TWASA KUHYANA BATI BIZINDO?

1 | Keti Mukale Na Kaangu

Biyendeka Mbimbiliya:

“Njambi kesi na kaangu. Oloni woshe amukomoka na kulinga bije byabibwa bakamutambula kuli ikeye, kukwesi mulonga nambe ikeye wakundama ku muyati uka nambe uka.”—VILINGA 10:34, 35.

Bicilumbununa Cisoneka:

Yehovaa Njambi kesi kusompa munu kwesekesa na lifuti kwakala, muyati wendi, cikanda cendi nambe cisemwa cendi. Oloni akaka mbunge ku biyongola na mashungu ali mu mbunge yetu. Mukemwo Mbimbiliya yendeka lalo ngwayo: “Munu akakenge cifwa ca hanja, oloni yange njikamono mu mbunge.”—1 Samwele 16:7.

Eci Cisoneka Cimikwasa Bati?

Twasa kutembwinina Njambi uje kakele na kaangu, nameme kutuzibuka bili mu bimbunge bya banu. Keti muzibukile banu mu cibunga, oloni zibukeni umo na umo wabo. Nga muliziba ngweni mwazinda banu ba ku lifuti limo nambe muyati umo, co lombeni Njambi amikwase mubazeme. (Myaso 139:23, 24) Nga mulomba Yehova kutundilila kwisi ya mbunge yeni ngweni amikwase kujeneka kukala na kaangu, co amikwasa.—1 Petulu 3:12.

a Yehova likelyo lizina lya Njambi.—Myaso 83:18, NWT.

“Olu lukelwo lwapwile lwa kulibanga kutumama na cindele mu kwoloka . . . Njalizibile ngwange njili mukati ka bandolome na bandokazi ba mu kaye koshe.”—TITUS

Bibaliwanene Nabyo Banu Bamo mu Buyoye—TITUS

Wecelele Kukala na Cizindo

Munalume wa lizina lya Titus walubalele mwafwa ya lishiko limo libatungile baka-fulumende lije lyamwesele kaangu. Co walikwatasanene na cibunga cimo ca baka-kulwisa. Wendekele ngwendi: “Twakele na kuya ku myela imo ya mu mbaka ya kufwa ngwe mahotela, myela ya kunwila bwala, kuje kubazindile manene banu ba kuzibala mangana tukakatule lwozi na bindele.” Titus wendekele ngwendi cizindo cikeco camulingisile apwe muka-lwozi. Ngeci wendekele lalo ngwendi: “Munjakele na kulicokota na munu ipwe munalume nambe munakazi, yange njakele na kulibanga kumwasha ñome.”

Titus washangumukile kutengulula futisi yendi mwashangumukile kulilongesa Mbimbiliya na Bakaleho ba Yehova. Kutanda Mbimbiliya kwamukwasele manene. Cikulaheso ca kwendeka ngwaco, “kukukakala kutsa nambe busiwa nambe kulila nambe kukemanga,” camukwasele manene.—Kujombolola 21:3, 4.

Ha kulibanga, Titus kwamukaluwilile kwecela kuzinda banu. Wendekele ngwendi: “Kwanjikaluwilile kwecela bisinganyeka na bilinga byange.” Oloni mukanda wa Vilinga 10:34, 35 uje umwesa ngwawo Njambi kakele na kaangu, wamukwasele manene.

Byuma muka byabibwa byatundilemo? Titus wendekele ngwendi: “Njalimwenenene ngwange bulombelo bwa Bakaleho ba Yehova bwapwa bwa busunga mwafwa balizema nameme batunda ku miyati na bikanda bya kuliseza-seza. Simbu kanda banjimbwitike, cindele umo wa mu cikungulukilo wanjilanyele ku njibo yendi mangana njikalye nendi bya kulya. Njakasamene manene mwafwa olu lukelwo lwapwile lwa kulibanga kutumama na cindele mu kwoloka na kulya nendi bya kulya. Njalizibile ngwange njili mukati ka bandolome na bandokazi ba mu kaye koshe baje bali mu bulombelo bwa busunga.”