Tuˈugë tsujpë lugäär

¡OK IX ja Naxwinyëdë! ¡Extëm tëgekyë tyim tsujˈäjnë! Ixë ääjy ujts etsë ääjy kepy, pëjy ujts ets tëgekyë jëyujk animal. ¿Mˈijxypy mä yamë elefantë etsë kää?

¿Pën të dyajkojˈyë tyäˈädë it lugäärë tsujpë? Wenë, min nˈokˈijxëm wiˈixë Dios dyaˈoˈoyëtsyondakyë tyäˈädë Naxwinyëdë ets nduktsënäˈäyëm.

Tim jawyiin, Dios yëˈë yajkojë mëëjy ets dyajwindukëdë nax. Nandëˈën ojts dyajkojy kexy kaˈpxyë ääjy ujts etsë ääjy kepy. Tsujë Naxwinyëdë kyëxeˈeky ko yoonyë tyäˈädë ääjy ujts. Per kyaj jeˈeyë tsuj kyëxeˈeky, nandëˈën dyakyë jeˈxy pekyë jantsy jektsypyë o xuˈkxpë.

Ok ta netë Dios ojts dyajkojˈyë äjkx ets nyëëguyayët nëjoty, etsë joon yëˈë ets kyaagëditët tsäjwinm. Yajkojë uk etsë mistë etsë kuääjy; jëyujk animalë mëjatypyë etsë mutskatypyë. ¿Jamë jëyujk animal mdëjk windum? ¡Jantsy oyjyaˈayë Dios yˈijty ko dyajkojtääjy tëgekyë ets ndukˈoyˈäjtëm!

Tim ok, ta Dios dyaˈoˈoyë jantsy tsuj tukpedasë Naxwinyëdë diˈib xyëëmoojy Eden. Kyaj nety jyamëtyë axëkˈäjtënë. Tëgekyë mëk tsujë nety jam. Dios tsyojk ets tëgekyëxyëbë Naxwinyëdë jyëmbity dëˈën extëmë tyäˈädë lugäärë tsujpë.

Per ok ix jatëgokë tyäˈädë dibujë. ¿Mnijäˈäp ti Dios yˈijx ko tëgoyˈäjtp yam mä tyäˈädë lugäärë tsujpë? Min nˈokˈijxëm.