Ja reyë axëkjäˈäybyë diˈib anaˈam Ejiptʉ

TYÄˈÄDË jäˈäyëty diˈib yam mˈijxypy, yëˈë yajtuundëp jamë jäˈäy amëjää. ¿Mˈijxypy diˈib jam pyoˈowojpyë tadë tuumbë? Diˈibaty yam tuundëp yëˈë fyamilyë Jakoob, ja yajtijtë israelitëty. Etsë tyäˈädë jäˈäy diˈib yajtuunëdëp yëˈë diˈib Ejiptʉ. Min nˈokˈijxëm tiko net ja israelitëty yajtuumbëˈäjt yajmosëˈäjttë ets yaˈaxëktuundë.

Ja fyamilyë Jakoob jeky jyotkujkˈäjttë jap Ejiptʉ, pesë Josee yëˈë diˈib nety anaˈamp ets pääty kyuentˈäjtëdë. Per ko ja Josee ojts yˈoˈknë ets nandëˈën ja Faraón, ta tyëjkë rey ja tuˈugë wiinkpë Faraongë axëkjäˈäybyë diˈib kyaj tˈixäˈänyë israelitëty.

Tyäˈädë Faraón yëˈë diˈibë net yˈaxëktuunë israelitëty. Ttuknipejky ja axëkjäˈäyëty ets dyajtundët mëk ja israelitëty mä ja jëën tëjk tniwinmayë. Per ok, ta ja israelitëty waanë niˈigyë ojts jyantsy myayëndë, ta ja Ejiptʉ jäˈäy tsyëˈkëdë ko niˈigyë yˈaktimayëdët, ets nëjx näˈä nyibëdëˈëgëdë.

Pääty, ¿mnijäˈäp ti tyuunë Faraón? Ta tmëjwoojy ja parteerëty ets tˈanmääjy: Pën tuˈugë israelitë toxytyëjk yajmaxuˈunkˈäjtypy tuˈugë mixyuˈunk, ta xyaˈoogët. Per kom ja parteerëty oyjyaˈay, kyaj dyaˈoˈktë ja mixyuˈungëty.

Pääty ja Faraón ojts ttukˈaneˈemy ja nyax kyäjpn: Yaˈooktë niˈamukë israelitë yˈuˈunk diˈib mixyuˈunk. Yëˈëyë kixyuˈunk myajwëˈëmdëp. ¿Këdii mëk axëëk dëˈënë Faraón ojts tniˈanaˈamë? Per min nˈokˈijxëm wiˈix tsyoky tuˈugë mixyuˈunk.