Jósʼin si̱chjén je grabación xi tjío

1. Jmésani xi faʼaitʼa ya jw.org xi koasenkaoná kʼiatsa si̱chjén.

¹ Nʼio nkjín chjota xi tjíobinyakao nga bʼéxkia jmeni xi faʼaitʼa ya jw.org, nga̱ jmeni xi ya faʼaitʼa nʼio nda tso kʼoa ñaki kʼoatjín (Ecl. 12:10). A jesa kinoʼyalai je grabación xi ya tjío. Nʼio nkjín xo̱n xi faʼaitʼa ya jw.org xi kʼoati jetjío grabaciónle. Jósʼin koasenkaoná kʼiatsa si̱chjén.

2. Jósʼin koa̱n si̱chjén grabación xi tjío kʼianga toñá chotʼayá kʼoa kʼianga chotʼayajtían Énle Niná ya niʼyaná.

² Kʼianga toñá chotʼayá kʼoa kʼianga chotʼayajtían Énle Niná ya niʼyaná. Kʼiatsa ndiaa titomjeyá kʼoa tsa xáná tinʼia ya yaniʼyaná koaan kuinóʼyalee je grabación xi tjío xi tsʼe Biblia, xi tsʼe rebista kʼoa xi tsʼe xi kjaʼaísa xo̱n. Tsa kʼoasʼiaan, nʼio ndasʼin si̱chjén je nichxinná (Efes. 5:15, 16). Kʼianga chotʼayajtían Énle Niná ya niʼyaná kʼoati koa̱n kuinóʼyalee jngo grabación kʼoa kjuintjenngiaa josʼin kjimaxkia. Kʼoa kʼianga toñá chotʼayá koaan kuinóʼyalee je grabación xi tjío. Kʼiatsa kʼoasʼiaan, nʼio koasenkaoná nga ndasa koa̱nná kʼoéxkiaa je xo̱n kʼoa kʼoati koasenkaoná kʼiatsa kjaʼaí én tichotʼayá.

3. ʼYáni xi ngisa nʼio nda koasenkao je grabación xi tjío.

³ Kʼianga ʼmiyasoán. Nʼio nkjín chjota xi tsaojiaan nga ʼmiyasoán xi kʼoatso nga tsín maʼale nga xo̱n bʼéxkia. Tonga tsakui nichxin koa̱njyole nga jngo grabación kjuinrʼoéle. Kʼoa tjíokʼa chjota xi kjaʼaí én nchja̱ xi tsakui nichxin ngisa nda kjuinrʼoé je énnda chjotse kʼiatsa kao énle kʼuínyanile (Hech. 2:6-8). Tjíokʼa naxinandá jñani je chjota nʼio nda nrʼoé nga jme xi sʼeyanajmíle. Tobʼelañá, je chjota xi én hmong nchja̱ kʼoasʼin beni saʼnda ngasʼa nga tobʼéyanajmíle je xtile jmeni xi be, kʼoa ngisa nda bʼéjinkon. Kʼoati nkjín naxinandá tjío ya África jñani je chjota nʼio tsjoake nga tosʼeyanajmíle jmeni xi ʼmiyale.

4. Kʼiatsa kui si̱chjén je grabación xi tjío kʼianga kʼuínyasoán, jméni xi chjónangilee yaoná.

⁴ Si̱kjaʼaitsjenla ya jñani ʼmiyasoán, a skénndiaa tsa títjon kjoanla jngo grabación kjuinrʼoé choale je chjota xi kjaʼaí én nchja̱. A ʼyaxkon kʼaa chjota xi koasenkao je grabación kʼiatsa ya correole si̱kasénnilee. Kʼoa je chjota xi mandosinle Énle Niná, a koaan koájnalee je xo̱n kʼoa jngo disko kuinyalee je grabaciónle. Koaan kʼoétʼaa ya informená jotjín libro, foyeto, rebista kʼoa kao tratado xi ñaki kjiojngo kʼoailee je chjota xi ya kachʼajenñá ya jw.org. Je grabación xi tjío nʼio basenkaoná kʼianga toñá chotʼayá kʼoa kʼianga ʼmiyalee Énle Niná je chjota (1 Cor. 3:6).