3 Basenkaoná nga kaná je kjoa xi sʼená

Nichxin xi tiyoaa ndʼaibi, tjín kjoa xi tsín kʼoamaná bʼendajiaan. Tobʼelañá, tsa jngo xíngi kinichai kʼoa tsa chʼin xi nʼio tʼao tíbʼetʼali, tsakui nichxin tokuisa choyalai nga tjínnele ska̱li nga kui kjoa tibitjatojin. A koaanle Biblia koasenkaoná kʼianga kui kjoa bitjatojiaan.

JE CHʼIN XI NʼIO TÁO

Je Rosa itso: “Kʼoati kui chʼin tjínna je chʼin xi kisʼele xíngia. Je chʼin jebi nʼio síkjaʼákonna. Alikui titsjoa tjínni tokoan”. Kʼianga kui chʼin tjínle je Rosa, ñʼai koanle nga kiskotʼaya je Biblia, kʼoa kui xi nʼio kisikjáojin. Tonga je xi kitsjoanganʼiole kui jmeni xi kitso je Jesús, tojosʼin faʼaitʼa ya Mateo 19:26, jñani tso: “Niná koaanle ngayije kjoa”. Je Rosa koanjinle nga nkjín koya josʼin ma chotʼayá. Nga sakʼoa ñʼai koanle nga kiskotʼaya xi totʼatsʼe je chʼinle, kui kinrʼoéle je grabación xi tsʼe Biblia kao grabaciónle xo̱n xi Énle Niná yʼangini.a Je Rosa itsosa: “Tsa tsínlani je grabación jebi, alikuijin kʼoakoanna nga kisikuinda josʼin tijna xi kao Niná”.

Kʼianga ba sʼe kon je Rosa nga tsín tikʼoamanile kʼoasʼín josʼín ngasʼa, kui tsjoánganʼiole jmeni xi tso 2 Corintios 8:12, jñani tso: “Tsa jngo xi jyondi̱to̱nle, kʼoasʼin tjoé jo kji tjínle, likui jo kji xi tsínle”. Kui én jebi xi síkjaʼaitsjenjinle nga tsjoa tjín kon Niná xi tʼatsʼe, nga̱ bʼénele yaole nga síxále jokji tjen kʼoamale.

NGA JNGO XÍNGIAA BIYA

Je Diana, xi jenása kabʼaxki̱, itso: “Kʼianga kʼien je ʼndítsotina, xi tokʼia 18 nóle, nʼio aon koanna, kʼoa saʼnda kʼoasʼin kisikjaʼaitsjen nga tsín tichókjoanina nga koatejnakoan. Alikʼiajin tikʼoakoa̱nni nga jetsín ʼndítsotina”. Je Diana kui kitsjoanganʼiole jmeni xi tso Salmo 94:19, jñani itso xi kisele Niná je salmista: “Kʼianga nʼio kisikjáojian, ji tsakʼainganʼionái kʼoa kinikinjenyʼánjin ni̱ma̱na”. Je Diana itsosa: “Kisijéle je Jeobá nga katabasenkaona nga skoe jmeni xi sʼian nga tsín nʼio aon sʼe̱ tokoan”.

Je Diana yaa kitsjoanganʼio nga kisixá jñani nʼio tsjoa tsakáya kon. Xi jeki nichxin, kʼoatso nga kʼoakoan joma je color xi ma nikʼiñá je xo̱n, ninga koa̱nxkoa̱ tojo maa síkʼi. Kʼoati kisʼe kon je Diana. Ningalani aon kisʼe kon, tojo koan tsakasenkao xi kjaʼaí. Itsosa: “Toxijña koanjinna nga kʼoaniti tíbasenkaona je Jeobá kʼianga tsakasenkoa je chjota xi xinyale Biblia nga koanjinle je Énle Niná”. Jngoo lista tsakʼénda jñani tsakʼétʼa je jaʼaínle choʼndale Niná xi kʼoati kjoaʼaon jaʼatojin. Jósʼin tsakasenkao jebi. Kui xi koanjinle nga “ngatsʼi je choʼndale Niná jebi jé Jeobá tsakʼétsʼoale ngantsjai”. Kʼoati koanjinle nga “tsín josʼin jchañá josʼin basenkaoná je Jeobá kʼiatsa tsín kʼoéxkiaa je Biblia”.

Tonga tjínsa jmeni xi kjimajinle je Diana: Kjimajinle nga ngisa nda kʼianga kui síkjaʼaitsjen nichxin xi nroaján tikʼoajinni nichxin xi jejaʼato. Nʼio tsjoánganʼiole jmeni xi tso Hechos 24:15, jñani tso: “Kjoaʼáyale xi kʼen, nda tsa kao chjota xi tjínle kjoakixi, kao chjotatsʼen”. A ñaki makjainle je Diana nga sikjaʼáyale Jeobá je ʼndítsotile. Itso: “Alikui jao tjínna nga skoe ijngokʼa je ʼndítsotina. Je Nʼainá xi tíjna ngʼajmi jetjítʼaxo̱nle kʼiáni skoe ijngokʼa. Kʼoasʼin fiya jkoa nga ñaki kʼoasʼe̱ tokoan nga skoe ijngokʼa jokisʼe tokoan kʼianga tosʼa tsaʼbe nga kitsin”.

a Nʼio nkjín grabación jebi xi faʼaitʼa ya pájina xi tíjnanajin ya Internet ya jw.org.

Je Biblia tsjoánganʼioná ninga kʼia nga ñʼai tjín kjoa bitjatojiaan

JÓSʼIN KOA̱N KOASENKAONÁ NINÁ

Je Biblia tsoya josʼin basenkaoná je Niná, itso: “Je Jeobá chrian tíjnale ngatsʼi xi je básjai, ngatsʼi xi ñaki kjoaixi nga básjai. Tsjoále jmeni xi mele je xi tsokjónke, kʼoa nrʼoéle kʼianga síjéle nganʼio, kʼoa bʼasjentjai” (Salmo 145:18, 19). Nʼio tsjoánganʼioná én jebi. Jósʼin basenkaoná Niná kʼianga nganʼio nijélee.

TSJOÁNÁ NGANʼIO

Je kjoa xi sʼená tsakui nichxin sikʼajen tokoán kʼoa tsín titsjoa sʼe̱niná nga si̱xálee Niná (Proverbios 24:10). Tonga je Jeobá “tsjoále nganʼio xi tíbijtale, kʼoa tsjoále nganʼio je xi tsín jme nganʼio tjínle” (Isaías 40:29). Je pastro Pablo, xi nʼio tse kjoa jaʼatojin, i kitso: “Kʼoakoa̱nna tojmeni nga̱ tjínna nganʼio xi totʼatsʼe je xi kʼoasʼin tsjoána nganʼio” (Filipenses 4:13, TNM). Jé Niná tsakasenkao nga kitsjoale je nganʼiotsjele, kʼoa kʼoati tsjoáli tsanda ji tsa si̱jélai nganʼio (Lucas 11:13).

TSJOÁNÁ KJOACHJINE

Jméni xi sʼiain kʼiatsa nganʼio machjénli nga koa̱njinli jmeni xi tso je Biblia. Je chjotatjenngile Cristo, xi Santiago tsakʼin, itso xi kiski: “Tsa jngo xi jon xi chale kjoaʼisentakon, katasíjéle Niná, je xi kjaínga tse tsjoákjoatjaole ngatsʼi, kʼoa likui taon be. Kʼoasʼin kʼoaile” (Santiago 1:5). Nga kʼoasʼiain jmeni xi nijélai Niná kʼianga bʼetsʼoalai, machjén nga kʼoéxkiai je Biblia kʼoa si̱tjosuin jmeni xi tso (Santiago 1:23-25). Tsa kʼoasʼiain, jchaní nga síchjinená je kjoafaʼaitsjen xi tsjoá je Biblia.

NYʼÁN SʼE TOKOÁN

Ninga nʼio tinikjáojin, je Jeobá koasenkaoli nga nyʼán sʼe̱ tokuin. Je Biblia itso: “Ali kʼoajin mano. Tojmenibe xi machjénno, tijélao Niná, tʼetsʼoalao, kʼoa tʼailao kjoanda. Kʼoasʼin katasʼejinle Niná jme xi nijáo. Je kjoanyʼántakonle Niná xi ñaki faʼatole ngayije kjoafaʼaitsjenle chjota, jé xi sikuinda ni̱ma̱no kao kjoafaʼaitsjenno nga̱ tiyokao Cristo Jesús” (Filipenses 4:6, 7). Tijélai je Jeobá nga katabasenkaoli nga nyʼán sʼe̱ tokuin.

Tsa tsín ndi̱to̱n sʼendajin je kjoa xi tjínli, ali kʼoajinsʼin nikjaʼaitsjain nga jekichajinle Niná xi tʼatsi. Kʼianga kjoa sʼená, jé Jeobá tsjoáná nganʼio nga chókjoajinná (1 Corintios 10:13). Xi ijngosani, je Biblia kʼoatso nga kjoaʼaí nichxin nga tondiaa tjóxin je kjoa xi sʼená.