Ali bʼaiʼndejion nga ʼya xi sikʼantjaiya kjoafaʼaitsjenno

1, 2. Ánni nga kʼoasikji énndiso síchjénsíni ndʼaibi je chjota, kʼoa jósʼin tjíosíkʼabíson. (Chótsenlai sén xi faʼaitʼa ibi.)

JE SONʼNDE xi tiyoaa ndʼaibi, je chjota ñaki tobʼanachaa kʼoa ñaki tobʼéndiso. Ya Biblia kʼoatsokixi nga je Na̱i tíbatéxoma i̱ Sonʼnde. Je Na̱i nʼio maña josʼin síchjén énndiso kʼoa josʼin bʼanacha (1 Tim. 2:14; 1 Juan 5:19). Kʼianga sa kjimachrian sa kjimachrianle nga kjoetʼa jmeni xi chon je sonʼnde, sa jti sa jti kjimale je Na̱i, nga̱ “be nga tochoa nichxin tjínle” (Apoc. 12:12). Kʼoa kuinga je chjota xi ya fitjenngile nga sa ndiso sa ndiso kjimasíni kʼoa mele nga kʼoanachale je choʼndale Niná xi kixi.

² Je chjota sakʼoa énndiso kaníbason xi tʼatsʼe testigole Jeobá kʼoa kao jmeni xi makjainle. Kʼoa yaa kʼoatso ya telebisión, ya periódiko kʼoa tsa ya Internet. Jósʼin bichótsjoá nga kʼoasʼín. Tjínkʼa chjota xi majtikená kʼoa xi tsín tisasénnile xi tʼatsaan nga makjainle énndiso jebi.

3. Jméni xi koasenkaoná nga tsín tsa katachʼanachaná.

³ Koaan taja kuiyolee je énndiso xi síkʼabíson je Na̱i. Nga tsínkui katabʼanachaná kui xá kijnani je Biblia xi “kjaínga nda machjén [...] nga sichoyandaná” (2 Tim. 3:16). Je pastro Pablo kʼoakitso nga tjínkʼa je chjotale Cristo xi tsakatio ya naxinandá Tesalónica xi tsakʼanachale je kjoandisole Na̱i. Kuinga i̱ kitsosínile: “Ali jngo tjojin mʼófaya[ni] kjoafaʼaitsjenno” (2 Tes. 2:1, 2). Jméni xi bakóyaná jmeni xi kitsole je pastro Pablo. Jósʼin koasenkaoná je nichxin xi tiyoaa ndʼaibi.

KʼIAKJOÁN SʼEJINTOKOÁN KʼIANGA MACHJÉNNÁ

4. 1) Jósʼin kisʼejinkon je chjotale Cristo xi tsakatio ya naxinandá Tesalónica xi tʼatsʼe “je nichxinle” Jeobá. 2) Jósʼin sʼejintokoán tsanda ñá ndʼaibi.

⁴ Je karta xi títjon kisikasénle je pastro Pablo je chjotale Cristo xi tsakatio ya Tesalónica kʼoakitsole josʼin kjoaʼaí “je nichxinle Nainá [Jeobá]”. Kui xi koanmele nga tsín to njio katabatio kʼoa nga tsín tokuichoneská je nichxinle Jeobá. Kuinga kʼoakitsosínile nga “isen” katabatio, xi tsonile, nga tje̱nyatokon katabatio. Kitsole: “Kuiyochonnía, nʼio tojbi koanngínkoaa yaoná” (tʼexkiai 1 Tesalonicenses 5:1-6). Nichxin xi tiyoaa ndʼaibi, kui tichoyalee nga ni̱kje je Babilonia xi nʼioje, je relijión ndiso. Nga jekʼoakoa̱n kʼiaa koaitsʼia je nichxinle Jeobá. Jengisa nda kjimajinná josʼin kuitjoson jmeni xi tjínndajinle je Niná. Xi ijngosani, ya jinjtín ntsjaintsjai bʼainá kjoafaʼaitsjen xi koasenkaoná nga tje̱nyatokon kuiyolee nichxinle Jeobá. Kʼiatsa ñá xi si̱tjosoán jme xi ʼminá, kui xi koasenkaoná nga tosi tonda si̱xálee je Jeobá kʼoa nga nda si̱chjén je kjoafaʼaitsjenná jonga sʼiaan (Rom. 12:1).

5, 6. 1) Jméni xi kitsole Pablo je chjotale Cristo xi tjío ya Tesalónica kʼianga kisikasénle karta xi majaoni. 2) Jméni xi jeme kʼoakuitsole Niná nga katasʼín je Jesús. 3) Jméni xi koa̱n chjónangilee yaoná.

⁵ Kʼianga jekisikasénle pastro Pablo je karta xi títjon je jtín xi tíjna ya Tesalónica, tiʼakʼia kisikasénnile xi koanjaoni karta. Karta jebi kui nchja̱ni tʼatsʼe kjoañʼai xi sʼe̱ kʼianga kjoaʼaísíkjeson Jesús “je xi tsín [...] be Niná, kʼoa xi tsín sítjosonle je énnda” (2 Tes. 1:6-8). Ya kapítulo 2 xi tsʼe 2 Tesalonicenses, je pastro Pablo kʼoatso nga tjínkʼa xi kisibale ni̱ma̱le nga kʼoasʼin koankjainle nga jetíjnachrian je nichxinle Jeobá (tʼexkiai 2 Tesalonicenses 2:1, 2). Je chjotale Cristo xi títjon tsakatio alikui koanjinyejele josʼin kuitjoson jmeni xi tjínndajinle Jeobá. Kʼianga kinchja̱ni tʼatsʼe én xi tongini kinokjoa, je pastro Pablo saʼnda i kitso: “Tochoa xi ʼyaxkoaan, kʼoa tochoa xi nokjoayaa. Tonga kʼia nga kjoaʼaí je xi ñaki tjínjngo, kʼia je xi tochoa tjín, likui tikoa̱nchjénni” (1 Cor. 13:9, 10). Ninga tsínlani koanjinyejele kixi kitʼale Niná, kui tsakinyakao je én xi kiskile Pablo, Pedro kʼoa kao xi ngikʼa chjotale Cristo xi ya kisʼele kjoachoya ya ngʼajmi.

⁶ Kʼianga kisikixiyandale je Pablo kʼoakitsole nga títjon kjoanla sʼe̱ chjota xi yátsʼi̱n kuinyale Niná kʼianga kjesa faʼaijin nichxinle Jeobá. Kʼoa nga kʼoati títjon kjoanla koa̱ntsen “je chjotatsʼen”.a Kʼoati kitso nga xi jekuicho nichxin, je Jesús “sikixoya” ngatsʼi xi chʼanachale. Je Pablo kʼoakitsole anni nga kʼoakoa̱ntʼainni, kitso: “Nga̱ tsín koantsjoake xi kjoakixi” (2 Tes. 2:3, 8-10). Machjén nga chjónangilee yaoná: “Jókji tsjoake je Énle Niná. A kotʼayaña rebista jebi kʼoa kao xo̱n xi ngikʼa, xi síkasén je naxinandále Niná, kʼianga skoe jmeni xi sʼa kjimajinsaná tʼatsʼe Biblia”.

NDA CHJOÉJIAAN JE MIYONÁ

7, 8. 1) Jmé che̱n xi tjínnele kisikuindale yaole je chjotale Cristo xi títjon tsakatio. 2) Jméni xi nʼio si̱kuindalee yaoná xi chjotale Cristo maa ndʼaibi.

⁷ Ali tsa tokuijin énndiso xi kitsoya je chjota xi yátsʼi̱n tsakinyále Niná xi kisikuindale yaole je chjotale Cristo. Je pastro Pablo kisikʼaxkisa che̱n xi kjaʼaínile kʼianga kiskile je Timoteo, kitsole: “Je xi símekon tao̱n, ya nroani ngayije kjoatsʼen”, kʼoa “je chjota xi kui símekon, xin ndiaa [...] [file] én xi makjainná. Ali tokʼoakji kjoaso kjoañʼai” faʼá (1 Tim. 6:10). Ijngosa che̱n xi tjínnele kisikuindale yaole kuiní “je kjoa xi sʼín yaoná” (Gál. 5:19-21).

⁸ Je pastro Pablo tsakájinkon je chjotale Cristo xi ya Tesalónica tsʼe nga tsín je sisinle je “pastro ndiso”. Ya jinjtín sʼee je chjota xi “kuinchja én xi chʼao tjín. Koa̱nmele koaikao chjota[le Cristo] xi je koaitʼale” (2 Cor. 11:4, 13; Hech. 20:30). Nga koanskanni, je Jesús kʼoakitsole je jtín xi tsakʼejna ya Éfeso nga nʼio nda kisʼin nga tsín kitsjoaʼndele je chjotatsʼen. Je chjotale Cristo xi Éfeso tsʼe tsakakó nga to “chjotandiso” chjotatsʼen jebi (Apoc. 2:2). Kʼianga kiskile xi koanjaoni karta je chjota xi ya Tesalónica tsʼe, je pastro Pablo i kitso: “Tonga kʼoasʼin bʼenelaijin, ndsʼe, xi tʼatsʼe jaʼaínle Nainá Jesucristo, nga kuinyaxinlao ngatsʼi ndsʼee xi chʼaosʼin tjíomakao yaole”. Xijekoan, kʼoati kisikʼaxki̱ je “xi kaile síxá” (2 Tes. 3:6, 10). Kʼiatsa kʼoatsakʼinle nga tjínnele kuinyaxinle je xi chjotatsʼe, tsí ngisa nʼio machjén nga kuinyaxinle je xi yátsʼi̱n jetjíobinyále Niná. Nʼiojin xkón tsakatio kʼiatsa jelani kisisinle, kuinga tjínnesínile nga tsakinyaxinle. Kʼoa nichxin xi tiyoaa ndʼaibi kʼoati tjínnele sʼiaan tsanda ñá (Prov. 13:20).

9. Ánni nga nʼio si̱kuindanilee yaoná tsa ʼya xi kui kjoakaoniná jmeni xi tsín ya Biblia tsoya kʼoa tsa chʼaosʼin sikʼaxki̱je̱ naxinandále Jeobá.

⁹ Jenʼio machrianle kʼianga koaitsʼia je kjoañʼai xi nʼio tse kʼoa nga kjoetʼa jmeni xi chon sonʼnde. Kuinga nʼio machjénsíniná jmeni xi kisʼejinkon je chjotale Cristo xi títjon tsakatio. Alikui mená nga tokjoatjao chjoé “je kjoandale Niná”, nga̱ tsa kʼoasʼiaan, si̱chajián je kjoanda xi tichoyalee nga koa̱n kuiyoaa ngantsjai nichxin (2 Cor. 6:1). Kʼiatsa je xi bichó kjoajtínná kui kjoakaoniná jmeni xi tsín ya Biblia tsoya kʼoa tsa chʼaosʼin sikʼaxki̱je̱ naxinandále Jeobá tjínnele nga nʼio si̱kuindalee yaoná (2 Tes. 3:13-15).

“TʼEJINTAKON JE KJOAFAʼAITSJEN XI KICHOTʼAYAO”

10. Jmé kjoafaʼaitsjenni xi tjínnele koankjainle je xi tsakatio ya Tesalónica.

¹⁰ Je Pablo kʼoakitsole je ndsʼe̱ nga taja katabatio kʼoa nga tosi tonda kʼoakatasʼín jmeni xi tsakʼinyale (tʼexkiai 2 Tesalonicenses 2:15). Jmé kjoafaʼaitsjenni xi tsakʼinyale. Ali tsakuijin xi ya nroani relijión ndiso kao xi ya bakóya. Kuiní xi kitsoya Jesús, xi kitsoya Pablo kʼoa kao xi kitsoya xi ngikʼa chjotale Cristo. Kʼoa jebi yaa Énle Niná kisʼetʼa. Je Pablo kʼoakitsole je jtín xi kisʼejna ya Corinto nga nʼio nda kisʼin, kitsole: “Nga nda tjíojintakon tʼatsʼan, kʼoa nga bʼejinkon kjoakixi josʼin nga tsakakoyano” (1 Cor. 11:2). Kjoaʼmiya jebi tʼatsʼe Niná kinroani kʼoa machjén nga koankjainle.

11. Jósʼin koa̱nkjinle Jeobá je xi tsjoáʼnde nga chʼa̱nachale.

¹¹ Kʼianga kiskile je chjota hebreo je Pablo jao koya kisikʼaxki̱ xi kʼoetʼale nga sicha kjoamakjainle kʼoa nga tsín tikixi koaitʼanile Niná (tʼexkiai Hebreos 2:1; 3:12). Kinchjani tʼatsʼe nga “xin ndiaa” mangínlee Jeobá kʼoa nga nikjinlee. Kʼianga xin ndiaa fi jngo chjota xi chitso tíjnaya tsakui nichxin likui tsen male nga̱ tobijbi makjinle ndainandá. Tonga tsa toxá ya koaikaoni chitsole kʼoa tsjóntsjá nga katamakjinle ndainandá tijé xosikaoni yaole nga koa̱nkjin. Nga jao koya jebi kui bakóná jmeni xi koa̱nle ʼyani xi tsjoáʼnde nga chʼa̱nachale kʼoa xi tsín tisinʼiotʼani jotso je Énle Niná.

12. Jmé kjoasʼetsaojinni xi síkinroajen kjoamakjainná.

¹² Tsakui nichxin kitsjoaʼnde kʼa je chjotale Cristo xi tsakatio ya Tesalónica nga kichʼanachale. A kʼoati koaan tsanda ñá ndʼaibi. Nʼio nkjín koya tjín xi nichxin fáʼaná. Tobʼelañá, je chjota nʼio nkjín ora bʼétsaojin, nʼio tse nichxin síkʼaya nga síchjén redes sociales, nga síkasén kʼoa nga bʼéxkia correo kʼoa tsamaije̱ tokui síkʼayale nichxinle ya Internet nga kotʼa tʼatsʼe chjota xi síská. Kjoasʼetsaojin jebi sítsʼená kʼoa likui timatsjoachañá xi tʼatsʼe Niná. Tsakui nichxin likui tini̱ma̱ná kjuinroajinni jokʼuínlee je Jeobá kʼianga kʼoétsʼoalee, to ngotjosa chótʼayá Biblia, likui tinanda koanngínñá kjoajtínná kʼoa tsín tikʼuínyasonñá. Jméni xi sʼiaan nga tsín katabʼantjaiya kjoafaʼaitsjenná.

JMÉNI XI KOASENKAONÁ

13. 1) Tojo tso je én xi tongini kinokjoa, jósʼin síkjaʼaitsjen kʼa chjota tʼatsʼe nichxin xi tiyoaa ndʼai. 2) Jméni xi koasenkaoná nga si̱kuindaa je kjoamakjainná.

¹³ Tjínnele nga si̱kjaʼaitsjeen nga nichxin fetʼa tiyoaa kʼoa nga nʼio xkón sikatíoná tsa je kjoájtaa chjota xi tsín makjainle nga nichxin fetʼa tiyoaa. Je pastro Pedro i kitso tʼatsʼe nichxin xi tiyoaa ndʼaibi: “Kjoaʼaí xi tsjoale bijnoke, xi titsʼeni kjoachi̱nga̱le kʼoémajin. Kʼuikuitso: Jñá tíjna ndai xi kitsjoa tsʼoa nga kjoaʼaí. Jo saʼnda nga kʼen xijcháná, tojo kʼoasʼin chon jo saʼnda nga kisʼenda sonʼnde” (2 Ped. 3:3, 4). Kʼianga tsín cha̱jinná nga nichxin fetʼa tiyoaa machjénní nga nyaon nyaon kʼoéxkiaa kʼoa chótʼayá je Biblia. Je xi yátsʼi̱n tjíobinyále Jeobá tjíobatio saʼnda kjoatse kʼoa tojo kʼoachon saʼnda ndʼai. “Je chjotatsʼen” xi tínchja̱ni ya Biblia tojo tíbʼejnachjoale choʼndale Niná. Kuinga machjénsíni nga tsín si̱chajiaan nga jetíjnachrian nichxinle Jeobá (Sof. 1:7).

14. Jósʼin basenkaoná nga ntsjaintsjai ʼmiyasoán.

¹⁴ Ijngosa koya xi koasenkaoná nga tsín ʼya xi kʼoanachaná kʼoa nga tsín ʼya xi sikʼantjaiya kjoafaʼaitsjenná kuinga ntsjaintsjai kʼuínyasoán je énnda chjotse. Je Jesucristo, xi Ngʼajko̱ tíjnale je Jtín, kʼoakitsole je chjotale nga katatsoyale chjota xi tjín ngakjijnda Sonʼnde nga katasítjoson jmeni xi tsakakóya. Kʼoa je xá jebi nʼio binyakaoná (Mat. 28:19, 20). Kʼianga kʼuínyasoán ñaki kao kjoatsjoa kʼoasʼianñá. Je chjotale Cristo xi ya Tesalónica tsʼe ali tsa tokuijin nga kitsoyasonni nga tjínnele kʼoasʼin. Je pastro Pablo i kitsole nga kiskile: “Ali bʼechjoajinlao je Espíritu Santo. Ali chʼasjengijion je én xi nokjoaya tʼatsʼe Niná” (1 Tes. 5:19, 20). Je én xi ʼmiyalee chjota tikui basenkaoniná nga tje̱nyatokon biyoaa.

15. Jméni xi koa̱n chótʼayá kʼianga chotʼayajtían énle Niná ya niʼyaná.

¹⁵ Ngatsʼiñá nga mená nga kuinyakoaa je xíngiaa kʼianga ngisa nda katatsoyason je énnda chjotse. Kuinga tjínkʼasíni je ndsʼee kao tichjaa xi sakʼoa kui kotʼaya josʼin kjoakaonajmí je chjota kʼianga kotʼayajtín énle Niná ya niʼyale. Tsakui nichxin koa̱n kui chótʼayá jókʼuínlee je chjota nga koanngínchon ijngokʼalee. Tobʼelañá, jmé xi chja̱kaonajmíñá nga koanngínchon ijngokʼalee. Jméni xi koa̱nndosinle. Jmé orani nga koa̱n kjuinchónlee. Kʼoa nʼio nkjín ndsʼee xi kui kotʼaya jmeni xi faʼa ya kjoajtínná kʼoa bationda nga tsjoá énle. A koaan kʼoati sʼiaan tsanda ñá. Kʼiatsa kʼoee énná nga tiyoaa ya kjoajtínná ngisa koa̱ntajasa kjoamakjainná kʼoa alikui ʼya xi sikʼantjaiya kjoafaʼaitsjenná (Sal. 35:18). Kʼianga kʼoasʼin chotʼayajtían énle Niná ya niʼyaná basenkaoná nga tsínkui chaniyaa jkoaa jmeni xi tsín ya Biblia faʼaitʼa kʼoa basenkaoná nga tsín jao sʼe kjoafaʼaitsjenná.

16. Jméni xi binyakao je chjotale Cristo xi ya koai ngʼajmi nga tsín ʼya xi bʼanachale kʼoa nga tsín ʼya xi síkʼantjaiya kjoafaʼaitsjenle.

¹⁶ Je Jeobá tísíchikontʼain je naxinandále jokji nga tífaʼato nó. Sa tíbʼéjnatsen sa tíbʼéjnatsenle josʼin tsoyanile je én xi tongini kinokjoa. Kʼianga kʼoatísʼín Jeobá ñaki makjainná nga nʼio tse kjoanda tsjoáná nichxin xi nroaján. Je xi ya koai ngʼajmi kui koyale nga ya koatexomakao Cristo. Kʼoa kui jebi xi binyakao nga tsín ʼya xi bʼanachale kʼoa nga tsín ʼya xi síkʼantjaiya kjoafaʼaitsjenle. Bakinle je én xi kitsole je pastro Pablo chjotale Cristo xi ya Tesalónica tsʼe: “Tonga jinjin machjénnajin nga kʼoailaijin kjoanda Niná ngantsjai xi tʼatsaon, ndsʼe xi tjaokeno Nainá. Tsakjaʼájinno Niná [...] xi kisitsjeyano kʼoa totʼatsʼe nga makjainno xi kjoakixi” (2 Tes. 2:13).

17. Jósʼin tsjoánganʼioná je én xi faʼaitʼa ya 2 Tesalonicenses 3:1-5.

¹⁷ ʼYani xi mele nga koatio ngantsjai nichxin i̱ Sonʼnde kʼoati tsín koa̱n tsjoáʼnde nga ʼya xi kʼoanachale. Tsa meli kʼianga kuijnai ngantsjai nichxin nʼio tsjoánganʼioli je én xi kiskile pastro Pablo je chjotale Cristo xi Tesalónica tsʼe (tʼexkiai 2 Tesalonicenses 3:1-5). Nʼio tsjoánganʼioná én jebi. Nga jao karta xi kichjile chjotale Cristo xi tsakatio ya Tesalónica kui bájinkonná nga nʼio xkón tíjna tsakui si̱siaan jmeni xi tsín ya Biblia bakóya kʼoa kao xi to jao bʼé kjoafaʼaitsjenná. Kʼoa nga nichxin fetʼa jetiyoaa ndʼaibi nʼio machjénná kjoasʼejintokon jebi.