Bihula Bya Baka-kutanda
Devidi mwasonekele majwi ali ku mukanda wa Myaso 61:8 NWT, wendekele ngwendi akashangazala lizina lya Njambi “myaka yoshe.” Kuma oku kulumbununa ngwabo wasinganyekele ngwendi ayoya myaka yoshe ndi?
Embwe. Kalumbunwine ngwendi akayoya myaka yoshe.
Acisinganyekeni ha majwi asonekele aje ali aha ha vesi na mavesi akwabo: “Njikaimba na kushangazala lizina lyobe myaka yoshe, omwo njikanyunga bije njakulahesele, ha litangwa na litangwa.” “Njikakushangazala na mbunge yange yoshe yobe Shukulu Kalunga Njambi yange, co njikambulula bukama bwobe ku myaka yoshe.” “Njikashangazala lizina lyobe ku myaka yoshe.”—Myaso 61:8 NWT; 86:12; 145:1, 2.
Devidi mwasonekele awa majwi, kalumbunwine ngwendi katsi. Wazibukile ngwendi banu bakatsi mwafwa ya bubi. Co wazibukile lalo ngwendi nendi wapwa muka bubi. (Kusha 3:3, 17-19; Myaso 51:4, 5) Wazibukile ngwendi banalume ba kulongwa ba kufwa ngwe Abrahamu, Isaki na Jakobu, nabo batsile. Co nendi wazibukile ngwendi litangwa limo akatsa. (Myaso 37:25; 39:4) Oloni majwi ali ku Myaso 61:8, amwesa lishungu lyakele nalyo Devidi na cizango cendi ca kushangazala Njambi myaka yoshe, kulumbununa mu myaka ya kuyoya kwendi.—2 Samwe 7:12.
Simbu imo, Devidi wasonekele byuma byaliwanene nabyo mu buyoye bwendi, ngwe mutumwena majwi a helu ya capita 18, 51 na 52 ya mukanda wa Myaso. Ku Myaso 23, Devidi nesekesa Yehova ku kanyungi uje ali na kutwamenena, kuhwimisa na kunyunga. Devidi wapwile ngwe ou kanyungi. Co washakele kupangela Njambi mu ‘matangwa oshe a kuyoya kwendi.’—Myaso 23:6.
Anukeni lalo ngweni Yehova ikeye wahwimininine Devidi asoneke byuma byoshe byasonekele. Byasonekele byambateselele bupolofweto bwa byuma biija kulutwe. Cakumwenako, ku Myaso 110, Devidi wasonekele bya simbu omwo Mwata wendi ‘akatumama ku liboko lya Njambi lya cilyo’ mwilu na kutambula nzili yakama manene. Bika byakalinga? Akaswana bitozi ba Njambi na “kusompa miyati” ya hano hasi. Devidi wapwile kukulwila ya Yesu, Mesiya uje ali na kuyula kutundilila mwilu, co lalo napu ‘kapilistu wa myaka yoshe.’ (Myaso 110:1-6) Yesu wendekele ngwendi bupolofweto buli ku Myaso 110 bwendeka hali ikeye, co bukalishulisilila kulutwe.—Mate 22:41-45.
Yehova watwamenenene Devidi asoneke byuma byalingiwile mu simbu yendi na byuma bije bikalingiwa kulutwe, mubakamusangula ku batsi, co akalikuwa kushangazala Yehova myaka yoshe. Ngeci, majwi ali ku mukanda wa Myaso 37:10, 11, 29, apangele ha simbu ibawasonekele, co lalo akapanga na kulutwe. Awa mavesi alishulisilile kusañulu mu lifuti lya Isalele, co lalo akalishulisilila kulutwe, Njambi mwakashulisilila bikulaheso byendi.—Taleni paragirafu 8 mu cilongesa ca “Ukakala Nange mu Paradaisi” cije cili muno mu magazini.
Ngeci, mukanda wa Myaso 61:8 umwesa ngwawo Devidi washakele kushangazala Yehova mu Isalele ya kusañulu kweta noho hakatsila. Co lalo amwesa byakalinga Devidi kulutwe, Yehova mwakamusangula.