BIBLIOTEKË MÄ INTERNET Watchtower
Watchtower
BIBLIOTEKË MÄ INTERNET
ayuk
Ä
  • Ä
  • ä
  • Ë
  • ë
  • Ʉ
  • ʉ
  • BIIBLYË
  • ËXPËJKPAJN
  • REUNYONK
  • es20 paj. 88-98
  • Septiembrë

Kyaj ti bideo.

Kyaj mbäät yaˈixyë bideo.

  • Septiembrë
  • Nˈokˈëxpëjkëmë Diosë jyaaybyajtën tuˈuk tuˈugë xëë 2020
  • Subtítulo
  • Martës 1 äämbë septiembrë
  • Mierkëlës 2 äämbë septiembrë
  • Jueebës 3 äämbë septiembrë
  • Biernës 4 äämbë septiembrë
  • Sääbëdë 5 äämbë septiembrë
  • Domingë 6 äämbë septiembrë
  • Lunës 7 äämbë septiembrë
  • Martës 8 äämbë septiembrë
  • Mierkëlës 9 äämbë septiembrë
  • Jueebës 10 äämbë septiembrë
  • Biernës 11 äämbë septiembrë
  • Sääbëdë 12 äämbë septiembrë
  • Domingë 13 äämbë septiembrë
  • Lunës 14 äämbë septiembrë
  • Martës 15 äämbë septiembrë
  • Mierkëlës 16 äämbë septiembrë
  • Jueebës 17 äämbë septiembrë
  • Biernës 18 äämbë septiembrë
  • Sääbëdë 19 äämbë septiembrë
  • Domingë 20 äämbë septiembrë
  • Lunës 21 äämbë septiembrë
  • Martës 22 äämbë septiembrë
  • Mierkëlës 23 äämbë septiembrë
  • Jueebës 24 äämbë septiembrë
  • Biernës 25 äämbë septiembrë
  • Sääbëdë 26 äämbë septiembrë
  • Domingë 27 äämbë septiembrë
  • Lunës 28 äämbë septiembrë
  • Martës 29 äämbë septiembrë
  • Mierkëlës 30 äämbë septiembrë
Nˈokˈëxpëjkëmë Diosë jyaaybyajtën tuˈuk tuˈugë xëë 2020
es20 paj. 88-98

Septiembrë

Martës 1 äämbë septiembrë

Oy xykyaˈixtë ja Jesukristë, mtsojktëp miitsëty jaˈa (1 Peed. 1:8).

Ko Lázaro yˈoˈky, Jesus jyäˈäwë ja jäj jëmuˈumën diˈibë nety yajnäjxtëbë Marta mëdë María, ets pääty “jyëëy” yaxy (Fwank 11:32-35). Kyaj jyëëy yaxy mët ko kyaj nety mëdë Lázaro yˈokˈyajpäädanë, pes nyijäˈäwëbë nety ko yajjukypyëkaampy. Diˈibën yajjëëy yajˈyaxë, yëˈë ko tjäˈäwë ja jäj jëmuˈumën diˈibë netyë Marta mëdë María yajnäjxtëp. Mëjwiin kajaa xyjyotkujkmoˈoyëm ko nnijäˈäwëm wiˈixë Jesus tjäˈäwë ti nety ja jäˈäy yajkëjx yajnäjxtëp, ets ntsojkëm mët ko pyaˈˈayoowë jäˈäy. Xyjyotkujkmoˈoyëm ko yëˈë tyuny Rey mä Diosë yˈAnaˈam Kyutujkën ets ko tim tsojk dyajjëgaˈagäˈäny tukëˈëyë tijaty xyyaˈˈayoˈowëm. Komë Jesus jyukyˈäjt extëmë naxwinyëdë jäˈäy, pääty yëˈëyë mbäät dyajtsoktäˈäy ja jäj jëmuˈumën diˈibë Satanás të xymyoˈoyëm. Jantsy jotkujk nnayjyäˈäwëm ko nmëdäjtëm tuˈugë Rey diˈib nyijäˈäwëp yajxon “yëˈë nˈayoˈonˈäjt njotmayˈäjtëm” (Eb. 2:17, 18; 4:15, 16). w19.03 17 parr. 12, 13

Mierkëlës 2 äämbë septiembrë

Nipën mbäät kyaminy mä ëjën pën kyaj dyajminy yëˈë Dios Teety diˈibëts ëj xykyajx (Fwank 6:44).

Mä nˈëwäˈkx ngäjpxwäˈkxëm, nbudëjkëmë jäˈäy parë tˈixyˈattëdë Dios, per tsojkëp njamyajtsëm ko Jyobaa yëˈë diˈib tuump mëjwiin kajaa (1 Kor. 3:6, 7). Jyobaa yëˈë diˈib myëjwoobyë jäˈäy. Extëm ja jäˈäy niduˈuk niduˈuk tmëdaty ja jyot korasoon, duˈun tkupëkäˈändë ja Diosë yˈayuk ets yëˈë këˈëm diˈib wyinˈixandëp (Mat. 13:4-8). Nˈokjamyajtsëm ko nimayë jäˈäy kyaj ojts tˈaxäjëdë ko Jesus myëtmaytyakëdë, oyë nety jyayëˈëjëty diˈib mas oy yaˈëxpëjkp. Pääty, kyaj mbäät wiˈix nnayjyäˈäwëm pën nimayë jäˈäy kyaj tmëdowäˈändë Diosë yˈayuk. Jantsy oy wyimbëtsëmäˈäny ko nyaˈijxëmë paˈˈayoˈowën mä nˈëwäˈkx ngäjpxwäˈkxëm. Ndukxondäˈägäˈänëm mas niˈigyë ets nbudëkëyäˈänëm pënaty jënandëp “ja yˈääw jyot ko kyupëkandëp ja tëyˈäjtën parë jyukyˈattët winë xëëw” (Hech. 13:48, TNM). Pääty, nˈokmayˈäjtënduˈunëm “mët oytyim pënëty nidëgekyëty” (Gal. 6:10). Duˈuntsoo nëjkx nnayjyäˈäwëm jotkujk ko nyajmëjpëtsëˈëmëmë nDeetyˈäjtëmë Jyobaa (Mat. 5:16). w19.03 25 parr. 18, 19

Jueebës 3 äämbë septiembrë

Mä të nyaymyukëdë, itkujky nmëjkumayaˈany (Sal. 22:22).

Ja rey David duˈun tkujäˈäyë: “[Jyobaa] janty mëj yëˈë ets patëp yajmëjpëjktaˈakëty” (Sal. 145:3, TY). David mëkë nety ttsokyë Jyobaa, pääty tmëjkumayany mä ja myëguˈuktëjk “të nyaymyukëdë” (1 Crón. 29:10-13; Sal. 40:5). Tuk pëky wiˈix tyam mbäät nmëjkumäˈäyëmë Jyobaa, yëˈë ko ngomentaräjtëm. Niˈamukë nˈoymyëdoˈowëm ko wiˈixëmë nmëguˈukˈäjtëm kyomentarattë. Njantsy yˈoymyëdoˈowëm ko tuˈugë mixyuˈunk kyomentaraty kyëˈëm ääw kyëˈëm ayuk ets nanduˈun ko tuˈugë nmëguˈukˈäjtëm tnimaytyaˈaky tuˈugë tëyˈäjtënë diˈib të tˈëxpëjkpääty. Nan nmëjjäˈäwëm ko kyomentaraty tuˈugë nmëguˈukˈäjtëm diˈib wintsoytyuˈun o diˈib apenënëm tjatyë nˈayukˈäjtëm (1 Tes. 2:2). ¿Ti mbäät nduˈunëm parë nyajnigëxëˈkëm ko nmëjjäˈäwëm? Tuk pëky, yëˈë ko nmoˈoyëmë dyoskujuyëm ko jyëjpkëxëdë reunyonk ets ko nˈanmäˈäyëm ko të xymyëjääwmoˈoyëm extëm të kyomentaraty. Ets ja tuk pëky, yëˈë ko ëtsäjtëm nanduˈun ngomentaräjtëm. Duˈuntsoo nmëjjääwmoˈoyëm nanduˈunë nmëguˈukˈäjtëm ets kyaj jeˈeyë ëtsäjtëm nyajmëjääwmoˈoyëm (Rom. 1:11, 12). w19.01 8 parr. 1, 2; 9 parr. 6

Biernës 4 äämbë septiembrë

Jäˈäygyëdäˈäktë (Kol. 3:15).

Nimäjkë yetyëjk mëk axëëgë nety jyat kyëbattë, pes yëˈë nety myëdäjttëbë leprë päˈäm. Të nety nmëdoyˈattë ko Jesus, ja mas oybyë yaˈëxpëjkpë, myëmadaktaapy oytyim diˈibëtyë yuu päˈäm. Pääty, ko tëgok tˈijxpattë jagambäät, ta tmëyaxkaktë: “Jesus, Wintsën, paˈˈayoogëts ëëtsëty”. Jesus, ta dyaˈˈagëdakyë tyäˈädë nimäjkpë jäˈäy. Seguurë ko niˈamukë tjantsy myëjjäˈäwëdë ti Jesus tukmëduunëdë, per jeˈeyë niduˈuk diˈib yajnigëxëˈk mëdë yˈääw yˈayuk, ets yëˈë niduˈugë samaritanë diˈib myëjkuˈëˈëw myëjkugäjpxë Dios (Luk. 17:12-19). Duˈun extëmë tyäˈädë samaritanë, nanduˈun nyaˈixäˈänëm ko njäˈäygyëdakëm tijaty yajtukmëduˈunëm. Jyobaa yëˈë pyëjtakypyë oybyë ijxpajtën parë nyaˈijxëm ko nmëjjäˈäwëm tijaty. Tuk pëky wiˈix dyaˈixyëty, yëˈë ko tkunuˈkxy pënaty tyuundëp ti yëˈë tyukjotkëdakypy (2 Sam. 22:21; Sal. 13:6; Mat. 10:40, 41). Biiblyë xytyukˈanaˈamëm: “Mët ko miits mˈuˈunkˈatëdë Dios, jikyˈattë extëm yëˈë ttseky” (Éfes. 5:1). Pääty, tuk pëky wiˈix mbäät nyajnigëxëˈkëm ko nmëjjäˈäwëm tijaty, yëˈë ko njäˈäyˈäjtëm extëmë Jyobaa. w19.02 14 parr. 1, 2; 15 parr. 4

Sääbëdë 5 äämbë septiembrë

¡Axtë naˈoogëdëts kyajts nmastuˈudäˈänyë Dios! (Job 27:5).

Tuˈugë kiixy yajpääty mä yˈeskuelë, ets jam yajtuknibëjtäägë tuˈugë xëëw, perë tyäˈädë kiixy nyijäˈäwëp ko Dios kyaj ttukjotkëdaˈaky. Jatuˈugë mixy kyäjpxwaˈkxy tëjkmdëjkm, ta kyugäjpxë mä tuˈugë tëjk ets yëˈë jap tsënaapy tuˈugë myëguˈuk diˈib mëët yˈeskuelëˈaty diˈib nyëxiky tyukxikypyë Jyobaa tyestiigëty. Jatuˈuk, yëˈë tuˈugë uˈunkteety. Mä tyuny, ta ja wyintsën yˈanëˈëmxëty ets yˈandäˈägët o ttunët diˈib kyaj yˈoyëty. Per oy ja tyuunk ttimˈyajtëgoyët, ta tˈanëëmë ko yëˈë tëyˈäjtën myëët tijaty ttuny ets ko myëmëdoobyë ley mët ko Dios duˈun ttsoky jyaˈayˈatët pënaty mëduunëdëp (Rom. 13:1-4; Eb. 13:18). Extëm të nˈijxëm, ¿diˈibë jäˈäyˈäjtën të dyajnigëxëˈëktë tyäˈädë nidëgëëkpë nmëguˈukˈäjtëm? Mbäät kanäk pëky nigäjpxëm, extëmë jotmëkˈäjtën o ko tëyˈäjtën myëët tijaty të ttundë. Per diˈib niˈigyë të dyajnigëxëˈëktë, yëˈë ko amumduˈukjot të tmëmëdowdë Jyobaa. Të ttundë ja mëjääw parë kyaj të tmëdëgoytyë ets të tmëmëdowdë ja yˈanaˈamën. Seguurë ko agujk jotkujk të dyajnayjyawëdë Jyobaa. Ëtsäjtëm, nan agujk jotkujk nyajnayjyawëyäˈänëmë Jyobaa. w19.02 2 parr. 1, 2

Domingë 6 äämbë septiembrë

Ja anaˈamën diˈibë Moisés yajmooy, dëˈën jaˈa extëmë awax diˈibë yajnigëxeˈkypy wiˈix yˈity ja oyˈäjtën diˈibë miimpnëm (Eb. 10:1).

Ja Ley yëˈë ijty mas niˈigyë kyuwaampy pënaty kyaj tmëdattë ja diˈib nitsiptunëdëp, extëm ja kuˈookyˈuˈunk, ja kuˈookytyoxytyëjk etsë jabyoˈkxyjyaˈay. Niˈamukë ja fes tsojkëp ijty tmëmëdowdëdë tyäˈädë anaˈamën: “Këdii nëgoo oˈktëy xytyundëty jëbyoˈkxy jaˈaytyëjkëty, ni yëˈë wiˈixaty xykyätundëty yëˈë kuˈooky uˈunktëjkëty, ets ja toˈoxytyëjkëty mëdiˈibë kuˈoogyëtyën, ko ënety mënuˈkxyˈatëtë. Këdii yëˈë wyit tyujkxy xypyëjkëdëty, mëdiˈibë ja nuˈkxy mdukkutëkëdëbën” (Deut. 24:17, MNM). Jyobaa yëˈë ijty mas niˈigyë naytyukjotmaytyuunëp pënaty ayoowdëp ets tyukumëdoopy ijty pënaty tuunëdëp axëëk (Éx. 22:22-24). Jyobaa tsyojkypy ets pënaty të tmoˈoyë kutujkën nyaytyukjotmaytyunëdët pënaty të yajtuknipëktë tˈijxˈit tkuentˈattët. Ets mëk tˈaxëkˈixy ko jäˈäy yˈity tsyëënë axëëk, nan tsyojkypy parë yajkuentˈatët ets kyaj axëëk yajtunët ja uˈunk ënäˈk, ets mas niˈigyë pënaty kyaj mbäät nyaynyitsiptunëdë (Lev. 18:6-30). Pën seguurë nˈijtëm ko Dios kyaj axëëk xytyuˈunëm, ta mas niˈigyë ntsokäˈänëm. Ets ko ntsojkëmë Dios ets tijaty nyiˈanaˈamëp, yëˈë diˈib xypyudëjkëm parë ntsojkëm ja jiiky mëguˈuk ets kyaj axëëk nduˈunëm. w19.02 24, 25 parr. 22-26

Lunës 7 äämbë septiembrë

[Njëjpkudijëm] ja jikyˈäjtënë axëëkpë (Titʉ 2:12).

Min nˈokˈijxëm tuˈugë ijxpajtën wiˈix mbäät nnaygyuentˈäjtëm parë kyaj nwinmäˈäyëm extëmë Satanás. Jyobaa të xytyukniˈˈijxëm ko kyaj yˈoyëty nimaytyakëm mä jäˈäy axëëk yˈit tsyëënëdë ets nitii diˈib kyaj wyäˈätsëty (Efes. 5:3, TNM). Per ¿ti mbäät nduˈunëm ko ja diˈib mëët nˈeskuelëˈäjtëm o nduˈunëm tyëkëdët käjpx maytyakpë axëëk? Ja jot winmäˈäny, mbäät xytyukˈawäˈänëm ko kyaj yˈoyëty (Rom. 2:15). ¿Ti net ndunäˈänëm? ¿Nmëmëdowäˈänëm extëm xyˈanmäˈäyëm ja käjpn kuentˈäjtpë ets nyaˈˈadukäˈänëm ja tëjkˈääw? Waˈan nmëdowäˈänëm tijaty jam kyäjpx myaytyaktëp o nˈixäˈänëm tijaty jam naytyukˈijxëdëp. Per diˈib mbäät nduˈunëm, yëˈë nyajtëgäjtsëm ja maytyaˈaky o ndimtsoˈonëm. Tsojkëp nˈijtëm jotmëk parë njëjpkuwäˈkëm ko ja nmëguˈukˈäjtëm atsip xytyuktunäˈänëm diˈib kyaj yˈoyëty o xyyajwinmayäˈänëm axëëk. Mbäät nˈijtëm seguurë ko Jyobaa yˈijxypy ko nduˈunëmë mëjääw parë njëjpkuwäˈkëm extëmë Satanás wyinmay ets ko xymyoˈoyäˈänëmë mëjääw etsë wijyˈäjtën parë njëjpkuwäˈkëm (2 Crón. 16:9; Is. 40:29; Sant. 1:5). w19.01 17, 18 parr. 12, 13

Martës 8 äämbë septiembrë

Ënatës të nmëmay të nmëtajy mëtiˈipëjatyës të ntunyën [...] ets të nijawës ko nëkoopë tääpë tuunk të nyatëkëˈaty [...] ets ko kajtëm yaa nitii naxwiinyëtë tii mëpaat ntukjotkëtakëmën (Ecl. 2:11, TY).

Salomón, yëˈë diˈib ijt mas mëkjäˈäy ets myëdäjtë madakën parë ttunët oytyim tiijëty, yˈixan pyäädan ja jotkujkˈäjtën yä naxwiiny (Ecl. 2:1-10). Kyoj mayë jëën tëjkë oyatypyë, pyëjtakë parke ets tyuun tijaty tyim tsojk. ¿Yajnayjyäˈäwë agujk jotkujk ets yaˈujts yajjotkëdakë? Ko tˈijxy tukëˈëyë tijaty nety të ttuny, ta jyënany extëm tyamë tekstë jyënaˈany. ¿Ti mdukniˈˈixëyanëp extëm jyajtyë Salomón? ¿Mˈijxkukëyaampy mjaygyukëyaampy? Koonëm näägë jäˈäy pyokytyundë ets tkuˈayowëdë, taanëm tpëktë kuentë ko diˈib të ttundë kyaj yˈoyëty. Jyobaa kyaj ttsoky ets duˈun mjatët, tsyojkypy xyjaygyukët wiˈix mˈanëˈëmxëty ets xymyëmëdowët. Parë duˈun xytyunët, tsojkëp xymyëdatëdë mëbëjkën, per ninäˈä nëjkx xykyamëkjawë ko xypyëjtäˈägëdë mwinmäˈäny parë xymyëdunëdë Dios mët ko xymyëdaty ja mëbëjkën. Jyobaa ninäˈä tkajäˈäytyëgoyaˈany ja tsojkën diˈib myaˈijxëp mët yëˈë (Eb. 6:10). Pääty, tunë mëjääw parë niˈigyë xyyajkëktëkëdë mëbëjkën. Duˈun këˈëm xyˈixët ko tukëˈëyë diˈibë Jyobaa mdukˈanaˈamëp, yëˈë parë këˈëm xytyukˈoyˈatët (Sal. 32:8). w18.12 22 parr. 14, 15

Mierkëlës 9 äämbë septiembrë

Dios xytyukˈijxëm ko niˈigyë xytsyojkëm, mët ko Jesukristë oj xykyuˈoˈkëm määnëmë nety nbojpëjäˈäyˈäjtëm (Rom. 5:8).

Tuˈugë jäˈäy diˈib ijtp oy mëdë Dios, myëbëjkypy ko tamë Dios ets yˈijxypy tijaty extëm yëˈë tˈixy. Naygyëyäjkëp parë Jyobaa tyuˈumoˈoyëdët ets të tpëjtaˈagyë wyinmäˈäny ko tmëmëdowäˈäny (1 Kor. 2:12, 13). Duˈunë David ttuuny, mä tuˈugë ëy jyënany: “Jyobaa yëˈëts ngumäˈäyënˈäjtypy”. Ko duˈun jyënany, yëˈë nety myaytyäˈägaampy ko oy mëët yˈity (Sal. 16:5). Myëjjäˈäwëbë nety ko nyaymyayëty mëdë Dios ets jamë nety myëjˈoˈkpety (Sal. 16:1). Ets pääty duˈun tkujäˈäyë mët ko jantsy jotkujkë nety nyayjyawëty. Nitii nety duˈunë jotkujkˈäjtën kyamoˈoyëty extëm ko oy yˈity mëdë Jyobaa (Sal. 16:9, 11). Pënatyë jyot wyinmäˈäny pyëjtaktëp mä xondakën o mä meeny sentääbë, kyaj mbäät nyayjyawëdë agujk jotkujk extëmë David (1 Tim. 6:9, 10). Pën mmëdäjtypy mëkë mëbëjkënë mä Jyobaa ets mmëduumpy, ta nëjkx xynyijawë ti mdunëp mä mjukyˈäjtën ets kyaj mnayjyawëdët awäˈäts tukwäˈäts. Per parë mas niˈigyë xymyëdatëdë mëbëjkën, tsojkëp xyyajnaxëdë tiempë mëdë Jyobaa. ¿Wiˈix? Ko xykyäjpxëdë yˈAyuk, ko xyˈix xytyunët tijaty të dyajkojy ets ko xypyawinmayët wiˈix jyaˈayˈaty, extëm ko mëk mtsokyëty (Rom. 1:20). w18.12 25 parr. 7, 8

Jueebës 10 äämbë septiembrë

Byeenëm miits xywyintsëˈëgëdët ja pëjk ukën (Eb. 13:4).

Pablo kyaj nety nëgoo duˈun nyajjënäˈäny, diˈibën nyiˈanaˈamë, yëˈë ets ja Dios mëduumbëty tmëjˈixtët ja pëjk ukën ets twintsëˈëgëdët. ¿Duˈun nwinmäˈäyëm mä ja pëjk ukën? Ets pën mijts të mbëjknë, ¿duˈun xyˈixy ja mtsënäˈäy mjukyˈäjtën? Pën nmëjˈijxëm ja pëjk ukën ets nwintsëˈkëm, yëˈë nety nbanëjkxëmë Jesusë yˈijxpajtën. Ko ja fariseety dyajtëëwdë Jesus pën mbäät tuˈugë jäˈäy yaˈˈajääywyaˈkxy, ta ttukmëtmaytyaky wiˈixë netyë Jyobaa të jyënaˈany ko tpëjtaky ja tim jawyiimbë kasäädë jäˈäy, jyënany: “Pääty ja yetyëjk yˈabekyë mä ja tyääk tyeety es dëˈën nyaybyuwäˈägëdë mëdë nyëdoˈoxy, es nimajtsk jyikyˈattë extëm tuˈugën jeˈeyë”. Ets yˈakjënany: “Diˈibë ja Dios të dyajnaymyukëdë, nipën tkayajwäˈxët” (Mar. 10:2-12; Gén. 2:24). Jesus jyaygyujkëbë nety yajxon ko Dios yëˈë pyëjtak ja pëjk ukën ets jyënany ko ninäˈä mbäät kyanaymyastuˈudëdë. Jyobaa kyaj tˈanmääyë Adán mëdë Eva ko mbäät yaˈˈajääywyäˈkxtë parë dyajjëjpkëxtët ja tsyënäˈäy jyukyˈäjtën. Niˈigyë ojts tˈanëëmë ets “nimajtsk jyikyˈattët” extëmxyëp tuˈuk jeˈeyë, nuˈun ja xyëëw jyukyˈäjtën. w18.12 10, 11 parr. 2-4

Biernës 11 äämbë septiembrë

Yajtëgatstë ja mjot mwinmäˈäny (Rom. 12:2, TNM).

Ko nnijäˈäwëm ja tëyˈäjtën diˈib mä Biiblyë, ta njaygyujkëm ko jëjpˈam ets nmëmëdoˈowëm tijatyë Dios nyiˈanaˈamëp. Per ko niˈigyë nmëwingoˈonëmë Jyobaa, ta niˈigyë nnijäˈäwëm wiˈix wyinmay, ti yˈoyˈijxypy ets ti kyaj, ets wiˈix tijaty tˈixy, ets nasˈijxëm parë xytyuˈumoˈoyëm mä tijaty nduknibëjtakëm ets mä tijaty ndunäˈänëm. Agujk jotkujk nnayjyäˈäwëm ko njäjtëm nwinmäˈäyëm extëmë Jyobaa, per naa tsiptakp mët ko nbokyjyaˈayˈäjtëm. Extëm nˈokpëjtakëm, mbäät xytsyiptakxëm njaygyujkëm wiˈixë Dios tˈixy ko jäˈäy tpaˈoˈktëwdë jukyˈäjt madakën, ko axëëk yˈit tsyëënëdë, ko dyajtundë neˈpyny ets wiˈix tˈixy ko nˈëwäˈkx ngäjpxwäˈkxëm. ¿Ti xypyudëkëyäˈänëm parë nwinmäˈäyëm extëmë Dios? Jëjpˈam ets nˈëxpëjkëmë Biiblyë, net njaygyujkëm wiˈixë Dios wyinmay, nbawinmäˈäyëm etsë net nmëdäjtëm ja wyinmäˈäny. w18.11 23, 24 parr. 2-4

Sääbëdë 12 äämbë septiembrë

¿Axtë näˈä mijts nˈamdow nbëjktsowëdë naybyudëkë parëts xyyaˈˈawäˈätspëtsëmët mä jäˈäy axëëk nyaytyunëdë ets kyajts xypyudëkët? (Hab. 1:2).

Mä jyukyˈajtyë Habacuc, jantsy axëëgë netyë jäˈäy yˈadëˈëtstë. Ets yëˈë jantsy määy jantsy täjpë nety mët ko niˈamukë ak axëëk yˈadëˈëtstë. ¿Näˈä nety jyëjpkëxäˈäny ja axëkˈäjtën? ¿Tiko netyë Jyobaa kyaj ti ttuny? Tyäˈädë kugajpxy yëˈëyë nety yˈijxypy ko kyaj pën yajtunyë tyëyˈäjtën ets ko jeˈeyë yaˈˈaxëktuny, ets diˈibë nety duˈun adëtstëp yëˈë ja israelitëty. Habacuc kyaj nety mbäät ti ttuny. Ko duˈun nyayjyäˈäwë, ta tmënuˈkxtakyë Dios parë pyudëkëdët. Ets waˈanë nety të wyinmay ko Jyobaa kyaj tmëjpëjtaˈaky tijaty tuun jäjtëp ets ko nëgoo tyim jajknë. ¿Të duˈun näˈä nnayjyäˈäwëm extëmë tyäˈädë kugajpxy? ¿Tëdaa netyë Habacuc dyajtëgoyë myëbëjkën mä Jyobaa ets mä ja wyandakën? Kyaj. Ko Habacuc ttukmëtmaytyakyë Jyobaa ets kyaj yëˈëjëty tuˈugë naxwinyëdë jäˈäy, yëˈë xytyukˈijxëm ko duˈunyëmë netyë Jyobaa ttukˈijxpety. Diˈibë nety myëmääy myëdajpy, yëˈë ko kyaj tjaygyukë tiko Jyobaa kyaj ti ttuny ets tiko tnaˈixy parë yˈayowët. w18.11 14 parr. 4, 5

Domingë 13 äämbë septiembrë

Katë mjikyˈaty xywyintsimy xywyinwëëny ja meeny yä naxwiiny (Mat. 6:19).

¿Ti tyuundë Pedro mëdë Andrés, diˈibë nety äjkxmäjtstëp, ko Jesus yˈanmääyë “pamiindëgëts, es ëjts miits nˈëxpëjkpëˈattëp”? Netyë tnikaktë ja yˈäjkxmäjtsn ets ojts tpanëjkxtë ja Jesus (Mat. 4:18-20). Tyäˈädë kyaj yëˈë tˈandijy ets tmastuˈuttët ja tyuunk pënaty nyijäˈäwëdëp ja tëyˈäjtën, pes tsojkëp tyundëp parë tpäättëdë myeeny syentääbë ets tˈixtët ja fyamilyë (1 Tim. 5:8). Per näˈäty, mbäät dyajtëgatstë ja jyot winmäˈäny mä wiˈix tˈixtë meeny sentääbë o ti diˈib jëjpˈam pyëjtaktëp. Min nˈokˈijxëmë yˈijxpajtënë María. Yëˈë të netyë wyinmäˈäny tpëjtaˈaky parë ttukˈëyëˈëgäˈäny ttukuyatäˈänyë golf ets tpäädäˈäny mayë meeny sentääbë. Per ta tˈëxpëjktsondakyë Biiblyë ets ta tkuytyuuntsondaky. María ta tpëjkyë kyuentë ko tsiptäˈäganxëbë nety tˈaduunmukët majtsk pëky, yˈitët oy mëdë Jyobaa ets tpanëjkxˈadëˈëtsët ja kyarreerë (Mat. 6:24). Ta tpëjtakyë wyinmäˈäny tmastuˈudäˈäny diˈibë nety të tjantsy tsyojkënyëˈaty. Tyam prekursoora tyuny ets jyënaˈany ko “agujk jotkujk jyukyˈaty ets nitii kyatëgoyˈäjtxëty”. w18.11 5 parr. 9, 10

Lunës 14 äämbë septiembrë

Jaˈa tyäˈädë ja tsajtspë, ja Mariië myäänk (Mar. 6:3).

Ko Jesus tmëdäjtyë jyëmëjt 30, ta tmastuty ja tsajts jëˈtk parë dyajtuuny ja jyukyˈäjtënë mä tnimaytyaˈaky ja Diosë Kyutujkën. Nyijäˈäwëbë nety ko yëˈë tyäˈädë tuunk diˈib mas jëjpˈam, pes jyënany ko päätyë Dios kyajxë yä Naxwiiny (Mat. 20:28; Luk. 3:23; 4:43). Yëˈë diˈib ojts tmëwiin tmëjotë mä jyukyˈäjtën ets tsyojk parë nanduˈun ttundëdë wiinkpë (Mat. 9:35-38). Kyaj niˈamukë njäjtëmë tsajts jëˈtk, per niˈamukë ngäjpxwäˈkxëm ja oybyë ayuk. Jantsy jëjpˈamë tyäˈädë tuunk, pes axtë Dios mëët nduˈunëm. Biiblyë jyënaˈany “ko yëˈë mëët nduunmujkëmë Dios” (1 Cor. 3:9, TNM; 2 Kor. 6:4). Ets nanduˈun njënäˈänëm extëm jyënany niduˈuk diˈib jyaayë Salmo: “Mä ja mˈaaw mˈayuk yajpataˈay ja tëyajtën” (Sal. 119:159, 160, TY). Pääty, tsojkëp nˈijxëm pën yajxon ndukniˈˈijxëmë jäˈäy “ja ayukë tëyˈäjtënbë” (2 Tim. 2:15). Oy ko nduˈunëmë mëjääw parë yajxon nyajtuˈunëmë Biiblyë, pes yëˈë tuˈugë tuumbajn diˈib jëjpˈam nyajtuˈunëm parë jäˈäy ndukniˈˈijxëm pënën Jyobaa, Jesus ets ja Anaˈam Kutujkën. w18.10 11 parr. 1, 2

Martës 15 äämbë septiembrë

Xypyudëkëdët diˈibë tëgoyˈäjtxëp, es xyjamyatstët ja Nintsënˈäjtëm Jesusë yˈëxpëjkën (Apos. 20:35).

Ko yetyëjk kasäädë tpaduny ja Jesukristë yˈijxpajtën, ta kyaj tsyiptakxëty ja kyudëjk wyingutsëˈëgëdët (Éfes. 5:22-25, 33). Ets pën ja kyudëjk wingutsëˈkëp, ta tjaygyukëyaˈany wiˈix ja myëmëjjäˈäy nyayjyawëty. Ko tääk teety nyaymyëjpëjtäˈägëdë, ta tmoˈoytyë oybyë ijxpajtënë ja yˈuˈunk yˈënäˈk. Per nan oy ko ttukniˈˈixëdët wiˈix mbäät tmëjpëjtäˈäktë wiink jäˈäy. Extëm nˈokpëjtakëm, mbäät tˈanëëmëdë ets kyaj pyëyëˈkmin pyëyëˈkxëptët mä nduˈukmujkëm, o ko tyunëdët tuˈugë reunyonk sosial tnaˈixtët ets jawyiinë mëjjäˈäytyëjk tˈabëkëdët ja kyaaky tyojkx. Ko tuˈugë mixyuˈunk tmäjtsˈitët ja tëjkˈagäj, mbäät nˈanmäˈäyëm ko jantsy oy ko duˈun ttuny. Duˈun ja mixyuˈunk oy nyayjyawëdët ets wyëˈëmët mä jyot kyorasoon ko “niˈigyë njotkujkˈäjtëm ko wiink jäˈäy nbudëjkëm es kyaj ko wiink jäˈäy xypyudëjkëm”. w18.09 29 parr. 5, 6

Mierkëlës 16 äämbë septiembrë

Ja Kristë, ëjë dëˈën jeˈeyë mWintsënˈäjtypy (Mat. 23:10).

Extëmë Kristë xytyuˈumoˈoyëm, xypyudëkëyäˈänëm tyam ets mä tiempë myiny kyëdaˈaky. Pääty, nˈokwinmäˈäyëm wiˈix ndukˈoyˈäjtëm ko nmëmëdoˈowëm tijaty näämnëmë Diosë kyäjpn të twijtstëgatsy. Ko nDiosˈawdäjtëm tuk familyë, ¿tiko nganimaytyakëm wiˈix të tyëgatsyë reunyonk ets mä ngäjpxwäˈkxëm, ets wiˈix xypyudëjkëm? Pën njaygyujkëm ko jantsy oy wyimbëtsëmy extëmë Jyobaa kyäjpn tnëˈëmoˈoy ttuˈumoˈoy, ta kyaj tsyiptäˈägäˈäny nbanëjkxëm ets nˈijtëm agujk jotkujk. Extëm nˈokpëjtakëm, ¿këdii oy nnayjyäˈäwëm ko Diosë kyäjpn kyaj nëgoo meeny tnekyyajtuny mä dyajpëtsëmyë ëxpëjkpajn? Ets mët ko tijaty jyembyëtsëmy, ta yajtuknijawë mas niˈigyë jäˈäy ja oybyë ayuk. Pääty , nˈokˈyajjënäjkëm mas niˈigyë ëxpëjkpajn o bideo mä telefënë o tabletë. Duˈuntsoo nety nbudëjkëmë Kristë, diˈib tsyojkypy ets nguentˈäjtëm ja meeny sentääbë diˈibë Diosë kyäjpn jyaˈäjtypy. Ko nbanëjkxëm amumduˈukjot extëmë Kristë xytyuˈumoˈoyëm, ta tyäˈtspëky ja mëbëjkën ets nˈijtëm tuˈugyë mëdë nmëguˈukˈäjtëm. w18.10 25, 26 parr. 17-19

Jueebës 17 äämbë septiembrë

Byeenëts miits ntsoktë, [...] es kyaj jyeˈeyëty nduknijawëdët ja oybyë ayuk (1 Tes. 2:8).

Pën jäˈäytsyojkëm extëmë Jyobaa, ta nëjkx xyyajtuˈunëm parë tˈatsoowëmbitëdë nyuˈkxtakën pënaty këjx tujktëp (2 Kor. 1:3-6). Kyaj nwinmäˈäyëm ko nmëguˈukˈäjtëm wyäˈätsjäˈäyëty. Pën winmäˈäyëm ko kyaj tyëgoytyë, mbäät ok axëëk nnayjyäˈäwëm ko nˈijxëm ko nan tëgooytyëp (Ecl. 7:21, 22). Oy ko nbanëjkxëmë Jyobaa yˈijxpajtën, pes yëˈë kyaj tˈawixy ets nimää ngatëgoˈoyëm. Ko duˈun nduˈunëm, ta nnaymyëmaˈkxtujkëm nixim niyam (Éfes. 4:2, 32). Kyaj yˈoyëty ndukjaygyujkëm ja nmëguˈukˈäjtëm ko kyaj nëgoo tjotmoˈoytyë Diosë tyuunk ets nan kyaj nˈijxkijpxyëm mëdë wiinkpë, net kyaj axëëk nyayjyawëdët. Niˈigyë mbäät nmëjkumäˈäyëm ko jantsy oy tijaty ttundë, duˈuntsoo agujk jotkujk tmëdundëdë Jyobaa (Gal. 6:4). w18.09 16 parr. 16, 17

Biernës 18 äämbë septiembrë

Kots ëj nduny diˈibë tsyejpy pënëts të xykyexy, ujts jotkëdakpëts extëm jyawë ngay nˈiigyëts (Fwank 4:34).

Jesus duˈun tˈijxy extëmë käˈäy ukën ko tmëmëdooyë Tyeety. Ko yajxon ngäˈäy nˈukëm, pyudëjkëp ja niniˈkx këbäjk ets agujk jotkujk xyyajnayjyäˈäwëm, nanduˈun jyaty ko nduˈunëm ti Dios tsyojkypy, yajmëktakypy ja mëbëjkën. Ko nbaduˈunëm tijatyë Dios xytyukniˈˈijxëm, duˈunë nety nˈijtëm wijy (Sant. 3:13). Mëjwiin kajaa ndukˈoyˈäjtëm ets nitii mëët kyayaˈijxkijpxyë. Biiblyë jyënaˈany: “Pën tuˈugë jäˈäy yˈëxtääyˈadëtsypy ja wijyˈäjtën duˈun jyäˈtäˈäny extëm tuˈugë ujts kepy diˈib mmooyëbë jukyˈäjtën. Ets pënaty jam naygyumäjtsëdëp agujk jotkujk nyaxäˈändë” (Prov. 3:13-18). Tëgok, duˈunë Jesus tˈanmääy ja yˈëxpëjkpëty: “Pën mjaygyujkëdëbë tyäˈädë es pën mbaduundëp, mˈittëp agujk jotkujk” (Fwank 13:17). Ja Jesusë yˈëxpëjkpëty agujk jotkujkë nety yˈitäˈändë pën xëmë myëmëdowëdë. Ets duˈunën ttuundë, tyukjukyˈäjttë ja Jesusë yˈëxpëjkën ets pyanëjkxtë ja yˈijxpajtën. w18.09 4 parr. 4, 5

Sääbëdë 19 äämbë septiembrë

Dios ojts dyajkojy yëˈë naxwinyëdë jäˈäy duˈun ojts dyajkojy ejxtëm yëˈë këˈëm yˈixëtyën (Gén. 1:27, MNM).

Adán mëdë Eva jeˈeyë nety nimajtsk yajpäättë mä ja lugäärë tsujpë, per extëmë Jyobaa myooyëdë ja anaˈamën ojtsxyëp yajwinmayëdë parë tmëmay tmëdäjtët ja yˈuˈunk yˈënäˈk. Pesë Dios të nety kyunuˈkxëdë ets të tyukˈanaˈamëdë parë nyayajnimayëdët, dyajwinduktët ja Naxwinyëdë ets tkuentˈatët (Gén. 1:28). Ets duˈun extëm Jyobaa nyaytyukjotmaytyunyëty mä ja kyojy pyëjtaˈaky, nanduˈunxyëbë Adán mëdë Eva ojts tmëmay tmëdäjtë ja yˈuˈunk yˈënäˈk parë yˈittët jotkujk. Ets parë niˈamukë ttukxondäˈäktët ja it lugäärë tsujpë, tsojkëbë nety duˈun dyajjëmbittët tukëˈëyë ja Naxwinyëdë. Kajaaduungë nety tmëdatäˈändë, pääty tsojkëbë nety tyundët niˈamukë. Nan ojtsxyëp dyajjëmbittë ja Naxwinyëdë tsuj extëmë netyë Jyobaa të ttuknibëjtäägë ets duˈunxyëp tyëjkëdë mä pyoˈkxtakn (Eb. 4:11). ¡Nˈokpawinmäˈäyëm wiˈixxyëp agujk jotkujk nyayjyäˈäwëdë koxyëp duˈun ttuundë! Ets koxyëp nyaybyudëjkëdë nixim niyam ets yˈijttë yäjkpëjäˈäy, mëjwiin kajaaxyëbë Jyobaa ojts kyunuˈkxëdë. w18.08 18 parr. 2; 19, 20 parr. 8, 9

Domingë 20 äämbë septiembrë

Yëˈë të tniwäämbety ja mduumbë rey wyindum (2 Sam. 19:27).

¿Ti mbäät nduˈunëm pën yajtukniwäämbajtëm diˈib kyaj tyëyˈäjtënëty? Wenë, Jesus mëdë Juan Yajnëbajtpë nanduˈun jyäjttë (Mat. 11:18, 19, TY). ¿Ti tyuunë Jesus? Kyaj jam ja xyëëw tiempë dyajtuuny ets ja jyot myëjääw parë nyaynyikäjpxtutë, niˈigyë tˈanmääy ja jäˈäyëty ets tˈixtët wiˈix yëˈë jyukyˈaty, tijaty tyuumpy ets tijaty tukniˈˈijxëp. Pesë Jesus jyënany: “Jää nyikëxëˈëky ja [Dios] ja wyijyˈajtën kyejyajtën ma winë yajtunyën”. ¿Ti tyäˈädë xytyukniˈˈijxëm? Ko mbäät näˈätyë jäˈäy xyˈëbat xykyäjpxpatëm o xynyimaytyakëm extëm axëëk xyyajwëˈëmëm. ¿Ti mbäät nduˈunëm? Njukyˈäjtëm tsuj yajxon extëm kyaj pën tmëbëkët wiˈix nyajnimaytyakëm. Nˈokpanëjkxëmë yˈijxpajtënë Jesus, ko njukyˈäjtëm tëyˈäjtën myëët extëm nyigëxëˈëgët ko kyaj tyëyˈäjtënëty wiˈix nyajniwäämbajtëm o nyajnimaytyakëm. w18.08 6 parr. 11-13

Lunës 21 äämbë septiembrë

Wingutsëˈëgëdë yëˈë mWintsën Diosëty, ets ëwdättë yiˈiyë tuˈugyë. Mëdundë oy yajxon (Deut. 10:20, MNM).

Biiblyë myaytyakypy ko Caín, Salomón ets ja israelitëty kyaj myëdoowdë ets ko mbäätxyëp dyajtëgäjtstë ja wyinmäˈäny ets jyodëmbijttë (Apos. 3:19). Tyäˈädë yëˈë xytyukˈijxëm ko Jyobaa yajkypyë tiempë parë njodëmbijtëm, pes nˈokjamyajtsëm ko pyokymyaˈkxë Aarón. Tyam nan xymyoˈoyëmë ëwij käjpxwijën diˈib miimp mä Biiblyë, ëxpëjkpajn o ko xykyäjpxwijëm tuˈugë nmëguˈukˈäjtëm. Ets ko nmëjpëjtakëm, ijtëm seguurë ko Jyobaa xypyaˈˈayowäˈänëm. Tam tiko Jyobaa xypyaˈˈayoˈowëm extëm kyaj xyjanitëjkëm (2 Kor. 6:1). Xymyoˈoyëm ja tiempë parë “nmastutëm ja jikyˈäjtënë axëëkpë” (Titʉ 2:11-14). Ets mientrës njukyˈäjtëm mä tyäˈädë tiempë, duˈunyëm nwinguwäˈägëyäˈänëmë jotmay diˈib xyˈijxmatsäˈänëm pën nmëduˈunëmë Dios amumduˈukjot. Pääty nˈokpëjtakëmë winmäˈäny ets nbuwäˈkëmë Jyobaa. w18.07 21 parr. 20, 21

Martës 22 äämbë septiembrë

Jyobaa yˈixyˈajtypy pënaty yëˈë jyaˈäjtypy (2 Tim. 2:19, TNM).

¿Ti mbäät nduˈunëm parë xëmë ntsojkënyëˈäjtëm etsë Jyobaa xymyëjkumäˈäyëm ets kyaj yëˈëjëtyë naxwinyëdë jäˈäy? Min majtsk pëky nˈokˈijxëm diˈib mbäät nyaˈijtëm winmäˈänyoty. Myëduˈuk, ko Jyobaa xëmë tmëjkumay pënaty mëmëdoowëp (Eb. 6:10; 11:6). Jyobaa mëj xyyajnäjxëm niduˈuk niduˈuk, ets parë yëˈë, kyaj nety ttuny ja tëyˈäjtën ko xykyamëjpëjtakëm. Yëˈë “kyëwentˈajtyp yë waˈats jaˈaytyëjk yë nyëˈë tyuˈu” ets nyijäˈäwëp wiˈix dyaˈˈawäˈätspëtsëmët (Sal. 1:6, TY; 2 Peed. 2:9). Myëmajtsk pëky diˈib mbäät njamyajtsëm, yëˈë ko Jyobaa mbäät xymyëjkumäˈäyëm extëmë nety kyaj ndimˈawijxëm. Yëˈë kyaj tkumayaˈany pënaty tyuundëbë oyˈäjtën jeˈeyë parë wiink jäˈäy yˈixëdët. ¿Tiko? Yëˈko Jesus jyënany ko yëˈë kyumäˈäyënˈäjttëp ko jäˈäy myëjkumayëdë (Mat. 6:1-5). Per nan jënan ko ja Tyeety yˈijxypy “ayuˈutsyë” pënaty tyukmëduundëbë oyˈäjtënë ja myëguˈuk ets kyaj yajmëjkumaytyë. Dios yˈijxypy tijaty tyuundëp, ets ta kyumayëdë. w18.07 9 parr. 8, 10

Mierkëlës 23 äämbë septiembrë

Diˈibë Dios të dyajwäˈätsy, katë mij xyˈandijy diˈibë yaˈˈaxëˈkëp o yajpekykyäˈäp (Apos. 10:15).

Ko duˈunë Pedro tmëdooy, kyaj tjaygyujkë ti tuun jäjtëp ets ti tukjaygyukëyanëp. Tamë nety duˈun të yaˈˈanmääytyaˈay ko jyäjttë jäˈäy diˈibë Cornelio kajxëdë. Ta Pedro ojts yajwoownëjkxy mä tyëjkë Cornelio mët ko duˈun tyuˈumooyë ja espiritë santë. Ja judiyëtëjk ninäˈä ijty tkakuˈix tkakugäjpxëdë pënaty kyaj jyudiyëty. Päätyë Pedro ninäˈäxyëp kyatëjkë mä Cornelio tyëjk, koxyëp yëˈëyë tˈijxy diˈib nikëjxy këbajky. ¿Per tiko ojts nyijkxy? Jaˈko Dios tijaty tyukˈaˈijxnäjxë ets mët ko tyuˈumooyë ja espiritë santë. Ko Pedro tmëdoowˈijtääy wiˈix ja Cornelio myëtmaytyakë, ta jyënany: “Tyamëts njaygyukë ko tëyˈäjtën ja Dios nidëgekyë jäˈäy ttsojktäˈäy, es tkupëjktäˈäy oytyim pën jäˈäyëty diˈibë wintsëˈkëdëp es [mëduunëp]” (Apos. 10:34, 35). Tyäˈädë jembyë tëyˈäjtën diˈibë Pedro jyaygyujkë, nan pudëkëyanëbë nety niˈamukë ja Dios mëduumbë. w18.08 9 parr. 3, 4

Jueebës 24 äämbë septiembrë

Axëkˈixtë diˈib axëëk (Amós 5:15).

Niˈamukë njëjpkudijëm tijatyë Dios nyigajpxy ko axëëk. Per ta diˈibë Biiblyë kyaj tnigajpxy ti mbäät nduˈunëm. ¿Wiˈix mbäät nnijäˈäwëm ti Jyobaa tsyojkypy ets nduˈunëm? Pën nasˈijxëm etsë Biiblyë twiˈtˈoy tpëjkˈoyët ja jot winmäˈäny, ta nëjkx nwinˈijxëm diˈib oy. Mët ko Jyobaa xytsyojkëm, të xymyoˈoyëm ja tyëyˈäjtën diˈib wyiˈtˈoˈoy pyëjkˈoˈoyëp ja jot winmäˈäny. Yëˈë jyënaˈany: “Ëjts, Jyobaa, ëjtsën mijts xyDiosˈäjtp, ja diˈib mdukniˈˈijxëp parë këˈëm xytyukˈoyˈatët, ja diˈib mduˈumooyëp wiˈix mbäät mnëˈëyoˈoy mduˈuyoˈoy” (Is. 48:17, 18). Ko nbawinmäˈäyëm ja Diosë tyëyˈäjtën ets ko nasˈijxëm parë xyˈadëjk xytyuktëjkëm, ta twiˈtˈoy tpëjkˈoyë ja jot winmäˈäny. Duˈuntsoo, mbäädë net xypyudëjkëm parë nwinˈijxëm diˈib oy. Mä Biiblyë kyaj jeˈeyë myinyë ley o anaˈamën, nan miimbë tëyˈäjtën diˈib mbäät xytyuˈumoˈoyëm parë nduˈunëm diˈib oy. Ko njaygyujkëmë tyäˈädë tëyˈäjtën, ta nmëwinmäˈänybyatëm wiˈixë Jyobaa wyinmay ets tiko näägë ley dyajnaxkëdaky. w18.06 17 parr. 5; 18 parr. 8-10

Biernës 25 äämbë septiembrë

¿Oyëdaa kots ngugëbattët mä yëˈë yajkutujkpë kopk, o kyajë? (Mat. 22:17).

Ja Eroodësë jyaˈayëty wyinmääytyë ko pën ja Jesus jyëjpkugäjpxëp ja kugëbety, mbäät tniwäämbattë ko kyaj tmëmëdoy ja anaˈamën diˈib Roma, ets pën jënäämp ko mbäät yajˈyaky, ta ja jäˈäyëty myastuˈudäˈänëdë. Jesus yaˈijxë ko kyaj ttuktëkë tyäˈädë jotmay, pes nyijäˈäwëbë nety ko nimay ja yajkugëbajtpëty kyaj ttundë tëyˈäjtën, per kyaj yëˈë tˈijxy. Jamë wyinmäˈäny tpëjtaky mä ja Diosë yˈAnaˈam Kyutujkën, diˈib jyantsy yaˈoyëyaampy ja amay jotmay. Duˈuntsoo tpëjtaky tuˈugë ijxpajtën diˈib mbäät niˈamukë nbanëjkxëm. Ninäˈä kyaˈoyëty nduktëjkëmë politikë oy jyakëxëˈëky ko oy diˈib tyunandëp. Ëtsäjtëm, yëˈë jawyiin nbëjtakëm ja Diosë yˈAnaˈam Kyutujkën ets kyaj nbuˈëˈëw nbukäjpxëm ja diˈib tyuundëp tijaty tëyˈäjtën myëët ets ja diˈib kyaj (Mat. 6:33). Mayë Jyobaa tyestiigëty të tmastuˈuttë ja politikë winmäˈäny diˈibë nety myëdäjttëp. w18.06 6 parr. 9-11

Sääbëdë 26 äämbë septiembrë

Ja Diosë tëyˈäjtënbë yˈuˈunk yˈënäˈk ogäˈän tpëjktë kuentë ko ja naxwinyëdë jäˈäyë nyëëxëty jantsy oy jantsy tsujjëty (Gén. 6:2).

Waˈanë Satanás kyaj yëˈëyë ttukwinˈëˈëny ja anklëstëjk parë yˈit tsyëënëdët mët ja toxytyëjkëty, nanduˈunën tˈanmääy ko mbäät tˈanaˈamdë naxwinyëdë jäˈäy. Ets waˈan duˈun tjëjpkuwäˈägëyany parë kyaj jyäˈtët ja toxytyëjkë “tyëëm yˈääts” diˈibë netyë Dios të twandaˈaky (Gén. 3:15). Perë Jyobaa, ta dyajmiiny ja Ayoˈonduu ets dyajmäˈtääy diˈibë netyë Satanás të ttukniwinmayë mët ja dyemonyëtëjk. Tsojkëp nnaygyuentˈäjtëm parë kyaj Satanás xyyajkäˈäjëm mä axëëkpë ijt tsënaaky ets mä mëjˈat këjxmˈat. Ja anklëstëjk diˈib pyuwäˈkëdë Satanás, jantsy kanäk jëmëjtë netyë Jyobaa të tmëdundë. Ojts tnasˈixëdë nimay ets ja axëëkpë tsojkën myëjwindëkët mä jyot wyinmäˈäny. Ëtsäjtëm, nan mbäät xytyukmiˈinëm ja axëëkpë tsojkën ets myëjwindëkët mä jot winmäˈäny, oy kujk kanäk jëmëjt ndukˈijtëm ja Diosë kyäjpn (1 Kor. 10:12). Pääty jyëjpˈamëty ets janääm jatsojk nmëmäˈäy nmëdäjëm wiˈix yajpäätyë jot winmäˈäny parë njëjpkudijëm ja mëjˈat këjxmˈat etsë axëëkpë tsojkën (Gal. 5:26; Kol. 3:5). w18.05 25 parr. 11, 12

Domingë 27 äämbë septiembrë

Ndimmëdäjttiibyëts ja amay jotmay (Rom. 9:2).

Pablo jyäˈäwë ko nimay ja judiyëtëjk kyaj tkupëjktë ja oybyë ayuk, per ninäˈä kyaˈëxtëkëwaˈky. Pes ko tiempë nyajxy, ojts tnigajpxy mä ja neky diˈib tyuknijäˈäyëdë ja Dios mëduumbëty diˈib Roma wiˈixë nety wyinmay mä ja judiyëtëjk, jyënany: “Diˈibëts sitëy njantsytsyejpy amumduˈukjot es nˈamdoy nbëjktsoyëts ja Dios, jaˈa dëˈën es ja israelitëty nyitsoˈoktët. [...] Yˈawdatandëp ja Dios, per kyaj tjaygyukëdë ti Dios tsyejpy” (Rom. 10:1, 2). Pablo duˈunyëm ojts ttukmëtmaytyaˈaky ja Diosë yˈayuk, mët ko jyantsy tsyojkënyëˈäjt amumduˈukjot ets ja judiyëtëjk tpäättët ja nitsokën (Rom. 11:13, 14). Yˈamdoow pyëjktsoowë Dios parë tpudëkët ja judiyëtëjk ets tkupëktët ja oybyë ayuk. Ets yˈakjënany ko ja judiyëtëjk “yˈawdatandëp ja Dios”. Pablo yˈijx ja oyˈäjtën diˈibë nety niduˈuk niduˈuk ja jäˈäy myëdäjtëp. Nan nyijäˈäwëbë nety ko mbäät ja judiyëtëjk tmëbëktë Kristë mët ko jyantsy awdatandëbë Dios duˈun extëm yëˈë. w18.05 13 parr. 4; 15, 16 parr. 13, 14

Lunës 28 äämbë septiembrë

Käjx matyäˈäktë diˈibë yajmëjwiin yajkajaajëp ja myëbëjkën pënëty myëdoodëp, es ttukˈoyˈatët (Éfes. 4:29).

Niˈamukë mbäät nˈijxëm tijaty yajtëgoyˈäjttëbë nmëguˈukˈäjtëm. Pablo duˈun tˈanmääy ja myëguˈuktëjk diˈib käjpxtëp ebreo: “Yajmëkpëktë ja këˈë diˈib tëëynyaapy, ets ja kox diˈib kyaj myëkëty, ets yajtëwdë ja nëˈë tuˈu parë mdekyëty, net ja tekymyäˈät kyaj yˈadonët ja tyeky, niˈigyë yˈagëdäˈägët” (Heb. 12:12, 13, TNM). Axtë ënäˈktëjk, mbäät tmëjääwmoˈoytyë nmëguˈukˈäjtëm. Pablo duˈun dyajkyë käjpxwijën: “Pën mjotmëkmooyëdëp ja Kristë, pën myajjotkujkˈäjtëdëp jaˈagyëjxm ko mtsokëdë, pën ja espiritë santë mëët mˈittë, es pën mbaˈˈayoodëp ja jäˈäyëty, mdundëp wiˈixëts ëj nˈit nxonët jotkëdaˈaky jaˈagyëjxm ko tiˈigyë ja winmäˈäny xymyëdattë, tiˈigyë mnaytsyokëdë nixim niyam, tiˈigyë mnayjyawëdë es tiˈigyë mjot mjäˈäjënëty. Diˈibë mdundëp miitsëty mä mjikyˈattë, nitii xykyatundët diˈibë jeˈeyë këˈëm xytyukˈoyˈattët o mnaymyëjpëjtäˈägëdët mët ja wiingatypyë, naybyëjtäˈägëdë yuunk naxypy, es xyjawët ko myëjjëty ja wiingatypyë es këdiinëm miitsëty këˈëm. Waˈan niduˈuk niduˈuk miits tˈëxtäˈäytyë ja diˈibë tyukˈoyˈattëp ja wiinkpëty, kyaj jeˈeyë diˈibë këˈëm mdukˈoyˈattëp” (Filip. 2:1-4). w18.04 22 parr. 10; 23 parr. 12

Martës 29 äämbë septiembrë

Nigutiky esëts oytyiity ndunët diˈibëts ntsejpy; per kyaj tëgekyë ttukˈoyˈatët, [...] es jyikyˈattët extëmë Dios ttseky (1 Peed. 2:16).

Jyobaa ojts xyyaˈˈawäˈätspëtsëˈëmëm mä nety xytyuumbëˈäjtëm ja poky etsë oˈkën mët yëˈëgyëjxmë Jesus parë nyajtuˈunëmë jukyˈäjtën mä tyuunk. Tuk pëky wiˈix mbäät mas oy nyajtuˈunëm ja awäˈätstumˈäjtën, yëˈë ko nyajtuˈunëm ja jot mëjääw ets ja xëëw tiempë mä Jyobaa tyuunk. Net kyaj nbaˈoˈktëˈëwëm tijaty jaˈäjtp yä naxwiiny o tijaty ntsojkënyëˈäjtëm (Gal. 5:16). Min nˈokjamyajtsëm ti tyuundë ja Noé mëdë fyamilyë. Jamë nety jyukyˈattë mä jäˈäy axëëk yˈit tsyëënëdë ets nyayaˈook nyayajtëgoyëdë, per kyaj duˈun jyukyˈäjttë extëm ja jäˈäyëty. ¿Ti pudëjkëdë? Ko jamë wyinmäˈäny tpëjtaktë mä tijatyë Jyobaa tukˈanaˈamëdë: ojts tkojtë ja arkë, dyajmujktë ja jeˈxy pëky parë yëˈëjëty ets parë ja jëyujk animal ets ttukˈawäˈänëdë jäˈäy ko nety myiny ja kutëgoˈoyën. Biiblyë jyënaˈany: “Noé ta ttuuntsondaky tukëˈëyë extëmë netyë Dios të tyukˈaneˈemyëty. Duˈunën meerë ttuuny” (Gén. 6:22). Pääty nyitsoktë mët ja fyamilyë (Eb. 11:7). w18.04 10 parr. 8; 11 parr. 11, 12

Mierkëlës 30 äämbë septiembrë

Ëjts mij nmoˈoyëp ja kutujkën esë mëjˈäjtën mä tëgekyë naxwinyëdë diˈibë ndukˈijxypy. Ëjts tëgekyë nyajmooy, es mbäädëts nmoˈoy diˈibëts ëj ntsejpy (Luk. 4:6).

Satanás mëdë kyaˈoybyëtëjk kyaj yëˈëyë dyajtundë gobiernëtëjk parë twinˈëëndë “nidëgekyë ja naxwinyëdë jäˈäy”, nan yajtuundëbë relijyonk diˈib kyaj tyëyˈäjtënëty etsë meeny wyinmäˈäny (Diˈibʉ Jat. 12:9). Satanás nyiwäämbejtypyë Jyobaa, ets yëˈë yajtuumbyë relijyonk diˈib kyaj tyëyˈäjtënëty. Ets të ttuknibëjtäägë parë jäˈäy ttukjäˈäytyëgoyaˈanyë Diosë xyëëw nuˈun tmëmadaˈaky (Jer. 23:26, 27). ¿Ets wiˈixë net wyimbëtsëmy? Pes nimayë jäˈäy wyinmaytyë amumduˈukjot ko yëˈë yˈawdäjttëbë Dios, per yëˈë yˈawdäjttëbë kaˈoybyëtëjk (1 Kor. 10:20; 2 Kor. 11:13-15). Satanás nan yajtuumbyë meeny wyinmäˈäny parë dyajwaˈkxyë wiingatypyë anëë. Extëm nˈokpëjtakëm, tyukmëbëjkypyë jäˈäy ko parë yˈitët agujk jotkujk, tsojkëp tmëdatët mayë meeny sentääbë etsë jukyˈäjt madakën (Prov. 18:11). Pënaty myëbëjktëbë tyäˈädë anëë, jamë netë jyot wyinmäˈäny tpëjtäˈäktë ets ja jyot myëjääw “mä ja meeny” en lugäär mä Jyobaa (Mat. 6:24). Ko ttsoktë niˈigyë ja mëkjäˈäyˈäjtën, ta xyaˈamnëdë ja tsyojkën diˈib myëdäjttëp mä Dios (Mat. 13:22; 1 Fwank 2:15, 16). w18.05 23 parr. 6, 7

    Ayuk ëxpëjkpajn (2004-2025)
    Yaˈˈadukë mguentë
    Tëkë mä mguentë
    • ayuk
    • Mbäädë wiinkpë xytyuknigexy
    • Configuración
    • Copyright © 2025 Watch Tower Bible and Tract Society of Pennsylvania
    • Wiˈix mbäät jeˈeyë tyuny
    • Wiˈix yajkuwäˈäny
    • Ix pën mgupëjkypy
    • JW.ORG
    • Tëkë mä mguentë
    Mbäädë wiinkpë xytyuknigexy