Mwatha Kukwatha Munu Uje Asholoka mu Vushaki Ndi?

DON, Mukaleho wa Yehova wa ku Canada, walyanene kwambulwila vanu vaje vakakala mu vitapalo. Don wendekele ngwendi: “Njawanene munalume umo, lithzina lyendi Peter. Ou munalume wapwile muka-kuyevangela mu tapalo, cho wakele na mathzilo manene. Sholwethi yendi yapwile ya vushaki, cho vanu vavangi vakele na kumwongoloka. Peter wakele na kuvyana kumukwatha.” Nameme vithimbu vimo Don kakele na kumuwana, oloni walifwitile kumukwatha ha myaka ya kutuvakana 14.

Litangwa limo, Peter wehwile Don ngwendi: “Vika viuviyithila thimbu yove hali yange? Vanu voshe kuvethi kunjishwenya. Vika viulipakethela yove vavenya?” Don wakumbulwile Peter kulikwathetha vithoneka vitatu vije vyamwetele ku mbunge. Cha kulivanga, Don wehwile Peter indi athzivuka lithzina lya Njambi, cho wamulekele ngwendi alitandelelyo mu Mbimbiliya ku Myatho 83:18. Cha mu chivali, ha kushaka kukwatha Peter amone vyuma vyanenethele ngwavo Don amwake mbunge, Don walekele Peter atande Loma 10:13, 14, haje hali majwi amwetha ngwavo, “woshe atambeka ha lithzina lya Mwene akovoka.” Cha mamanethelelo, Don watandelele Peter chithoneka cha Mateo 9:36 na kumuleka lalo ngwendi alitandelecho vavenya. Eyi vesi yendeka ngwayo: “Omwo wamwene vimbunga vya vanu, wavathzivilile mema ku mbunge, omwo vakele na kuyandangela na kujuka, ngwe vimanga kuvethi na kanyungi.” Peter washangumukile kulila omwo wathzivile awa majwi, cho wehwile Don ngwendi: “Kuma yange manga ivanatumbula aha ndi?”

Peter washangumukile kutengulula yoyethi yendi. Wajwelele na kuteula minjethzi na kuthzala vuthzalo vwavuvwa vwamwanene Don. Peter watwaleleleho kukala na kusholoka mwamuvwa.

Peter wakele na kalivulu kathonekele mithzimbu yendi. Mithzimbu yendi ya kunima yathonekelemo imwetha vya kukaluwa kwa vuyoye vwendi, oloni munima ya kutenguluka, wathonekelemo mithzimbu yaivwa. Wathonekelemo ngwendi: “Njathzivuka lithzina lya Njambi. Omwo njilomba, njilombela kuli Yehova. Njavwahelela kuthzivuka lithzina lya Njambi. Don wanjilekele ngwendi Yehova atha kupwa kavuthamba kange, cho atha kunjitolilila thimbu yoshe yoshe.”

Thimbu kanda athse, Peter wathonekelele mukanda shongo yendi wa munalume na yayendi wa munakathzi ngwendi:

“Hano njili na kuvinja. Muvila wange unathzeye omwo ya vukulukathzi. Nameme njithsa, oloni njathzivuka ngwange tukalimona lalo na kavuthamba kange [Don] mu Palandaisi. Thzivukeni ngweni njinathsi laja. Nga mumona munalume uje kapandele kukala ha vya kuthsa vyange, endekeni nendi na kumutandela ka livulu ka kuthzivuluka [katwapangethele mu kulilongetha Mbimbiliya ka “Niti ye isa kwa Bupilo Bwa Kamita”].a Omwo mu ka livulu muli majwi amwetha ngwavo njikalimona lalo na kavuthamba kange mu Palandaisi. Njakulahela awa majwi na mbunge yange yoshe. Yange ndolome yeni, Peter.”

Munima ya vyakuthsa vya Peter, ndokathzi yendi Ummi walekele Don ngwendi: “Thimbu imo kunima, Peter wathimutwiyiye nange. Njamwene ngwange wapwile wa kuvwahelela cho wamwethwile na kumwethula. Nange njitanda eli livulu livanene ndolome yange. Njikulahela ngwange muli vyuma vyavivwa.” Kukapwa muje, Ummi watavele kulilongetha na Mukaleho wa Yehova mu livulu lya Bibele I Lutañi Luli?

Kutwapandele kukala na kangu, oloni tunapande kuthzema vanu voshe na kukala na lukakateya mu kuvakwatha. (1 Tima. 2:3, 4) Nga tulinga ngocho, cho tukwatha vanu vaje vasholoka mu vushaki, va kufwa ngwe Peter, oloni vali na vimbunge vyavivwa. Twathzivuka ngwetu Njambi uje ‘akamono mu mbunge’ ikeye akakwatha vanu va vimbunge vyavivwa valilongethe vuthunga.—1 Samwe. 16:7; Yowa. 6:44.