Ja myëmäjkpë ayoˈon

Moisés ta ojts tˈanëëmë faraon ko wyinwäˈktuˈudaampy. Per mä kyanëjkxynyëm, ta tˈanmääy: “Tyam, tsuˈumgujky niˈamukë ja kaˈaxkopkˈuˈunk diˈib Egipto yˈoogäˈäny, duˈun ja faraongë myäänk diˈib kaˈaxkopk ets ja tuumbë mosë yˈuˈunk yˈënäˈk diˈib kaˈaxkopk”.

Jyobaa ta tˈanmääy ja israelitëty: “Yaˈoyëdë tuˈugë oybyë käˈäy ukën. Yaˈooktë tuˈugë borreegë o tsyiibë diˈib tuk jëmëjt ets këxijkxtë ja nyeˈpyny mä ja mdëjkˈagäjë nyawits. Tsäˈäytyë ja tsuˈutsy ets kaytyë ja tsäjpkaaky diˈib kyaj tmëdatyë lebaduurë. Ets nayjëjpˈixëdë parë mtsoondët, tuktëkëdë mwit etsë mgëˈëk. Tyäˈädë ux nyaˈˈawäˈätspëtsëmäˈändë”. ¿Mbawinmaapy wiˈix ja israelitëty agujk jotkujk nyayjäˈäwëdë?

Ta tsuˈumgujky nyajxyë Jyobaa yˈanklës mä tukëˈëyë ja jëën tëjk diˈib Egipto. Ets mä kyaj tˈijxy ja neˈpyny, ta dyaˈoˈky ja kaˈaxkopkˈuˈunk. Per mä tˈijxy ko tamë neˈpyny, ta ja anklës duˈunyë tninäjxy ja tëjk. Niˈamukë ja Egipto jäˈäy duˈunë mëkjäˈäy etsë ayoobë jäˈäy, yˈoˈktë ja kyaˈaxkopkˈuˈunk. Per ja israelitëty nituˈugë yˈuˈunk kyaˈoˈktë.

Ja faraongë kyaˈaxkopkˈuˈunk nan oˈk. Ets yëˈë diˈib mëk jyantsy jyäˈäwë ja faraon, ta tˈanmääyë Moisés etsë Aarón: “¡Nëjkxtë! ¡Pëtsëmdë yä ets nëjkx awdattë mDios! ¡Yajnëjkxtë mjëyujk mˈanimal ets tyamyëts xywyinwäˈktuˈuttët!”.

Meerë nety ja poˈo pyikë mä tadë koots. Ta ja israelitëty yajpëjtaktë tuk familyaty ets niˈuˈunk niˈok parë tsyoˈondë Egipto. Ja 600 milë yetyëjk, abëkyë toxytyëjk etsë ënäˈkuˈunk. Nan nimayë jäˈäy tsyoˈondë diˈibë nety kyaj yˈisraelitëty parë nëjkx tˈawdatäˈändë Jyobaa. ¡Taanëm ja israelitëty yˈawäˈätspëtsëëmdë!

Jëjpˈamë nety jëmëjt jëmëjt dyaˈoyëdët ja käˈäy ukën diˈib tukjamyatsëdëp ko Jyobaa nety të yaˈˈawäˈätspëtsëmëdë. Ja ttukxëwˈäjttë Paskë xëëw.