Énle Niná bitjongʼa kʼianga satío je kjoajtíntse xi jan nichxin
1. Jméni xi kisikjaʼaitsjenjin chjota israelita kʼianga tsakatío je sʼuí xi kitsole Niná.
1 Nichxin kjoatse, je chjota israelita jan kʼa koanña nga xki̱ nó nga tsakatío sʼuí xi kitsole Niná. Kʼoa ninga toje xi xʼin xi tjínnele nga ki sʼuíje jebi xi kisatio ya Jerusalén, nʼio nkjín xi kʼoati kikao kjitʼa yaniʼyale (Deu. 16:15, 16). Kʼianga ya tjío kui kisikjaʼaitsjenjin kjoanda xi tjínle tʼatsʼe Niná. Tobʼelañá, kisikjaʼaitsjenjin nga Jeobá nʼio tjínle kjoatsjoacha, nga tsjoále choʼndale jme xi machjénle (Deu. 15:4, 5). Nga koa̱n sinʼiotʼa yaole Jeobá nga je koandiaale kʼoa sikuinda (Deu. 32:9, 10). Kʼoa nga tjínnele kixi koa̱n joni tsa Niná, nga̱ naxinandále mani (Deu. 7:6, 11). Nichxin xi tiyoaa ndʼaibi kʼoati kui xá mangínñá je kjoajtíntse xi jan nichxin satío.
2. Jósʼin basenkaoná jme xi faʼa ya kjoajtíntsená nga ngisa nda majinná je énle Niná.
2 Jmeni xi ʼmiyaná basenkaoná nga ngisa majinná énle Niná. Kʼianga sʼejna kjoajtíntse xi jan nichxin nkjín koya jmeni xi faʼa. Faʼa kjoanokjoaya, drama, xíngiaa xi kʼoasʼínchoya tsa jmeni kʼoa kao xi chjonangile josʼin tjíosíxále Niná. Kʼoa ngayeje jebi ngisasa nda síchoyaná josʼin si̱tjosoán énle Niná (Juan 17:17). Je naxinandále Jeobá tongini jetíbatíonda jmeni xi kjoaʼa ya kjoajtíntse xi sa̱tío, xi koasenkao xíngiaa jngo tjíjtsa Sonʼnde (Mat. 24:45-47). A tsí tsjoa mali nga nikjaʼaitsjenjin jmeni xi kʼuínyaná.
3. Jméni xi sʼiaan kʼianga ngisasa nda koasenkaoná jmeni xi kjoaʼa ya kjoajtíntse.
3 Kʼianga ngisasa nda koasenkaoná jmeni xi kjoaʼa ya kjoajtíntsená machjénní nga koanngián nga jan nichxin kʼoa nga nda kuinyañoaa. Koaan tongini tijékjoao ya jñani nixáo. Kʼoa nichxin nga sʼe̱jna kjoajtíntsená xátí soyofao ánni nga nda kuinyañosíño jmeni xi kjoaʼa. Tjín je xíngiaa xi ngisa nda binyáño kʼianga ya kotsenle je xi tínchja̱ya kʼoa tsa tíbʼétʼaxo̱nkaoni. Tikatíojyo je celularno kʼoa tsa localizadorno ánni nga ni jon kʼoa ni ʼyajin xi sijtisínile. Ali chobanajmíjion, ali tsa mensajejin nikasáon, kʼoa ali tsa tsojmijin chinao nga tísʼejna kjoajtíntse.
4. Jósʼin kuinyakao xtile je xi xijchá ma kʼianga nda katabinyáño ya kjoajtíntse.
4 Kʼianga xki̱ ñato nó, ñaki mañaa ngatsʼi je chjota israelita kʼianga kisʼexkiale je kjoatéxomale Niná kʼianga kisʼejna Sʼuí Xkójnda. Koanña je xi xijchá ma kʼoa kao “je xtiʼndí” nga kinrʼoé kjoatéxomale Niná (Deu. 31:12). Kʼoa ndʼaibi, nʼio tsjoa maná kʼianga tsjoá tjíojtín je familia nga tjíonrʼoé jmeni xi tífaʼa ya kjoajtíntse kʼoa nga tsjoá nda tjíobinyáño je xtiʼndí kʼoa nga tsín tokjiofe. Je xi kʼoati koa̱n sʼiaan nga nyaon nyaon kʼianga koa̱nnjio kuinga cho̱bayañá jmeni xi kabʼetʼaxoaan xi nʼio kasasénná. Kʼoa mani nga “kjoachini [tjío]jin ni̱ma̱le” xi sʼa xti, je xi xijchá ma tjínnele nga tsín totsjoáʼnde kjitele jme xi sʼin. Kʼoa ninga jekjimajchínga, machjénní nga koa̱nkuinda kʼianga nyisen kʼoa tsa yaje̱ hotel (Pro. 22:15; 29:15).
5. Jósʼin nda bʼaxki̱ je énle Niná xi totʼatsʼe nga nda nʼia.
5 Kʼianga nda nʼia nda bʼaxki̱ énle Niná. Kʼianga nda nʼia nga tiyoaa ya naxinandá jñani sʼejna kjoajtíntse nda bʼaxki̱ je énle Niná (Tito 2:10). Je chjota xi síxá ya hotel nʼio tsjoa male nga nda sʼín je xíngiaa xi ya batio, nga tsejta, nga tjínle kjoaxkóntokon kʼoa nga sítjoson joʼmile (Col. 4:6). Nichxin nginó, kʼianga tjíobásjai je ndsʼee xi síkasén Sucursal hotel jñani koatio je xíngiaa, je chjoón xi tíjnaʼnda kitsoxóle: “Nʼio tsjoa manajin nga i̱ bationi je testigole Jeobá nga̱ nʼio tjínle kjoaxkóntokon kʼoa nda chjota. Bexkón choʼndanajin kʼoa alikui chʼao síchon”.
6. Jósʼin nda bʼaxki̱ je énle Niná xi totʼatsʼe nga nda soyoaa.
6 Je xo̱n xi fatʼaa nga mangián kjoajtíntsená ali tsa tokuijin xá machjénni nga skoe̱ je xíngiaa joʼminá kʼoa nga kataʼyale nga kjoajtíntse tísʼejna. Kʼoati kui xá machjénni nga katabe chjota nga nda kjoan najño xi kichʼakjá kʼoa ndasʼin matseen ngatsʼiaa xi kui kjiotʼaná, kʼoa nga tsín kʼoakjoaan jokjoan je chjota xi tjín sonʼnde nga tokjaʼaíngá fayo, nga koto kjoan najño xi bʼakjá kʼoa tsakuije̱ xi matsenya (1 Tim. 2:9, 10). Kuinga si̱kuindasíñá yaoná josóyoaa nga tiyoaa ya jña sʼe̱jna kjoajtíntse kʼoa kʼiaje̱ nga sʼa kuichokʼetʼaxoaan yaoná ya hotel. Alikui ndasʼin matsen tsa jngo testigole Jeobá xi xká koto kji kʼoa tsa to playera yʼakjá nga kuicho. Ninga tsín tjínngʼián jñani sʼe̱jna je kjoajtíntse, kui najño xi ndasʼin matsen chʼa̱kjá. Kʼiatsa tjín jña koanngínkichaa nga jekjoetʼa kjoajtíntsená nga jngó jngó nichxin kʼoa mená si̱kʼantjaiyaa najñoná tojo machjénní nga nda sóyoaa, alikui si̱chajiaan nga kjoajtíntse kamangián.
7. Jmé xi sʼiaan kʼianga ndasa jchaa je xíngiaa ya kjoajtíntsená.
7 Kʼianga tsakatío sʼuí je chjota israelita koan kisimiyo je chjota xi kjin tjío kʼoa xi xin naxinandá jaʼaini, kʼoa kui xi jtín sʼin kisikatío (Hech. 2:1, 5). Kʼianga satíoná je kjoajtíntse xi jan nichxin kʼoati matsen nga jtín tiyoaa ngatsʼiaa kʼoa jebi tokʼoamale je chjota (Sal. 133:1). Kʼianga chʼa choaa tsojmi xi ya chinee ʼndele nga kʼia koanngínkindá ngisa tjínná ʼnde nga ʼyaxkoaan xíngiaa xi kjaʼaí kʼoa nga chjakaonajmiá.
8. Ánni nga ndatjínsíni tsa kʼoainganʼioá kʼianga sʼejna kjoajtíntsená.
8 Je chjota ñaki tokʼoamale josʼin nixá ya kjoajtíntsená kʼoa ngisa nga sʼejinle nga tsín machjíná. Kʼoa jon, a jetiyondao kʼianga kʼoainganʼio ya kjoajtíntse (Sal. 110:3). Nʼio nkjín xijchá xi fikao ʼndíxtile kʼianga tsjoánganʼio ya kjoajtíntsená kʼoa kʼoasʼin bakóyanile nga tjínnele kuinyakoaa xi ngikʼa. Tsa ʼyani xi ñʼai male nga símiyo xíngiaa, so̱kole miyo tsa tsjoánganʼio nga sʼejna kjoajtíntse. Jngo tichjaa xi kitso: “Me tsín nanda ʼya xi ʼbexkoan tsakai nga fia kjoajtíntse, tojékjoán familiana kʼoa tojngo jao mani miyona. Tonga kʼianga kisitsje ya jñani sʼejna kjoajtíntsená nʼio nkjín ndsʼee kao tichjaa tsaʼbexkoan. ¡Nʼio tsjoa kisʼena!”. Kʼiatsa kʼoatisʼin kʼoainganʼioá nga sʼejna kjoajtíntsená nkjín miyo sʼe̱ná kʼoa nʼio tsjoa sʼe̱ tokoán (2 Cor. 6:12, 13). Tsa nisañandiajin bʼainganʼio, chjónangilao je xi chjotajchínga sʼin tjío jméni xi tjínneno sʼiaon tsa meno kʼoainganʼio.
9. Jméni xi sʼiaan kʼianga katafi kjoajtíntsená je chjota.
9 Kʼoatʼinlai xi kjaʼaí nga katafinrʼoé énle Niná. Tojo tinʼia nó xi tífaʼato kʼianga tongini jan xomana mangínkjayolee chjota je xo̱n xi tsʼe kjoajtíntsená, kʼoati sʼiaan nó jebi. Nga jngó jngó jtín kʼoenele yaole nga sikʼabíjnda jñani bʼakaole (chótʼai rekuadro xi tso: “Jókʼuínlee chjota kʼianga kjoáyolee xo̱n xi tsʼe kjoajtíntse”). Je xo̱n xi kʼoangi jchʼañá nga koanngián kjoajtíntse ánni nga je katasíchjénsíni xíngiaa xi ngikʼa nga kjoayole chjota xi jtsaojin.
10. Kʼoalasi kʼai choa̱ josʼin bichótsjoá nga kʼoasʼin xo̱n fayolee chjota.
10 Jósʼin bichótsjoá nga kʼoasʼin xo̱n fayolee chjota. Xi tojngola choa̱: Ñandia kʼianga tísʼejna kjoajtíntse, jngo ndsʼee xi síkatíonda chjota tsakásjaiʼndele jngo chjoón kao xʼinle. Chjota jebi kʼoaxókitsole ndsʼee nga jngo xo̱n xi tsʼe kjoajtíntse tsakʼaile kʼoa koanmexósale nga skoe̱. Kʼoa tsʼatoxó 300 kilómetro kjin tjínle jña jaʼaini kao karrole. Xi ijngosa choa̱: Jngo tichjaa xi xki̱ ndʼia títsoyason, jngoxó xo̱n xi tsʼe kjoajtíntse tsakájnale jngo chjota. Kʼoa nga tsabe nga koanndosinle kʼiaxó tsakʼéyanajmíle jme xi tínchja̱ni xo̱n jebi. Kʼoa kʼianga tísʼejna kjoajtíntsená, je tichjaa jebi tsabexó nga kicho chjotabe kʼoa jngoxó miyole tje̱nkao kʼoa jngó jngóxó xo̱n xi kʼia kitjo yʼa nga jao.
11. Ánni nga nʼio machjénsíni nga ntsjaintsjai koanngián je kjoajtíntse xi jan nichxin satío nga xki̱ nó.
11 Je sʼuí xi kitsole Jeobá nga koatio je chjota israelita nʼio chjíle. Kui tsakasenkao nga kixi kisixále Jeobá kʼoa nga tsín jée tsakajngi (Jos. 24:14). Kʼoa je kjoajtíntse xi jan nichxin satíoná ndʼaibi kʼoati basenkaoná “nga kao kjoakixi” bitsomaa. Kʼoa jé Niná tiʼyaxkoán kʼianga mangián (3 Juan 3). Je Jeobá katasíchikontʼainno ngatsʼio xi tsjoachao énle nga kʼoasʼin bʼenelao yaono nga xki̱ nó xki̱ nó mangíon kjoajtíntsená kʼoa nda binyaño.
[Én xi ya faʼaitʼakao sén xi faʼaitʼa ya pájina 4]
Kʼianga nda nʼia nga tiyoaa ya naxinandá jñani sʼejna kjoajtíntsená nda bʼaxki̱ je énle Niná
[Én xi ya faʼaitʼakao sén xi faʼaitʼa ya pájina 5]
Jan xomana tongini nga sʼe̱jna je kjoajtíntse koanngínkjayolee xo̱n je chjota ánni nga koaisíni
[Én xi ya faʼaitʼakao sén xi faʼaitʼa ya pájina 3]
Én Xi Sʼejintokoán Tʼatsʼe Je Kjoajtíntse Xi Jan Nichxin Sʼe̱jna Nó 2012
◼ Ora nga koaitsʼia kʼoa nga kjoetʼa. Las 9:20 koaitsʼia nga jan nichxin. Las 8:00 tjóxʼá je xo̱ntjoa. Kʼianga kʼoakʼuínná nga kuinóʼyalee je músika xi koaitsʼiani kjoajtíntsená, choyalee nga jekoanngínkiyoaa ʼndená ánni nga ndasʼin koaitsʼiasíni. Nga bixine kao nga xoto las 4:55 kjoetʼa, kʼoa nga taingo las 3:40 kjoetʼa.
◼ Jña sʼeyo karro. Ya jñani tiñá si̱kuindañá je karro alikui kʼoéchjiá, kʼoa kʼoasʼin sʼe̱yo chʼin chʼin josʼin kuicho. Kʼoa ya jñani sʼe̱yo karrole xíngiaa xi tsín ma fi, tojekjoán xi kʼoaiʼndele xi tjínle placa kʼoa kao xi tjínle letrero. Mani nga totjíchoa̱ karro jchóya, kʼoaʼmilee xíngiaa nga nkjín chjota katabatioya nga tojngo karro.
◼ Yáxile. Tojékjoán xi koa̱n koatiolee yáxile je xi tojngo niʼya maa, kao je xi tikui karro koanngínkaoñá kʼoa kao je xi tiʼmiyalee Biblia (1 Cor. 13:5).
◼ Tsojmi xi chinee. Ngisa nda nga chʼaa tsojmi xi chi̱nee tikʼoajinni nga kʼia koanngínkindá nga nyisen. Koaan jngo xjoa̱ chʼaa xi koa̱n ya si̱kʼéjnangiaa yáxile. Ya jñani satío kjoajtíntse alikui tjoʼnde nga kui xjoa̱ xi nʼio yʼai kjoan chʼá kʼoa kao tsojmi xi cho̱tsín.
◼ Tao̱n. Koaan kʼoainganʼioá je xá xi kjima jngo tjíjtsa Sonʼnde nga koatioyá kaxa̱ jotjín nroajin ni̱ma̱ná. Kʼiatsa kʼoasʼiaan kʼoasʼin koakoñá nga nʼio ʼyachjía je kjoajtíntsená. Tsa ʼyani xi mele nga cheque sikatíoya kaxa̱, kui kʼoetʼa je jaʼaín xi yʼa je testigole Jeobá ngixko̱n kjoatéxoma i̱ México: La Torre del Vigía, A.R.
◼ Tsa ʼyani xi skuiʼaon kʼoa tsa tjín xi koa̱n. Kʼiatsa ʼya xi tjín xi koa̱nle koaan je kjitʼanangi kʼoakʼuínlee je ndsʼee xi tjíosíkatíonda chjota. Ndsʼee jebi jé sikjinrʼoé je xi ya tjío ya Primeros Auxilios ánni nga je sisinsínile.
◼ Xki. Kʼiatsa tinixkio koaan chʼa̱o xkino, nga̱ tsín ya kʼoainá xki ya jña sʼe̱jna kjoajtíntsená. Tsa ʼyani xi chʼinxi tjínle kʼoa tsa jeringa kʼoa nindo síchjén alikui koa̱n nga tojña sikʼatsao, kʼoa ni koa̱njin nga ya sikʼatsaoya je xjoa̱tjé xi satío ya jña sʼejna kjoajtíntse kao xi tjío ya hotel.
◼ Jté. Nga xki̱ nó nkjín mani xi miʼaon xi totʼatsʼe jtéle. Ngisa nda nga kui kjoáyaa jté xi nda sʼeyaná xi tsín tokjoan toma ánni nga tsín jme xi koa̱nsíniná ya jña mijon chon, jña eskalón tjín kʼoa tsa ya jñani ki̱cha̱ kjiojchxo.
◼ Xíngiaa xi tsín nda nrʼoé. Tjínkʼa kjoajtíntse jñani kʼoati ma noʼyalee kao radio (FM) jmeni xi faʼa, tonga toyaní jinkjoajtíntse. Nga koa̱n kuinóʼyalao machjén nga jngo radio chʼa̱o xi pila tjínle kʼoa kao audífono.
◼ Carriola kao yáxile xi sʼekjaoya. Alikui koa̱n nga carriola kʼoa tsa yáxile xi sʼekjaoya kʼoa̱ je xi xijchá ma. Je xi koa̱n kʼoa̱ tokui yáxile xi tsʼe xtiʼndí xi tochoa̱ ma jchóson jñani biyoaa.
◼ Perfume. Tjín ʼnde jñani satío kjoajtíntsená nga aire acondicionado machjén nga̱ yaniʼyaní. Mani nga tsjoachaa xíngiaa alikui koa̱n nga toxkia tse perfume si̱chjén xi nʼio nje̱, nga̱ tjín xíngiaa xi chʼao síkao xi tsín nanda ma kjenjta kʼoa tjínje̱ xíngiaa xi kjaʼaísa chʼin tjínle (1 Cor. 10:24).
◼ Xon xi Sírvase visitar (S-43-S) ʼmi. Kʼoaʼmilee xíngiaa nga chʼa̱o tsa jngo kʼoa tsa jao je xo̱n xi Sírvase visitar ʼmi ánni nga koa̱n kʼoétʼaxo̱nsíño tsa jngo chjota xi koa̱nndosinle énle Niná chja̱kaonajmío. Xijekoa̱n, je tʼailao je ndsʼee xi ya síxá ya Departamento de Publicaciones, kʼoa tsamaije̱ kʼia tʼailao je xi secretario sʼin tíjna ya jinjtín (chótʼai Nuestro Ministerio del Reino xi tsʼe sá mayo nó 2011, pájina 3).
◼ Jña kjen chjota. Kʼiatsa nda sʼiaan nga tiyoaa ya jña kjen chjota jé Jeobá kuitjongʼa. Kʼoa tsa kʼoasʼin beni ya jñani kuichaa nga sʼejna jotjínle tsʼe ndáxile koaan kʼoéjnaa.
◼ Hotel
1) Ali nkjínjin kuarto nijáo tsa tsínni koa̱nchjénno ngayeje, kʼoa tokʼoakjoantjín tiyoʼyao je kuarto jotjín tsjoáʼnde je hotel.
2) Kʼiatsa ñaki tsínni kʼoakoa̱nno nga ya kuiyo, ndi̱to̱n tinókjoao ya hotel (Mat. 5:37).
3) Tʼiaon kuenta jebi: Kʼiatsa tarjeta de crédito kʼoa tsa tarjeta de débito kʼoéchjíño hotel, sʼe̱jnanʼio choa je tao̱nno. Je tao̱n jebi kui koa̱nchjíntjaini tsa totsejinni tjín xi si̱kitsón jotjín nichxin nga ya kuiyo. Kʼiaa jekoa̱n si̱chjénño tao̱n jebi nga jekjoaʼato jngo jao nichxin nga jekabʼechjío.
4) Kʼiatsa kui si̱chjaon je ki̱cha̱ xi ma nokjónya chʼá, tiʼa tangínnikʼéjnaño nga jekoa̱nchjénno ánni nga koa̱n sichjénsíni xi kjaʼaí chjota.
5) Tʼailao tsʼe ndáxile je chjota xi síxá ya hotel xi tsókjón tsojmino. Kʼoa nyaon nyaon tikʼéjnalao tsʼe ndáxile je chjoón xi sindachon kuarto jña kuiyo.
6) Kʼiatsa tsín tjoʼnde nga kui sʼenda tsojmi xi ma chine ya kuarto jña kuiyo, alikuijin bʼendao.
7) Chósonnilao jotjín chjóao je kafe kʼoa kao tsojmi xi kʼoaino nga tanjio jotjín nichxin nga ya kuiyo.
8) Katamatsen nga énle Niná tichotʼayao kʼianga chja̱kao je xi síxá ya hotel. Tikjaʼaitsjaon nga nkjín chjota sísinle kʼoa nga tsjoa male nga tondʼé nʼia kʼoa nga tsejta maa.
9) Je xi xijchá ma tjínnele nga sikuinda je ʼndíxtile tojñani nga tjío ya hotel, a yaa ya piscina, a yaa jña bitjasʼenñá hotel axo yaa ya gimnasio.
10) Jotjín síkʼéchjí nga jngo nitje̱n ya hotel yaa tjítʼa je xo̱n xi Lista de hoteles recomendados ʼmi xi nikasénle jtín, tonga kjaʼaínile jotjín síkʼéchjísonsa. Kʼiatsa tsʼato kʼoatjín sikʼéchjíno, kjitʼanangi tikjinrʼóao je ndsʼee xi kjinele Departamento de Alojamiento.
11) Tsa jme kjoa sʼe̱no ya kuarto jña kuiyo jotjín nichxin sʼe̱jna kjoajtíntse, kjoan tikjinrʼóao je ndsʼee xi kjinele Departamento de Alojamiento.
◼ Je xi mele tsjoánganʼio jme xá xi sʼe. Toʼyani xi mele tsjoánganʼio xá xi sʼe̱ ya kjoajtíntse, ya katafi jñani tíjna Departamento de Servicio Voluntario. Je xti xi kje xjaʼaonjngojin nóle koaan tsjoánganʼio jme xá xi sʼe̱ tsa tje̱nkao jngo xijchále. Kʼoati koa̱n sixá tsa tje̱nkao jngo xi jejchínga tsa katsjoáʼnde xijchále.
[Én xi ya faʼaitʼakao sén xi faʼaitʼa ya pájina 6]
Jókʼuínlee chjota kʼianga kjoáyolee xo̱n xi tsʼe kjoajtíntse
Kʼianga kuitjosonjndaná je ʼnde xi bʼakaoná, koaan tongotjo chja̱kaonajmiá chjota kʼianga kjoáyolee xo̱n. Koaan i̱ kʼuínlee: “ʼNdali. Jngo xo̱n tifayolaijin xíngiaa tʼatsʼe jngo kjoajtíntse xi sʼe̱jnanajin, koajnale tsi. Xo̱n jebi tíbʼabí jngo tjíjtsa Sonʼnde. I faʼaitʼa kʼiani kʼoa jñani sʼe̱jna”. Tsa kʼia nga xoto kʼoa tsa nga taingo si̱kʼabíson xo̱n jebi kʼoati koa̱n kjoáyo rebista. Kao kjoatsjoa si̱kʼabísoan xo̱n jebi.