Manaa diˈibë israelitë jyëˈxtë

¿MNIJÄˈÄP ti yamë jäˈäy yajmujktëp naxkëjxy? Dëˈën jyëdajnë extëmë manik diˈib të myëjäämiky. Poop ets pejˈyaty. Per kyaj yëˈëjëtyë manik yëˈko mbäät yajjeˈxy.

Jeˈeyënëmë nety kujk nyaxy tuk poˈo mä ja israelitë pyëtsëmdë Ejiptʉ. Ta jyäjttë mä tuˈugë lugäärë äänëˈëk tëtsëˈëkpë, mä kyaj yonyë jeˈxy peky. Ta tyëjkëdë abajt kutujkpë: Nek oyxyëbë Jyobaa të xytyim yaˈoˈkëm jap Ejiptʉ. Jap käˈäy ukëmë nety yajxon.

Päätyë Jyobaa jyënany: Tyamëts nyajtuˈujäˈänyë mjeˈxy mbeky. Ets dëˈënën ttuuny. Ja kum bom, ta ja israelitëty tˈijxtë ko të kyaˈay naxkëjxy jantsy poobëm, ta nyayajtëëjëdë: ¿Ti yëˈë?

Ta Moisés yˈanmääyëdë: Tyäˈädë yëˈë diˈibë Jyobaa yajkypy ets xykyay xyˈuuktët. Ta ja israelitëty txëëmooytyë MANAA. Ets ko dyaˈoˈoyëdë, dëˈën jyawë extëmë tsäjkaaky diˈib myëdäjtypyë seerë päˈäk.

Moisés ta tˈanmääjy ja israelitëty: Yajmuktë nëˈën jeˈeyë tyam xyjëˈxäˈändë. Pääty ja israelitëty jopy jopy nëjx dyajmuktë ja manaa, pes ko ja Xëë pyëtsemy ta ja manaa jyëëywyäˈxtäˈäy.

Moisés ta nandëˈën tˈanmääyë israelitëty: Nipën tkapëjkëˈëgëdë manaa ets ja kum bom tjëˈxët. Per nääk ta tpëjkëˈktë. ¿Ets mnijäˈäp wiˈix jyaty? ¡Ja kum bom të jyantsy tyënëˈkëtyaˈay ets axëëk xyuuky!

Ta netë Jyobaa jyënany ets mä myëdëdujk xëë dyajmuktët majtsk dëˈënën, yëˈko kyaj ti dyajkäˈäjäˈäny mä myëjëxtujk xëë. ¡Ets ko tpëjkëˈktë manaa ets tˈijxtë mä ja myëjëxtujk xëë, kyaj ojts tyënëˈkë ets nan kyaj axëëk xyuˈky! ¡Yëˈë ja tuˈugë mëjˈäjtënë diˈibë Jyobaa tyuun!

Nëˈën ja israelitëty yˈijttë jam mä ja lugäärë äänëˈëk tëtsëˈëkpë, yëˈë jyeˈxyˈäjttë manaa.