Énnda chjotse xi machjén nga sʼe̱jinkon ngatsʼi chjota

Je kjoafaʼáyale Jesús nʼio kisitaja je kjoamakjainle chjotale kʼoa ñaki tsjoa tjíole nga kisixále. Tobʼelañá, je pastro Pablo kikakóyason saʼnda Asia Menor kao ya ʼnde xi tjío ya ndáchikon Mediterráneo, tsakatío jtín kʼoa kisinʼiojin je chjotale Cristo nga ñaki kixi katama ninga ʼya xi koaitjenngike kʼoa ninga kjoajndí kijnabasen. Kʼoa nga kʼoakisʼin, tosi tonda koannkjínya je chjotale Cristo.

Je pastro Pablo saʼnda kichaní ndoyá. Ninga ndoyá tíjnaʼya, kiskile je jtín xi tjío nga kitsjoanganʼiole kʼoa nga kitsjoale kjoafaʼaitsjen. Kʼoakitsole nga katasíkuindale yaole je xi yátsʼi̱n kuinyale je Niná. Je Niná kitsjoale nganʼiotsjele, kʼoa tongini kʼoakitso Pablo nga sʼe̱ chjota xi jngoyale “tseen xi nʼio toán” koa̱n, kʼoa énndiso sichjén tojoni nga skénʼndóbʼakjá je chjotale Cristo (Hechos 20:29, 30).

Kʼianga toje tífikjetʼa siglo I, jetjío chjota xi yátsʼi̱n tsakinyále je Niná. Kʼoa nga me tikuini nó jebi, je Jesús sén kisichjén nga tsakakóle je pastro Juan jmeni xi koa̱n nichxin xi nroani. Kʼoa tojo tso én xi kiski je pastro Juan, nijejinla xi kontra tjíobatiole Niná kʼoa nijejinla chjota xi to kjoandiso bakóya koa̱nle kʼoechjoa nga kuitjoson jmeni xi tjínndajinle Niná xi kao Sonʼnde kʼoa kao chjota. Kʼoa je énnda chjotse xi tʼatsʼe Chjotaxále Niná sa̱kóyasonle chjota “ngayije nangi, kao ngayije ntje̱, kao ngayije én, kao ngayije naxinandá” (Apocalipsis 14:6). Je Sonʼnde ʼndenaxó koa̱n, kʼoa ʼyani xi kʼoasʼin josʼin nga mele je Niná koatio ngantsjai nichxin.

Tsí nʼio naskátjín én jebi. Kʼiatsa makjainli xi tʼatsʼe jebi, tjasjaiyai jmeni xi tso Biblia xi tʼatsʼe Niná kʼoa jchaní nga nʼio koasenkaoli ndʼaibi kʼoa kao nichxin xi nroaján.

Tʼexkiai Biblia ya Internet; ñachantela koya én faʼaitʼa i̱ dirección jebi: www.jw.org. Kʼoati ya koa̱nsjaitʼali je foyeto A ʼyaní jme xi tínchjani je Biblia kao Énnda chjotse xi tʼatsʼe Niná tínroani, je libro Jmé kjoanni xi bakóya je Biblia kʼoa kao xi kjaʼaísanile. Xo̱n jebi kui bakóyaná ánni nga koa̱n koa̱nkjainsíniná jmeni xi tso je Biblia kʼoa josʼin si̱chjén nga jngó jngoá kʼoa kao familianá je kjoafaʼaitsjen xi faʼaitʼa. Kʼiatsa mesali jchai, kʼoatʼinlai jngo testigole Jeobá nga katatsoyali.

(Yaa yʼangini Hechos, Efesios, Filipenses, Colosenses, Filemón, 1 Juan kao Apocalipsis.)