Abril

Tjínkʼa choʼndale Niná xi kjoa jaʼatojin xi tsínkui koyale tsakai tsa kʼoakoa̱n. Jolani Jacob, je nʼaile kʼoakitsole nga je katabixankao jngo xtiyánchjínle Labán xi xínkjín mani xi kʼoati je Jeobá bexkón kʼoa kʼoakitsole nga tse kjoanichikontʼain tsjoále Jeobá (Gén. 28:​1-4). Je Jacob kisitjoson kʼoa ki jñani tsʼe Labán, jao koanni xtiyánchjínle Labán xi Lea kao xi Raquel tsakʼin. Je Jacob jé koantsjoake Raquel, je tsoti xi maʼndí. Je Labán kʼoakitsole Jacob nga ñato nó sixákao nga koa̱n kuixankao je Raquel (Gén. 29:18). Tonga tsínni kʼoakoan josʼin tíkoyale tsakai Jacob, nga̱ je Labán jé kitsjoale Lea nga chjoónle katamani. Nga jngo xomana jejaʼato, kʼoakitsole nga koa̱n kuixankao je Raquel tonga tjínnele ngi ñato nó sixákao (Gén. 29:​26, 27). Je Labán kʼoati totsakʼanachale je Jacob kʼianga negocio kisʼin, 20 nó nga totaon tsabe (Gén. 31:​41, 42). w23.04 15 párr. 5

ʼYáni xi koa̱n si̱jélee nganʼio tsa ba tjín tokoán kʼoa tsa kjoafaʼaitsjen machjénná. Ñá xi choʼndale Jeobá maa ʼyañá nga toje Jeobá xi koasenkaoná. Je Jeobá mele nga kjitʼa kʼoétsʼoalee, nga̱ itsoná: “Tʼetsʼoao ali nichajinjion ngantsjai” (1 Tes. 5:17). Koaan kʼoétsʼoalee kʼoa si̱jélee kjoafaʼaitsjen tojmeni xi sʼiaan (Prov. 3:​5, 6). Nga nda chjota je Jeobá koaan nkjín kʼa kʼoétsʼoalee. Je Jesús tsabe nga nʼio chjí be je Jeobá kʼianga bʼetsʼoalee. Nga kje faʼaijin i̱ Sonʼnde, tsabe nga kinrʼoéle Jeobá je choʼndale kʼianga tsakʼétsʼoale kʼoa tsabe josʼin tsakasenkao, jolani je Ana, David, Elías kao xi ngikʼa (1 Sam. 1:​10, 11, 20; 1 Rey. 19:​4-6; Sal. 32:5). Kuijin nga kʼoakitsonile Jesús je chjotale nga ntsjaintsjai katabʼétsʼoa (Mat. 7:​7-11). w23.05 2 párr. 1, 3

Kitsokjonke Jeobá je naʼmitítjon Jehoiadá, kʼianga je tsotile Jezabel tsakatéxoma xi Atalía tsakʼin ya naxinandá Judá, je Jehoiadá tsakakó nga tsokjónke Niná. Je Atalía nʼio tsʼen koan kʼoa jé koanmele tsakatéxoma, kuinga kisikʼienni je xtile rey xi xtindaile mani (2 Crón. 22:​10, 11). Tonga kinjengi jngo xti jebi, xi Jehoás tsakʼin, nga̱ jé tsakʼasjentjai Jehoseba, je chjoónle Jehoiadá. Jé Jehoseba kao Jehoiadá kisikʼéjnaʼma, kʼoasʼin kitsjoanganʼio nga tsín kichangi je xi rey koan xi ya ntje̱le David jaʼaini. Je Jehoiadá kixi kitʼale Jeobá kʼoa tsín je Atalía kitsokjonle. Kʼianga ñato nóle Jehoás tsakakó ijngokʼa je Jehoiadá nga kixi kitʼale Jeobá. Tsakʼéndajin jmeni xi kisʼin, tsa nda kuichomani jmeni xi tsakʼéndajin rey koa̱n je Jehoás xi ya jaʼaini ntje̱le David, tonga tsa tsín nda kuichomani jmeni xi sʼin si̱kʼienjin. Je Jeobá kisichikontʼain nga ndasʼin kichomani jmeni xi tsakʼéndajin. w23.06 17 párr. 12, 13

Je rey Nabucodonosor tsakui nichxin kʼoasʼin kisikjaʼaitsjen nga kontra tíbʼejnale je Daniel kʼoa nga tosa katanikʼien. Tonga je Daniel alikui kitsokjon, kitsoyaa josʼin tsoyanile je nijñá xi tsakʼaile je rey. Jmé xi tsakasenkao je Daniel nga nʼiojin koan jokjitse tsakʼejna. Je xi tsakasenkao kuinga nda tsakʼinyale Énle Niná nga sʼa xti (Deut. 6:​6-9). Je Daniel nʼio nda tsabe jotso je xi te kjoatéxoma kʼoa kʼoati tsabe jmeni xi tsín koa̱n ski̱ne je chjota israelita (Lev. 11:​4-8; Dan. 1:​8, 11-13). Kʼoati kisʼejinle je kjoa xi tsakatiojin je chjota xi tsín kisitjoson je kjoatéxomale Niná (Dan. 9:​10, 11). Ñaki tsakʼéjngo kon Daniel nga je Jeobá tsakasenkao kʼoa nga kisikasén je ánkjele nga kitsjoanganʼiole kʼianga tse kjoa jaʼatojin (Dan. 2:​19-24; 10:​12, 18, 19). w23.08 3, 4 párr. 5, 6

Je Rebeca nʼio chjine koan kʼoa ñaki tjínjngo kon jmeni xi kisʼin (Gén. 24:58; 27:​5-17). Tonga kʼoati tsakakó kjoaxkóntokon kʼoa kisitjoson (Gén. 24:​17, 18, 65). Tsa nangitokon koai̱n joni Rebeca kʼoa tsa si̱tjosonlai je xi tsjoáxále Jeobá nga bándiaaná, nda choa̱ kʼoéjnalai yaniʼyali kao xi tjío jinjtín. Machjén nga nangitokon koa̱n ngatsʼi chjotale Cristo. Je Ester kixi kitʼale Niná kʼoa nangitokon koan. Tobʼelañá, kʼianga reina koan alikui ngʼakon koan. Kinrʼoé jme xi kitsole je Mardoqueo, xi primole koanni, kʼoa kisitjoson jme xi kitsole (Est. 2:​10, 20, 22). Kʼoati koa̱n chjénngilai Ester. Koaan si̱jái kjoafaʼaitsjen kʼoa titjosuin jokʼuínli (Tito 2:​3-5). Ijngosa koya josʼin tsakakó Ester nga nangitokon koan kuinga ninga nʼio naskánakisʼe, alikui kui tsakʼasjengʼani yaole (Est. 2:​7, 15). w23.12 19, 20 párr. 6-8

Alikui koa̱n nga tokui si̱kjaʼaitsjen ʼndeʼndee jme jée xi tsakijnyaa. Tsa kʼoakjimaniná jme xi kinʼia, tsa jetsakʼeyanajmílee xi chjotajchínga sʼin tjío kʼoa tsa tsín tikʼoatinʼiañá, ñaki kʼoakʼoé tokoán nga jekisichatʼaná Jeobá (Hech. 3:19). Nga jekʼoakanʼia jebi, je Jeobá kui xi mele nga tsín tijée kjoáneñá yaoná, nga̱ be nga sikiʼaonná tsa tosi tonda kui kʼoéjinkoaan (Sal. 31:10). Tsa toba sʼe̱ntsjainá, kjuinroajenjin tokoán kʼoa tsínjin tije Jeobá si̱xánilee (2 Cor. 2:7). Kʼiatsa to jée fane ʼndeʼndee yaoná si̱kjaʼaitsjenjiaan josʼin tíjna nga síchatʼaná je Niná (Sal. 130:4). Kʼianga ñaki ni̱ma̱ná nroajinni nga kʼoamaniná je jéená, je Jeobá sítjoson nga i̱ tso: “Alikui tikui kjoaʼaítsjennina je jéele” (Jer. 31:34). Jebi kui xi tsonile nga tsín tikui síkjaʼaitsjenni Jeobá jmeni xi kinʼia kʼianga jesíchatʼaná. Alikui chʼao kʼoé tokoán kʼiatsa tsín jme xá sʼe̱nená ya jinjtín. Je Jeobá jekisichatʼaná je jée xi tsakijnyaa kʼoa machjén nga kʼoakʼoé tokoán tsanda ñá. w23.08 30, 31 párr. 14, 15

Kʼianga kisʼe chʼin COVID-19 nkjín énndiso kisʼe. Nga tsangíntjenngiaa je kjoafaʼaitsjen xi kitsjoaná naxinandále Jeobá alikui kui kjoa kitjatojiaan je kjoa xi tsakatiojin je chjota xi kui kisisin je énndiso xi kisʼe (Mat. 24:45). ʼNdele nga totjín totjenni kjoa xi nichxinná si̱kʼayalee, tosa kui kʼoailee kjoandosin jmeni xi ngisa chjíle (Filip. 1:​9, 10). Kʼianga tokui nikʼayalee nichxin jmeni xi tsín nʼio chjíle alikuini kui kʼoanʼia jmeni xi nʼio tjínle kjoandosin. Tobʼelañá, tsa tokui kuenta sʼiaan je xáná, nga bichaa, nga ʼyoá, kʼoa nga bʼetsaojiaan tokuijin si̱kʼayalee nichxin (Luc. 21:​34, 35). Je chjota tokui fáoyani jmeni xi chon sonʼnde kʼoa kao kjoasi xi tjín. Kuinga si̱kuindanilee yaoná nga tsín kʼoati sʼiaan tsanda ñá. Alikui koa̱n kui si̱kjaʼaitsjeen kʼoa tsakui cho̱bayañá. Kui che̱n jebi síchjén je Na̱i tojoni nga tsín tikixi kjuintʼanilee je Jeobá. w23.07 16, 17 párr. 12, 13

Nʼio chjí ʼyaa ñá xi choʼndale Jeobá maa nga nikjaʼaitsjenyá Kjoabiyale Cristo nga xki̱ nó. Tokui xi kʼoakitso Jesús nga si̱kjaʼaitsjenyá nga xki̱ nó (Luc. 22:​19, 20). Kataʼyala kʼa ánni nga nʼio choyanilee nichxin jebi. Nga nikjaʼaitsjenyá Kjoabiyale Cristo kui nikjaʼaitsjenjiaan jokji chjíle nga kisikasén Niná je xi tsakʼéchjíntjainá. Kʼoati bʼailee kjoanda je Jesús nga kitsjoa kjoabijnachonle (2 Cor. 5:​14, 15). Nkjín ndsʼee bichó nga kui nichxin kʼoa bʼainganʼiongañálee xíngiaa (Rom. 1:12). Nga kui nichxin nkjín ndsʼee xi jekisikatío xále Niná bichó. Nga nda chjoeyaa ndsʼee jebi nkjín xi je Jeobá síxá ijngokʼanile. Kʼoa chjota xi bichó nga kui nichxin, nga be jmeni xi ma, kʼoati mamele kotʼaya Biblia. Nʼio choyalee nga kui nichxin nga̱ ʼyañá nga kʼoati kʼia koatiojtín ngatsʼi ndsʼee xi tjío jngo tjíjtsa Sonʼnde. Kuinga nʼio chjí ʼyañá nga faʼaitsjenya Kjoabiyale Cristo. w24.01 8 párr. 1-3

Nga si̱kjaʼaitsjenjiaan jokji kjoama̱ tsakʼéngi je Jeobá kao Jesús nga tsakʼéchjíntjainá, ngisaa sʼe̱jngo tokoán nga nʼio tsjoakená nga jngó jngoá (Gál. 2:​20, TNM). Kuinga tsjoakená nga kʼoakisʼinni. Nʼio chjí bekon Jeobá je Jesús, tonga kitsjoaʼnde nga kjoañʼai tsakjaʼá kʼoa nga kʼienntjainá. Je Jeobá ñaki bakó nga tsjoakená (Jer. 31:3). Jé Jeobá xi kʼoasʼin koanmele nga naxinandále tiyojiaan (tingósonkoai Deuteronomio 7:​7, 8). Alikui ʼya kʼoa alikui jme xi kʼoechjoa nga tsjoake koa̱nná Jeobá (Rom. 8:​38, 39). Jósʼe tokuin kʼianga kui nikjaʼaitsjenjin jebi. w24.01 28 párr. 10, 11

Je chjotale Cristo xi ya ngʼajmi koai nʼio chjí be je kjoachoya xi tjínle. Tobʼelañá, kʼianga nó 1991, i kitso je ndsʼee Frederick Franz: “Ñaki tjínjngoo tokoán nga kuitjoson jmeni xi tichoyalee nga jngó jngoá xi 144,000 mañá, saʼnda tsín machoyaná ndʼai jokji kjoanda sʼe̱ná”. “Nʼio chjí ʼyaa nga kui kjoachoya tjínná kʼoa ngisaa chjí ʼyaa ninga sa tse sa tse kjoaʼato [ . . . ]. Nga̱ tsín tsa toxitsjoajin nga tichoyá”. Ninga ya ngʼajmi tjínná kjoachoya kʼoa ninga i̱ Sonʼnde choyalee nga kuiyoaa, tsjoa sʼe tokoán nga kui kjoanda tjínná. Tosi tonda kʼoakʼoé tokoán nga kuitjoson jmeni xi choyalee. w23.12 9 párr. 6; 10 párr. 8

Ya nditsinle ndʼianajño jngo sonxta kisʼejna jñani kisakale cho̱ je Jeobá (Éx. 27:​1, 2; 40:29). Ningalani cho̱ kitsjoatʼa, alikui tondiaa kichatʼa je jéele chjota israelita (Heb. 10:​1-3). Nga cho̱ tsakʼaitʼale Niná ya ndʼianajño, kui kitsoyanile jmeni xi kʼoaitʼale Niná nga koa̱nskanni tonga xi tondiaa sichatʼa jéele chjota. Je Jesús be nga kui xá kisikasénni Jeobá i̱ Sonʼnde nga kʼienntjainá (Mat. 20:​28, TNM). Kʼianga kisʼenngindá Jesús kʼoasʼin tsakakóni nga jetíjnanda nga ñaki toje Jeobá sixále (Juan 6:38; Gál. 1:4). Yaa koanngóson joni tsa ya sonxta kitsjoatʼa yaole. Je sonxta jebi kui tsoyanile jmeni xi mele Jeobá, kʼoa je xi koanmele kuinga kitsjoatʼa kjoabijnachonle je ʼNdíle. Je Jesús tojngokʼakjoán kʼienntjainá nga koa̱n tondiaa jchatʼa je jéená tsa koa̱nkjainná xi tʼatsʼe (Heb. 10:​5-7, 10). w23.10 26 párr. 10, 11

Tsa toñá alikui koa̱nná chʼa̱sjentjé yaoná tʼatsʼe jée kao kjoabiya (Sal. 49:​7, 8). Kuinga kitsjoaʼndeni Jeobá nga kʼien ʼNdíle nga kʼoasjentjainá. Kʼianga si̱kjaʼaitsjenjiaan jmeni xi kisʼin Jeobá kao Jesús xi tʼatsaan ngisaa chjí jchaa nga tsakʼéchjíntjainá. Kʼianga tsakajngijée Adán alikui tikoan tsakʼejnani ngantsjai nichxin. Kʼoa kʼoati kisicha kjoanda jebi ngatsʼi ntje̱le. Kʼianga koanchjíntjai jmeni xi kisicha je Adán, kui kjoabijnachonle Jesús kitsjoa. Jokji tse tsakʼejna Jesús i̱ Sonʼnde “likui tsajngi jée, ni kinchjajin énchʼanacha” (1 Ped. 2:22). Kʼianga kʼien Jesús chjotatsjení, josʼin chjotatsje je Adán kʼianga kje bajngijéejin, kuinga koan kisijndani kjoabijnachon xi kisicha Adán (1 Cor. 15:45; 1 Tim. 2:6). w24.01 10 párr. 5, 6

Kʼianga jejaʼáyanile Jesús kʼiaa jaʼasʼen ya ʼnde xi nʼio tsje xi tsʼe yo̱ngo̱le Niná. Nga jefi nichxin kʼoati ya fi je chjotale Cristo xi kitjoejin nga ya ngʼajmi koai. Ngisaa tse kjoanda tjenkao josʼin tjínndajinle Jeobá nga jchaxkón ndʼaibi nga̱ yaa yʼangini nga tsakʼéchjíntjainá je Jesús, kʼoa nga naʼmitítjon sʼin tíjnaná. Je ʼnde xi nʼio tsje xi kisʼejna ya naxinandá Israel to chjota tsakʼénda jñani jaʼasʼenkao je naʼmitítjon je njínle cho̱, tonga je Jesús yaa jaʼasʼen jngo ʼnde xi nʼio tsje, xi tsonile ya ngʼajmi ya ngixko̱n Jeobá. Yaa kichokasejna ngixko̱n Niná kʼianga kitsjoatʼa jokji chjíle je kjoabijnachonle, “jméni nga tsakjaʼáxinsíni je jée nga kitsjoatʼa yaole” (Heb. 9:​24-26). Nga kʼienntjainá je Jesús, koaan jchatʼa je jéená, koaan jchaxkoán ngatsʼiaa Jeobá ya yo̱ngo̱le, ni ya ngʼajmi tjínná kjoachoya, kʼoa ni i̱ Sonʼnde choyalee nga kuiyoaa. w23.10 28 párr. 13, 14

Si̱kjaʼaitsjeen jme xi tísʼín Jesús ya ngʼajmi nga Rey sʼin tíjna kʼoa nga Naʼmi sʼin tíjna. Totʼatsʼe nga ma nichriantʼalee Niná kʼoa nga ma bʼetsʼoalee nga nijélee nganʼio ánni nga “koa̱nsjaisíniná kjoanda xi koasenkaoná kʼia nga koa̱nchjénná” (Heb. 4:​14, 15). Nyaon nyaon si̱kjaʼaitsjenjiaan jmeni xi tísʼín Jeobá kʼoa jmeni xi tísʼín Jesús xi tʼatsaan. Nga ʼyaa nga nʼio tsjoakená Jeobá kao Jesús tosi tonda kao kjoatsjoa si̱xálee (2 Cor. 5:​14, 15). Kʼianga binyakoaa chjota nga testigole Jeobá katama kʼoa nga chjotatjenngile Cristo katama kʼoasʼin bʼainilee kjoanda Jeobá kao Jesús jmeni xi tjíosʼín xi tʼatsaan (Mat. 28:​19, 20). Kʼoakisʼin je pastro Pablo. Koanjinle nga kui xi mele Niná “nga ngatsʼi chjota kuitjontjai, kʼoa nga kuichonrʼoe xi kjoakixi” (1 Tim. 2:​3, 4). w23.10 22, 23 párr. 13, 14

Nʼio nichjén texto jebi kʼianga ʼmiyasoán, nga kʼoaʼmilee chjota jokoa̱nchon kʼianga jeʼndenaxó koa̱n Sonʼnde. Jósʼin kuinyakoaa je chjota nga katamakjainle nga kuitjoson kjoaixi jmeni xi tso ya Apocalipsis 21:​3, 4, kʼoa jméni xi sʼiaan nga tosi tonda je Jeobá si̱nʼiotʼaa kʼoa nga ñaki sʼe̱jngo tokoán nga kuitjoson jmeni xi tso. Nkjín koya jmeni xi bakóná nga sitjoson kjoaixi Jeobá jmeni xi tso. Je Jeobá kʼoatso nga ʼndenaxó koa̱n Sonʼnde kʼoa je texto xi fisani kui tsoyaná nga kʼoakoa̱n kjoaixi. Itso: “Je xi tíjnason yáxile, kitso: Koeni an sichjotse ngayije. Kʼoa kitsona: Chjí, nga̱ je énbi ndaní, kʼoa kjoakixiní. Kʼoa je kitsona: Jekʼoakisʼe. An nía je Alfa kʼoa je Omega, xi títjon kʼoa xi fetʼa” (Apoc. 21:​5, 6a). w23.11 3 párr. 3-5

Jngo koya xi bakó je ndsʼee nga kʼoasʼin síkjaʼaitsjen josʼin síkjaʼaitsjen Jeobá kʼiaa nga síkuinda jokjoan najño xi bʼakjá kʼoa jobatío je ntsja̱jko̱. Me tongatsʼi chjota xi najño sínda xi tsín je Jeobá bexkón kʼoa kui kʼoasʼín xi kjoajndí tjenkao. Kuinga kui najño síndani xi sʼeyoyanʼio je chjotaxʼin kʼoa jo yánchjín sʼin matsen. Jngo ndsʼee xi sʼa xti xi kui choa̱le Jesús fitjenngi kuenta sʼín je kjoafaʼaitsjen xi tsjoá je Biblia kʼoa jofayo je ndsʼee xi nda choa̱ batío. Koaan i̱ tso xi sikjaʼaitsjenjin: “A kosonnile jokjoan najño xi bʼakja kʼoa a kuenta sʼian josʼin síkjaʼaitsjen xi ngikʼa. A bakó jokjoan najño xi bʼakja nga Niná tisixále” (1 Cor. 10:​31-33). Kʼianga nda síkjaʼaitsjen je xi sʼa xti, tsjoa sʼe kon Jeobá kao je ndsʼee. w23.12 26 párr. 7

Nichxin kjoatse, je “rey xi sur tsʼe” tsakʼetʼale je choʼndale Niná (Dan. 11:40). Tobʼelañá, kʼianga kisʼejna je Kjoajchántse xi títjon kao xi majaoni, nkjín ndsʼee xi ndoyá kinikatíoʼya nga tsín ki kjoajchán kʼoa kʼoati tsakichonsje ya ndʼiaskuela je xti kʼianga tsín kisʼin saludar je bandera. Tonga nichxin xi tiyoaa ndʼaibi nkjín koya josʼin tíchotʼayakao je ndsʼee tsa kixi tjíofitʼale je Chjotaxále Niná. Tobʼelañá, kʼianga tosʼa bʼetsoma je chjota xi xá mele tjoé, tsakui nichxin jngo xi koa̱nmená kʼoainganʼiolee. Ninga tsínkjoan koanngín sʼiaan votar tonga tsakui nichxin kʼoasʼin si̱kjaʼaitsjeen nga je katanjele je xi sasénná. Kʼianga ñaki kixi kjuintʼalee je Niná machjén nga si̱kuindaa yaoná jmeni xi nʼia, josʼin nikjaʼaitsjeen kʼoa jotjío je tokoán (Juan 15:​18, 19). w23.08 12 párr. 17

Machjén nga kjuintjenngiaa kjoafaʼaitsjen jebi kʼianga so̱koná kjoabijnachon: “Tókao, jméni nga kʼoasʼin chjoésínio kjoatjao” (1 Cor. 9:24). Je Jesús i kitso: “Tikuindao yaono nga tsín tsa kui ai ska̱le ni̱ma̱no kao kjoachi̱nga̱ kao kjoachʼi̱, kʼoa kao ngayije kjoa xi ai xi tsʼe i̱ sonʼndebi” (Luc. 21:34). Jmeni xi tso texto jebi kao xi kjaʼaínile koasenkaoná nga jchaa jmeni xi tinʼia kʼoa nga si̱ndayaa yaoná nga kuichotjenngiaa je kjoabijnachon xi tsínkʼia fetʼa. Nga je Jeobá koasenkaoná ñaki tjínjngoo tokoán nga kuichotjenngiaa kjoabijnachon xi tsínkʼia fetʼa (Is. 40:​29-31). Kuinga machjénni nga tosi tonda je Jeobá si̱xálee. Kʼoasʼiaan jokisʼin je pastro Pablo nga tsakʼénele yaole josaʼnda nga kitjoéle je kjoanda xi kiskoyale (Filip. 3:​13, 14). Ñá xi tjínnele kʼoénelee yaoná kʼoa je Jeobá koasenkaoná nga kuichotjenngiaa je kjoabijnachon xi tsínkʼia fetʼa. Koasenkaoná nga kuitjosonná je xá xi kjinená kʼoa nga chja̱ʼaxinlee yaoná jmeni xi síkiʼaonná. Nga je Jeobá koasenkaoná, chókjoajinná je kjoa xi kuitjátojiaan kʼoa sʼeená je kjoabijnachon xi tsínkʼia fetʼa. w23.08 31 párr. 16, 17

Kʼianga 12 nóle je Jesús yaa kikao xijchále ya Jerusalén nga ki je sʼuí xi xki̱ nó bitjo (Luc. 2:​46-52). Kʼianga jetjíonroani, je José kao María alikui tsabe tsa tsín ya tjenkao je Jesús. Je José kao María tjínnejinle nga nda kisikuinda tsakai Jesús kao xtindsʼe̱ xi ngikʼa. Kʼianga jekoansjaile jñani tíjna, i kitsole: “Ánni nga kʼoakinikaosíninajin”. Je María kʼoakitsole nga nʼio kisikjáojin nga tsabe nga tsín ya tjenkao. Ninga kʼoalani tsakʼinle je Jesús alikui jokitso, tosaa tsakakóle kjoaxkóntokon je xijchále kʼoa tosi tonda kisitjosonle. Tsa sʼa xti, a sakʼoa ñʼai mali nga nitjosonlai xijcháli. Tsa sakʼoa tsín nda sʼín kʼoa tsa tsín majinle jotjín tokuin. Jmé xi koa̱n sʼiain. Kuenta tʼiain jósʼe kon je Jeobá. Je Biblia kʼoatso nga nda sʼe kon je Niná kʼianga sítjosonle xijchále je ʼndíxti (Col. 3:20). Je Jeobá be nga sakʼoa tsín majinle xijcháli jotjín tokuin kʼoa tsa sakʼoa síkʼatone choa̱le jmeni xi tsoli. Ninga kʼoalani, tsa tosi tonda si̱tjosonlai xijcháli nda sʼe̱ kon je Jeobá. w23.10 7 párr. 5, 6

Tsa kʼoakuitsoná xi ñatjen mangián skuela nga machjén kʼianga kʼoainganʼiolee je xi tixʼin xínkjín kʼoa tsa xi tiyánchjín xínkjín matsjoakeni, koa̱njin kʼoakʼuínlee nga ʼyaxkoán josʼin síkjaʼaitsjen nga jngó jngó chjota (1 Ped. 2:17). Tsa kʼoakʼuínlee, tsakui nichxin tsjoáʼndená nga kʼoéyanajmílee jmeni xi tso je Biblia. Tsa ʼya xi kʼoakuitsoná nga tsín sasénle josʼin makjainná, si̱kjaʼaitsjeen ánni kʼoatsoni. Kʼiatsa jngo xi ñatjen mangián skuela kʼoakuitsoná nga tsín ndatjín nga tʼatsʼe Niná makjainná, alikui koa̱n kʼoasʼin si̱kjaʼaitsjeen nga tʼatsʼe evolución makjainle kʼoa nga nʼio nda be xi tʼatsʼe jebi. Tsakui nichxin saʼnda tsínni kui síkjaʼaitsjen. Koaan kʼoakʼuínlee nga katakotsenle je video kʼoa jmesani xi faʼaitʼa ya jw.org xi kui nchja̱ni nga Niná kisinda jmeni xi tjín. Kʼoa nga koa̱nskanni, tsakui nichxin koa̱nmele nga skótsensale jmeni xi faʼaitʼasa ya jw.org. Kʼiatsa koakolee kjoaxkóntokon tsakui nichxin tije sikjaʼaitsjenjinni. w23.09 17 párr. 12, 13

Je Jeobá tsjoáxáná kʼoa sichikontʼainná tsa si̱ndayaa yaoná jñani tsín nda kanʼia kʼoa tsa tosi tonda je si̱nʼiotʼaa (Prov. 28:13). Ningalani tsín chjotatsje koan Sansón kʼoa tsín nda kisʼin nga je Dalila kisinʼiotʼa, tosi tonda je Jeobá kisixále. Kʼoa je Jeobá alikui kʼoasʼin kisikjaʼaitsjen nga tsín tisindayani yaole Sansón. Tosi tonda je Sansón kisichjén nga kitjoson josʼin mele. Tojo kʼoasʼin tsabekon nga tjínle kjoamakjain, kuinga kʼoati ya bʼaxki̱kaoni Sansón jñani bʼaxki̱ je chjota xi kisʼele kjoamakjain, tojosʼin faʼaitʼa ya capítulo 11 xi tsʼe Hebreos. Nda sʼe tokoán nga ʼyaa nga tsjoakená Jeobá kʼoa nga mele tsjoánganʼioná, ngisaa kʼianga kjoa bitjatojiaan. Kuinga kʼoati koa̱n i̱ kʼuínnilee tojo kitso je Sansón: “Sijéle kjoanda, ali nichajinjinnái. [ . . . ] Tʼainái nganʼio” (Juec. 16:28). w23.09 7 párr. 18, 19

ʼYañá nga jechrian tíjna nichxinle Jeobá. Kuinga ʼmiyasonnilee Énle Niná je chjota, tonga sakʼoa nokjoaan kʼoa tsín tso tokoán nga nokjoakaoñá Énle Niná. Kʼoati koan je Pedro, kʼianga tínijtsoʼa Jesús nkjín kʼa kʼoakitso nga tsín bexkon nga̱ chjota kitsokjonle (Mat. 26:​69-75). Tonga xijekoan, alikui tichjota kitsokjonnile kʼoa i kitso: “Ali jkonjinlao nga je” (1 Ped. 3:14). Tojo kitso Pedro koaan nʼiojin koaan nga tsín chjota kuijkónlee. Jmé xi koasenkaoná nga tsín chjota kuinókjonlee. Je Pedro i kitso: “Chʼa̱sjetsjao Cristo ya jinni̱ma̱no nga Naino ma” (1 Ped. 3:​15, TNM). Kui xi tsonile nga si̱kjaʼaitsjenjiaan jókji nganʼio tjínle je Jesús nga Nainá ma kʼoa nga Rey sʼin tíjna. w23.09 27 párr. 6-8

Machjén nga si̱kuindaa yaoná nga tsínkui kʼoasʼiaan jmeni xi tsín sasénle Niná, nga̱ je Biblia itso: “Ali kʼoajinsʼin nʼiao je xá xi tsín koa̱nntje̱no, xi totsʼe kjoanjio” (Efes. 5:11). Jngo chjota xi kui kotsenle je xi kjoachajngi tjenkao, xi kui nrʼoéle kʼoa xi kui fáoyani chanjin kui jée ska̱jin (Gén. 3:6; Sant. 1:​14, 15). Nʼio maña josʼin bʼanachaná je Na̱i nga tsín kataʼyaa jméni xi ndatjín kʼoa jméni xi chʼaotjín (Is. 5:20; 2 Cor. 4:4). Kuinga tsín chʼaotjín manile chjota jmeni xi jndí sʼin bekon Jeobá (2 Ped. 2:19). Jmeni xi faʼa ya televisión, jmeni xi bakó ya película kao Internet kontra file jotso je kjoatéxomale Jeobá. Je Na̱i kui xi mele nga kʼoasʼin si̱kjaʼaitsjeen nga tsín chʼaotjín nga nichajngiaa (Efes. 5:6). w24.03 22 párr. 8-10

Je ndʼianajño kui xá koanchjénni nga ya tsakatiojtín je chjota israelita nga tsakʼétsʼoale Jeobá kʼoa nga ya kitsjoatʼale cho̱ (Éx. 29:​43-46). Nga xinxin ʼnde kikatio je chjota israelita ya ʼndekixí tsakʼa je ndʼianajño (Éx. 25:​8, 9; Núm. 9:22). Me 500 nó nga tokui ndʼianajño kisichjén josaʼnda nga kisʼenda je yo̱ngo̱ ya Jerusalén. Je ndʼianajño “ngʼiánle kjoa xi tjío ngʼajmi” kʼoa kui tsoyanile je yo̱ngo̱ xi tsʼe Niná, xi tsonile, josʼin ʼyaxkoán Jeobá ndʼaibi. Kʼianga kui kinchja̱ni Pablo je ndʼianajño, i kitso: “Jebi xi mangósonkao nichxin xi ndʼaindai” (Heb. 9:9). Kʼianga kiskile Pablo je chjota hebreo xi chjotale Cristo ma, tokʼoa jekʼoasʼin ʼyaxkón Jeobá josʼin ʼyaxkoán ndʼaibi. Je Jesús kʼiaa Naʼmitítjon koan nga nó 29 kʼianga jekisʼenngindá kʼoa yaa kisixá ya yo̱ngo̱ xi tsʼe Niná, xi tsonile, josʼin ʼyaxkoán Niná ndʼaibi (Hech. 10:​37, 38; Heb. 4:14). w23.10 25, 26 párr. 6, 7

Machjén nga chósonnilee josʼiaan nga tosi tonda je Jeobá si̱xálee. Tobʼelañá, kʼianga bʼantjaiya josʼin tiyoaa kʼoa nga jchaxkoán jmeni xi sʼín kʼoa josʼin síkjaʼaitsjen xi ngikʼa. Tjínnele nda chósonnilee josʼiaan ngatsʼiaa xi choʼndale Niná maa. Kʼoati tjínnele nga nangitokon koaan kʼoa nga koakoá kjoamatokon. Je Biblia kʼoatso nga je Jeobá yaa mangóson jngo “Na̱xi̱” (Deut. 32:4). Tonga kʼoati kosonnile josʼín. Tobʼelañá, kʼianga bʼantjaiya jme xi chon sonʼnde, je Jeobá básjaile josʼín nga katabitjoson jme xi tjínndajinle. Nga kʼoasʼin kisindaná jokjoan je, kʼoati fasjailee jonʼia kʼianga bʼantjaiyajin josʼin tinijchá yaoná. Je Jeobá tsjoáná kjoafaʼaitsjen xi ya nroatʼa Biblia, xi basenkaoná nga kui chjoejiaan xi ndatjín ninga kjoa bitjatojiaan. Nga kʼoasʼin tsjoáná kjoafaʼaitsjen kʼoasʼin bakóni Jeobá nga kosonnile josʼín. w23.07 20 párr. 1-3

Ya Biblia kui síngósonkao Jeobá josʼín jngo na̱ xi nʼio tjao be je ʼndíle (Is. 66:​12, 13). Nga nʼio tsjoake ʼndíle, yaa xkóle síkʼéjnason kʼoa ngasin nganda fákao. Kʼianga kjiʼndá je ʼndíleele kjitʼanangi finrʼoe. Tikʼoasʼinni xi kao Jeobá, jé koasenkaoná kʼianga ba sʼe tokoán. Je Jeobá tosi tonda tsjoake maná ninga sakʼoa tsín nda nʼia (Sal. 103:8). Nkjín kʼa nga tsín kisitjoson chjota israelita jmeni xi kitsole Jeobá, tonga nga kʼoakoannile jme xi kisʼin, tosi tonda tsjoake koan. Ñandia nga i̱ kitsole naxinandále: “Nga ndasʼin tijnai ngixkoan, chjí tiʼbele kʼoa tsjoakele” (Is. 43:​4, 5). Je Jeobá alikui bʼantjaiya. Ningalani ai tíjna je jée xi kuijnyá alikui tsjiónkonná. Tosi tonda tsjoake koa̱nná tsa kʼoakoa̱nniná kʼoa tsa si̱jélee kjoanichatʼa, nga̱ tíjnandaa nga sichatʼaná (Is. 55:7). Je Biblia kʼoatso nga jé Jeobá xosʼín nga nda satío tokoán kʼianga síchatʼaná (Hech. 3:19). w24.01 27 párr. 4, 5

Jé Jeobá koasenkaoná jñani sakʼoa ñʼai maná. Jolani kʼianga si̱jékjoaa ya tʼaxáná nga katatjoʼndená nga kjuian kjoajtíntse, tsa kʼiaje̱ nga si̱kʼantjaiyaa josʼin nixá ánni nga tsín si̱chañá je kjoajtín xi satíoná. Kʼianga kʼoama, tsa je Jeobá si̱nʼiotʼaa jchañá josʼin basenkaoná kʼoa ngisaa sʼe̱jngo tokoán nga je koasenkaoná ngantsjai. Je Esdras nangitokon koan kʼoa jé Jeobá kisijéle nganʼio. Kʼianga tsabele kon nga tsín kuitjosonle je xá xi kisʼenele, jé Jeobá kisijéle nganʼio (Esd. 8:​21-23; 9:​3-5). Je chjota xi tsabe nga kʼoakisʼin Esdras tsakinyakao kʼoa kiskenngile (Esd. 10:​1-4). Kʼianga kui nʼio nikjáojiaan josʼin tjíoni je xíngiaa kʼoa tsa kʼiaje̱ nga ñʼai maná tao̱n, kʼoétsʼoalee je Jeobá kʼoa ñaki kʼoéjngoaa tokoán nga je koasenkaoná. w23.11 18 párr. 15-17

Je Jeobá kui xi mele nga kjuintjenngiaa choa̱le Abrahán ánni nga kixi skoe̱konsíniná. Tonga alikui xi tsonile nga ñaki kʼoakjoán tisʼiaan jokisʼin je. Nkjín koya josʼin koakoá nga makjainná. Tobʼelañá, koaan nda chjoéyaa je xi sʼa choatsele nga bichó kʼianga biyojtián, koaan kuinyakoaa je ndsʼee xi nganʼio machjénle kʼoa nda si̱koaa je xi xíngiaa mani. Kui jebi xi sasénle Jeobá (Rom. 15:7; 1 Tim. 5:​4, 8; 1 Juan 3:18). Ijngo koya xi nʼio chjíle josʼin bakoá nga makjainná kʼiaa nga ʼmiyasoán (1 Tim. 4:16). Kao jmeni xi nʼia bakoñá nga makjainná nga sitjoson Jeobá jmeni xi tso. Kʼoati majinná nga kui xi ngisa ndasʼin bichómani nga kui kʼoanʼia jmeni xi tsoná. Tsa kʼoasʼiaan, chjotakixi sʼin skoe̱konná Jeobá kʼoa miyo kuitsoná. w23.12 2 párr. 3; 6 párr. 15

Jé pastro Pablo kinchja̱ én jebi kʼoa jé xokitsole je chjotale Cristo xi Éfeso tsʼe. Nʼio tjínle kjoandosin nga koaitjenngi kjoafaʼaitsjen jebi je ndsʼee xi sʼa xti. Nga nda kuichomani jmeni xi sʼin, machjén nga sitjoson kʼoa koaitjenngi je kjoafaʼaitsjen xi tsjoá Biblia (Luc. 2:52). Ánni tjínnile kjoandosin nga skénngi choa̱le Jesús je ndsʼee xi sʼa xti. Je ndsʼee tsee xá kjinele ya yaniʼyale kao ya jinjtín. Kʼiatsa sʼa xti, tsakui nichxin kui nikjaʼaitsjain jme xá xi sʼiain nichxin xi fini. Jolani tsa precursor sʼin si̱xái, tsa siervo ministerial koai̱n kʼoa tsa chjotajchínga sʼin kuijnai nga koa̱nskanni. Kʼoa tsakui tinikjaʼaitsjainje̱ nga kuixain kʼoa nga ʼndíxti sʼe̱li (Efes. 6:4; 1 Tim. 3:1). Kʼianga kuichotjenngi jebi kʼoa nda si̱tjosuin je xá xi sʼe̱neli machjén nga chjénngi choa̱le Jesús. w23.12 24 párr. 1, 2

Jé xi chjotajchínga sʼin tjío bánele Jeobá nga sikuinda je choʼndale. Ndsʼee jebi chjí be nga binyakao je ndsʼe̱ kʼoa nda síkuinda (Jer. 23:4; 1 Ped. 5:2). Tsjoa sʼe tokoán nga tjín je ndsʼee xi kʼoasʼin tsjoánganʼio ya jinjtín. Nda choa̱ bʼéjnale xi chjotajchínga sʼin tjío jokisʼin Gedeón (Heb. 6:12). Kisikuindaa je naxinandále Niná (Juec. 2:16; 1 Crón. 17:6). Ñʼai kjimachon nichxin xi tiyoaa ndʼaibi, kʼoa tojo kisʼin je Gedeón, kʼoati kui kjinele xi chjotajchínga sʼin tjío nga sikuinda je naxinandále Niná (Hech. 20:28; 2 Tim. 3:1). Nda choa̱ tsakʼéjnale Gedeón nga nangitokon koan, nga kisitjoson kʼoa nga kichokjoajinle kjoa xi jaʼatojin. Jmeni xi kisʼin Gedeón kʼoati kuinyakaoná ngatsʼiaa nga kʼoainganʼiolee xi chjotajchínga sʼin tjío kʼoa nga chjí jchaa je xá xi sʼín (Heb. 13:17). w23.06 2 párr. 1; 3 párr. 3