TWASA KUHYANA BATI BIZINDO?

3 | Tundiseni Bizindo Mu bimbunge Byeni

Biyendeka Mbimbiliya:

‘Eceleni Njambi atengulule biyongola bya mu bimbunge byeni. Asinoni mukazibuka cizango ca Njambi, bije byabibwa nebi bimuzibisa kubwaha nebi bya kusungama.’—LOMA 12:2.

Bicilumbununa Cisoneka:

Njambi akamono byuma bitukasinganyeka. (Njelemiya 17:10) Kutwapandele lika kujenjuka ku kwendeka nambe ku kulinga byuma bimwesa ngwabyo twazinda bakwetu, oloni kuli byuma bikwabo bitunapande kulinga. Kuzinda banu kukashangumukila mu mbunge na mu bisinganyeka. Ngeci, tunapande kutundisa bisinganyeka bya kuzinda banu mu bimbunge byetu. Kulinga ngoco kukekwo lika kutukwasa ‘tutengulule biyongola bya mu bimbunge’ byetu na kwecela kuzinda banu.

Eci Cisoneka Cimikwasa Bati?

Munapande kulilula mwamubwa mangana munanguke mumukamwena banu ba ku mafuti eka nambe ba miyati yeka. Lihuleni ngweni: ‘Njikabamono bati? Kuma njikabamono kwesekesa na byuma binjizibuka nambe kusinganyeka hali bakebo ndi? Indi njikabayengula lika mwafwa ya mizimbu injikazibi hali bakebo?’ Jenjukeni ku mizimbu ya ha intaneti, mafilimu nambe byuma bya kulizima nabyo buli bije bishongangeya bizindo na bukenya.

Mbimbiliya itukwasa tutundise bizindo mu mbunge na mu bisinganyeka byetu

Kunasa kutukaluwila kwilula mwamubwa bisinganyeka bili mu bimbunge byetu. Oloni Lijwi lya Njambi lyasa kutukwasa ‘twilule biyongola na bizango bya mu bimbunge’ byetu. (Vahevelu 4:12) Ngeci, twaleleleniho kutanda Mbimbiliya. Esekeseni byuma bimutanda mu Mbimbiliya ku bisinganyeka bili mu mbunge yeni, co lingeni mumwasela mwoshe mangana bisinganyeka byeni bilitombole nebi biilongesa Mbimbiliya. Mbimbiliya yasa kutukwasa tutundise bizindo bije binakakateya mu bimbunge na mu bisinganyeka byetu.—2 Kolinte 10:4, 5.

Bibaliwanene Nabyo Banu Bamo mu Buyoye—STEPHEN

Watengulwile Bisinganyeka Byendi

Bindele bazindile Stephen na baka-naanga yendi. Mu kwita kwa simbu, Stephen washangumukile kulikwatasana na cibunga ca bupolitiki cije calwililile lisesa lya banu ba kuzibala. Stephen walikwatasanene na bibunga bije byakele na kulwisa banu. Wendekele ngwendi: “Bisimbu bimo nange na babusamba bange twakele na kuyongola mafilimu aje amwesele mubakele na kuyandela banu ba kuzibala mu bundungo ku America. Hanima ya kuyongola ije filimu twalubalele, co twapupile bindele batwakele nabo mu mulili mutwakele na kuyongwela filimu. Mutwatundile muje mu mulili twaile na kushakazeka bindele bakwabo mangana tukabapupange.”

Stephen watengulwile bisinganyeka byendi mwashangumukile kulilongesa Mbimbiliya na Bakaleho ba Yehova. Wendekele ngwendi: “Njakomokele manene munjamwene likwatasano lyakele mukati ka Bakaleho ba Yehova mwafwa ha kulibanga njezililile lika kumona banu ba bizindo mukati kabo. Cakumwenako, Mukaleho umo wa cindele mwaile ku lifuti lyeka, wasezele bana bendi ku naanga imo ya Bakaleho ba kuzibala mangana bamunyungilebo. Co lalo naanga imo ya ndolome umo wa cindele yatabele kukala na ndolome umo wa kuzibala uje kakele noku kwa kukala.” Stephen walimwenenene ngwendi Bakaleho ba Yehova bakebo lika baka-Kilistu baje balizema mu busunga kwesekesa nomu mwendekelele Yesu ngwendi bakalizema umo na mukwabo.—Yowano 13:35.

Bika byakwasele Stephen ecele bilinga byakelenabyo bya kuzinda banu? Mukanda wa Loma 12:2 ukewo wa mukwasele. Wendekele ngwendi: “Njashangumukile kunanguka ngwange njapandele kutengulula bisinganyeka byange. Njecelele kupwa muka-lwozi, co njalilongesele ngwange kukala mukwoloka kukekwo kwa seho manene mu buyoye bwange.” Stephen natwalelelaho kukala mu kwoloka na banu ha myaka ya kutubakana 40.