Ja mäjkpë ayoˈon

OK IXË tyäˈädë dibujë. Yëˈë ja mäjkpë ayoˈon diˈibë Jyobaa kyajx Ejiptʉ. Myëduˈukpë yëˈë mä Arón twojpy ja nëë diˈib xyëˈäjtypy Nilo, ta jyëmbijty neˈpyny ets tëgekyë ja äjkx yˈoˈktääjy, ta ja nëë xyuˈkpejky.

Ok ta Jyobaa dyajpëtseemyë nootsy mä ja Nilo nëë. Ta ja nootsy tyëjkë jënoty tëgoty, tsimoty pokoty ets tyëjkë oy tyim määjëty. Ets ko ja nootsy yˈoˈktääjy, ta ja jäˈäy dyajnipajttë tukwindukaty, ta ja käjpn xyuˈkpejky.

Mä ja myëdëgëëkpë ayoˈon, yëˈë mä ja Arón twojpyë naxway mëdë tyäjk, ta ja naxway jyëmbijty jääm tsukts.

Tyäˈädë wiingatypyë ayoˈon diˈib ak miin kyaj nyekypyatëdë ja israelitëty. Ja myëmäjtaxkpë yëˈë mä myiinyë tsatsyë mëjatypyë, diˈib tyuktëjkëtyaayë Ejiptʉ jäˈäyë jyëën tyëjk. Ja myëmëgoxkpë ayoˈon, yëˈë mä pyäˈämbajtääjy tëgekyë ja Ejiptʉ jäˈäyë jyëyujk yˈanimal. Mayˈit jyantsy yˈoˈkyë jëyujk tsäjkää etsë tsyiip borreegë.

Mä ja myëdëdujkpë ayoˈon, Moisés mëdë Arón twëjëˈktë kuyjääm, ta ja jäˈäy etsë jëyujk animal pyatääyëdë axëk puˈuts.

Ok ta Moisés xyäjeˈky, ta Jyobaa tkejxyë tëtsnduu mëdë anaa jëtsuk. Ninäˈänëmë nety dëˈën kyatëtsnduˈuy Ejiptʉ.

Ja myëduktujkpë ayoˈon yëˈë mä Jyobaa tkejxyë may myuˈu jap Ejiptʉ. Ninäˈänëmë nety dëˈën kyajäˈtynyëmë may myuˈu, ta tjëˈxtääjy tëgekyë ja ääjy ujts diˈib ja tëtsnduu kyaj dyajwindëgoojy.

Ja myëdaxtujkpë yëˈë mä ojts kyootsë. Tëgëk xëë yˈijty koots, per mä ja israelitëty tsyënääytyë kyaj ojts kyootsë.

Mä ja myëmäjkpë ayoˈon, Dios tˈanmääjy ja israelitëty etsë tsyiip neˈpyny tkëxijkxët mä ja tëjkˈagäj. Ta net ja Diosë yˈanklës nyajxy mäjaty ja jëën tëjk, ets ko tˈijxy ja neˈpyny kyaj pën dyaˈoˈky. Per ko tkaˈijxy ja neˈpyny, ta dyaˈoˈky ja kaˈaxkopkˈuˈunk ets ja jëyujk animalë yˈuˈunk diˈib jawyiin kyeˈxypy.

Ko tyäˈädë myëmäjkpë ayoˈon nyajxy, taanëmë Faraón tkejxy ja israelitëty. Tyäˈädë israelitëty të nety dyajmujktääynyëdë tijaty, ta mä tadë ux ojts tsyoˈonëdë Ejiptʉ.