Ja miläägrë diˈib tuun jäjtë mä ja mejnyë Tsaptspë

Ko faraon tmëdoyˈajty ko ja israelitëty të tsyoondë Egipto, ta jyënany ko kyajxyëp të tkexy. Ta tˈanmääy ja syoldäädëtëjk: “Naynyiˈˈixëdë mëdë mgarrëty diˈib mëët mtsiptundë ets nˈokpatsoˈonëm. Kyajxyëp të ngajxëm”. Ta ja faraon mët ja jyaˈayëty tpatsoˈondë ja israelitëty.

Jyobaa yëˈë diˈib ojts twooyoˈoy ja kyäjpn, xëëny mët tukwijtsëˈëgyë yoots ets koots mët tukwijtsëˈëgyë jëën. Ta dyajjäjty mä ja mejnyë Tsaptspë ets tˈanmääy parë jam nyaynyikojëdët.

Ok, ta ja israelitëty tˈijxtë ko ta pyaminëdë faraon mët ja tsyiptuumbëty. Nimäätsoowë nety mbäät kyakaˈaktë, wyinduuy tamë nety ja mejny ets ëxkëˈëy pyaminëdë ja tsiptuumbëty. Ta yaxkaktë ets tˈanmääytyë Moisés: “¡Tyamë net nˈoˈkëm! ¿Tikots të xyyajpëtsëmdë Egipto?”. Perë Moisés ta yˈatsooy: “Këdii mtsëˈëgëdë. Maˈkxtuktë ets ixtë wiˈixë Jyobaa myajtsoˈogëdë”. ¿Këdii Moisés myëdäjt mëkë mëbëjkën mä Jyobaa?

Ok, ta Jyobaa tˈanmääy ja israelitëty parë dyajmuktët mä nety të nyaynyikojëdë. Mä tadë ux, ta Jyobaa jatëgok ojts dyajtsoony ja yoots nëmäˈä ets tpëjtaky itkujky, duˈun ojts dyajnaywyaˈkxyëty ja israelitëty mët ja Egipto jäˈäy. Kootsë nety yajpääty mä ja Egipto jäˈäy, per mä ja israelitëty jamˈäjtë tëˈkx jäjjën.

Ok, ta Jyobaa tˈanmääyë Moisés parë tkäjptëwët ja tyäjk mä ja mejny. Ta myiiny tuktsuˈum ja mëk poj. Ets ta ja mejny ojts nyaywyaˈkxyëty majtsk pëky parë kujkˈääy ja tuˈu ojts wyeˈemy. Ta ja israelitëty nyäjxtë windëˈëtstuuy ets pëˈääybëˈääy ojts wyeˈemy ja mejny.

Ta ja faraongë syoldäädë tpadëjkëdë ja israelitëty mä ja naxë tëˈëtspë. Perë Jyobaa ta ojts dyajpäjktëgaandutäˈäy ja kyarrëty ets ja Egipto jäˈäy kyaj ojts tnekynyijawëdë ti tyundëp. Ta ja soldäädëtëjk yaxkaktë: “¡Nˈokjëmbijtënë! Jyobaa yëˈë nyitsiptuumbyë kyäjpn”.

Jyobaa ta tˈanmääyë Moisés: “Käjptëwë mdäjk mä mejny”. Ta ajotkumonë ja mejny yˈayaˈpmujky ets dyajnitujktääy ja faraongë tsyiptuumbëty. Niˈamukë yˈoˈktääytyë, nituˈuk ojts kyatsokwëˈëmdë.

Jam mejny awinaxy, niˈamukë tmëjkumääytyë Dios ko yˈëëwdë: “Nguyˈëwaambyëtsë Jyobaa, mët ko të myëjpëtsëmy. Të dyajjiˈkxtäˈäy ja jäˈäyëty mëdë kyabayë”. Mientrës ja nax käjpn yˈëëwdë, ta ja toxytyëjkëty yˈajtstë ets dyajjënandë ja pujxnxijtën. Agujk jotkujk yajpattë mët ko të nety yˈawäˈätspëtsëmdë.