TWASA KUHYANA BATI BIZINDO?

2 | Keti Mwilwisile Bubi

Biyendeka Mbimbiliya:

“Kesi umwilwisile bubi bwendi lalo embwe. . . . Lingeni byuma byoshe ngwe mumunasela na kuyoya mu kwoloka kuli munu na munu. . . . Kesi mulinge shambandinga. . . . Omwo bisoneka byendeka ngwabyo, ‘“Yange njilinga shambandinga, njikabelwisila fweto yabo,” mwanendeka Shukulu Kalunga.’”—LOMA 12:17-19.

Bicilumbununa Cisoneka:

Nga munu natulingi mwamubi tunasa kulubala, oloni Njambi kashaka ngwendi twilwisile bubi owo munu. Yehova ashaka ngwendi tukwate mbunge mwafwa nakulahesa ngwendi ololo amanesa bubi bwoshe.—Myaso 37:7, 10.

Eci Cisoneka Cimikwasa Bati?

Nga banu ba kujeneka kulumbunuka belwisila bakwabo bubi, co bizindo bilibwezela mukati kabo. Ngeci, nga munu umo namilingi mwamubi, kesi mumwilwisile bubi. Mukumbululeni mwamubwa, co kesi mulubale. Simbu imo tunasa kubakonekela na kwibalako. (Visimo 19:11) Oloni nga mumona ngweni oyo ñanda inapu yakama manene, munasa kuyambulula ku banu banapande. Cakumwenako, nga banu bamo banamilingi mwamubi, co mwasa kubambulula ku polisi nambe ku banu beka baje bali na moko.

Nga mwilwisila bubi, co mubwezelela lika ku bukalu

Mulinga bati nga kukwesi ngila imo yaibwa ya kumaneselamo bukalu? Batico nga muneseka bingila byoshe bya kumaneselamo obwo bukalu? Nameme ngoco, kesi mwilwisile bubi. Nga mwilwisila bubi, co mubwezelela lika ku bukalu. Nga kumwilwisila bubi, co mutepulula ku bizindo. Kulaheleni ngweni Njambi amikwasa mumanese obwo bukalu. Mbimbiliya ngwayo: “Kulahela kuli ikeye, co akakukwasa.”—Myaso 37:3-5.

Bibaliwanene Nabyo Banu Bamo mu Buyoye—ADRIÁN

Wecelele Kwilwisila Banu Bubi

Mwapwile mwanike Adrián wapwile muka-kutenuka, co wakele na kulinga mwamubi baje bakele na kumulinga mwamubi. Wendekele ngwendi: “Ha bisimbu byabingi twakele na kulwa kupangesa mata, co simbu imo njakele na kubulumuka na kutunda maninga a mangi. Simbu imo bakele na kunjiwana mu ngila ngumbanga, njalezumuka.”

Mwakele na myaka 16, Adrián washangumukile kulilongesa Mbimbiliya. Wendekele lalo ngwendi: “Munjashangumukile kulilongesa Mbimbiliya njanangukile ngwange njapandele kutengulula futisi yange.” Wapandele kwecela kuzinda banu na kwecela lwozi. Byalilongesele ku mukanda wa Loma 12:17-19 bya kujeneka kwilwisila banu bubi, byamukwasele manene. Wendekele ngwendi: “Njalilongesele ngwange Yehova akamanesa bubi ha simbu inapande. Mukwita kwa simbu, njecelele futisi yange ya lwozi.”

Litangwa limo mangwezi, Adrián waliwanene na cibunga cimo cije cakele na kulilwisa na cibunga cakele na kulikwatasana naco kunima. Ntwama wa cije cibunga walekele banu bendi ngwendi: “Munzalyeni.” Adrián wendekele ngwendi: “Njashakele kulwa nabo.” Oloni ha simbu ije walombelele kuli Yehova, co wabasezele.

Adrián watwaleleleleho kwendeka ngwendi: “Lyamukwabo njaliwanene na ntwama wa cije cibunga. Munjamumwene njalubalele manene. Njashakele kumupupa, oloni njalombele Yehova anjikwase mangana njikwate mbunge. Njakomokele munjamwene uje mukwenje aija kuliyange na kwendeka ngwendi: ‘Njikonekeleko ha byuma binalingiwile izau mangwezi. Kwendeka lika busunga njishaka ku kutembwinina. Nange njishaka kulilongesa Mbimbiliya.’ Njalingile mwabubwa manene munjakwatele mbunge. Co kwanjikwasa njishangumuke kulilongesa nendi Mbimbiliya.”