Kʼoasʼin si̱kjaʼaitsjeen josʼin síkjaʼaitsjen Jeobá kao Jesús

1, 2. 1)Jósʼin tíjna nga tsjoacha maa je Jeobá. 2) Jósʼin tsakakó Jesús nga tsjoake koan je Nʼaile.

JE Jesús kʼoakitso jñánile je kjoatéxoma xi ngisa chjíle. I kitso: “Katamatsjoachai tsokʼoa je Nainá Nináli. Katamatsjoachani ngayije ni̱ma̱li, kao ngayije kjoatsjoali, kao ngayije kjoafaʼaitsjenli, kao ngayije nganʼioli” (Mar. 12:30). Je texto jebi kʼoatso nga tjínnele tsjoacha koaan je Jeobá kʼoa yaa koakoñá josʼiaan, jmeni xi si̱metokoán kʼoa josʼin si̱kjaʼaitsjeen. Nga tsjoachaa je Jeobá kʼoatisʼin nikjaʼaitsjeen josʼin síkjaʼaitsjen. Ningalani tsínkʼia koa̱njinná jokjoansʼin síkjaʼaitsjen, je xi koasenkaoná nga jchaa josʼin síkjaʼaitsjen kʼiaa nga chótʼayajiaan josʼin síkjaʼaitsjen Cristo, nga̱ je Cristo kʼoasʼin síkjaʼaitsjen josʼin síkjaʼaitsjen je Nʼaile (1 Cor. 2:​16, TNM, kao nota de estudio “nosotros sí tenemos la mente de Cristo”).

² Je Jesús nʼio tsjoake koan je Jeobá, kuinga kisitjosonnile ningalani be nga tse kjoañʼai kjoaʼa nga kʼoasʼin. Alijme xi kjaʼaínile xi ngisa chjí tsabekon Jesús, kui ngisa kitsjoale kjoandosin nga kisitjosonle je Nʼaile.

3. Jmé xi koanjinle Pedro kʼianga ya tsakʼamjekao Jesús, kʼoa jméni xi kitsole je chjotale Cristo (1 Pedro 4:1).

³ Je Pedro kao xi ngikʼa pastro tsabe josʼin síkjaʼaitsjen Jesús nga̱ yaa ñatjen tsakʼetsoma. Kʼianga kiski Pedro je xi títjon carta xi jaʼaínle yʼa, kʼoakitsole je chjotale Cristo nga kʼoatisʼin katasíkjaʼaitsjen josʼin síkjaʼaitsjen je Cristo (tʼexkiai 1 Pedro 4:1).a Kʼianga “chjóao nganʼio” kitso je Pedro kui kinchja̱ni josʼín jngo sondado nga bʼejnanda kʼianga fi kjoajchán nga bʼa je ki̱cha̱ xi machjénle nga skan. Tikʼoasʼinni, kʼianga kʼoasʼin nikjaʼaitsjeen josʼin síkjaʼaitsjen je Jesús kui xi basenkaoná nga tsínkui xi chʼaotjín nikjaʼaitsjeen kʼoa nga tsín kʼoasʼin nikjaʼaitsjeen josʼin mele je Na̱i (2 Cor. 10:​3-5; Efes. 6:12).

4. Jmé xi chótʼayajiaan i̱ kjoaʼmiya jebi.

⁴ I̱ kjoaʼmiya jebi kui chótʼayajiaan josʼin síkjaʼaitsjen Jesús kʼoa jméni xi sʼiaan nga kʼoatisʼin si̱kjaʼaitsjeen tsanda ñá. Kui chótʼayajiaan xi tʼatsʼe jebi: Xi títjon, jósʼiaan nga kʼoatisʼin si̱kjaʼaitsjeen josʼin síkjaʼaitsjen Jeobá. Xi majaoni, jósʼiaan nga nangitokon koaan. Kʼoa xi majanni, nga nda chósonnilee josʼiaan.

KʼOATISʼIN SI̱KJAʼAITSJEEN JOSʼIN SÍKJAʼAITSJEN JEOBÁ

5. Kʼiáni nga tsín kʼoasʼin kisikjaʼaitsjen Pedro josʼin síkjaʼaitsjen Jeobá.

⁵ Jngola choa̱ kataʼyaa josʼin tsakakó Pedro kʼianga tsín kʼoasʼin kisikjaʼaitsjen josʼin síkjaʼaitsjen Jeobá. Je Jesús kʼoakitsole chjotatjenngile nga ya Jerusalén koai, nga je xi nyatítjonle religión tsoa̱ nga kjoañʼai sikjaʼá kʼoa nga sikʼien (Mat. 16:21). Tsakui nichxin kui kisikjaʼaitsjenjin Pedro nga tsín tsjoáʼnde Jeobá nga kʼoakoa̱ntʼain Jesús, nga̱ be nga je Mesías xi tíchoyale xi kʼoasjentjai naxinandále Niná (Mat. 16:16). Kuinga kikaotʼaxinni je Jesús kʼoa i kitsole: “Señor, Niná katabʼéchjoale kjoabi tʼatsi. Nikʼiajin nga kʼoakoa̱ntʼain” (Mat. 16:22). Je Pedro alikui kʼoasʼin kisikjaʼaitsjen josʼin síkjaʼaitsjen je Jeobá kao Jesús.

6. Jósʼin tsakakó Jesús nga kʼoatisʼin síkjaʼaitsjen josʼin síkjaʼaitsjen Jeobá.

⁶ Nga kʼoasʼin síkjaʼaitsjen Jesús josʼin síkjaʼaitsjen je Nʼaile, i kitsole Pedro: “Titjájtonnái, ji Satanás. Kjaí tochʼao nikaonái, nga tsín ʼmitʼalai kjoale Niná, [tsín kʼoasʼin nikjaʼaitsjain josʼin síkjaʼaitsjen Niná] tonga ʼmitʼalai kjoale chjota” (Mat. 16:23). Je Jesús be nga kjoañʼai kjoaʼa kʼoa nga ni̱kʼien nga sitjoson josʼin mele Jeobá, kuinga tsín kinrʼoénile jmeni xi kitso je Pedro ningalani kui xi koanmele Pedro nga tsín jme xi koa̱nle je Jesús. Je Pedro koanjinle nga tjínnele kʼoasʼin sikjaʼaitsjen josʼin síkjaʼaitsjen Jeobá. Kui xi bakóyaná tsanda ñá nga tjínnele kʼoasʼin si̱kjaʼaitsjeen josʼin síkjaʼaitsjen Jeobá.

7. Jósʼin tsakakó Pedro nga mele kʼoasʼin sikjaʼaitsjen josʼin síkjaʼaitsjen Jeobá (chótsenlai sén xi faʼaitʼa ya ).

⁷ Kʼianga jeki nichxin, je Pedro tsakakó nga mele kʼoasʼin sikjaʼaitsjen josʼin síkjaʼaitsjen Jeobá. Je Jeobá kʼoakitso nga koa̱n koatiojin ya naxinandále je chjota xi xin tsʼe kʼoa kʼoakitsole Pedro nga katafitsoyale je Cornelio. Jé Cornelio xi títjon chjotale Cristo koan xi xin naxinandále. Tsakui nichxin ñʼai koanle Pedro nga kisitjoson jmeni xi tsakʼinle, nga̱ je chjota judío alikui ya tsakájta je chjota xi xin naxinandále, tonga nga koanjinle jmeni xi mele Jeobá kikonle Cornelio kʼianga kinchja̱le (Hech. 10:​28, 29). Kisʼenngindá je Cornelio kao xi tjío ya yaniʼyale kʼianga kitsoyale Pedro je Énle Niná (Hech. 10:​21-23, 34, 35, 44-48, TNM).

8. Jósʼin koakoá nga kʼoatisʼin nikjaʼaitsjeen josʼin síkjaʼaitsjen Jeobá (1 Pedro 3:8).

⁸ Kʼianga jejaʼato nó, je Pedro i kitsole je chjotale Cristo: “Tojngo kjoafaʼaitsjen katasʼeno ngatsʼio” (tʼexkiai 1 Pedro 3:8).b Yaa Biblia faʼaitʼa josʼin síkjaʼaitsjen Jeobá. Tsa mená nga tongóson sʼin si̱kjaʼaitsjeen kao ngatsʼi je ndsʼee nga testigole Jeobá maa, machjén nga kʼoasʼin si̱kjaʼaitsjeen josʼin síkjaʼaitsjen Jeobá. Tsakuila si̱kʼaxkiaa nga kʼoakitso Jesús nga kui xále Niná ngisa kʼoailee kjoandosin, jókʼuínlee jngo ndsʼee tsa kʼoakuitsoná nga mele ngisasa tse sixále Niná (Mat. 6:33). Alikuijin kʼoakʼuínlee jokitsole Pedro je Jesús, tosajin kʼoakʼuínlee nga nʼio nda tísʼín kʼoa kuinyakaojián.

NANGITOKON KATAMAA

9, 10. Jókisʼin je Jesús kʼianga tsakakóyale chjotatjenngile nga tjínnele nangitokon koa̱n.

⁹ Jngo nitje̱n tongini nga kjesa nikʼienjin Jesús, kʼoakitsole je chjotatjenngile nga nʼio chjíle nga nangitokon koa̱n. Nga tongini, kʼoakitsole je Pedro kao Juan nga katabatíonda jmeni xi koa̱nchjénle nga koakjenkao je chjotatjenngile nga kjesa nikʼienjin. Je Pedro kao Juan tsakatíondajin je xjoa̱ kao toalla xi koa̱nchjénle nga sa̱néjon ndso̱ko̱ xi kuichokjien. ʼYáni xi tsakanéjon ndso̱ko̱ xi kicho.

¹⁰ Jé xi choʼnda ma banéjon ndso̱ko̱ je xi bichó. Tonga nga kʼia jé Jesús xokisʼin. Jóxótse sʼin kisikjaʼaitsjen je pastrole kʼianga tsabe nga kiskoé Jesús je toalla, nga tsakʼéya nandá je xjoa̱ kʼoa nga tsakanéjon ndso̱ko̱ chjotatjenngile (Juan 13:​4, 5). Jókji tse nga kʼoakisʼin Jesús. Tsakanéjon ndso̱ko̱ ngatsʼi pastrole kʼoa kao tsʼe Judas, ninga tije kineni nga koanskanni. Je Jesús kʼoasʼin tsakakó nga nangitokon ma. Xijekoan, i kitsole chjotatjenngile: “A machoyano xi kasikaono. Jon Maestro kʼoa Señor ʼmináo. Kjaínga nda bixón, nga kui nía. Neni tsa an xi Señor, xi Maestro, kabanejoan ndso̱ko, kʼoati jon machjénno nga tanejonngañáo ndso̱ko̱ xíngio” (Juan 13:​12-14).

11. Jósʼin tsakakó Pedro nga nangitokon koan (1 Pedro 5:5; kʼoati chótsenlai sén xi faʼaitʼa).

¹¹ Je Pedro kiskenngile Jesús nga nangitokon koan. Kʼianga koanskanni, nga jekini ngʼajmi je Jesús, je Pedro jngo chjota kisindaya xi chjiʼngé saʼnda nga kitsin (Hech. 1:​8, 9; 3:​2, 6-8). Kʼianga kʼoakisʼin, tokʼoakoanle je chjota xi tsabe (Hech. 3:11). Ningalani kʼoasʼin beni je chjota xi ya tsʼe nga yaole bʼasjengʼa, je Pedro alikui kʼoakisʼin. Tosaa je Jeobá kao Jesús tsakʼasjengʼa. I kitso: “Jesús kisinda je chjotabi xi tiʼyao xi ʼyaxkon [ . . . ]. Tokui nga makjainnajin tʼatsʼe Jesús, kui nga kabʼainile kjoanda je chjotabi” (Hech. 3:​12-16). Xijekoan, je Pedro kʼoakitsole je chjotale Cristo nga nʼio chjíle nga nangitokon koa̱n. Jmeni xi kitso tsakui nichxin kui síkjaʼaitsjenjinná jokisʼin Jesús nga tsakanéjon ndso̱ko̱ pastrole (tʼexkiai 1 Pedro 5:5).c

12. Tojo kisʼin Pedro, jósʼin koakoá nga nangitokon maa.

¹² Tojo kisʼin Pedro, kʼoati koa̱n koakoá nga nangitokon maa. Nga nangitokon maa yaa bakoñá jobixoán kʼoa josʼin nikjaʼaitsjeen. Kʼianga kʼoakitso Pedro nga nangitokon koaan kui kinchja̱ni josʼin nikjaʼaitsjeen xi tʼatsaan kʼoa josʼin nikjaʼaitsjeen tʼatsʼe xi kjaʼaí tojo tso ya 1 Pedro 5:5. Kuinga binyakaoñá xi kjaʼaí nga tsjoachaa je Jeobá kʼoa nga tsjoachaa xíngiaa. Ali tsakuijin kʼoanʼiañá nga nda katabʼaxkiaa. Kʼoasʼin koakoñá nga nangitokon maa tsa tsjoa tjín tokoán nga je Jeobá tinixálee kʼoa nga tibinyakoaa je ndsʼee ninga tsín ʼya xi skoe̱ná nga kʼoatinʼia (Mat. 6:​1-4).

CHÓSONNILEE JOSʼIAAN

13. Jósʼin tíjna nga nda chosonnilee jonʼia.

¹³ Kʼianga nda chosonnilee jonʼia kuenta nʼia josʼin síkjaʼaitsjen Jeobá (1 Ped. 4:7). Majinná nga kui xi ngisa chjíle nga nda tiyoaa ngixko̱n. Alikui kʼoasʼin nikjaʼaitsjeen nga toñá ʼyayejee, tosaa je Jeobá nijélee nganʼio nga katabasenkaoná.d

14. Kʼiáni nga tsín je Jeobá kisinʼiotʼa Pedro.

¹⁴ Kʼianga tojeme kuindoa̱ Jesús, i kitsole chjotatjenngile: “Ngatsʼio nga jon, kʼoasʼin tsao̱tʼaxion xi tʼatsʼan kui nitje̱nbi”. Kʼoa je Pedro i kitso: “Nda tsa kʼoasʼin tsao̱tʼaxin ngatsʼi xi tʼatsi, an nikʼiajin ska̱tʼaxian”. Nga tikuini nitje̱n, je Jesús kʼoakitso kʼale chjotatjenngile nga tjenyatokon katabatio kʼoa nga kjitʼa katabʼétsʼoa (Mat. 26:​31, 33, 41). Tsa kʼoalani kisʼin Pedro jotsakʼinle, kʼoajin kitso nga chjotatjenngile Jesús ma. Tonga nga tsín tjenyatokon tsakʼejna kʼoa nga tsín tsakʼétsʼoa, kʼoakitso nga tsín bexkon je Jesús kʼoa skanni kʼoakoanle nga kʼoakitso (Mat. 26:​69-75).

15. Kʼianga tojeme ni̱kʼien Jesús, jmé xi tsakasenkao nga kitjosonle josʼin mele je Nʼaile.

¹⁵ Je Jesús jé Jeobá kisinʼiotʼa ngantsjai. Ningalani chjotatsje ngotjo ngosá tsakʼétsʼoanile je Nʼaile kʼianga tojeme ni̱kʼien. Nga kʼoakisʼin, kui xi tsakasenkao nga kitjosonle josʼin mele je Nʼaile (Mat. 26:​39, 42, 44; Juan 18:​4, 5). Je Pedro alikuijinkʼia kisichajin nga kjitʼa tsakʼétsʼoa je Jesús.

16. Jósʼin tsakakó Pedro nga nda kiskosonnile jokisʼin (1 Pedro 4:7).

¹⁶ Nga jeki nichxin, je Pedro jé Jeobá kisinʼiotʼa kʼianga tsakʼétsʼoale kʼoa kʼianga jejaʼáyanile Jesús kʼoakitsole Pedro kao xi ngikʼa chjotatjenngile nga kʼoaile nganʼiotsjele Niná kʼianga kuitsoyason, tonga kʼoati kitsole nga toyala Jerusalén katabatio (Luc. 24:49; Hech. 1:​4, 5, TNM). Je Biblia kʼoatso nga je Pedro kao xi ngikʼa chjotale Cristo nʼio kitsjoale kjoandosin nga tsakʼétsʼoa (Hech. 1:​13, 14). Kʼianga kiski Pedro je xi títjon carta xi jaʼaínle yʼa kʼoakitsole je chjotale Cristo nga tjínnele nʼio nda skósonnile jmeni xi sʼin kʼoa nga je Jeobá sinʼiotʼa nga kʼoetsʼoa (tʼexkiai 1 Pedro 4:7).e Je Pedro jé Jeobá kisinʼiotʼa kʼoa nʼio nda tsakasenkao je naxinandále Niná (Gál. 2:9).

17. Jméni xi tjínnele kuenta sʼiaan ngantsjai ningalani jeʼyaa jonʼia (kʼoati chótsenlai sén xi faʼaitʼa).

¹⁷ Tsa mená nga nda chósonnilee josʼiaan machjén nga kʼoétsʼoalee Jeobá nga je katabándiaaná ningalani jeʼyaa jonʼia. Ngisaa tsa nʼio tjínle kjoandosin jmeni xi mená sʼiaan machjén nga je si̱jélee nganʼio nga̱ jé xi ngisa nda be jmeni xi machjénná.

18. Jméni xi koa̱nná kʼoasʼiaan tojo kisʼin Pedro.

¹⁸ Kui kjoanda tjínná nga koa̱n chjénngilee jokjoan je Jeobá nga̱ toxá kʼoasʼin kisindaniná (Gén. 1:26). Ningalani tsínkjoan koa̱nná kʼoasʼiaan josʼín tonga koaan chjénngilee (Is. 55:9). Tojo kisʼin Pedro koaan kʼoasʼin si̱kjaʼaitsjeen josʼin síkjaʼaitsjen Jeobá. Koaan nangitokon koaan kʼoa nda chósonnilee josʼiaan.