Ttuknaxtë ja mejnyë Tsaptspë

¡OK IX ti yam tuun jäjtëp! Tamë Moisés tkäjptëyë tyäjk mä ja mejny diˈib xyëˈäjtypy Tsapts. Etsë tadë jäˈäyëty diˈib jam mëët mejnybyëˈääjy yëˈë israelitëty. Per ok ixë Faraón mëdë syoldäädëty tam jyiˈkxtäˈäytyë. Min nˈokˈijxëm tidën ko dëˈën tyuun jyäjtë.

Extëm yaptsoo të nijäˈäjëm, ko ja myëmäjkpë ayoˈon nyajxy ta ja Faraón tkejxyë israelitëty. Ja naa 600,000 yetyëjk israelitë pyëtsëëmdë Ejiptʉ, abekyë toxytyëjk etsë ënäˈkuˈunk. Nandëˈënë may jyaˈay diˈib myëbëjkë Jyobaa tpabëtsëëmdë ja israelitëty. Niˈamukë pyëtsëëmdë jap Ejiptʉ mëdë jyëyujk tsyäjkää etsë tsyiip byorreegë.

Mä nety tsyoonanëdë ja israelitëty, ta tˈamdoodë wit nijam, oorë etsë platë. Ja Ejiptʉ jäˈäyëty mooytyaayëdë tëgekyë ti tyim amdoodë, pes të nety nyaxy ja myëmäjkpë ayoˈon ets mëkë nety tsyëˈëgëdë.

Tuk xëë majtsk xëënëmë nety tyuˈuyoˈoytyë, ko jyäjttë mä ja mejny. Ta jam ojts tyuˈuboˈxtë. Myentrës jam tyuˈuboˈxtë, ja Faraón mët ja jyaˈayëty ta nyaytyukjäˈäjëdë tiko nety të tkaxtë ja israelitëty, ta nyayjënanëdë: ¡Ixëga të nˈokkajxtäˈäyënë nduumbëˈäjtëm!

Ta ja Faraón jatëgok wyinmääjy tyëgäjtsy. Ta netyë tˈijxy ja kyarrë diˈib mëët tsyiptuny ets dyajnaymyujktääyë ja tsyiptuumbë. Ta tpatsoˈondë ja israelitëty mët tëdujk mëgoˈpxë karrë oyatypyë, ets abekyë karrë diˈibë nety japˈäjtp Ejiptʉ.

Ko ja israelitëty tˈijxpattë ja Faraón mëët ja myay tsyiptuumbë, ta jyantsy tsyëˈkëdë. Pes nimäätsoo nety mbäät kyakaˈaktë. Wyinduujy tamë nety ja mejny ets ëxkëˈëy tamë nety pyaminëdë Faraón mëdë tsyiptuumbëty. Per ta Jyobaa tpëjtaky itkujkyë yoots nimäˈä, ets ja Faraón mëdë tsyiptuumbëty kyaj tˈijxpäättëdë israelitëty.

Jyobaa ta net tˈanmääyë Moisés ets tkäjptëwëdë tyäjk mä ja mejny. Ko tkäjptëëjy ja tyäjk, ta Jyobaa dyajmiiny ja mëk poj ta ojts dyajnaywyaˈxyëty ja mejny. Ta ja mejny ojts wyeˈemy extëm majtsk aduˈumë potsy.

Ta net ja israelitëty nyäjxtë windëˈëtstuujy. Kanäk oorë nyajxy ets ja may jyaˈay nyäjxtääytyë mejny awinm mëdë jyëyujk yˈanimal. Taanëmë net ja Ejiptʉ jäˈäyëty tˈijxpattë ja israelitëty, ta tpadëjkëdë mä ja mejny.

Per ta Dios dyajpäjktëgaandutääjy ja kyarrëty. Ta jyantsy nyayˈatsëˈkëdë ets nyayjënanëdë: Jyobaa yëˈë diˈib mëët yam ntsiptuˈunëm. ¡Min nˈokjëmbijtënë! Per kyaj nety tnekytiempëty.

Ta Jyobaa tˈanmääyë Moisés ets tkäjptëwëdë tyäjk mä ja mejny, extëm të xyˈixy yaptsoo mä dibujë. Ta net ja mejny yˈayaˈpmijky ets dyajnitujktääjy ja Faraón mët ja tsyiptuumbëty ets ja kyarrëty. ¡Ni tuˈuk ojts kyatsoˈoky! Pes të nety niˈamukë tyëjkëtyaˈaytyë mejnyoty.

¡Mëk ja israelitëty jyantsy xyondaktë ko kyaj wiˈix jyäjttë! Ta ja yetyëjkëty tyëjkëdë ëëbë: Jyobaa të myadaˈaky mä tyäˈädë mëj tsip. Të dyajjiˈkxtäˈäy ja kuääjy mët ja jäˈäyëty. Miiriam ja Moisesë myëgaˈax mët ja wiingatypyë toxytyëjk, tjuˈttë pyujxn xijtën. Ta tyëjkëdë ajtspë ets ëëbë: Jyobaa të myadaˈaky mä tyäˈädë mëj tsip. Të dyajjiˈkxtäˈäy ja kuääjy mët ja jäˈäyëty. Dëˈën tmooytyë dioskujuyëmë Jyobaa ko tkuyˈëëdë.