Abril

Kʼoa ñá, jósʼin nikjaʼaitsjeen. A kʼoasʼin nikjaʼaitsjeen josʼin síkjaʼaitsjen je Jeobá axo kʼoasʼin nikjaʼaitsjeen josʼin síkjaʼaitsjen je chjota. Nga chjotale Cristo maa kʼoasʼin mangínkoaa yaoná jotso je kjoatéxomale Jeobá. Tonga jósʼin nikjaʼaitsjeen. A kʼoasʼin nikjaʼaitsjeen joni je Jeobá. Machjén nga nʼio kʼoénelee yaoná nga kʼoasʼin si̱kjaʼaitsjeen. Tonga nʼio choa ñʼai tíjna nga kʼoasʼin si̱kjaʼaitsjeen josʼin síkjaʼaitsjen je chjota, nga̱ kui kjoafaʼaitsjen tjín ngakjijnda (Efes. 2:2). Xi ijngosani, je chjota xi tjín sonʼnde to yaole fini kʼoa kui xi mele nga kʼoati sʼiaan tsanda ñá. Nʼio choa ñʼai tíjna nga kʼoati sʼin ni̱kjaʼaitsjeen josʼin síkjaʼaitsjen je, tonga ñʼai maná nga kʼoasʼin nikjaʼaitsjeen josʼin síkjaʼaitsjen Jeobá. Tsa kʼoaiʼndee nga kui koandiaale je kjoafaʼaitsjenná jochon je sonʼnde, to yaonájin kjuinñá kʼoa toñájin kʼoakuixoán jmeni xi ndatjín kʼoa jmeni xi chʼaotjín (Mar. 7:21, 22). Kuinga nʼio machjénsíni nga kʼoasʼin si̱kjaʼaitsjeen joni Jeobá, kʼoa tsín kʼoasʼin si̱kjaʼaitsjeen joni chjota. w18.11 18 párr. 1; 19 párr. 3, 4

Nʼiojin tsakasenkao je Jesús nga chjí tsabekon je Jeobá, kʼoa kʼoasʼin tsakakónile nga jan kʼa kinoʼyale je jta̱le ya tjen ngʼajmi. Kʼianga jekisʼenngindá je Jesús ya xo̱ngá Jordán kʼiaa kinchja̱ Jeobá je én xi faʼaitʼa texto xi kamaxkia ndʼaibi. Kʼoa tojé Juan Bautista xi kʼoati kinrʼoé én jebi. Kʼoa jngola nó tongini nga kjesa nikʼienjin je Jesús, jan chjotale xi kʼoati kinrʼoéle je Niná kʼianga i̱ kitso: “Jebi ʼndína xi tsjoake̱. Jonda sʼekoan xi tʼatsʼe. Tinóʼyalao nga je” (Mat. 17:5). Kʼoa xi koanjanni kʼa nga kinoʼyale je jta̱le Jeobá, kʼiaa nga tsakjákao ijngokʼa je Jesús, tongini nga kje nikʼienjin (Juan 12:28). Je Jesús koanjinle nga nʼio tse kjoa kjoaʼatojin, nga énndiso sʼe̱ne kʼoa nga ni̱kʼien. Ninga kʼoalani, kʼianga tsakʼétsʼoa kui kisijé nga kui kʼoakatama josʼin mele Nʼaile (Mat. 26:39, 42). Kichokjoajinle ngayeje kjoañʼai xi jaʼatojin, kʼoa alikui kui tsakásjai nga ndasʼin jchale i̱ Sonʼnde, kui kʼoakisʼin josʼin koanmele je Nʼaile (Heb. 12:2, TNM). w18.07 10, 11 párr. 15, 16

Kʼianga jetsakʼéjnachoa̱ je Jesús josʼin kjoaʼaítsjenya je kjoabiyale, nʼio tsakakó kjoanʼiojin. Ánni kʼoabixónsíñá. Kuinga kisitjosonle Niná ninga kjoasoa tsakʼejnajin nga kʼoatsakʼinle nga Niná kinchja̱ʼaonle kʼoa nga kinikʼien (Mat. 26:65, 66). Je Jesús tsakʼasjengʼaa je jaʼaínle Niná nga̱ kixi kitʼale ngantsjai, kʼoa tsakakó nga toje Niná xi tjínle ʼnde nga koatexoma. Kʼoa xi totʼatsʼe Jesús koaan sʼe̱le kjoabijnachon xi tsínkʼia fetʼa je chjota xi kʼoamanile je jéele. Xi ijngosani, tongini kisikatíonda je chjotatjenngile tʼatsʼe kjoa xi kjoaʼatojin. Je Jesús kʼoati nʼiojin koan kʼianga tsín to yaole kini. Kui ngisa kuenta kisʼin jmeni xi koanchjénle je pastrole xi kixi kitʼale. Kʼianga jekʼoakitsole je Judas nga katafi, kʼiaa tsakʼéjnachoa̱ josʼin kjoaʼaítsjenya je kjoabiyale, kʼoa kui xi kisikjaʼaitsjenjinle je chjotale xi ya ngʼajmi koai josʼin koasenkao je njín tsje xi kʼoejten je Jesús kʼoa nga ya kjoaʼasʼenjin je kjoasʼendajin chjotse (1 Cor. 10:16, 17). w19.01 22 párr. 7, 8

Kʼianga kʼoakitso Jesús, je Jeobá i kitsole: “Jetsʼasjejeya jaʼaínna, kʼoa kʼoasʼin kʼoasjejeyangánia”. Je Jesús kui koankjáojinle jokji kjoandosin tjínle nga kixi koaitʼale je Jeobá. Be nga tse kjoañʼai ni̱kjaʼá kʼoa nga ni̱kʼien (Mat. 26:38). Tonga je xi ngisa koanndosinle Jesús kuinga kʼoasjejeya je jaʼaínle Nʼaile. Kʼoatsakʼinle nga Niná kinchja̱ʼaonle, kʼoa kui koankjáojinle tsa chʼaosʼin kʼoaxki̱ je jaʼaínle Niná kʼianga ni̱kʼien. Nʼiojin tsakasenkao je Jesús je én xi kinchja̱ Jeobá. Tojo koan Jesús tsakui nichxin kʼoati kui nʼio nikjáojiaan tsa chʼaosʼin kʼoaxki̱ je jaʼaínle Jeobá. Tsakui nichxin kui kʼoakoa̱ntʼeen xi tsín kixi tíjna kʼoa tsakui makjáojinnáje̱ je énndiso xi fánená je chjota xi batiochjoaná. Tsakui nichxin kʼoasʼin nikjaʼaitsjeen nga chʼaosʼin tíbʼaxki̱ je Jeobá kao naxinandále. Tonga likui kʼoaiʼndee nga kui sikinroajen tokoán. Nga̱ je Jeobá kʼoakitso nga kʼoasjejeya je jaʼaínle (Sal. 94:22, 23; Is. 65:17). w19.03 11, 12 párr. 14-16

Jmeni xi kitso je Jesús tokʼoakoanle je chjotatjenngile. Ningalani koankjainle nga je Jesús koatexoma, tokʼoakoanle kʼianga kʼoakitsole nga kjoañʼai kjoaʼa kʼoa nga ni̱kʼien. Je pastro Pedro i kitsole: “Señor, Niná katabʼéchjoale kjoabi tʼatsi. Nikʼiajin nga kʼoakoa̱ntʼain”. Tonga je Jesús i kitsole: “Titjájtonnái, ji Satanás. Kjaí tochʼao nikaonái, nga tsín ʼmitʼalai kjoale Niná, tonga ʼmitʼalai kjoale chjota” (Mat. 16:22, 23; Hech. 1:6). Nga kʼoakitso je Jesús, tsakʼéjnatsen nga tsín mangóson je kjoafaʼaitsjenle Niná kao je kjoafaʼaitsjen xi tjín sonʼnde, xi je Na̱i kjinentsja (1 Juan 5:19). Jmeni xi kitso je Pedro kui bakó josʼin síkjaʼaitsjen je chjota. Tonga je Jesús be josʼin síkjaʼaitsjen je Jeobá. Jmeni xi kitso je Jesús tsakakó nga tsakʼasjengi josʼin síkjaʼaitsjen je chjota xi tjín sonʼnde, nga̱ kʼoasʼin kisikjaʼaitsjen josʼin síkjaʼaitsjen je Nʼaile. w18.11 18 párr. 1, 2

Kʼianga millón mani chjota xi batiojtín jngo tjíjtsa Sonʼnde nga faʼaitsjenya je Kjoabiyale Cristo, je Jeobá ali tokuijin kotsenle jotjín mani chjota xi batiojtín, kuenta sʼín nga jngó jngó xi bichó. Tjínkʼa xi tsín sícha kjoajtín jebi ninga chjota fitjenngike, kʼoa tjínkʼa xi tokʼia bichó nga faʼaitsjenya je Kjoabiyale Cristo tonga tsín fi je kjoajtín xi satío nga xki̱ xomana. Je Jeobá kʼoati kuenta sʼín je xi tokʼia bichó títjon, ninga tobichókotsen jmeni xi ma. Tsjoajin male je Jeobá nga nkjín mani chjota batiojtín kʼianga faʼaitsjenya je Kjoabiyale Cristo (Luc. 22:19). Tonga je xi ngisa kuenta sʼín kʼoa xi ngisa bechjí kui ánni nga bichóni. Je xi mená kuinga je Jeobá kʼoa kao naxinandále katabándiaaná (Is. 30:20; Juan 6:45). w19.01 26 párr. 1-3

Je Jesús ali tokʼiajin tsakakó kjoatsjoacha nga kitsjoa kjoabijnachonle xi totʼatsʼe chjotatjenngile, ngantsjai nga kuenta kisʼin jme xi koanchjénle. Tobʼelañá tsakatiojtín kao chjotatjenngile ningalani ba tjínkon kʼoa kijtale (Luc. 22:39-46). Kui ngisa kini josʼin tsjoánganʼiole je xi ngikʼa tikʼoajinni nga je kʼoainganʼiole (Mat. 20:28). Nga naxinandále Niná tiyojinlee kao kjoatsjoa nikʼayaa je nichxinná nga kʼoaʼmilee je chjota nga kʼoati katakotʼaya je Énle Niná. Tonga je xi ngisa mená kuinyakoaa jé xi ngóson sʼin makjainná, jolani xi jekisikatío xále Niná (Gál. 6:10). Bakolee kjoatsjoacha nga kʼoaʼmilee nga katafi kjoajtín, kʼoa nga katafi nga faʼaitsjenya je Kjoabiyale Cristo. Joni je Jeobá kao Jesús, ñá kʼoati tsjoa maná kʼianga ijngokʼa síchriantʼale je Niná ʼyani xi jekisikjinle tsakai (Mat. 18:14). w19.01 29 párr. 12, 14; 30 párr. 15

Kʼianga tsakʼéjnachoa̱ Jesús josʼin kjoaʼaítsjenya je kjoabiyale, kui kisichjén je nioxtila kao je vino xi kinjengi nga kisʼejna je sʼuí Paxko. Kʼoakitsole je chjotatjenngile nga je nioxtila kao je vino kui tsoyanile je njínle kao yaole xi tsín jme jée tjínle xi tsjoántjai nga koa̱nskanni. Alikuijin tokʼoakoanle je pastrole kʼianga choa ñʼai sʼin tsakʼéndajin je Jesús kʼianga tsakʼéjna je Kjoabichile Nainá. Nga̱ kʼianga ya tíjna ya ndʼiale je Lázaro, Marta kao María, xi miyole koanni, nga kitsoyale xi tʼatsʼe Niná, je Marta kuila ngisa nʼio kitsjoale kjoandosin kʼianga tsakʼénda jmeni xi sikjenni je Jesús. Tonga je Jesús ngasin nganda kʼoakitsole nga tsín machjén nga nʼio tse tsojmi kʼoenda (Luc. 10:40-42). Kʼoa nga jekoanskanni, kʼianga tojeme ni̱kʼien, tijé kʼoakisʼinni jmeni xi kitsole je Marta, alikui nʼio tse jmeni xi tsakʼénda nga tsakjenkao je chjotatjenngile. w19.01 20, 21 párr. 3, 4

Je Jeobá tse kjoanda kitsjoale je Jesús kʼianga jejaʼáyanile kʼoa jngo xá xi ngʼa tíjna kitsjoale. Tonga kʼoati kui kjoanda kitsjoale nga tsín tikʼia kuiyáni (Filip. 2:9; 1 Tim. 6:16). Nʼio tse kjoanda tsakʼaile nga kixi koan. Jmé xi koasenkaoná nga tsínkui kjoásjee jme xi tjín sonʼnde. Kuenta sʼiaan nga je Jeobá chjí bekon ngantsjai je choʼndale xi kixi fitʼale, kʼoa nkjín koya josʼin bakóniná kjoandale. Alikui ʼyaa jokji kjoanda tsjoáná nichxin xi nroaján. Kʼoa alikui si̱chajiaan nga tochoasa nichxin tíjnale sonʼnde jebi (1 Juan 2:17). Je Jeobá alikui sichajin je xá xi tinʼia kʼoa kao je kjoatsjoacha xi bakolee je jaʼaínle (Heb. 6:10). w18.07 11 párr. 17, 18

Je xi kisikjáojin Jesús kʼianga tokʼoatjínni tsakjenkao je chjotale kuinga jtín katabatio. Kʼianga tsakʼétsʼoa, kʼoakitso nga kui xi mele nga tojngo katama chjotale, xi tsonile nga jtín sʼin katabatio josʼin tjío je Jesús kao Nʼaile. Tsa jtín sʼin tjío je chjotale Jesús kao kui jchanile nga je Jeobá kisikasén je Jesús i̱ Sonʼnde. Tsa tsjoake xínkjín kʼoasʼin jchanile nga ñaki chjotale Jesús ma, kʼoa kʼoati kui xi jtín sʼin sikatío (Juan 13:34, 35). Nga kui nitje̱n, je Jesús nʼio kʼoakitsole chjotale nga jtín sʼin katabatio nga̱ tsabee nga tsín kʼoasʼin tjío. Kui tsakjáotiyani “ʼyá xi koasenjna títjon” kʼoa jekjoan nkjín kʼa nga kui fáotiyani (Luc. 22:24-27; Mar. 9:33, 34). Ñandia nga je Santiago kao Juan kʼoakitsole Jesús nga jngo xá xi ngʼa tíjna katatsjoále kʼianga koatexoma (Mar. 10:35-40). w18.06 8 párr. 1, 2

Je Jeobá kui xi mele nga tsjoake koa̱n xínkjín xi jechixan jokjitse koatio (Mat. 19:3-6). Kʼianga síchajngitʼale xínkjín xi jechixan kui xi ngisasa nʼio chʼaotjín xi sʼín je chjoón kʼoa tsa je xʼin. Kuinga tsín kitsjoaʼndeni je xi mañatoni kjoatéxoma nga kʼoasʼin je chjota (Deut. 5:18). Kʼianga síchajngitʼale xínkjín xi jechixan bajngijée “ngixko̱n Niná”, kʼoa tsee kjoaʼaon bʼejnajin je chjoón kʼoa tsa je xʼin xi kanichajngitʼale (Gén. 39:7-9). Tsakui nichxin nʼio nkjín nó nga kjoaʼaon kʼoéjnajin. Je Kjoatéxoma kʼoati bakó nga nʼio mandosinle je Jeobá tʼatsʼe ʼndíxti. Ali tokuijin xi tsakʼénele je xi xijchá ma nga koa̱njngíʼa je ʼndíxtile, kʼoati kitsole nga tjínnele kuitsoyale xi tʼatsʼe Niná. Tojñani tjío, tjínnele nga kitsoyale je ʼndíxtile nga chjí katabe je kjoatéxomale Niná kʼoa nga tsjoake katama (Deut. 6:6-9; 7:13). Alikui koan nga tojo tsojmi sʼin tsabekon je xi xijchá ma je ʼndíxtile, tsa tsín kisikuinda kʼoa tsa totaon tsabe. Tjínnele kʼoasʼin tsabekon joni jngo kjoatjao xi tʼatsʼe Jeobá nroani, kʼoa tjínnele nda kisikuinda kʼoa tsakakóle kjoatsjoacha (Sal. 127:3). w19.02 21 párr. 5, 7

Je Job ñaki kʼoatsakʼé kon nga mandosinle Niná tsa kixi koaitʼale kʼoa tsa mai. Ningalani tse kjoa jaʼatojin bení nga Jeobá sichikontʼain kʼoa kui xi tsakasenkao nga kixi kitʼale. Nʼio tsjoa kisʼele je Jeobá xi tʼatsʼe Job kʼoa nʼio tse kjoanichikontʼain kitsjoale (Job 42:12-17; Sant. 5:11). Kʼoa nichxin xi nroaján, ngisaa tse kjoanichikontʼain tsjoále Jeobá. Je Nináná alikui tíbʼantjaiya (Mal. 3:6). Kʼiatsa si̱kjaʼaitsjenjiaan nga bechjí nga kixi mangíntʼalee kui xi koasenkaoná kʼianga tsín si̱chajiaan je kjoachoya xi tjínná tʼatsʼe nichxin xi nroaján (1 Tes. 5:8, 9). Ñaki kʼoakʼoé tokoán nga kixi kjuintʼalee ngantsjai je Jeobá. Tsakui nichxin sakʼoa kʼoasʼe tokoán nga toñá xi kʼoatinʼia, tonga mai. Jngo tjíjtsa Sonʼnde millón mani je ndsʼee xi kʼoati tjíobʼénele yaole nga kixi tjíofitʼale je Niná. Xi ijngosani, kʼoati ya koa̱nxki̱koaa je choʼndale Jeobá xi tsakatio nichxin kjoatse, xi kisʼele kjoamakjain kʼoa xi kixi kitʼale Jeobá ninga kinikʼien (Heb. 11:36-38; 12:1). w19.02 7 párr. 15, 16

Nga jemachrianle nga kjoaʼaítsjenya je Kjoabiyale Cristo, machjén nga chjónangilee yaoná jebi: “Jósʼin nga ngisa nda skenngile je kjoatsjoacha xi tsakakó Jesús. A kui ngisa kuenta sʼian jmeni xi machjénle je ndsʼee tikʼoajinni jmeni xi machjénna an. A kui koyale nga ngisa tse jmeni xi sʼin je ndsʼee, axo kuenta sʼian jokji tjen kʼoamale”. Chjénngiaa ngantsjai je choa̱le Jesús kʼoa ni̱jinlee yaoná jotjío kon je ndsʼee. Jeme kjoaʼaí je nichxin nga tsín tisi̱kjaʼaitsjenyañá je Kjoabiyale Cristo. Kʼianga tíjna je kjoañʼai xi nʼio tse kʼiaa “kjoaʼaí” je Jesús kʼoa koaikao ya ngʼajmi je chjotale xi ya tjínle kjoachoya xi tjíosa i̱ Sonʼnde. Kʼianga jekʼoakoa̱n alikui tisi̱kjaʼaitsjenyañá je Kjoabiyale Cristo (1 Cor. 11:26; Mat. 24:31). Ningalani tsín tisi̱kjaʼaitsjenyañá je Kjoabiyale Cristo, alikuijin jchajinná nga kui tsoyanile nga nangitokon koan je Jesús, nga nʼiojin koan kʼoa nga tsakakó kjoatsjoacha. w19.01 25 párr. 17-19

Nga nikuindaa josʼin nikjaʼaitsjeen yaa mangóson nga nda nikuindaa yaoná. Tobʼelañá, tsa mená nga tsín chʼin sʼe̱ná, tjínnele nga nda kuichaa kʼoa nga kjitʼa sʼiaan ejercicio. Tikʼoasʼinni, tsa mená nga nda kuiyoaa ngixko̱n Niná tjínnele nga kjitʼa kʼoéxkiaa je Biblia kao xo̱n xi ya yʼangini kʼoa koakoá nga tjínná kjoamakjain xi kao Jeobá (Rom. 10:8-10; Sant. 2:26). Xi ijngosani, tsa nda matseen xi tosonngʼa, tsakui nichxin kʼoasʼin nikjaʼaitsjeen nga nda tiyoaa ninga chʼinni tjínná. Kʼoatisʼinni, tochale kʼoasʼin si̱kjaʼaitsjeen nga taja tíjna je kjoamakjainná kʼiatsa nda tinixálee Niná, ninga kuini xi chʼaotjín tinikjaʼaitsjeen (1 Cor. 10:12; Sant. 1:14, 15). Je Na̱i kui xi mele nga kʼoasʼin si̱kjaʼaitsjeen josʼin síkjaʼaitsjen je. w19.01 15 párr. 4, 5

Je Jesús kʼoakitso nga kʼoati tjínnele sʼiaan tsanda ñá. Kuinga chjónanginilee yaoná: “A kʼoati sʼian tsanda an jokisʼin je chjota samaritano” (Luc. 10:30-35). A kʼoati sʼin bakoa kjoamatokon. Kʼianga ʼbe tsa ʼyani xi kjoañʼai tífaʼá, a bakole kjoamatokon. Jméni xi sʼian nga basenkoa. Tobʼelañá, a basenkaoña je ndsʼee xi jekoanjchínga, je tichjaa xi jekʼien xʼinle, tsa jeje̱ xti xi tsín kotʼaya Énle Niná je xijchále. A koaan tsjoanganʼiole ʼyani xi nroajen kon (1 Tes. 5:14; Sant. 1:27). Kʼianga binyakoaa je xi kjaʼaí ʼyañá nga ngisa nda nga bʼé tikʼoajinni nga chjoé. Xi ijngosani, ʼyañá nga sasénle je Jeobá kʼianga kʼoanʼia (Hech. 20:35; Heb. 13:16). Je rey David i kitso tʼatsʼe je chjota xi bakó kjoamatokon: “Jé Jeobá sikuinda kʼoa sikʼéjnakon. Kʼoa ñaki tsjoa sʼe̱le nga kʼoéjna i̱ sonʼnde” (Sal. 41:1, 2). Tsa koakolee kjoamatokon xi ngikʼa, je Jeobá kʼoati koakoná kjoamatokon kʼoa nʼio tsjoa sʼe̱ tokoán ngantsjai nichxin (Sant. 2:13). w18.09 19, 20 párr. 11, 12

Jngo tichjaa xi Yoshiko ʼmi kʼoakitsole je chjoón chjinexki xi sísinle nga to choatsesa kʼoéjnakon. Jméni xi kisʼin tichjaa jebi nga kʼoatsakʼinle. Kjitʼanangi kisikjaʼaitsjenjin jngo texto xi nʼio tsjoake, je texto xi kamaxkia ndʼaibi. Xijekoan, kʼoakitsole je chjoón chjinexki nga tsín tsokjón nga̱ jé Jeobá títsoanʼio je ntsja. Texto jebi nʼio kitsjoanganʼiole kʼoa kui xi tsakasenkao nga ngisa kisinʼiotʼa je Jeobá. Kʼoati koasenkaoná tsanda ñá kʼianga ñʼai tjín kjoa kuitjátojiaan. Je Jeobá kuinga kʼoakitsonile je Isaías nga katasínʼiojin je chjota judío xi ya koaikationʼio ya Babilonia. Kʼoa koanmele nga kisʼetʼaxo̱n jmeni xi tsakʼinle je chjota judío ánni nga tojo koasenkoani je choʼndale xi tjío saʼnda ndʼaibi (Is. 40:8; Rom. 15:4). Je nichxin xi tiyoaa nʼio ñʼai kjimachon, kuinga machjénniná jmeni xi tso je librole Isaías (2 Tim. 3:1). w19.01 2 párr. 1, 2

Je xi binyatʼaxinle xínkjín kjoa faʼatojin. Je pastro Pablo ijngosa koya kinchja̱ni ánni nga tjínnenile tosi tonda koatiokao xínkjín xi jechixan. I kitso: “Je xʼin xi tsín tsa makjainle, kʼoasʼin chjotale Cristo ma xi totʼatsʼe chjoónle, kʼoa je chjoón xi tsín tsa makjainle kʼoasʼin chjotale Cristo ma xi totʼatsʼe xʼinle. Tsa tsínlani kʼoasʼin, je xtino tojndí koa̱n kjoan, tonga ndʼai chjotale Cristo ma” (1 Cor. 7:14). Nʼio nkjín je ndsʼee kao tichjaa xi tojo batiokao je xʼinle kʼoa tsa chjoónle xi tsín testigole Jeobá ma ninga tse kjoa faʼatojin. Kʼoa nga kʼoasʼín tsjoa satío kon, nga̱ jéni Jeobá síxále nga jemani je xʼinle kʼoa tsa chjoónle (1 Cor. 7:16; 1 Ped. 3:1, 2). Nichxin xi tiyoaa ndʼaibi, jngo tjíjtsa Sonʼnde nʼio nkjín mani je ndsʼee kao tichjaa xi jechixan xi ndasʼin tjíokao xínkjín. Tsakui nichxin ʼyaa ya jinjtínná je ndsʼee kao tichjaa xi tsjoa tjío kon. Je ndsʼee kixi fitʼale je chjoónle kʼoa tsjoakee, kʼoa je tichjaa tsjoakee kʼoa bexkón je xʼinle. Kui xi bakó nga koa̱n chjí jchatokoán kʼoa jchaxkoán je kjoabixan (Heb. 13:4). w18.12 14 párr. 18, 19

Je én xi Edén tso kui tsoyanile jngo ʼnde jñani “tsjoa sʼe tokoán”, kʼoa nʼio nda bakinle nga kʼoatsakʼin ʼnde jebi, nga̱ nʼio tse tsojmi xi ma chine kisʼe, naskánakoanchon kʼoa nyʼán sʼin tsakatiokao xínkjín je chjota kao cho̱ (Gén. 1:29-31). Je xi ʼndenaxó sʼin faʼatoya nga én hebreo, parádeisos sʼin faʼatoya nga én griego. Jngo enciclopedia xi kʼoatso nga kʼianga kui én jebi kinrʼoé jngo chjota griego, kui kiskaniya jko̱ jngo ʼnde jñani naskánachon, jñani tsín je xi chʼaotjín, jñani tjín je yá xi naskánakjoan xi nkjín koya to bale, jñani faʼa nandá xi tjín tsjetsje kʼoa nga bichókjen ndainandá je barré kao je cho̱ xi antílope ʼmi (Cyclopaedia, xi tsʼe M’Clintock kao Strong; tingósonkoai Génesis 2:15, 16). Jebi kui tsoyaná nga nʼio naskánakoanchon ya ʼndenaxóle Edén. Je Niná jngoo ʼndenaxó kisikatíojin je Adán kao Eva, tonga xijekoanni, alikui tiya tsakationi nga̱ tsín kisitjosonle Niná. Je kʼoa kao ntje̱le kisichaa ʼndenaxó jebi (Gén. 3:23, 24). Alikui tiʼya xi ya tsakationi jñani kisʼejna je ʼndenaxóle Edén, kʼoa kʼiaa kicha nga jaʼai je Jtsínʼio. w18.12 3, 4 párr. 3-5

Je xi xijchá ma tsoyale je ʼndíxtile je xi ndatjín. Kʼianga jekoa̱njchínga je ʼndíxtile koaan je skoéjin jmeni xi mele sʼin. Tsa kʼoasʼin koaitjenngi jmeni xi tsoyale je xijchále, ndajin skoéjin jmeni xi sʼin, tsínjin kjoa jtsaojin kʼoa tsínjin jme xi sikjáojin. Je Jeobá jngoo Nʼai xi nʼio ndasʼin bakóyaná, kʼoa kui xi mele nga ndasʼin kuiyoaa (Is. 48:18). Kuinga bakóyaniná josʼin kjuinkoaa yaoná kʼoa josʼin jchatokoán je xíngiaa. Kʼoatsoná nga kʼoasʼin si̱kjaʼaitsjeen joni je kʼoa nga kʼoasʼiaan jotso je kjoatéxomale. Alikui xi tsonile nga bʼéchjoaná je Jeobá jmeni xi mená sʼiaan, tosaa basenkaoná (Sal. 92:5; Prov. 2:1-5; Is. 55:9). Basenkaoná nga kui chjoejiaan jmeni xi tsjoa bʼé tokoán kʼoa tsjoáʼndená nga kʼoanʼia jmeni xi mená (Sal. 1:2, 3). Alikui jao tjínná nga basenkaoná nga kʼoasʼin nikjaʼaitsjeen josʼin síkjaʼaitsjen je Jeobá. w18.11 19, 20 párr. 7, 8

Nga tosi tonda kʼoasʼin kjuinkoaa yaoná jotjínni xi kixi, alikui kʼoaiʼndee nga je xi ngikʼa kʼoakuitsoná jmeni xi sʼiaan. Kʼianga tsaʼyaa jokjoantjínni xi kixi, tsʼantjaiyaa josʼin tiyoaa kao je miyoná kʼoa kao xíngiaa xi tsín testigole Jeobá ma. Tjínkʼa xi kisasenle kʼoa tjínkʼa xi mai. Tsakui nichxin je xíngiaa, je xi ñatjen mangián skuela kʼoa tsa jeje̱ xi ñatjen nixá kʼoakuitsoná kʼianga sʼuí bʼasje. Jméni xi koasenkaoná nga tsínkui chʼa̱sjee sʼuí xi jtike Jeobá. Xi koasenkaoná kuinga nda katamajinná ánni nga tsín sasénnile Jeobá. Kʼoati koasenkaoná nga chótʼayajiaan jmeni xi tso je xo̱n xi síkasénná je naxinandále Niná tʼatsʼe jñá nroani je sʼuí xi bʼasje chjota. Kʼianga ʼyaa ánni nga tsínkui sʼuí chʼasjeñá, ʼyañá nga kui kʼoatinʼia jmeni xi sasénle Niná (Efes. 5:10). Tsa je Jeobá si̱nʼiotʼaa kʼoa koa̱nkjainná jmeni xi tso je Biblia, alikui chjota kuinókjonlee (Prov. 29:25). w18.11 11 párr. 10, 12

Kʼianga toxijña bʼantjaiya josʼin tiyoaa, tsakui nichxin nʼio si̱kjáojiaan kʼoa ñaki tokui si̱kjaʼaitsjeen. Koanjin kʼoakisʼe kon je José. Tonga ʼndele nga kui sikjaʼaitsjen kjoa xi tífaʼatojin, tosaa tsakʼénele yaole nga kui xi ndatjín kʼoakisʼin. Ninga ndoyá tsakʼejnaʼya, nda kisitjoson je xá xi tsakánele je xi síkuinda ndoyá, tojo kisʼin kʼianga ya kisixákao je Potifar (Gén. 39:21, 22). Tojo koan je José, tsakui nichxin kui kjoa kuitjátojiaan xi tsín ñá kʼoakoa̱nná kʼoéndajiaan. Tonga tsa tsejta koaan kʼoa tsa kʼoénelee yaoná jokji tjen kʼoakoa̱nná nga kui kʼoasʼiaan xi ndatjín, je Jeobá sichikontʼainná (Sal. 37:5). Tsakui nichxin sakʼoa tsín nda sa̱tío tokoán kʼoa tsín ʼyaa jósʼiaan, tonga ngantsjai nichxin nga so̱koná nganʼio, tojo kitso je pastro Pablo (2 Cor. 4:8). Koasenkaoná je Jeobá, ngisaa tsakui títjon si̱kʼéjnaa je xále. w18.10 29 párr. 11, 13

Kʼiatsa jngo chjota ska̱jiaan xi ʼyaxkoaan, jósʼe̱ tokoán kʼiatsa tsín faʼaitsjenle joʼminá kʼoa tsa saʼnda kʼoakuitso nga tsín bexkonná. Bajin sa̱tío tokoán. Ánni. Nga̱ ngatsʼiaa kui xi mená nga katabexkonná xi ngikʼa kʼoa nga chjí kataʼyatokonná (Núm. 11:16; Job 31:6). Nga chjotajée maa, tsakui nichxin si̱kʼatoné choa̱le josʼin mená nga skoe̱konná xi ngikʼa. Xi ijngosani, jmeni xi chon je sonʼnde tsakui nichxin kui xosikaoná nga kui si̱metokoán nga nʼio kataʼyaná. Kʼia tsa kʼoasʼin si̱kjaʼaitsjeen toñájin kuitjongʼaa, ʼndele nga je Nʼainá xi tíjna ngʼajmi kuitjongʼa (Apoc. 4:11). w18.07 7 párr. 1, 2

Alikui tokʼoamaná nga je Na̱i kʼoa kao ánkje tsʼen fayojin nga énndiso nchja̱ je xi xángʼa tjínle (1 Tim. 4:1, 2). Je xi ngisa tjínle jée jé xi nyatítjonle religión ndiso. Ánni. Nga̱ je chjota xi makjainle je énndiso xi tsoya kui kʼoasʼín jmeni xi jtike Niná, kʼoa jebi alikui kuinyakao nga koa̱n koatio ngantsjai nichxin (Os. 4:9). Kʼoakisʼin je chjota xi nyatítjonle religión kʼianga tsakʼejna je Jesús, totsakʼanachale chjota. Kuinga i̱ kitsonile Jesús: “Ma̱xóño jon, chjota skribano kao chjota fariseo, nga jaonkjaínño. Nga̱ kʼoasʼin bimajion ndáchikon kʼoa sonnangi, nga si̱kinjao jngo chjota xi koaitʼano. Kʼoa nga jefitʼano, jon xonʼiao nga jaoya kʼoakji bakinle je Gehena [nga tondiaa jchajin] tikʼoani jon” (Mat. 23:15, TNM). Je Jesús kʼoakitsole nga ya mangóson josʼín je Na̱i nga kʼien síkʼien (Juan 8:44). w18.10 7 párr. 5, 6

Je Jesús i kitso: “Tʼetsjoaotakon, kʼoa tʼejngotakon, nga̱ je chjíno nʼio tse koa̱n ya ngʼajmi. Kʼoasʼin kitjenngikontrale je xi kinchjaya tʼatsʼe Niná, xi títjon tjíono” (Mat. 5:12). Kʼianga kjoañʼai kinikjaʼá je chjotatjenngile Jesús kʼoa kʼoasʼin kisʼenele nga tsín tikatatsoyasonni, tsjoa kisatio kon kʼianga jekitjoni ya ngixko̱n Sanedrín. Ningalani kjoañʼai kinikjaʼá, tsjoa kisatio kon nga̱ “kichʼasjengi xi tʼatsʼe jaʼaínle Jesús” (Hech. 5:41). Nichxin xi tiyoaa ndʼaibi, ñá xi choʼndale Jeobá maa, kʼoati kao kjoatsjoa chókjoajinná kʼianga kjoañʼai chjaʼá xi totʼatsʼe jaʼaínle Jesús kʼoa tsa kʼiaje̱ nga nʼio tse kjoa bitjatojiaan (Sant. 1:2-4). Alikui tsjoachaa nga kjoañʼai nikjaʼáná. Tonga tsa kixi kjuintʼalee je Jeobá kʼianga kjoa bitjatojiaan, jé koasenkaoná nga ska̱ná. Kʼianga ndasʼin biyoaa ngixko̱n “Niná xi tsjoa tjínle”, tsjoa satío tokoán ninga chjota fitjenngikená, ninga koatiochjoa je xi xíngiaa mani, ninga chʼin tjínná kʼoa ninga jetjínná nó (1 Tim. 1:11). w18.09 21 párr. 18-20

Nga nʼio ñʼai chon nichxin xi tiyoaa ndʼaibi, “tsee kjoañʼai chjaʼá”, nkjín chjota xi tsín nda satío kon nga kʼoama, nkjín xi tsín timenile koatiokon (2 Tim. 3:1-5). Nga xki̱ nó tsʼato 800,000 chjota síkʼien yaole, xi tsonile nga jngo biya nga xki̱ 40 segundo. Saʼnda tjín ndsʼee xi kʼoati satío kon kʼoa saʼnda síkʼien kʼa yaole. Nichxin xi tiyoaa ndʼaibi, nʼio nkjín ndsʼee xi tse kjoa tjíofaʼatojin kʼoa machjén nga koakolee kjoatjaocha kʼoa si̱nʼioá kon. Tjínkʼa xi chjota fitjenngike kʼoa xi ʼyasin. Kʼoa tjínkʼa xi chʼaosʼin nikʼaxki̱ ya tʼaxále, kʼoa tsa nʼio bijtajinle nga nkjín ora síxáson kʼoa tsa chóbekaole je xá xi sʼín, kʼoa tjínkʼa xi kjoa tjínle xi kao familiale, tsa je chjoónle kʼoa tsa xʼinle tsín kotʼaya je Énle Niná, kʼoa chʼaosʼin síkʼaxki̱ xínkjín. Kui ngayeje jebi xi síkijtajin je ndsʼee kʼoa tsín tinda satíoni kon. w18.09 13 párr. 3, 5

Je xi xijchá ma ñatjen síxá kao je Jeobá kʼianga kʼoatsole je xtile nga xále Niná katasʼín. Kʼianga jefi nichxin, nkjín xti xi to xále Niná sʼín kʼoa xin ʼnde fitsjoánganʼio. Tjínkʼa xi misionero ma, xi precursor sʼin síxá ya ʼnde jñani ngisa machjén je xi tsoyason kʼoa tjínkʼa xi ya Betel tsjoánganʼio. Je xi xijchá ma, ningalani tsín kjitʼa be je xtile, kʼoatsole nga tosi tonda katasíxále Niná. Kuinga kʼoatsoni nga̱ kʼoati tsjoa satío kon kʼianga kui títjon xále Niná tjíosʼín je xtile. Tsakui nichxin kʼoati satío kon je xi xijchá ma jokisʼe kon je Ana, kʼianga kʼoakitso nga tsjoá je Samuel, je ʼndíle, kʼianga je Jeobá sixále. Machjén nga sikjaʼaitsjenjin je xi xijchá ma nga nʼio tse kjoanda tjenkao kʼianga kʼoasʼin nixákoaa je Niná (1 Sam. 1:28). w18.08 24 párr. 4

Je Jesús alikui kʼoakitso nga ñaki tsín koa̱n tjoéle kjoanda jebi jngo xi nyiná. I kitso: “Jó tondano jon xi yo̱ma̱, nga̱ tsaon nío je kjoatéxomale Niná” (Luc. 6:20). Kʼianga kʼoakitso je Jesús, ali tsakuijin xi kitsonile nga kjuinrʼoéle ngatsʼi chjota xi ma̱ tjío kʼoa nga sʼe̱le kjoanichikontʼain. Kʼianga nichxinle Jesús nʼio nkjín chjota xi ma̱ tjío xi tsín chjotatjenngile koanni. Jebi kui tsoyaná nga tsínkui xi kuitsoni tsa tjínle tao̱n kʼoa tsa mai jngo chjota kʼianga miyole Jeobá koa̱n. Je ndsʼee kao tichjaa tsjoakee je Jeobá kʼoa ñaki kao ni̱ma̱le síxánile. Tjínkʼa xi nyiná kʼoa tjínkʼa xi ma̱ tjío. Je Biblia itso: “Je chjotanyiná [...]. Ali sínʼiotʼatakonjin je kjoanyinábe xi tsín kʼoatjín. Katasínʼiotʼakon Niná xi tíjnakon” (1 Tim. 6:17-19). Je Niná kʼoatsole ngatsʼi je choʼndale, ni nyiná kʼoa ni ma̱ tjío, nga xkón tíjna tsa tao̱n tsjoake koa̱n (1 Tim. 6:9, 10). Kʼianga kʼoasʼin ʼyatokoán je ndsʼee josʼin bekon je Jeobá, alikui kui mangínñá tsa tjínle tao̱n kʼoa tsa mai. w18.08 10, 11 párr. 11, 12

Mená nga koakolee je Jeobá nga bʼailee kjoanda nga ya naxinandále tiyojiaan. Je xi ngisasa ndatjín xi kinʼia kuinga tsakʼaitʼalee yaoná. Chʼasjengiñá je xi chʼaotjín. Xi ijngosani, tsjoachañá kʼoa ʼyaxkónñá je ndsʼee, nga̱ kʼoati choʼndale Jeobá mani (Rom. 12:10). Je Biblia kʼoatso nga tsín tsjiónkon Jeobá je naxinandále (Sal. 94:14). Alikui jao tjínná nga bitjoson én jebi. Ningalani kuiyá alikui sichajinná Jeobá (Rom. 8:38, 39). Je Biblia itso: “Tsa biyochonnía axo biyanía, tsʼe nía Nainá” (Rom. 14:8). Nʼio tsjoa maná nga kjoaʼaí je nichxin kʼianga sikjaʼáyanile Jeobá je miyole xi jekʼien (Mat. 22:32). Nichxin xi tiyoaa ndʼaibi jenʼio tse kjoanichikontʼain títsjoána je Jeobá. Tojo tso je Biblia, “tsjoa tjínle je naxinandá xi je Jeobá Ninále, je naxinandá xi je kiskoejin nga tsʼe koa̱n” (Sal. 33:12). w18.07 26 párr. 18, 19

Tjínkʼa chjota xi kʼoatso nga tiʼndená nga ñá kʼoakuixoán jmeni xi mená sʼiaan tsa tsjoáʼndená je kjoafaʼaitsjenná. Tsakui nichxin kui síkjaʼaitsjen jmeni xi kitsole Pablo je chjota xi Corinto tsʼe tʼatsʼe tsojmi xi chinee, nga i̱ kitso: “Jmé chjíle kjoandaína tsa kʼoasʼin sʼe̱le kjoañʼai xi totʼatsʼe kjoafaʼaitsjenle xi kjaʼaí” (1 Cor. 10:29). Kjoaixi nga tiʼndená nga ñá chjoéjiaan jmeni xi chótʼayá kʼoa jme xá xi sʼiaan. Tonga kuenta sʼiaan nga tsín tsa totiʼndená ngayeje kʼoa nga sakʼoa likui nda bichómani jmeni xi chjoejiaan, tojo tso je texto xi kamaxkia ndʼaibi. Jebi basenkaoná nga ʼyaa kʼianga tsínkui xi nʼio chjíle jmeni xi toñá mandosinná. w18.04 10 párr. 10

Tsakui nichxin kʼoakuitso jngo chjotale Cristo nga je Niná bexkón, tonga tsakuini xi chʼaotjín kʼoatísʼín (Jud. 11). Tsakui nichxin nʼio tsoyason kʼoa fi je kjoajtín, tonga kʼoani tikui tíkaníya jko̱ je kjoachajngi, je kjoaxkaiʼa, kʼoa tsa saʼnda jtikeni jngo ndsʼee (1 Juan 2:15-17; 3:15). Tsa tosi tonda kui sikjaʼaitsjen chanjin jée ska̱jin. Tsakui nichxin likui ʼya xi be jmeni xi nikjaʼaitsjeen kʼoa jmeni xi nʼia, tonga je Jeobá be ngayeje kʼoa be tsa je timangíntʼalee kʼoa tsa mai (Jer. 17:9, 10). Ninga kʼoalani, je Jeobá alikui kʼoasʼin síkjaʼaitsjen nga tsín tikoa̱nndayañá. Kʼiatsa be nga jetinikjinlee, i tsoná: “Nroanrʼoe ijngokʼanáo”. Je Jeobá kui xi mele nga kontra kuiyolee jmeni xi jtike kʼoa ngisaa kʼianga kui bixkantʼakoaa xi chʼaotjín (Is. 55:7). Tsa kʼoasʼiaan, koasenkaoná kʼoa tsjoánganʼioná nga tsín kuitjátoné je kjoatéxomale, nga tsínkui si̱kjaʼaitsjeen kʼoa nga tsínkui kʼoasʼiaan jmeni xi jée tjenkao (Gén. 4:7). w18.07 18 párr. 5, 6