CILONGESA 50
“Ukakala Nange mu Paradaisi”
“Cili bene lelo njikuleka ngwange, ukakala nange mu Paradaisi.”—LUKA 23:43.
MWASO 145 Bisinganyeka bya mu Mbunge Yange
BILI MUNO MU CILONGESAa
1. Simbu kanda Yesu atse, bika byendekele kuli uje cikenya wakele ku mukulo wendi? (Luka 23:39-43)
YESU na baje bikenya babali bakele kumukulo bazibile manene kubabala omwo bakele na kutsa kamandondo-kamandondo. (Luka 23:32, 33) Baje bikenya babali kubapwile bandongesi ba Yesu mwafwa bakele na kumushendumuna. (Mate 27:44; Maki 15:32) Oloni umo wabo watengulwile bisinganyeka byendi. Wendekele ngwendi: “Yesu ukanjanuke muukakobela mu Bumwene bobe.” Co Yesu wamukumbulwile ngwendi: “Cili bene lelo njikuleka ngwange, ukakala nange mu Paradaisi.” (Tandeni Luka 23:39-43.) Kukwesi bukaleho bumwesa ngwabo uje cikenya watabele ngwendi ‘Bumwene bwa mwilu buli muyehi’ buje bwalongesele Yesu. Co lalo Yesu kendekele ngwendi uje munalume akakala nendi mu Bumwene bwa mwilu. (Mate 4:17) Yesu wakele na kwendeka bya Paradaisi ya hano hasi ije ikaija kulutwe. Bika twendekela ngoco?
Bika bitwasa kwendeka hali uje cikenya wasimutwiiye na Yesu, co byuma muka byazibukile uje cikenya? (Taleni paragilafu 2-3)
2. Tuzibuka bati ngwetu ou cikenya watengulukile wapwile Kajuda?
2 Uje cikenya hamo wapwile Kajuda. Uje cikenya walekele mukwabo ngwendi; “Kuma yobe na kutewa Njambi kwahi omwo unatambula kashitiko kamolika nou munalume ndi?” (Luka 23:40) Bajuda bakele na kulemesa Njambi umo lika, oloni banu ba ku mafuti eka bakele na kulemesa binjambi babengi. (Kutu 20:2, 3; 1 Kori 8:5, 6) Ngwe baje bikenya bapwile baka-mafuti eka ngwe uje cikenya wehwile mukwabo ngwendi: “Kuma yobe na kutewa binjambi kwahi?” Kutundaho Yesu kubamutumine ku banu baka-mafuti, oloni bamutumine ku “bimanga ba kuzimbala bakunjibo ya Isalele.” (Mate 15:24) Njambi walekele lika Baisalele ngwendi akasangula batsi. Ou cikenya hamo wazibukile byei ñanda, mwafwa majwi endi amwesa ngwawo wazibukile ngwendi Yehova akasangula Yesu na kumupwisa Mwene mu Bumwene bwendi. Co lalo wakulahelele ngwendi Njambi nendi akamusangula.
3. Uje cikenya hamo wasinganyekele bika Yesu mwendekele bya Paradaisi? Lumbununeni. (Kushangumuka 2:15)
3 Ha kupwa Kajuda uje cikenya watengulukile wazibukile bya ñanda ya Adama na Eva na Paradaisi muje mwabakele Yehova. Ngeci ou cikenya hamo wakulahelele ngwendi Paradaisi yendekele Yesu ikapwa yaibwa manene, co ikakela hano hasi.—Tandeni Kushangumuka 2:15.
4. Majwi endekele Yesu kuli umo wa baje bikenya anapande kutulingisa tusinganyeke bika?
4 Majwi endekele Yesu kuli uje cikenya anapande kutulingisa tusinganyeke mubukafwila buyoye mu Paradaisi. Twasa kulilongesako bimo ha Paradaisi ku ciyulo ca Mwene Solomoni uje wayulile mu kwoloka. Mbimbiliya inendeka ngwayo Yesu wapwa wakama kutubakana Solomoni. Ngeci twakulahela ngwetu Yesu hamolika na baje bakayula nabo bakapwisa kano kaye Paradaisi yaibwa manene. (Mate 12:42) “Bimanga beka” nabo banapande kuzibuka bibanatela kulinga mangana bakayoye myaka yoshe mu Paradaisi.—Iwano 10:16.
BUYOYE BUKAFWA BATI MU PARADAISI?
5. Musinganyeka ngweni buyoye bukafwa bati mu Paradaisi?
5 Mukasinganyeka ngweni buyoye bukafwa bati mu Paradaisi? Hamo mukasinganyeka paki yaibwa ya kulifwa na lihya lya Edeni. (Kusha 2:7-9) Indi hamo mwanuka bupolofweto bwa Mika buje bwendeka ngwabo, banu ba Njambi bakakala “munu na munu mwisi ya muti wendi wa mikolobozi ya bushuka bwa binyu na mwisi ya muti wendi wa mukuyu.” (Mika 4:3, 4) Hamo munasa kusinganyeka ha mikanda ije yendeka ngwayo byakulya bikatuma. (Myaso 72:16; Isaya 65:21, 22) Lingeni ngwe muli mu lihya lyalibwa oku muli ku mesa ya kushula ya byakulya byakutobala. Lingeni lalo ngwe muli ku mwela waubwa kuje kuli na kwita kapunzi kakabwa na bweko bwabubwa bwa binemo byakuliseza-seza. Muli hamo na baka-naanga yeni na babusamba beni, kwambateselela na baje banasanguka oku munabwahelela, co muli na kulikuwa kukala hamo. Ebi keti bilota byangoco. Twakulahela ngwetu ebi byuma bikalingiwa bene hano hasi. Mu Paradaisi mukakala bipangi, oloni bikapwa byabibwa.
Tukakala na cipangi cakama ca kulongesa baje bakasanguka (Taleni paragilafu 6)
6. Bipangi muka bitukapanga mu Paradaisi? (Taleni cikupulo)
6 Yehova natutanga mu ngila ije itulingisa tulikuwe bipangi byetu. (Kwambu 2:24) Tukazezama manene mu myaka 1,000 yakayula Kristu. Baje bakoboka kayando kakama hamolika na makulukazi a banu baje bakasanguka bakatonda byakulya, byakuzala hamolika na myela kwakukala. Ngeci tukalikuwa kupanga mangana tukabakwase kuwana ebi byuma. Yehova wanene Adama na Eva cipangi ca kulima na kubwahesa kano kaye, ngeci netu tukalima na kubwahesa Paradaisi. Acisinganyekeni oco kubwaha citukaziba omwo tukalongesa makulukazi a banu babangi baje bakasanguka ku batsi baje kubazibuka byabingi hali Yehova na byuma byanayongola kukalinga. Co lalo tukabwahelela mutukakwasa banu ba kulongwa baje bayoyele kusañulu simbu kanda Yesu aije hano hasi, bazibuke byuma binalingiwa kutunda habatsililile.
7. Twakulahela bika, co mwafwa bika?
7 Twakulahela ngwetu mu Paradaisi, tukakala mu kwoloka, tukakala na byuma byoshe bitutonda, co lalo byuma byoshe bikenda mwamubwa. Bika twendekela ngoco? Mwafwa Yehova natumwesa laja mubikafwila byuma mu ciyulo ca Munendi. Ciyulo ca Mwene Solomoni citukwasa kuzibuka mubikafwila byuma mu ciyulo ca Yehova.
CIYULO CA MWENE SOLOMONI CITUKWASA KUZIBUKA MUBUKAFWILA BUYOYE MU PARADAISI
8. Majwi asonekele Mwene Devidi aje ali ku mukanda wa Myaso 37:10, 11, 29 alishulisililile bati? (Taleni bihula bya baka-kutanda muno mu magazini.)
8 Mwene Devidi bamuhwimininine asoneke mubukafwila buyoye kulutwe omwo Mwene wa mana na kulongwa akayula. (Tandeni Myaso 37:10, 11, 29.) Kakangi mutukasimutwiya na bakwetu bya Paradaisi ya kulutwe, tukatanda nabo mukanda Myaso 37:11. Yesu nendi wendekele majwi a kulifwa aje ali oku ku mukanda mu ñanda yendi yaha mukinda mu kumwesa ngwendi awa majwi akalishulisilila kulutwe. (Mate 5:5) Devidi nendi wamwesele mubukafwila buyoye, Mwene Solomoni mwakayula. Mwene Solomoni mwayulile Isalele banu ba Njambi balikuwile kukala mu kwoloka, co lalo bakele na byuma bibatondele mu lifuti “muje mwakele mabele na buki.” Njambi wendekele ngwendi: “Nga mukabangeya mashiko ange . . , Mukakala mu kwoloka kuluu mu lifuti lyeni, co kumukazibi lyoba.” (Levi 20:24; 26:3, 6) Ebi bikulaheso byalishulisilile nambe mu simbu yayulile Mwene Solomoni. (1 Mizi 22:9; 29:26-28) Yehova wabakulahesele lalo ngwendi banu bababi “bakahwa boshe njwa.” (Myaso 37:10) Ngeci, majwi atuwana ku mukanda wa Myaso 37:10, 11, 29 alishulisililile kunima, co lalo akalishulisililila kulutwe.
9. Mwene wa munakazi wa ku Shemba wendekele bika ha ciyulo ca Mwene Solomoni?
9 Mwene wa munakazi wa ku Shemba wazibile bya bufuko na kwoloka bibakele na kulikuwa Baisalele, mwakele na kuyula Mwene Solomoni. Uje Mwene wa munakazi wendele bungenzi bwabulaha bwa kuya ku Jelusalema mangana akalimwene ikeye babenya. (1 Vimye 10:1) Munima ya kulimwena byuma bibakele na kulikuwa Baisalele wendekele ngwendi: “Kunjazibisisile nambe cimo . . . Banabwahelela banu bobe, na bangamba bobe banabwahelela, aba simbu yoshe bali ku mesho obe na kuziba byendeka byobe bya kunyanyama.” (1 Vimye 10:6-8) Ciyulo ca Mwene Solomoni camwesele byakalingila Yehova banu mwakayula Munendi.
10. Yesu naliseze bati na Mwene Solomoni?
10 Yesu napu wa kulitila mu bingila byabingi kutubakana Mwene Solomoni. Solomoni wapwile wa kujeneka kulumbunuka, co lalo walingile milonga yakama ije yanenelele banu ba Njambi bukalu. Yesu ikeye wapwa Mwene wa kulumbunuka co lalo kesi kulinga bubi. (Luka 1:32; Hebe 4:14, 15) Yesu watwaleleleho kupwa wa kulongwa kuli Njambi nameme waliwanene na byeseko kutundilila kuli Satana. Kristu namwesa ngwendi kakalingi bubi nambe kulinga cuma cije casa kukobelesa banu bendi mu bukalu. Twabezika manene kukala na Mwene wa cifweci.
11. Beya bakayula na Yesu?
11 Yesu akapangela hamo na baka-Kristu bakubwabesa mu kunyunga banu, na kushulisilila biyongola bya Yehova hano ha kaye. (Kujo 14:1-3) Baka-Kristu bakubwabesa bakolesele mubaliwanene na byeseko mubakele hano hasi, ngeci bakazibisisa bibakaliwana nabyo banu baje bakayoya hano hasi. Cipangi muka cibakalinga aba bakubwabesa?
CIPANGI MUKA CIBAKAPANGA BAKUBWABESA?
12. Cipangi muka cibakalinga baka-Kristu bakubwabesa?
12 Cipangi cakalinga Yesu hamolika na baka-Kristu bakubwabesa cinapu cakama manene kutubakana cipangi calingile Mwene Solomoni. Mwene Solomoni wayulile lika makulukazi a banu bakele mu mutambela umo. Oloni baje bakayula mu Bumwene bwa Njambi bakayula makulukazi a banu mu kaye koshe. Banabezika manene aba baka-Kristu bakubwabesa kukapanga eci cipangi ca seho manene.
13. Cipangi muka ca kulitila cibakakala naco bakubwabesa?
13 Ngwe mwa Yesu, baka-Kristu bakubwabesa nabo bakapwa bimyene na tupilistu. (Kujo 5:10) Baisalele mubakabangeyeye mashiko a Mosesa, tupilistu babakwasele bapwe ba kulikangula ku mibila na kushwenya kuyehi na Yehova. Lije lishiko lyapwile “munzinzime wa byuma byabibwa bije bija kulutwe” ngeci twasa kwendeka ngwetu, baje bakayula hamolika na Yesu bakakwasa banu bapwe ba kulikangula ku mubila na kusipilitu. (Hebe 10:1) Ha simbu ino kutuzibuka mwamubwa mubakapangela hamo aba bimyene na tupilistu na banu babakayula, baje bakakala hano hasi. Twakulahela ngwetu Yehova akabwahesa byuma mu ngila ije ikalingisa baje bakayoya hano hasi bakabatwamenene mu ngila inapande.—Kujo 21:3, 4.
BIKA BIBANAPANDE KULINGA “BIMANGA BEKA” MANGANA BAKAYOYE MU PARADAISI?
14. Likwatasano muka lili mukati ka baka-Kristu bakubwabesa na “bimanga beka”?
14 Yesu wesekesele bakubwabesa ku “butanga bwabundondo.” (Luka 12:32) Wesekesele cibunga cikwabo ku “bimanga beka.” Ebi bibunga bibali binapu butanga bumo lika. (Iwano 10:16) Ha simbu ino ebi bibunga bibali bili na kupangela hamo, co lalo bikatwalelelaho kupangela hamo mu Paradaisi. Baka-Kristu bakubwabesa nambe ngwetu “butanga bwabundondo” bakebo bakakala mwilu, co “bimanga beka” bakebo bakalikuwa kuyoya myaka yoshe hano hasi. Oloni kuli bibanapande kulinga “bimanga beka” mangana bakayoye mu Paradaisi.
Ha simbu ino tunapande kumwesa ngwetu twalibwahesela kukayoya mu Paradaisi (Taleni paragilafu 15)b
15. (a) “Bimanga beka” bali na kupangela bati hamo na baka-Kristu bakubwabesa? (b) Bika byali na kulinga Ndolome uje ali mu cintolo, co twasa kumutembwinina bati? (Taleni cikupulo.)
15 Uje cikenya yakulahesele Yesu ngwendi akakala nendi mu Paradaisi, watsile te kanda amwese kukandelela kwendi ku byuma byamulingilile Yesu. Oloni “bimanga beka” bakebo basa kumwesa kukandelela kwabo ku byuma bya nabalingila Yesu mu bingila byabingi. Cakumwenako, basa kumwesa ngwabo bamuzema nga bapangela hamo na baka-Kristu bakubwabesa. Yesu wendekele ngwendi akasompa bimanga nga kubalingi bwino baka-Kristu bakubwabesa. (Mate 25:31-40) Ngila imo itwasa kumweselamo ngwetu tuli na kukwasa baka-Kristu bakubwabesa inapu kuzezama mu cipangi ca kwambulula, na kupwisa banu bandongesi. (Mate 28:18-20) Ngeci, tulinga bwino nga tweseka mutwasela mwoshe kupangesa bikwata bya kupangesa mu kulongesa byakufwa ngwe Libulu lya Likuweni Kuyoya Myaka Yoshe! Nga kumwesi na cilongesa ca Mbimbiliya ha simbu ino, mwasa kulyakela cilengo ca kutwamenena bilongesa bya Mbimbiliya.
16. Bika bitunapande kulinga mangana tukayoye mu Bumwene bwa Njambi?
16 Kutwapandele kubandamena ngwetu mutukakobela mu Paradaisi asinoni tupwa cifwa ca munu yatonda Yehova. Ino bene ikeyo simbu itunapande kupwa ba kulongwa mu byuma bitwendeka na byuma bitulinga. Co lalo tunapande kupwa ba kulongwa kuli Yehova, kuli muka-limbo lyetu hamolika na kuli bakwetu baka-Kristu. Nga tutwalelelaho kwononoka Yehova muno mu kaye kakabi, co kukatupwila kwakwasi kukamwononoka mu Paradaisi. Byuma bitulinga binapande kumwesa ngwabyo tuli na kulibwahesela kukayoya mu kaye kakaha. Taleni ñanda ya “Kuma Mwalibwahesela ‘Kuswana Lifuti-Libu Ndi’?” ije ili muno mu magazine.
17. Kuma tunapande kuzeya mwafwa ya bubi bwakama butwalingile kunima ndi? Lumbununeni.
17 Tunapande kulinga mwoshe mutwasela mangana keti tutwaleleho kuliziba mulonga mwafwa ya bubi bwakama butwalingile kunima. Oloni kutwapandele kumona ndando ya kupatula kupwa ngila ya ‘kulingilamo bubi bwa shakelo.’ (Hebe 10:26-31) Twakulahela ngwetu, nga twatengulukile ku bubi butwalingile, co lalo twalombele bukwasi kuli Yehova na ku bakulunu, na kutengulula futisi yetu, co Yehova natukonekela. (Isaya 55:7; Bili 3:19) Anukeni majwi endekele Yesu kuli Bafaliseo ngwendi: “Kunjezile na kusana baka-kusungama embwe, oloni baka-bubi.” (Mate 9:13) Yehova asa kutukonekela ku bubi bwetu bwoshe kwitila mu ndando ya kupatula.
MWASA KUYOYA MYAKA YOSHE MU PARADAISI
18. Twasa kusimutwiya ha byuma muka na uje cikenya yakonekelelele Yesu?
18 Acisinganyekeni ngweni muli mu Paradaisi, co muli na kusimutwiiya na uje cikenya ya konekelele Yesu. Muli na kusimutwiiya muinamikwasela ndando ya kupatula ya Yesu. Mumulomba amileke byalingiwile mwakele na kusimutwiya na Yesu simbu kanda atse, nomwo mwalizibililile, Yesu mwamulekele ngwendi akakala nendi mu Paradaisi. Nendi lalo amihula mukwafwililile kuyoya mu matangwa a kukotoka kwa kaye ka Satana. Ikapwa kubezika kwakama kulongesa banu ba cifwa eci Lijwi lya Njambi mu kaye kakaha.—Efeso 4:22-24.
Ndolome ali na kupangesa cashu cendi ca kusona mu myaka 1000 yakayula Yesu, mwafwa washungwiiye manene kulinga eci cipangi (Taleni paragilafu 19)
19. Bika twendekela ngwetu mu Paradaisi tukapwa bakubwahelela simbu yoshe? (Taleni cikupulo cili ha liputa lyakulibanga.)
19 Tukatwalelelaho kupwa bakubwahelela mu Paradaisi. Simbu yoshe tukakala na banu bababwa na kulinga bipangi byabibwa. Co lalo cuma ca seho manene, ha litangwa na litangwa tukatwalelelaho kuzibuka mwamubwa Tate yetu wa mwilu na kulikuwa byuma byakatulingila. Tukatwalelelaho kulilongesa byendi na byuma byanatanga. Tukatwalelelaho kuzema Yehova mwafwa tukayoya myaka yaingi. Kuyoya myaka yoshe kukatulingisa tuzeme manene Yehova. Twakandelelako manene kuli Yehova na Yesu ha kutukulahesa kukayoya myaka yoshe mu Paradaisi.
MWASO 22 Bumwene Buli na Kuyula, Tubulomba Bwije!
a Kuma simbu imo mukasinganyeka mubukakela buyoye mu paradaisi ndi? Kulinga ngoco kwapwa kwa seho. Kusinganyekesesa ha byuma byakatulingila Yehova kulutwe, kutukwasa tuzezame mu cipangi ca kwambulula. Cino cilongesa citukwasa tukanyamese likulahelo lyetu mu paradaisi ya kulahesele Yesu ije ikaija kulutwe.
b KULUMBUNUNA CIKUPULO: Ndolome uje ali na kushungwiiya kukalongesa banu baje bakasanguka mu kaye kakaha, ali na kulinga cipangi ca kulongesa banu ha simbu ino.