kjoanda nga kisikasén Niná je ʼNdíle i̱ Sonʼnde nga tsakʼasjentjainá xi tʼatsʼe jée kao kjoabiya. Kʼoati majinle nga kui kʼoakisʼinni Jeobá nga nʼio tsjoakená kʼoa nga nʼio tjínle kjoanda (1 Juan 4:9, 10). Je kjoabʼechjíntjaile Jesús kui xi ngisa bakó jokji tsjoakená Niná kʼoa jokji kjoanda tjínle. Nda sʼe tokoán nga ʼyaa nga jchatʼa jéená kʼoa nga tsje sʼe̱ tokoán tsa sʼe̱ná kjoamakjain tʼatsʼe kjoabʼechjíntjai xi kitsjoa Jesús (Heb. 9:14). Nʼio nda tso én jebi kʼoa mená nga katasʼejinle ngatsʼi chjota. w16.07 4:6, 7

Je Jeobá kʼoatso nga sichatʼa je jéená kʼiatsa sʼe̱ná kjoamakjain tʼatsʼe kjoabʼechjíntjai (Hech. 3:19-21). Xi totʼatsʼe kjoabʼechjíntjai, je Jeobá xtile sʼin bekon je xi ya ngʼajmi koai (Rom. 8:15-17). Kʼoati tsole Jeobá je xi “kjaʼaí barré” xi koatio i̱ Sonʼnde nga ya katabatiojin familiale. Xijekoa̱n, kʼianga jechjotatsje koa̱n ngatsʼi chjota jebi, chótʼayakao xi tofetʼani. Kʼiatsa kixi koaitʼale Jeobá, kʼoati xtile kuitsole (Rom. 8:20, 21; Apoc. 20:7-9). Je Jeobá tsjoake koa̱n ngantsjai je xtile. Kʼoa xi totʼatsʼe kjoabʼechjíntjai, tosi tonda sʼe̱ná kjoanichikontʼain ngantsjai nichxin. Jé Jeobá kitsjoaná kjoatjao jebi, kʼoa alikui ʼya xi kjoaʼaná. Tsa kʼoakoa̱nniná je jéená, je Na̱i alikui koa̱nle kʼoechjoaná nga ya kuiyojinlee familiale Jeobá. w17.02 2:15, 16

Je Jeobá koanmele nga tsa ʼyaxkoaan ninga be nga chjotajée maa kʼoa nga kuinga saténgiñá kʼoa ñʼai maniná nga kui kʼoanʼia xi ndatjín. Ninga kʼoalani, je Jeobá koanmele nga miyole koan. Nga nʼio tsjoakená je Jeobá, jngo kjoatjao kitsjoaná xi nʼio chjíle. Kisikasén i̱ Sonʼnde je ʼNdíle kʼianga kitsjoa kjoabijnachonle xi totʼatsaan kʼoa tsakʼéchjíntjai je jéená (Juan 3:16). Kʼianga saténgiaa koaan ni̱jélee je Jeobá nga katasíchatʼaná. Xi totʼatsʼe nga tsakʼéchjíntjainá je Jesús, je Jeobá síchatʼaná kʼoa tsjoáʼndená nga tojo miyole maa. Si̱kjaʼaitsjeen nga je Jesús jé kʼienntjai chjota xi kʼoamanile jéele. Kʼiatsa kʼoasʼin nikjaʼaitsjeen nga nʼio chʼaotjín jmeni xi kanʼia, si̱jélee je Jeobá nga katasíchatʼaná. Nʼio bʼailee kjoanda je Jeobá nga miyole kjimaa ninga chjotajée maa (1 Tim. 1:15). w16.05 4:6, 7