HOW TO BREAK THE CYCLE OF HATRED

4 | Lombeni Njambi Amikwase Kwecela Kuzinda Banu

Biyendeka Mbimbiliya:

‘Bushuka bwa sipilitu bunapu cizemo, kujolela, kwoloka, lukakateya, ngozi, bubwa, kulongwa, kulikehesa na kulinyunga.’—NGALATIYA 5:22, 23.

Bicilumbununa Cisoneka:

Njambi ikeye lika asa kutukwasa twecele kuzinda banu. Sipilitu yendi ya kujela ikeyo itukwasa tukale na bifwa bije kutwasa kukala nabyo mu nzili yetu. Mu nzili yetu kutwasa kwecela kuzinda banu, ngeci tunapande kulomba Njambi atukwase kulinga ngoco. Nga tulinga ngoco , co tuliziba ngwe mwalizibilile kapositolo Paulu uje wasonekele ngwendi: “Njasa kulinga byuma byoshe ha nzili ije yananjana Kilistu.” (Filipu 4:13) Co oku kutulingisa twendeke ngwetu: “Bukwasi bwange bukatunda kuli Shukulu Kalunga.”—Myaso 121:2.

Eci Cisoneka Cimikwasa Bati?

“Yehova nanjikwasa njitengulule futisi yange ya lwozi na kunjikwasa njikale mu kwoloka na bakwetu.”—WALDO

Lombeni Yehova mangana amyane sipilitu yendi ya kujela. (Luka 11:13) Mulombeni mangana amikwase kukala na bifwa byabibwa mu kuyoya kweni. Mbimbiliya imikwasa kutundisa bifwa byabibi mu mbunge bije bikanene bizindo na kukala na bifwa bya kufwa ngwe cizemo, kujolela, kwoloka, na kulinyunga. Waneni bingila bimwasa kumwesa ebi bifwa mu buyoye bweni. Co likwatasaneni na banu baje bali na kulifwita kukala nebi bifwa byabibwa. Aba banu “bamikwasa kumwesa cizemo na kulinga mwamubwa.”—Vahevelu 10:24.

Bibaliwanene Nabyo Banu Bamo mu Buyoye—WALDO

Wecelele Kuzinda na Kulwisa Banu

Munalume wa lizina lya Waldo waliwanene na bukalu bwabwingi ku bwanike. Wendekele ngwendi: “Simbu yoshe njakele na kulwa na banu baje bakele na kulandesa bumbanda bwa kupendesa . . . Simbu imo citozi cange wa fwetele munalume umo muka-kutsiya banu mangana anjitsiye. Mwanjitwile mbandu njapusunukile na kutewa.”

Waldo walubalele mwebwendi mwashangumukile kulilongesa Mbimbiliya na Bakaleho ba Yehova. Wendekele ngwendi: “Njazindile manene Bakaleho ba Yehova, co mubakele na kwija njakele na kubashaula simbu yoshe. Oloni simbu yoshe bakele na kunjikumbulula mukasingimiko.”

Mukwita kwa simbu Waldo nendi washangumukile kulilongesa Mbimbiliya. Wendekele ngwendi: “Kwanjikaluwilile kupangesa byuma binjakele na kulilongesa. Njamwene ngwange kunjasa kwecela futisi yange ya kulubala-lubala.” Oloni byuma byalilongesele mu Mbimbiliya bya mukwasele manene.

Waldo wendekele ngwendi: “Litangwa limo mulongesi wange Alejandro wanjilekele ngwendi njitande mukanda wa Ngalatiya 5:22, 23. . . . Wanjilekele lalo ngwendi kunjasa kukala nebi bifwa mu nzili yange lika, oloni njinapande kulomba sipilitu ya kujela ya Njambi mangana injikwase kukala nabyo. Kuzibuka ngwange Njambi anjikwasa njecele bukenya na matoto kwanjikanyamesele manene.”

Kukulahela Njambi kwakwasele Waldo ecele kuzinda banu. Wendekele ngwendi: “Babushoko bwange na babusamba bange balaja kukabakaluwila kuzibisisa ngwabo njatengulula futisi yange.” Wendekele lalo ngwendi: “Yehova nanjikwasa njitengulule futisi yange ya lwozi na kunjikwasa njikale mu kwoloka na bakwetu.”