Biñanda bya Kupangesa mu Mukanda wa Biwano bya Buyoye Bwetu Baka-Kristu na Cipangi Cetu
© 2022 Christian Congregation of Jehovah’s Witnesses
JANUARY 2-8
BISIMPI BYA SEHO BYA MU LIJWI LYA NJAMBI | 2 VIMYENE 22–23
“Mwafwa Bika Tunapande Kupwa ba Kulikehesa?”
w00 9/15 29-30
Yosiya Wapwile wa Kulikehesa, Co Yehova Wamubezikisile
Baje bakele na kubwahesa tembele bakele na kupanga na nzili kushwa mutondo-tondo. Yosiya wakandelelele manene kuli Yehova mwafwa wakele na kubakwasa mu cipangi ca kubwahesa njibo ya Njambi ibabiisile bakukulwila bendi bamo. Omwo cipangi catwaleleleleho, Shafane wetesele muzimbu umo kuli mwene. Muzimbu muka? Wakwatele libulu lya kuzenga mu maboko. Co wendekele ngwendi Kapilistu Wakama Hilikiya wawanene eli “libulu lya mashiko a Shukulu Kalunga, mashiko aje anene Njambi kuli Mosesa.” (2 Mizimbu 34:12-18) Bawanene libulu lya Mashiko lyasonekele bene Mosesa!
Yosiya washakele kuziba byoshe bibasonekele omwo mu libulu. Omwo Shafane wakele na kutanda eli libulu, mwene washakele kumona mashiko akelemo mwamukundamenenene hamolika na banu boshe. Co wakasamene mwazibile mashiko akelemo aje endeka ha kulemesa kwa busunga na bukalu bubaliwana nabwo banu nga balikobelesa mu bulombelo bwa makuli buje bunambateselela na kubatwala mu bunzinda. Yosiya mwanangukile ngwendi banu kubakele na kukabangeya mashiko oshe akele omu mu libulu, watabwile buzalo bwendi na kuleka Hilikiya, Shafane na bakwabo ngwendi: ‘Yeni mukanjihwileko kuli Shukulu Kalunga ha bilongesa ebi bili mu libulu eli libanawana. Shukulu Kalunga nalubala mwafwa bakukulwila betu kubasele kulinga bibasonekele mu libulu eli.’—2 Vimyene 22:11-13; 2 Mizimbu 34:19-21.
w00 9/15 30 ¶2
Yosiya Wapwile wa Kulikehesa, Co Yehova Wamubezikisile
Tutumwa ba Yosiya baile kuli kapolofweto wa munakazi Hulunda mu Yelusalema, co belukile na muzimbu umo. Hulunda nendi wendekele majwi atundile kuli Yehova aje amwesele bukalu bwizila banu ba kujeneka kwononoka, buje bubasonekele mu libulu libawanene. Wendekele lalo ngwendi ha kuwana ngwe Yosiya nalikehesa ku mesho a Yehova, kakaliwana nobu bukalu. Co bakamutsinda kubanatsindi bakukulwila bendi mu kwoloka.—2 Vimyene 22:14-20; 2 Mizimbu 34:22-28.
Kutondesesa Bisimpi bya Seho
w01 4/15 26 ¶3-4
Byuma Byasa Kumyendela Mwamubwa Nameme Kubyamyendelele Mwamubwa ku Bwanike
Nameme byuma kubyamwendelele mwamubwa ku bwanike, Yosiya walingile byuma byabibwa mu mesho a Yehova. Wayulile mwamubwa, mukemwo Mbimbiliya inendeka ngwayo: “Kukwakele lalo mwene wa kufwa ngwe ikeye uje wapangelele Shukulu Kalunga na mbunge yendi yoshe na mana endi oshe na nzili yendi yoshe na kwononoka mashiko oshe a Mosesa, co lalo kukwesi mwene wa kulifwa nendi wahi.”—2 Vimyene 23:19-25.
Yosiya napu mwanja waubwa kuli baje banaliwana na byuma byabibi ku bwanike. Bika bitulilongesa kuli ikeye? Bika byakwasele Yosiya kwangula kulinga byuma byabibwa na kutwalelelaho kubilinga?
JANUARY 9-15
BISIMPI BYA SEHO BYA MU LIJWI LYA NJAMBI | 2 VIMYENE 24–25
“Twaleleleniho Kupwa ba Kutona”
w01 2/15 12 ¶2
Litangwa lya Yehova lya Kusompa Lili Muyehi!
2 Cisholoka Zefaniya mwakele na kupolofweta, walingisile Yosiya uje wapwile mukwenje ananguke ngwendi kwatondekele kumanesa bulombelo bwa makuli mu Yunda. Nameme Mwene Yosiya wesekele kumanesa bulombelo bwa makuli, kamanesele bubi bwoshe bubakele na kulinga banu, co lalo byalingile kubyafwikile bubi bwa kuku yendi Mwene Manase mwafwa ya ‘banu ba kujeneka mulonga batsiile.’ (2 Vimyene 24:3, 4; 2 Mizimbu 34:3) Ngeci, litangwa lya Yehova lya kusompa lyakele na kwija.
w07 3/15 11 ¶10
Bisimpi bya Kulitila bya mu Mukanda wa Njelemiya
Mu mwaka wa 607 B.C.E, Zendekiya te nayulu myaka 11. Ha simbu oyo, Mwene Nebukataneza wa Mbambilone na maswalale bendi te banazengeleka Yelusalema ha bingonde 18. Ha litangwa lya bu 7 mu ngonde yamucitanu, mu mwaka wa bu 19 wa ciyulo ca Nebukataneza, Nebuzalandane ntwama wa maswalale ba Mbambilone ‘wakobelele’ mu Yelusalema. (2 Vimyene 25:8) Hamo Nebuzalandane mwakele hanja ya cibumbe ca nganda, welwile nganda na kumona mwasa kuihyanena. Co munima ya matangwa atatu, mu ngonde ya bu 10, Nebuzalandane ‘wakobelele’ mu nganda ya Yelusalema na kuyenyeka.—Njelemiya 52:12, 13.
Kutondesesa Bisimpi bya Seho
w05 8/1 12 ¶1
Bisimpi bya Kulitila bya mu Mukanda wa 2 Vimyene
24:3, 4. Yehova “kasambesele” Yunda mwafwa ya mulonga wa maninga wakele nawo Manase. Njambi wamona maninga a banu ba kujeneka mulonga kupwa a seho. Twakulahela ngwetu Yehova akanyongesa banu boshe baje bali na kwitila maninga a banu ba kujeneka mulonga.—Myaso 37:9-11; 145:20.
JANUARY 16-22
BISIMPI BYA SEHO BYA MU LIJWI LYA NJAMBI | 1 MIZIMBU 1–3
“Kuma Biñanda Bili mu Mbimbiliya bya Busunga, Indi bya Kulisinganyekela?”
w09 9/1 14 ¶1
Kuma Adama na Eva Kubakele Bene Ndi?
Tusimutwiyeniko ha mikana ya bikota bya Bayunda ibanasoneka ku mukanda wa 1 Mizimbu capita 1 kutwala 9 na mukanda wa Luka 3. Ku mukanda wa 1 Mizimbu banatumbula bikota 48, co ku mukanda wa Luka banatumbula bikota 75. Co ebi bikota banabitumbula mwamubwa mubinalikabela. Ku mukanda wa Luka banendekako bya cikota ca Yesu Kristu, co ku mukanda wa 1 Mizimbu banendekako bya bikota bya bimyene na tupilistu ba Baisalele. Aha ha mikana yoshe banatumbulaho banu bamo babazibuka banu babangi ba kufwa ngwe Solomoni, Ndabiti, Yakomba, Isake, Abilahama, Nowa, na Adama. Banu boshe babanatumbula aha ha mikana kubakele, co Adama ikeye munu wakulibanga ibanatumbula ha mikana yoshe ibali.
w08 6/1 3 ¶4
Muzimbu wa Nowa na Libazi wa Busunga, Keti wa Kulisinganyekela
Mizimbu ya mu Mbimbiliya ibali ije yendeka ha bikota bya banu imwesa ngwayo Nowa kwakele. (1 Mizimbu 1:4; Luka 3:36) Ezela na Luka baje basonekele ei mizimbu bapwile baka-kutondesesa. Luka wakabele cikota ca Yesu Kristu kweta na kuli Nowa.
w09 9/1 14-15
Kuma Adama na Eva Kubakele Bene Ndi?
Tucisimutwiyeni ha cilongesa ca ndando ya kupatula cije cibamona boshe baje bakalitumbula ngwabo baka-Kristu kupwa ca seho. Kwesekesa neci cilongesa, Yesu Kristu wanene kuyoya kwendi kwa kulumbunuka kupwa ndando ya kupatula banu ku bubi. (Mateu 20:28; Yiwano 3:16) Ngwe mutuzibukila, ndando ya kupatula yapwa fweto ya kupatula nambe kukula munu nambe cuma cimo, nambe ya kulanda cuma cije cinazimbala, co inapande kupwisa hamo. Mukemwo Mbimbiliya inatumbula Yesu kupwa ‘ndando ya kupatula ya kupwisa hamo.’ (1 Timothi 2:6) Oloni hamo tunasa kulihula ngwetu ya kupwisa hamo na bika? Mbimbiliya ngwayo: ‘Ngecilika boshe mubali na kutsa mwafwa ya Adama, mu ngila imolika, boshe bakayoya kwitila muli Kristu.’ (1 Korinte 15:22) Kuyoya kwa kulumbunuka kwanene Yesu kupwa mulambu wa kupatula banu ba kulongwa kunapwisa hamo na kuyoya kwa kulumbunuka kwazimbalesele Adama mwalingile bubi mu citungu ca Edeni. (Loma 5:12) Ngwe Adama kakeleko, ngwe ndando ya kupatula ya Kristu kuyesi na seho.
Kutondesesa Bisimpi bya Seho
it-1 911 ¶3-4
Bikota bya Banu
Mazina a Banakazi. Banakazi nabo bakele na kubasoneka ha mikana ya bikota bya banu habamwenenene ngwabo kulinga ngoco kunapande. Ku mukanda wa Kushangumuka 11:29, 30 Salai (Sala) banamutumbula mwafwa mbuto ibakulahesele yapandele kwija kwitila muli ikeye, keti kwitila muli munakazi weka wa Abilahama. Mileka nendi banamutumbula mu mikanda ya kulifwa mubanatumbula Lembeka mwafwa wapwile kuku ya Lembeka munakazi wa Isake. Banamutumbula mu kumwesa ngwabo Lembeka wapwile kabushoko ka Abilahama mwafwa Isake kapandele kwambatela ku muyati weka. (Kus 22:20-23; 24:2-4) Ku mukanda wa Kushangumuka 25:1, banatumbulako Ketula, munakazi mukwabo yambatele Abilahama. Oku kumwesa ngwabo Abilahama wambatele lalo munima ya kutsa kwa Sala, co wacikele na nzili ya kukita nameme kwetile myaka ya kutubakana 40 kutunda habalingisilile Yehova bakale lalo na nzili ya kukita na kukala na mwana mu kukomokesa. (Lom 4:19; Kus 24:67; 25:20) Co lalo kumwesa bushoko bwa Baisalele na Bamindyani na miyati ikwabo ya Ciarabia.
Leya, Lakele, na banakazi bakwabo ba Yakomba na bana babo nabo banabatumbula. (Kus 35:21-26) Ebi bitukwasa kuzibisisa byalingiwile mukati ka Njambi na bana babo mu kwita kwa simbu. Ebi byuma bitunasimutwiya bikebyo byalingisile banakazi bamo nabo babasoneke ha mikana ya bikota bya banu. Co lalo banakazi mubaswanene byuma bimo, mazina abo bawasonekele. (Kul 26:33) Tamale, Lahabe, na Lute bapwile banakazi ba kulitila. Umo na umo wabo wapwile kukulwila ya Mesiya, Yesu Kristu, mu ngila ya kukomokesa. (Kus 38; Lut 1:3-5; 4:13-15; Mat 1:1-5) Banakazi bakwabo babanatumbula ha mikana ya bikota tubawana ku mukanda wa 1 Mizimbu 2:35, 48, 49; 3:1-3, 5.
JANUARY 23-29
BISIMPI BYA SEHO BYA MU LIJWI LYA NJAMBI | 1 MIZIMBU 4–6
“Malombelo Ange Akamwesa Ngwawo Njafwa Bati?”
‘Muka-kuziba Malombelo’
Njabeze wazemene kulombela. Mwalombelele, washangumukile tahi kulomba Njambi amubezikise. Kutundaho, wamulombele byuma bimo bitatu bije byamwesele ngwabyo wakele na likulahelo lyakama.
Cakulibanga, walombele Njambi ngwendi ‘amwane lifuti lyakama.’ (1 Mizimbu 4:10) Ou munalume wa kulongwa kakele na kushungwiya libu lya mukwabo nambe kushaka kumunyekalyo. Lilombelo lyendi lyakundamene manene ku banu keti ku libu. Walombele ngwendi akaleko na mutambela wakama haje hasa kukungulukila bangamba ba Njambi babangi.
Camucibali, Njabeze walombele ngwendi liboko lya Njambi likale nendi. Liboko lya Njambi lya cifwisa lyapwa nzili yakapangesa mu kukwasa bangamba bendi. (1 Mizimbu 29:12) Njabeze wakulahelele ngwendi Njambi akakwasa bangamba bendi ba kulongwa, co amwana byanamulombo.—Isaya 59:1.
Camucitatu, Njabeze walombele Njambi ngwendi: “Njinyunge ku bubi buje bwasa kunjiyandesa.” Awa majwi amwesa ngwawo Njabeze kalombele ngwendi Njambi amanese bukalu bwaliwanene nabwo. Walombele ngwendi amukwase kuhyana obwo bukalu nambe kukolesa.
Lilombelo lya Njabeze limwesa ngwalyo wakele mbunge ku kulemesa kwa busunga, co lalo limwesa ngwalyo wakulahelele Yehova uje wapwa Muka-kuziba malombelo. Yehova walingile bika? Ou muzimbu uhwa na majwi endeka ngwawo: “Njambi wamwanene bije byalombele.”
Kutondesesa Bisimpi bya Seho
w05 10/1 9 ¶7
Bisimpi bya Kulitila bya mu Mukanda wa 1 Mizimbu
5:10, 18-22. Mu simbu ya Mwene Saulu, miyati ije yakele mwijatangwa ya Yondau yahyanene Bahangeli, nameme Bahangeli bakebo bapwile babangi manene kutubakana ei miyati. Ei miyati yahyanene mwafwa banalume ba kusimpa bei miyati bakulahelele Yehova ngwabo abakwasa. Netu tunapande kukulahela Yehova omwo tutwalelelaho kulwa na byuma bya nzili mu nzita ya ku sipilitu.—Efeso 6:10-17.
JANUARY 30–FEBRUARY 5
BISIMPI BYA SEHO BYA MU LIJWI LYA NJAMBI | 1 MIZIMBU 7–9
“Yehova Amikwasa Kupanga Bipangi Bimumona Ngwe Byabikalu”
w05 10/1 9 ¶8
Bisimpi bya Kulitila bya mu Mukanda wa 1 Mizimbu
9:26, 27. Balebi baje bakele na kunyunga bikolo bakele na cipangi ca seho manene. Babanene sapi ya ku bikolo bya myela ya kujela ya tembele. Bapwile ba kulongwa mwafwa bakele na kushokolola ebi bikolo ha litangwa na litangwa. Netu banatwana cipangi ca kwambulwila banu bali mu citingitingi cetu na kubakwasa kushangumuka kulemesa Yehova. Ngeci, netu tunapande kumwesa ngwetu tu ba kulongwa ngwe mubalingilile aba Balebi.
Tembwinineni Finehase Omwo Muliwana na Bukalu
Finehase wakele na cipangi cakama manene mu Isalele. Nameme ngoco, kusimpa, kusinganyekesesa mwamubwa na kukulahela Njambi kwamulingisile ahyane bukalu bwaliwanene nabwo. Co Yehova wamubezikisile mwafwa ya kupanga na nzili mu kukwasa cikungulukilo cendi. Munima ya myaka ya kweta ku 1,000, Njambi wahwimininine Ezela asoneke ngwendi: “Finehase muna Elyazale, wapwile ntwama yabo ha simbu ije, omwo Shukulu Kalunga wakele hamo nendi.” (1 Mizi 9:20) Co baje boshe bali na cipangi ca kutwamenena hamolika na baka-Kristu boshe banapande kutembwinina Finehase na kupwa ba kulongwa.
Kutondesesa Bisimpi bya Seho
w10 12/15 21 ¶6
Imbileni Yehova!
6 Yehova wapangesele tupolofweto mu kushika bangamba bendi ngwendi bamushangale kwitila mu myaso. Baka-kwimba ba ku muyati wa tupilistu kubakele na kupanga bipangi bibakele na kupanga bakwabo Balebi mwafwa bashakele kukala na simbu yaingi ya kusoneka myaso, co hamo na kulibwaheselayo.—1 Mizi 9:33.
FEBRUARY 6-12
BISIMPI BYA SEHO BYA MU LIJWI LYA NJAMBI | 1 MIZIMBU 10–12
“Shambeyeni Lishungu Lyeni lya Kulinga Cizango ca Njambi”
w12 11/15 6 ¶12-13
“Njilongese Kulinga Cizango Cobe”
12 Ndabiti wamwene seho ya binangulo haje emanene mashiko a Njambi, co lalo washakele kuyoya mu kulitombola nabyo. Co tunapande kumutembwinina. Tusimutwiyeni byalingiwile omwo Ndabiti watondele “mema a kunwa a mu lisima lya kuyehi na cikolo ca ku Mbetelehema!” Banalume ba Ndabiti batatu baile omu mu nganda nameme ha simbu oyo mwakele na kuyoya Bafilisitiya, co bamunenelele mema. Oloni Ndabiti “kawanwile, waetilile kuwapwisa ngwe ñombelo kuli Shukulu Kalunga.” Mwafwa bika? Ndabiti wendekele ngwendi: “Yange kunjasa kuwanwa! Cipwa ngwe njili na kunwa maninga aba banu balambwile myonyo yabo.”—1 Mizi 11:15-19.
13 Ndabiti wazibukile ngwendi mashiko amwesele ngwawo maninga bapandele kuana kupwa mulambu kuli Yehova keti kuwanwa. Co wazibisisile na seho ya kulinga ngoco. Ndabiti wazibukile ngwendi “mwonyo wa cuma coshe ca kuyoya wakala mu maninga.” Oloni baje banalume bamunenelele mema, keti maninga. Co bika byalingisile Ndabiti abyane kuwanwa? Wazibukile cinangulo halinemana eli lishiko. Ndabiti wamwene aje mema ngwe maninga a seho a baje banalume batatu. Mukemwo kawanwile. Wamwene ngwendi cacibwa kuwetila kutubakana kuwanwa.—Levi 17:11; Kwitu 12:23, 24.
Tabeseni Mashiko na Binangulo bya Njambi Bilongese Citakutaku Ceni
5 Nga tushaka ngwetu mashiko a Njambi atukwase, co kutwapandele lika kuwatanda na kuwazibuka embwe. Tunapande kuwazema manene na kuwasingimika. Lijwi lya Njambi ngwalyo: “Zindeni bije byabibi, co zemeni bije byabibwa.” (Amo 5:15) Twasa kulinga bati ngoco? Nga tulilongesa kumona byuma mwakabimwena Yehova. Cakumwenako, hamo muli na kulifwita na cilabulabu. Co ndotolo amileka cifwa ca byakulya bimunapande kulya na kweha bweho buje bukanyamesa mubila na kutengululako byuma bimo. Munima ya kupangesa byanamilekele, mumona ngweni byamikwasa. Mukandelela manene kuli ndotolo yeni mwafwa namikwasa.
6 Mu ngila imolika, Ishamatanga yetu natwana mashiko aje atunyungilila ku kulinga bubi mangana tuyoye mwamubwa. Acisinganyekeni bubwa butuwana nga tupangesa mashiko a mu Mbimbiliya aje abindika kukwisa na kuyongwela bakwetu matumbe amabi na kwiba na bupangala na bukenya na bundemone. (Tandeni Visimo 6:16-19; Kujo. 21:8) Nga tumona bubwa butunda mu kulinga byuma byazema Yehova, co mbunge yetu izema manene Yehova na mashiko endi.
Kutondesesa Bisimpi bya Seho
it-1 1058 ¶5-6
Mbunge
Kupangela Njambi na “Mbunge Yoshe.” Mbunge inapande kupwa ya mutunu asina yasa kupanga mwamubwa. Oloni mbunge ya cifwisa ikeyo yasa kulitepa. Ndabiti walombelele ngwendi: “Njikwase njikale na mbunge imolika mangana njizibile lyoba lizina lyobe.” Oku kumwesa ngwabo mbunge ya munu yasa kulitepa, co asa kuzema nambe kuzibila lyoba byuma bya kuliseza-seza. (Myaso 86:11, NWT) Munu wa cifweci, nasa kukala na bimbunge bibali, co kaka mbunge ku kupangela Njambi. (Myaso 119:113; Kujo 3:16) Munu nasa kukala na bimbunge bibali, co nasa kweseka kupangela bashukulu babali nambe kumwesa ngwe ali na kwendeka byuma bimo okuni ali na kusinganyeka byeka. (1 Mizi 12:33; Myaso 12:2) Yesu wapayele banu ba cifweci mwafwa ya cibembulu cabo.—Mat 15:7, 8.
Baje bashaka kuzibisa Njambi kubwaha kubapandele kukala na bimbunge bibali nambe mbunge ya kulitepa. Banapande kumupangela na mbunge imolika. (1 Mizi 28:9) Oloni kulinga ngoco kutondeka kulifwita mwafwa mbunge ikakwisi, co lalo yajendamena ku kulinga bubi. (Njele 17:9, 10; Kusha 8:21) Byuma bitukwasa kupangela Yehova na mbunge imolika binapu: kulombela kutundilila kwisi ya mbunge (Myaso 119:145; Mbimbi 3:41), kutanda Lijwi lyendi simbu yoshe (Ezela 7:10; Visi 15:28), kupanga na ntwima cipangi ca kwambulula (esekeseni Njele 20:9), na kulikwatasana na baje bali na kumupangela na mbunge imolika.—Esekeseni 2 Vimye 10:15, 16.
FEBRUARY 13-19
BISIMPI BYA SEHO BYA MU LIJWI LYA NJAMBI | 1 MIZIMBU 13–16
“Kukabangeya Byatuleka Yehova Kutukwasa”
Kuma Mukalihula Ngweni ‘Yehova Ali Kulijo’ Ndi?
12 Cikasha ca cikumiiyo bacilwisile mu Isalele, co cakele ku Kilyate-njelime ha myaka yaingi. Mwene Ndabiti wayongwele kucinena mu Yelusalema. Wasimutwiiye na bamyata, co wendekele ngwendi Cikasha ca cikumiiyo cija mu Yelusalema ‘nga bataba, co lalo nga cinapu cizango ca Yehova.’ Oloni katondesesele mwamubwa mangana ananguke cizango ca Yehova. Ngwe walingile ngoco, ngwe Cikasha kubacambatelele mu litemba. Ngwe Balebi ba ku cikota ca Kohate bakebo bacambatele ha bitsili ngwe mwashikilile Njambi. Nameme Ndabiti wakele na kwihula Yehova kushwa kumo kunima, oloni ha simbu ei wonowele kulinga ngoco mu ngila inapande. Byatundilemo byapwile byabibi manene. Co mu kwita kwa simbu, Ndabiti wendekele ngwendi: “Shukulu Kalunga Njambi yetu watuhisile omwo kutwamulemesele ngwe mutwapandele kulinga.”—1 Mizimbu 13:1-3; 15:11-13; Kulava 4:4-6, 15; 7:1-9.
Kuma Mukalihula Ngweni ‘Yehova Ali Kulijo’ Ndi?
13 Balebi mubambatele Cikasha ca cikumiiyo kucitundisa mu njibo ya Obende-endome kucinena mu Yelusalema, banu bembile mwaso wasonekele Ndabiti. Omu mu mwaso mwakele majwi amabwa aje anukisile banu bibapandele kulinga. Ngwawo: “Shakezekeni Yehova na nzili yendi. Shakezekeni bubwa bwendi simbu yoshe. Anukeni byuma byabibwa byanalingi, bikomokeso byendi na kwakula kwendi.”—1 Mizimbu 16:11, 12, NWT.
Kutondesesa Bisimpi bya Seho
w14 1/15 10 ¶14
Lemeseni Yehova, Mwene wa Myaka Yoshe
14 Ndabiti wanenele Cikasha ca cikumiiyo mu Yelusalema. Ha simbu ei ya kubwahelela, Balebi bembile mwaso wa kushangazala Yehova uje wakele na majwi amo a seho. Awa majwi banawasoneka ku mukanda wa 1 Mizimbu 16:31 uje wendeka ngwawo: ‘Lekeni banu boshe ngweni Yehova napu Mwene!’ Oloni hamo munasa kulihula ngweni, ‘Nga Yehova wapwa Mwene wa myaka yoshe, co wapwile bati Mwene ha simbu oyo?’ Yehova akapu Mwene mwakamwesa nzili ya ciyulo cendi nambe kwangula muka-kumwimanena, uje amwimanenako ha simbu imo nambe kutala bukalu bumo. Ou mutamba wa ciyulo ca Yehova wapwa wa seho manene. Simbu kanda Ndabiti atse, Yehova wamukulahesele ngwendi bumwene bwendi butwalelelaho kukalako myaka yoshe. Wamulekele ngwendi: “Njikapwisa umo wa hali bana bobe mwene, njikakolesa bumwene bwendi.” (2 Samwe 7:12, 13) Ou muna Ndabiti washolokele munima ya myaka ya kutubakana 1,000. Ou mwana wapwile iya, co wapwile Mwene mwaka uka?
FEBRUARY 20-26
BISIMPI BYA SEHO BYA MU LIJWI LYA NJAMBI | 1 MIZIMBU 17–19
“Twaleleleniho Kupwa ba Kubwahelela Nameme Byuma Kubyamyendelele Bwino”
w06 7/15 19 ¶1
Akeni Mbunge ku Bubwa bwa Munga ya Yehova
NDABITI napu umo wa banu ba kulitila babanendeka mu Bisoneka bya Cihebelu. Wapwile kanyungi, muka-kwimba, kapolofweto na mwene uje wakulahelele Yehova Njambi. Kuzema manene Yehova kwalingisile Ndabiti ashake kumutungila njibo. Ei njibo nambe tembele ikeyo yesi kupwile mwela wa kulemesela Njambi banu boshe mu Isalele. Ndabiti wazibukile ngwendi byuma bibesi kulingilile oku ku tembele byasele kulingisa banu babwahelele na kubanenela bibezikiso bya Njambi. Mukemwo wembile ngwendi: “Nabezika munu uje iunangula, na kumushwenyesa kuli yobe, ngeci akale mu lipela lyobe. Tunakuta na byuma byabibwa bya ku Njibo yobe, bibezikiso bya mu Njibo yobe ya kujela!”—Myaso 65:4.
Bwaheleleni Mwafwa ya Bipangi Bimwasa Kulinga mu Munga ya Yehova
11 Mu ngila imolika, tubwahelela manene nga tupanga na nzili cipangi coshe-coshe cibatwana mu munga ya Yehova. Ngeci, ‘lyaneni’ kupanga na nzili cipangi ca kwambulula na bipangi byoshe bibamyana mu cikungulukilo. (Vili 18:5; Heve 10:24, 25) Libwaheseleni mwamubwa biwano mangana mukakumbulule mu ngila ije itakamesa bakweni. Moneni ñanda ya mu sikola yoshe-yoshe ibamyana kupwa ya seho. Nga banamyana cipangi cimo mu cikungulukilo, cilingeni bwasi, co bamikulahela. Keti musinganyeke ngweni cipangi cibanamyana keti ca seho nambe kumona ngwe cimibiisila simbu. Esekeni mumwasela mwoshe kulinga bipangi bibanamyana mu butongwe. (Visi 22:29) Nga mupanga na nzili bipangi bya ku sipilitu, busamba bweni na Yehova bukanyama manene, co lalo mupwa ba kubwahelela. (Ngala 6:4) Kutundaho, kumipwila kwakwasi kubwahelela nga bakweni babana bipangi bimunatondele.—Loma 12:15; Ngala 5:26.
Kutondesesa Bisimpi bya Seho
w20.02 12, cipalo
Twazema Manene Tate Yetu Yehova
Kuma Yehova Anjizibuka Mwamubwa Ndi?
Mwalihulaho laja ngweni, ‘Hakati ka banu babangi bali na kuyoya hano hasi, kuma Yehova anjizibuka mwamubwa ndi?’ Nga mwalihulaho laja ngoco, co keti yeni lika. Mwene Ndabiti wasonekele ngwendi: ‘Munu wapwa iyajo kuli yobe Shukulu Kalunga ngeci umuyongole? Munu kesi na seho ngeci umutolilile?’ (Myaso 144:3) Nameme ngoco, Ndabiti wakulahelele ngwendi Yehova wamuzibukile mwamubwa. (1 Mizi 17:16-18) Co Yehova ali na kupangesa Lijwi lyendi na munga yendi mangana amikwase mukulahele ngweni azibuka mumwamuzemena. Singanyekeseseni ha bisoneka binatako bije bimikwasa mukulahele ngweni Yehova amizibuka mwamubwa:
• Yehova wamizibukile te kanda musemuke.—Myaso 139:16.
• Yehova azibuka biyongola byeni nomu mu muli na kulizibila.—1 Mizi 28:9.
• Yehova akatolilila ku malombelo eni oshe.—Myaso 65:2.
• Bilinga byeni byasa kuzibisa Yehova kubwaha ku mbunge nambe kumuzibisa kubihya.—Visi 27:11.
• Yehova ikeye namikoko mangana mukale muyehi nendi.—Yowa 6:44.
• Nga mutsa, Yehova asa kukamisangula mwafwa amizibuka mwamubwa. Akamisangula na mubila wauha na bisinganyeka bya kulifwa nebi bimwakele nabyo, co mukasa kwanuka byuma na kukala na bifwa bimo bimwakele nabyo.—Yowa 11:21-26, 39-44; Vili 24:15.
FEBRUARY 27–MARCH 5
BISIMPI BYA SEHO BYA MU LIJWI LYA NJAMBI | 1 MIZIMBU 20–22
“Kwaseni Babaha Bapange Mwamubwa Bipangi Bibanabana”
‘Kundika Ebi Bilongesa ku Banu Bababwa’
8 Tandeni 1 Mizimbu 22:5. Ndabiti wesi kusinganyekele ngwendi Solomoni kasa kulinga eci cipangi ca seho. Ei tembele inapandele kupwa ya “lutsimo na bumpau,” oloni ha simbu oyo Solomoni wapwile lika ‘mukwenje, te kanda acikale na mana.’ Ndabiti wazibukile ngwendi Yehova akwasa Solomoni mu cipangi cibamwanene. Ngeci, Ndabiti wakelele mana ku kukwasa ku cipangi na ku kukungulula bya kupangesa byabingi.
‘Kundika Ebi Bilongesa ku Banu Bababwa’
7 Ndabiti kalikelele kukwasa munendi nambe kusinganyeka ngwendi banamushaula omwo kubamutabesele kutunga tembele. Cili bene, ei tembele baitumbwile ngwabo tembele ya Solomoni, kesi ya Ndabiti, embwe. Nameme hamo eci cazibisile shwamwa Ndabiti mwafwa ya kujeneka kulinga byayongwele, oloni wakwasele manene mu cipangi ca kutunga. Wanonekele bibunga bya baka-kupanga na kukungulula butale na bunengu na siliva na ngolinde na mabaya a kendale. Kutundaho, washongangeyeye Solomoni ngwendi: “Munange . . . Shukulu Kalunga Njambi yobe akale hamo nobe, anyunge cikulaheso cendi ca kukulingisa kuya kulutwe ha kumutungila Njibo.”—1 Mizi. 22:11, 14-16.
Eni Bisemi Muli na Kukwasa Bana Beni Mangana Babambwitike Ndi?
14 Tunyungi ba ku sipilitu nambe ngwetu bakulunu mu cikungulukilo banasa kutakamesa bisemi nga bendeka byabibwa ha bilengo bya ku sipilitu. Ndokazi umo uje wapwile painiya ha myaka ya kutubakana 70, wanukile bubwa bwatundile mu byuma bibasimutwiiye na Ndolome Charles T. Russell, te ali na myaka 6. Ou ndokazi wendekele ngwendi: “Twasimutwiiye na ndolome Russell ha minutu 15 ha bilengo byange bya ku sipilitu.” Kwendeka byabibwa na kushongangeya bakwetu kubakwasa manene mu kuyoya kwabo. (Visi. 25:11) Bakulunu banasa kwana bisemi na bana babo bipangi ku Njibo ya Bumwene na kwana banike bipangi bije binalitombola na myaka na cashu cibali naco.
15 Bandolome na bandokazi mu cikungulukilo nabo banasa kukwasa bana babandondo. Banapande kumona mubali na kukolela banike ku sipilitu. Banike bamuli nabo mu cikungulukilo bakakumbulula mwamubwa ha simbu ya biwano ndi? Byeseko muka bibali na kukolesela ku masikola? Bakambulwila bakwabo bana ba sikola ndi? Bashangazaleni ha byuma byabibwa bibali na kulinga. Mukamwesa ngweni munaka mbunge banike mu cikungulukilo kwitila mu kusimutwiya nabo simbu kanda biwano bishangumuke nambe munima yabyo ndi? Nga mulinga ngoco, co mukwasa banike bananguke ngwabo nabo banakundama ku “mbunga ya banu” ba Njambi.—Myaso 35:18.
Kutondesesa Bisimpi bya Seho
w05 10/1 11 ¶6
Bisimpi bya Kulitila bya mu Mukanda wa 1 Mizimbu
21:13-15. Yehova waka mbunge banu bendi. Mukemwo washikile kangelo ngwendi emike bukalu bubaliwanene nabwo banu bendi. Co wamwesele ngwendi wapwa “muka-mema ku mbunge.”