Nga Muli na Kulifwita na Bubezi Bwakama

“Mubanjilekele ngwabo njili na kubabala kansa ya ku mila na ku mashapala, njasinganyekele ngwange njatala ku kutsa. Oloni munjelukile ku njubo, kutunda kuli ndotolo, njasinganyekele ngwange: “Kunjazibukile ngwange njili na kubabala bubezi bwa cifwa eci, oloni njinapande kuwana ngila ya kulikoleselamo.”—Linda wa myaka 71.

“Njabinjile bubezi buje bwalingisile mishisha ya ku mutambela wa cimoshwe wa cihanga cange yonwe kupanga mwamubwa. Ha simbu imo, kubabala kunjakele na kuziba kwanjilingisile njilizibe manene kwombwa. Kakangi njalizibile manene buli, co njakele na kusinganyeka bya kulitsiya.”—Elise wa myaka 49.

Munalume wa kubinja ali mu citwamo ca mawili, co banu baje bamuzema banamuzengeleka

NGA yeni nambe munu imwazema muli na kulifwita na bubezi buje butwala ku kutsa, kuli bukalu bukwabo bumunasa kuliwana nabwo. Munasa kulubala lubala bwasi, kushota mbunge, na kuziba lyoba. Mwasa kuliziba ngoco mwafwa ya sakesi ibanamikulahesa bandotolo, kujeneka kuwana bimbongo bya kulanda bumbanda, nambe nga bumbanda bubwezelela lika ku bubezi. Co lalo bisinganyeka binasa kumihwila.

Kuli kutwasa kuwana bukwasi? Banu babangi banamono ngwabo kulombela kuli Njambi na kutanda bisoneka bya mu Mbimbiliya bije bikazembeleka, kunabatakamesa manene. Co lalo baka-nanga na babusamba betu basa kutumwesa cizemo na kutukwasa ku mubila.

BYUMA BINAKWASA BAMO KULIKOLESA

Robert wa myaka 58 ngwendi: “Kulaheleni Yehova nameme muli na kubabala, co amikwasa mulikolese. Lombeleni kuli Yehova. Mulekeni mumuli na kulizibila. Mulombeni sipilitu ya kujela. Mulombeni amyane nzili ya kulikolesa ngechi mwase kushongangeya baka-nanga yeni omwo mutwalelelaho kulikolesa.”

Co wendekele lalo ngwendi: “Cikakwasa manene nga baka-nanga yeni bazibisisa mumulizibila na kumikwasa hoshe hamutondela bukwasi. Bamo bakanjisikila foni litangwa na litangwa na kunjihula ngwabo, ‘Mulizibako bati?’ Babusamba bange ba ku mitambela ya kulisezaseza bakanjitakamesa simbu yoshe. Bakanjishongangeya njitwaleleleho kulikolesa.”

Nga mumenekela kabusamba keni uje ali na kubabala, nangukeni byendekele Linda. Wendekele ngwendi: “Kabusamba keni hamo atonda kulizibako mwamubwa ngeci kasa kushaka ngwendi musimutwiye lika ha bubezi bwendi simbu yoshe. Endekeniko ha byuma byeka bimukasimutwiya simbu yoshe.”

Nga tulomba sipilitu ya Njambi na kutanda Bisoneka bya kutuzembeleka, na kutambula bukwasi buje butundilila kuli baka-nanga yetu na babusamba baje batuzema, co tumona ngwetu kuyoya kwapwa kwa seho nameme nga tuli na kulifwita na bubezi bwakama.

Bisoneka bya mu Mbimbiliya Bije Byasa Kumikwasa

Kulaheleni Njambi.

“Njalombelele kuli Shukulu Kalungu, co wanjikumbulwile, ikeye wanjipatwile ku lyoba lyange lyoshe. Tuhutu bakatambeka kuli ikeye, co akabaziba.”—Myaso 34:4, 6.

Linda itunabanga kusimutwiya byendi wendekele ngwendi: “Kujeneka kulombela kwanjilingisile njonwe kuliziba kushubuluka. Oloni kulombela simbu yoshe, kwanjikwasele njikanyame na kunjikwasa njilikolese.”

Tandeni Lijwi lya Njambi mangana limitakamese.

‘Naumo wahi lalo uje akayoya mu lifuti akalinyenga ha kubinja.’—Isaya 33:24.

Kusinganyekesesa ha byuma byabibwa bya kulutwe byanatukulahesa Njambi kutukanyamesa.

Lombeni bukwasi kuli babusamba na baka-nanga yeni.

“Babusamba bamwesa cizemo cabo simbu yoshe, babushoko banasemukila ngeci bamwene hamo tuyando.”—Visimo 17:17.

Elise itunabanga kusimutwiya byendi wendekele ngwendi: “Kesi mulyangunune ku bakweni. Tabeseni babusamba beni bamikwase. Bisimbu bimo mwasa kuliziba manene buli na kusinganyeka ngwe Njambi kasa kumitolilila, oloni kumwapandele kulyangununa ku bakweni.”