Vikulahetho Vije Vikalishulithilila
Muthzimbu wauvwa wa Vumwene vwa Njambi vali na kuwambulula mu kaye koshe ngwe mwapolofwetelele Yesu. (Mateo 24:14) Mukanda wa Ndanyele ngwawo, ovu Vumwene vwapwa fulumende ya Njambi. Mu kapetulu 2 muli vupolofweto vuje vwendeka ha vumwene nambe vifulumende vya ndthzili vije vyashangumukile kuyula mu kulikavathana kutunda ku Mbambilone ya kuthañulu kweta na lelo. Vesi 44 ituleka vyuma vije vikalingiwa kulutwe ngwayo:
“Njambi wa mwilu akaka vumwene vuje kuvukahu. Na umo wahi akavufungulula, cho vukanyongetha vumwene vwoshe, oloni vukevwo vukakala myaka yoshe.”
Ovu vupolofweto na vukwavo vwa mu Mbimbiliya vumwetha ngwavo Vumwene vwa Njambi vukainga viyulo vya vanu na kunena kwoloka mu kaye koshe. Vuyoye vukafwa vati mu Vumwene vwa Njambi? Evi vikulahetho vinatakanako ololo vilishulithilila:
KUKUKAKALA VINDTHZITA
Myatho 46:9: “[Njambi] amanetha vindthzita hano hathi hoshe, akapokothzola mata aluthipa na makunga, enyeka vintelo na tuhya.”
Vanu kuvakalanda lalo mata. Vyuma vyavivwa vije vivali na kupangetha mata ano matangwa vakavipangetha mu kukwatha manene vanu. Echi chikulahetho chikalishulithilila mu Vumwene vwa Njambi.
KUKUKAKALA KUVINJA
Isaya 33:24: “Naumo wai lalo uje akayoyela mu lifuti lyetu akalinyenga ha kuvinja.”
Achithinganyekeni kuvwaha kuvakathziva vanu kuyoya mu kaye muje kwemwethi mishongo ya mbunge na kansa na malaliya nambe mishongo yeka. Kukukakala lalo vipatela na vumbanda. Vanu vaje vakakala mu kaye vakapwa va kulikangula.
VANU VOSHE VAKAKALA NA VYAKULYA
Myatho 72:16: “Tiliku ipwe yaingi mu lifuti, hakamwa ya malundu hashule na vimbuto.”
Mu kaye mukakala vyakulya vyavingi, cho vanu vakajauka. Njala na mishongo ya njala kuvikakalako.
NKUKUKAKALA KUKEMANGA NA VUTHIWA
Kujombolola 21:4: “[Njambi] akathikumuna mithothzi yoshe ku mesho avo. Cho kukukakala kuthsa nambe vuthiwa nambe kulila nambe kukemanga. Omwo vyuma vyalaja vineti.”
Kulumbununa ngwavo vanu vakapwa va kulumbunuka, cho vakayoya myaka yoshe mu palandaisi hano hathi. Evi vikevyo vyanatukulahetha Ishamatanga yetu wa chithzemo Yehova Njambi.
MAJWI ANGE AKALISHULITHILILA
Kuma awa majwi anapu a vuthunga vene ndi? Nameme vanu vavangi vatava chikulahetho cha mu Mbimbiliya cha kukayoya myaka yoshe, oloni vamo kukavakaluwila kuthzivithitha ovu vupolofweto. Kutwapandele kukathama, mwafwa na umo wahi wayoyaho laja vuyoye vwa chifwa echi.
Vanu vali mu vundungo vwa kuthsa na vuvi, cho mishongo na tuyando vinavapinditha ha myaka yaingi, ngechi vamona ngwavo mukemwo muvanapande kuyoyela vanu. Oloni ovyo kethi vikevyo viyongola vya Ishamatanga yetu, Yehova Njambi.
Ha kushaka kutumwetha ngwendi vikulahetho vyendi vyapwa vya vuthunga, Njambi wendekele ngwendi: “Majwi ange kuakeluka kuli yange, kujeneka kulinga vije njawatumine ngechi awalinge.”—Isaya 55:11.
Mbimbiliya yamwetha ngwayo Yehova wapwa Njambi “uje kethi kukwitha.” (Tito 1:2) Omwo Njambi natukulahetha vyuma vyavivwa kulutwe, tunapande kutondethetha mangana tuwane vikumbululo ku vihula evi: Vanu vatha kuyoya myaka yoshe mu palandaisi hano hathi ndi? Tunapande kulinga vika mangana tukalimwene vyanakulahetha Njambi? Mu vilongetha vinatako, muwana muvanakumbulwila evi vihula.