Febreerë
Martës 1 äämbë febreerë
Naybyëjtäˈägëdë yuunk naxypy, es xyjawët ko myëjëty ja wiingatypyë es këdiinëm miitsëty këˈëm (Filip. 2:3).
Mbäät nbanëjkxëmë Jyobaa yˈijxpajtën ko nduˈunëmë mëjääw parë njaygyujkëm wiˈix nyayjyawëdë ja nmëguˈukˈäjtëm. Pääty, nˈokˈixyˈäjtëm yajxon. Nˈokmëtkäjpx nˈokmëtmaytyakëm mä kyatsondaˈakynyëmë reunyonk ets mä të kyëjxnë, nˈokkäjpxwäˈkxëm mëët, ets pën mbäät, nˈokwoˈowëm kaabyë. Ko duˈun nduˈunëm, waˈan nëjkx nbëjkëmë kuentë ko tuˈugë nmëguˈukˈäjtëm diˈib nˈijxëm ko kyaj pën ttunyë kuentë, päätyën duˈun kyëxëˈky mët ko wyintsoytyuˈunëty, o ko tuˈugë nmëguˈukˈäjtëm diˈib myëdäjtypy mayë meeny sentääbë, kyajtëm yëˈë tpaˈoˈktëy, niˈigyëdëm yˈoyjyaˈaytyaˈaky, o ko tuˈugë familyë diˈib xëmë ok jäjtp mä reunyonk, yajtukmëtsipˈäjtptëm mä jyëën tyëjk (Job 6:29). Tëyˈäjtën ko kyaj mbäät nduktëjk ndukwäˈkëm diˈib kyaj xypyatëm (1 Tim. 5:13). Per oy ko nˈixyˈäjtëm wanaty ja nmëguˈukˈäjtëm ets wiˈix të yaak të pyattë parë nnijäˈäwëm tiko duˈun jyaˈayˈattë. Ko nˈixyˈäjtëm niˈigyë tuˈugë nmëguˈukˈäjtëm diˈib jeˈeyë xyaˈˈawandäˈägäˈänëm, mbäät xypyudëjkëm parë njaygyujkëm tiko duˈun jyaˈayˈaty. Tsiptakp duˈun nduˈunëm. Per ko nbanëjkxëm ja käjpxwijën diˈib yajpatp mä Biiblyë mä jyënaˈany ets nyaˈˈawatsëm ja jot korasoon, yëˈë nety nbanëjkxëmë yˈijxpajtënë Jyobaa, diˈib tsyojkypy “nidëgekyë” jäˈäy (1 Tim. 2:3, 4; 2 Kor. 6:11-13). w20.04 paj. 16, 17 parr. 10-12
Mierkëlës 2 äämbë febreerë
Diˈibë kyuˈoogëp ja myëtnaymyaayëbëty, yëˈë dëˈën yaˈijxëp ko myëjëty ja tsojkën tmëdaty (Fwank 15:13).
Jakumbomë netyë Jesus yˈooganë ko ttukjamyejtsy ja yˈëxpëjkpëty ets nyaytsyokëdët nixim niyam. Jesus nyijäˈäwëbë nety ko yëˈë diˈib pudëkëyanëdëp parë nyayaˈitëdët tuˈugyë ets tmëmadäˈäktët ko ja naxwinyëdë jäˈäy yˈaxëkˈixëdët. Nˈokwinmäˈäyëm ja kongregasionk diˈib Tesalónica, desde ko nyaxkëdaky, yajpajëdijttë ja nmëguˈukˈäjtëm. Per ja Dios mëduumbëty yäjktë ja ijxpajtën ko dyaˈijxëdë tsojkën ets ko myadaktë (1 Tes. 1:3, 6, 7). Pablo yˈanmääyëdë ets “waanë niˈigyë” dyaˈixëdët ja tsojkën (1 Tes. 4:9, 10). Ja tsojkën, yëˈë nety pudëkëyanëdëp parë tmëjääwmoˈoytyët ja diˈib kumoon kudujkëdëp, ets tpudëkëdët ja diˈibë yaˈˈayow yaˈˈamäˈät yajpattëp (1 Tes. 5:14). Tyäˈädë Dios mëduumbëty jyaygyujkëdë extëmë Pablo yˈanmääyëdë. Pääty kyum jëmëjt, ta yaˈˈanmääytyë mä ja myëmajtskpë neky: “Mëjwiin kajaa yëˈë mmëbëjkënëty esë mtsojkënëty diˈibë miits mmëdäjttëp mët ja wiinkpëty” (2 Tes. 1:3-5). Ko tmëdäjttë ja tsojkën, yëˈë pudëjkëdë parë tmëmadaktë ja amay jotmay ets ko yajnibëdëˈktë. w21.03 paj. 22 parr. 11
Jueebës 3 äämbë febreerë
Nˈokpayëˈkëm mëk mä tadë pëyëˈkkijxyëk diˈibë nmëdäjtëm winduuy (Eb. 12:1).
Pën nˈaxäjëyäˈänëm ja premië, jaˈa njënäˈänëm, ja jukyˈäjtën diˈib winë xëëw winë tiempë, tsojkëp njukyˈäjtëm extëm yajniˈanaˈamë jyukyˈatët tuˈugë Dios mëduumbë (Hech. 20:24, TNM; 1 Peed. 2:21). Perë Satanás mëdë jyaˈay xytyukjëjpëˈyëˈktuˈudäˈänëmë tyäˈädë tuˈu ets tsyojktëp parë mëët nbëyëˈkëm (1 Peed. 4:4). Jeˈeyë tnëxiˈik ttukxiˈiktë wiˈix ëtsäjtëm nyajnëjkxëmë jukyˈäjtën ets jyënäˈändë ko mas oy extëm yëˈë jyukyˈattë mët ko awäˈätstum yajpäättë. Perë tyäˈädë kyaj tyëyˈäjtënëty (2 Peed. 2:19). Jëjpˈam parë kyaj nmäjtsëmë wiink nëˈë wiink tuˈu. Perë Satanás xytyukjëjpëyëˈktuˈudäˈänëm ja nëˈë tuˈu diˈib yajnëjkxp mä “jikyˈäjtënë winë xëë winë tiempë” ets tsyojkypy parë yëˈë nmäjtsëm ja mëj tuˈu mä nimayë jäˈäy nyëjkxtë. Tyäˈädë mëj tuˈu kyaj tsyipëty, per yajjäˈtäˈäny “mä ja kutëgoˈoyën” (Mat. 7:13, 14). Pääty, tsojkëp ndukˈijxpajtëmë Jyobaa ets nmëdoowˈijtëm wiˈix xyˈanmäˈäyëm parë kyaj xytyukjëjpˈyeˈeytyutëmë tyäˈädë tuˈu pënaty kyaj tmëmëdowdë Jyobaa yˈanaˈamën. w20.04 paj. 26 parr. 1; paj. 27 parr. 5, 7
Biernës 4 äämbë febreerë
Tim jëjpˈam nmënuˈxtaktëp esë jäˈäy tniˈamdowëdët, tnigäjxtäägëdët nidëgekyë jäˈäyëty [...], es dëˈën mbäät njikyˈäjtëm yajxon es nipën mëët ngatsiptuˈunëm, es nduˈunëm ja oybyë es njikyˈäjtëm extëm ja Dios ttseky (1 Tim. 2:1, 2).
Tyää näämnëm, Rusia mët kanäägë paˈis diˈib puwäˈkëdëp nan të tnidëkëdë “ja Tsujpë Naxwinyëdë” (Dan. 11:41). ¿Wiˈix? Mä jëmëjt 2017, të dyajkuboky ja tuunk diˈib tyuundëbë Jyobaa tyestiigëty ets të ttsum tmatstë ja nmëguˈukˈäjtëm. Nan të dyajkubokyë ëxpëjkpajn extëmë Traducción del Nuevo Mundo, ets të tˈawindumbëkyë Betel diˈib Rusia, ja Tëjk mäjaty nˈëxpëjkëm ets mä tyunyëtyë asamblee. Ko duˈun të yˈadëˈëtsyë Rusia, ta mä jëmëjt 2018, Diˈib Wyoowˈyoˈoytyëbë Jyobaa tyestiigëty të jyënäˈändë ko Rusia mëdë gobiernëtëjk diˈib puwäˈkëdëp, yëˈë duˈun ja reyë anikëjxytsyoobë. Per ninuˈun nmëduˈunëmë Jyobaa kyaj ntsiptuˈunëm mët nituˈugë gobiernë ets nan kyaj nyajnitëgatsäˈänëm oyxyëp axëëk xyjyatuˈunëmbë. Niˈigyën nbanëjkxëm ja käjpxwijën diˈib jënäämp ets ninuˈkxtakëm “nidëgekyë reyëty es nidëgekyë justisëty”, ets mas niˈigyë ko nety dyajwingëdäˈägäˈändë pën xyˈakmoˈoyäˈänëmë awäˈätstumˈäjtën parë nmëduˈunëmë Jyobaa (1 Tim. 2:1, 2). w20.05 paj. 14 parr. 9
Sääbëdë 5 äämbë febreerë
Mnaygyuentˈatëdëp këˈëm ets mëk xykyuentëˈatëty mëdiˈibë jäˈäy mdukˈëxpëjkypyën (1 Tim. 4:16, TY).
Tääk teety, parë mˈuˈunk mˈënäˈk yˈittët seguurë ko tëyˈäjtën tijaty myëbëjktëp, tsojkëbën këˈëm dyajkëktëkëdët ja nyaymyayë mëdë Jyobaa ets yˈittët seguurë ko Biiblyë yëˈëdën myëmiimpy ja tëyˈäjtën. Pën miitsëty uˈunktääk uˈunkteety mdukniˈˈixëyandëbë mˈuˈunk mˈënäˈk ja tëyˈäjtën mä pënën Jyobaa, tsojkëbën xymyoˈoytyëdë oybyë ijxpajtën ko miitsëty xyˈëxpëktëdë Biiblyë. Juuttë tiempë parë xypyawinmaytyët tijaty mˈëxpëjktëp. Ko duˈun xytyunët, ta nenduˈun ja mˈuˈunk mˈënäˈk ttunäˈändë. Tukniˈˈixëdë wiˈix dyajtundëdë naybyudëkëdë diˈib nmëdäjtëm parë nˈëxpëjkëm, duˈun extëm xytyukniˈˈixëdë pënaty myaˈëxpëjktëp. Duˈuntsoo nëjkx xypyudëkëdë mˈuˈunk mˈënäˈk parë ttsoktëdë Jyobaa ets ttukjotkujkˈattët ja tuumbë diˈib kuwijy diˈib yajtuumpy parë njaygyujkëmë Biiblyë (Mat. 24:45-47). Tääk teety, këdii jeˈeyë xytyukniˈˈixëdë ja mˈuˈunk mˈënäˈk ja tëyˈäjtënë wingëjxyatypyë. Pudëkëdë parë tnijawëdët “ja këkpë nimëjääbë wyinmäˈäny ja Dios”, duˈun extëm ja xyëëw jyëmëjt tmëdattë ets ja wyijyˈäjtën, duˈuntsoo nëjkx tmëdattë mëk ja myëbëjkën (1 Kor. 2:10). w20.07 paj. 11 parr. 10, 12; paj. 11 parr. 13
Domingë 6 äämbë febreerë
Jyobaa yˈaxëkˈijxypy diˈib axëkjäˈäy, per jantsy oy mëët nyaymyayëty diˈib tyuumbyë tëyˈäjtën (Prov. 3:32).
Miyonkˈam tyamë naxwinyëdë jäˈäy nyaymyaayëdë mëdë Jyobaa, oy pokyjyaˈay yajpäättë. Mbäät nmëtnaymyaayëbëˈäjtëmë Jyobaa ko nmëbëjkëmë Jesus ko yëˈë diˈib ojts xyjyuuybyëtsëˈëmëm. Ets mët ko Jesus ojts xykyuˈoˈkëm, mbäädë net nnaywyandakëm mä Jyobaa ets nnëbajtëm. Ko duˈun nduˈunëm, ta net nbuwäˈkëm ja miyonkˈambë nmëguˈukˈäjtëm diˈib të nyaywyandäˈägëdë, të nyëbattë ets diˈib naymyaayëndëp mëdë Jyobaa. ¿Wiˈix mbäät nyajnigëxëˈkëm ko nmëjjäˈäw ngunuˈkxyjyäˈäwëm ko nmëtnaymyaayëbëˈäjtëmë Jyobaa? Ko nbanëjkxëmë yˈijxpajtënë Abrahán mëdë Job, diˈib Dios mëduundë naxy tuk mëgoˈpx jëmëjt ets ninäˈä tkamastuttë. Ëtsäjtëm nan mbäät nmëduˈunˈadëtsëmë Dios mä tyäˈädë tiempë diˈib jëjpkëxanëp, oy nuˈun jeky kujk nmëduˈunënë. Nan mbäät nbanëjkxëmë yˈijxpajtënë Daniel diˈib mas niˈigyë yajtsobat ko nyaymyaayë mëdë Jyobaa ets kyaj dyuˈunëty ja jyukyˈäjtën (Dan. 6:7, 10, 16, 22). Mëdë Jyobaa nyaybyudëkë, mbäät nmëmadakëm oytyim ti jotmayëty ets duˈunyëm mëët nnaymyaˈayëm (Filip. 4:13). w20.05 paj. 27 parr. 5, 6
Lunës 7 äämbë febreerë
Yajtuˈugyëtsë ngorasoon (Sal. 86:11).
Rey David tamë nety yˈijxkeˈeky tyëjknikëjxy ko tˈijxy tuˈugë toxytyëjk kasäädë tsyiˈiy. David nyijäˈäwëbë nety ko Jyobaa yˈanaˈamën duˈun jyënaˈany: “Këdii xyˈatsojkëty yëˈë mëguˈuk [...] yëˈë tyoˈoxytyëjk” (Éx. 20:17, MNM). Per duˈunyëm tˈijxˈadëtsy ja toxytyëjk, ets ta ja kyorasoon ojts nyaywyaˈkxyëty. Tsyojkypyë nety ja toxytyëjk, per nan jyatunaambyë nety ti Jyobaa tyukjotkëdakypy. David, yëˈë naytyukmëmadakë ti nety yëˈë tsyojkypy, oyë nety jeky të dyajnigëxëˈëky ko tsyojkypyë Jyobaa ets ko tsyëˈkëp. ¿Wiˈixë net wyimbëtsëëmy? Tyuun tijaty kyaj yˈoyëty, yajnibaxëtëjkë Diosë xyëëw ets yaˈˈayoow ja jäˈäyëty diˈibë nety kyaj ti të ttuundëgoytyë axtë ja fyamilyë (2 Sam. 11:1-5, 14-17; 12:7-12). Jyobaa jyëjwijtsëmbijtë David ets ta jatëgok oy mëët yˈijty (2 Sam. 12:13; Sal. 51:2-4, 17). David ninäˈä tkajäˈäytyëgooy wiˈix tkuˈayoˈowë ets wiˈix tpaty ja amay jotmay mët ko ja kyorasoon ojts nyaywyaˈkxyëty. Extëm jyënany mä Salmo 86:11 nan mbäät duˈun yajkäjpxnaxy: “Mmoogyëts tuˈugë korasoon diˈib amuum”. ¿Ojtsëdaa Jyobaa yˈatsoowëmbijtxëtyë nyuˈkxtakën? Ojts, pesë Biiblyë yˈakjënäˈäny ko David “myëduunë Jyobaa Dios amumduˈukjot” (1 Rey. 11:4; 15:3). w20.06 paj. 11 parr. 12, 13
Martës 8 äämbë febreerë
Mëët ja tsojkën jäˈäwën nyajmiindëts mäts ëjtsën (Os. 11:4, TY).
Biiblyë jyënaˈany ko pääty nmëwingoˈonëmë Jyobaa mët ko xytsyojkëm. ¿Wiˈixën duˈun ttuny? Min nˈokpëjtakëm tuˈugë ijxpajtën. Okpawinmay ko mgënaxy mä tuˈugë jut diˈib jantsy këk ets kyaj mbäät këˈëm mbëtsëmy. Parë mbëtsëmët, tsojkëp pën tkuwëjnaxët tuˈugë tejpxyny etsë net mjuudëdët. Duˈun extëm jyënaˈanyë tekstë diˈib tyam, Jyobaa duˈun tˈanmääy ja israelitëty diˈibë nety të myëjagamgaˈagëdë mëdë tsojkën ‘nyajmiindëts mäts ëjtsën’. Jyobaa nenduˈun tyam tjawë pënaty të myëjagamgaˈagëdë, pes duˈun yajpäättë extëmxyëp të kyënaxtë jutoty ets jap yajjiˈkxäˈänëdë ja yˈamay jyotmay. Jyobaa pyudëkëyaampy parë jatëgok jyëmbittët ets tyuknijawëyaampy ko tsyojktëp. Ets mbäät ëtsäjtëm xyajtuˈunëm parë tyäˈädë nmëguˈukˈäjtëm tˈixtët ko tsojkëdëbë Jyobaa. Jëjpˈam ets xëmë nˈanmäˈäyëm pënaty të jyagamgaˈaktë ko tsojkëdëbë Jyobaa ets ko ëtsäjtëm nan ntsojkëm. w20.06 paj. 27 parr. 12, 13
Mierkëlës 9 äämbë febreerë
Jotkujk ja jäˈäy ko dyajnaxy ja ayoˈon mët ja maˈxtujkën (Sant. 1:12).
Näämnëmë netyë Santiago tmëbëkyë Jesus ko yajnibëdëˈktë ja ëxpëjkpëty jam Jerusalén (Apos. 1:14; 5:17, 18). Ets ko Esteban yaˈoˈkë jäˈäy, ta nimay ja ëxpëjkpëtëjk kyaktääytyë Jerusalén “es nyaywyäˈxtääyëdë mä nyaxëtyë Judeeë esë Samaaryë”, ets nääk axtë jäjttë Chipre ets Antioquía (Apos. 7:58–8:1; 11:19). Tsip nbawinmäˈäytyaˈayëm ja amay jotmay diˈib wyinguwäˈkëdë ja ëxpëjkpëtëjk. Per duˈunyëm ojts jyantsy yˈëwäˈkx jyantsy kyäjpxwäˈkxtë mä ojts nyëjkxtë ets dyajnaxkëdaktë kanäägë kongregasionk nuˈun ja it lugäär diˈib nyitënaabyë Roma (1 Peed. 1:1). Per ja amay jotmay diˈib wyinguwäˈkëdë jeˈeyënëmë nety tsyondaˈaky. Pënaty tim jawyiin pyanëjkxtë Jesus, wyinguwäˈkëdë kanäk pëkyë amay jotmay. Extëm nˈokpëjtakëm, Claudio, diˈibë nety anaˈamp Roma naa jaa mä jëmëjt 50, ojts tniˈanaˈamë ets niˈamukë ja judiyëtëjk pyëtsëëmdäˈäytyët Roma. Ta kuanë ja judiyëtëjk diˈibë nety të tpanëjkxtë Jesus, tnikaktääytyë jyëën tyëjk ets ojts nyëjkxtë wiink it wiink lugäär (Apos. 18:1-3). Naa jaa mä jëmëjt 61, apostëlë Pablo tkujäˈäyë ko ja myëguˈuktëjk të nety mayjyaˈay windum yajwingäjpx yajjëjpkäpxtë, yajtsum yajmatstë ets të yajpëjkëdë tijaty myëdäjttëp (Eb. 10:32-34). Pënaty pyanëjkxtë Jesus, nenduˈun yubajt pyäˈämbajttë ets dyaˈˈamääytyaktë tijaty extëm oytyim pënëty (Rom. 15:26; Filip. 2:25-27). w21.02 paj. 26, 27 parr. 2-4
Jueebës 10 äämbë febreerë
Ja mëjkuˈugopk të mnijënakëdë awäˈän es nyijäˈäp ko tyimpatypyë dëˈën ja tiempë (Diˈibʉ Jat. 12:12).
Pën ja nmëbëjkënyëˈäjtëm mëk yajpääty, kyaj nëjkxë Satanás mëdë jyaˈay xytyukjëjpˈyeˈeytyutëm ja tëyˈäjtën (2 Fwank 8, 9). Nnijäˈäwëm ko naxwinyëdë jäˈäy xyˈaxëkˈixäˈänëm (1 Fwank 3:13). Apostëlë Juan jyënany ko “naxwinyëdë jäˈäy yajpääty mä ja axëëkpë dyajtunyë myëkˈäjtën” (1 Juan 5:19, TNM). Ets kom niˈigyë wyingoonˈadëtsnë mä jyëjptëgoyaˈanyë tyäˈädë jukyˈäjtën, päätyë Satanás mas niˈigyë jyotˈambëjknë. Kyaj yëˈëyë xytyukˈyajtëgoyäˈänëm mä jäˈäy axëëk nyaymyëtˈit nyaymyëttsëënëdë ets ko wixaty jyënäˈändë pënaty të ttukpëtsëëmduˈuttë Diosë kyäjpn, nenduˈunënë jäˈäy xytyukmëtsipˈäjtëm ets xytyuktuˈunëm axëëk. Satanás nyijäˈäwëp ko jawaanë tiempë yˈakwëˈëmxëty, pääty nëgooyë tˈëxtääynyë winmäˈäny wiˈix mbäät dyajnëˈëˈaduky dyajtuˈuˈaduky mä nˈëwäˈkx ngäjpxwäˈkxëm ets wiˈix mbäät dyajtëgoy ja nmëbëjkënyëˈäjtëm. Pääty kyaj mëjˈixy mëjmëdoy njäˈäwëm ko mä näägë paˈis të kyubokyë Diosë tyuunk. Per ja nmëguˈukˈäjtëm diˈib tsënääytyëp mä tyäˈädë it lugäär, duˈunyëm tmëmadäˈäktë. Duˈun dyajnigëxëˈëktë ko duˈunyëm tmëdunäˈändë Jyobaa, oy ti Satanás ttunët. w20.07 paj. 24 parr. 12, 13
Biernës 11 äämbë febreerë
Dios nadëˈënyë dyaky ja jikyˈäjtënë winë xëë winë tiempë mët jaˈagyëjxm Nintsënˈäjtëm Jesukristë (Rom. 6:23).
Jyobaa tsyojk etsë naxwinyëdë jäˈäy jyukyˈattët winë xëëw winë tiempë mä ja lugäärë tsujpë diˈibë nety të dyajkojy. Per ko Adán mëdë Eva tmëbokytyuundë Jyobaa, ta kyaj mbäät nyekyjyukyˈäjttë winë xëëw. Ets ko ja tiempë tpaty, ta ojts yˈoˈknëdë ets nenduˈun ja yˈuˈunk yˈënäˈk (Rom. 5:12). ¿Ti net tyuunë Jyobaa? Netyë ojts tnigajpxy wiˈix dyaˈˈawäˈätspëtsëmäˈänyë naxwinyëdë jäˈäy (Gén. 3:15). Jyobaa, ta ttuknibëjtakë ko tkaxäˈänyë Jesus parë yajjuuybyëtsëmët ja yˈuˈunk yˈënäˈkë Adán mëdë Eva mä ja poky kaytyey ets mä oˈkën. Duˈuntsoo pënaty myëduundëbë Dios, mbäädë nety tˈaxäjëdë ja jukyˈäjtënë winë xëëbë (Fwank 3:16; 1 Kor. 15:21, 22). Mët yëˈëgyëjxmë Jesus, Jyobaa dyajjukypyëkäˈäny miyonkˈamë jäˈäy. Per kyaj tuktonyë pyëdëˈëgäˈändë. ¿Tiko? Yëˈko pën tuktonyë jyukypyëktë, ta pojën ja Naxwinyëdë yˈujtspatäˈäny. Etsë Jyobaa tukniwits tuknimäˈkxë tijaty ttuny. Pes nyijäˈäwëp ko tsojkëp duˈun ttunët parë jäˈäy tuˈugyë yajpäättët (1 Kor. 14:33). w20.08 paj. 14 parr. 3; paj. 15 parr. 5
Sääbëdë 12 äämbë febreerë
Mëk xykyuentëˈatëty mëdiˈibë jäˈäy mdukˈëxpëjkypyën (1 Tim. 4:16, TY).
Ja jäˈäy diˈib nyaˈëxpëjkëm, tsojkëp tjaygyukët ko pääty nyaˈëxpëjkëm parë tmëdunëdë Jyobaa ets Tyestiigëˈatët. Taaˈäjtp kanäk pëky diˈib mbäät ttuny ja jäˈäy diˈib nyaˈëxpëjkëm parë nyëbatët. Tuk pëky, tsojkëp tˈixyˈatëdë Jyobaa, ttsokët ets tmëbëkët (Fwank 3:16; 17:3). Ta net mëdë Jyobaa nyaymyaaybyëkëdët ets nenduˈun ja nmëguˈukˈäjtëm diˈib mëët nduˈukmujkëm (Eb. 10:24, 25; Sant. 4:8). Nan tsojkëbë net tmastuˈudët ja axëkˈäjtën diˈib tyuumpy ets jyodëmbitët mä ja pyoky kyaytyey (Hech. 3:19, TNM). Ta net ttukmëtmaytyäˈägëdë jäˈäy tijaty myëbëjkypy (2 Kor. 4:13). Ets ok, ta net nyaywyandäˈägëdët mä Jyobaa ets nyëbatët parë dyaˈixëdët ko të nyaywyandaˈagyëty (1 Peed. 3:21; 4:2). Jantsy jotkujk nnayjyäˈäwëm niˈamukë ko ttukjäˈtyë tyäˈädë xëëw. Ko nˈijxëm wiˈix ja jäˈäy diˈib nyaˈëxpëjkëm ttuny wanaty wanaty diˈib yä të yajnigajpxy, nˈokˈanmäˈäyëm ko jantsy oy duˈun ttuny ets nˈokpudëjkëm parë wyimbajtˈadëˈëtsët. w20.10 paj. 17, 18 parr. 12, 13
Domingë 13 äämbë febreerë
Nˈokpëjtakëm kooxyëp ja teky jyënaˈany: “Mët ko kyajts ëj ngëˈëjëty, pääty kyajts ëj nyëˈëjëty ja niniˈx”, dëˈënyëm wyeˈemy es jyaˈˈatyëty ja niniˈx (1 Kor. 12:15).
Ko nnayˈijxkijpxyëm mëdë nmëguˈukˈäjtëm, mbäädë net nwinmäˈäyëm ko kyaj ntsobatëm mä Diosë kyäjpn. Ta näägë nmëguˈukˈäjtëm diˈib jantsy oy yaˈëxpëjktëp, tyukniwijtsëdëp tijaty ets diˈib jantsy oy kyuentˈäjttëp ja jyiiky myëguˈuk. Ets mbäädë net nwinmäˈäyëm ko kyaj duˈun tijaty ndimtuˈunëm extëm yëˈëjëty. Ko duˈun nwinmäˈäyëm, yëˈë xytyukˈijxëm ko yujy tudaˈaky njäˈäyˈäjtëm (Filip. 2:3). Per nˈoknaygyuentˈäjtëm, pes ko xëmë nnayˈijxkijpxyëm mëdë nmëguˈukˈäjtëm diˈib myëdäjttëbë wijyˈäjtën, mbäät xyaˈëxtëkëwäˈkëm. Ets extëmë apostëlë Pablo jyënany, mbäädë net axtë nwinmäˈäyëm ko kyaj tii naybyudëkë nyäjkëm mä nduˈukmujkëm. Nˈokpawinmäˈäyëmë tyäˈädë: pënaty pyanëjkxtë Jesus mä primer siiglë, tam nääk diˈibë Jyobaa ojts myoˈoyëdë madakën mët yëˈëgyëjxmë espiritë santë parë ttundët tijaty mëjˈäjtëngyëjxm, per wiˈixëm ja madakën diˈib yajmooytyë (1 Kor. 12:4-11). Tuˈuk tuˈuk Dios mëduumbë niˈamukë tsyobäättë. Tëyˈäjtën ko tyam kyaj nmëdäjtëmë madakën parë tijaty nduˈunëm mëjˈäjtëngyëjxm, per niˈamukë Jyobaa xyajtsobatëm oy wiˈixëm ja wijyˈäjtën nmëdäjtëm. w20.08 paj. 23 parr. 13-15
Lunës 14 äämbë febreerë
Jyobaa yajpääty mët ëjts, kyajts ntsëˈëgëyaˈany (Sal. 118:6).
Ko xyˈamdowëdë Jyobaa parë mmoˈoyëdët ja jotmëkˈäjtën. Yëˈë yˈatsoowëmbitaampy ja mnuˈkxtakën ets ninäˈä mgamastuˈudäˈänyëty, xëmë mbudëkëyaˈanyëty (Apos. 4:29, 31). Oy ko xywyinmayët wiˈix mbudëjkë ko xypyatyë amay jotmay ets wiˈix të mmoˈoyëtyë jot mëjääw parë të xyajtëgatsyë mjukyˈäjtën. Pënë Jyobaa pyudëjkë ja israelitëty parë ttuknäjxtë ja mejnyë Tsaptspë, nan mbäät mˈity seguurë ko mbudëkëyanëp parë xypyanëjkxëdë Jesus (Éx. 14:13). It seguurë extëm jyënanyë tekstë diˈib tyam. Jyobaa nan mbäät dyajjotmëktaˈaky ja nmëguˈukˈäjtëm diˈib näämnëm tëjkëdëp ëwäˈkx käjpxwäˈkxpë. Min nˈokˈijxëm wiˈix jyajty tuˈugë nmëguˈukˈäjtëm diˈib xyëwˈäjtypy Tomoyo. Ko tim ëgäˈäny ojts nyijkxy ëwäˈkx käjpxwäˈkxpë tëjkmdëjkm, ta tuˈugë toxytyëjk pyëtsëëmy diˈib mëyaxkakë: “¡Ngatimmëtmaytyäˈägaambyëtsë Jyobaa tyestiigëty!”, ets ta ja tyëjk tˈajëduumiiny. Tomoyo, kyaj axëëk nyayjyäˈäwë, ta tˈanmääy ja myëguˈuk: “¿Të xyˈixyë? Nitukˈääwëts wiˈix të ngaˈˈanëëmë, perë taabë toxytyëjk nyijäˈäptëm ko Testiigëts. ¡Jantsy jotkujkëts nnayjyawëty!”. Tomoyo, ja tyam tyuny prekursoora regulaar. w20.09 paj. 6 parr. 13, 14
Martës 15 äämbë febreerë
Yëˈë Asá oy ojts winë ttuny ets mëdëy Wintsën windum, mëdiˈibë Diosˈäjtpën (2 Crón. 14:2, TY).
Asá, ta tˈanmääy ja nax käjpn ko yëˈë netyë Jyobaa diˈib të myoˈoyëdë agujkˈäjt ‘jotkujkˈäjtën’ mä ja nax käjpn diˈib myëtsëbäˈänˈäjttëp (2 Crón. 14:6, 7, TY). Perë Asá kyaj tyëjkë tuumbë ëën woots mët ko nety jyamˈaty ja agujkˈäjt jotkujkˈäjtën, niˈigyën mëk tyuundëjkë, dyajtäˈtspëjky ja nax käjpn, tnabojtsy, dyajpëdëˈkyë mëj potsy ets tpëjtaky ja tëjkˈagäj. Ets ta net tˈanmääy ja nax käjpn diˈib Judá: ‘Tyam määnëmë nax käjpn ëëts njaakjaˈäjtëmën’. ¿Ti myaytyäˈägan? Ko mbäädë nety dyajnëˈëyeˈey dyajtuˈuyeˈeytyë ja potsy agujk jotkujk mä ja naxwinyëdë diˈibë Dios të myoˈoyëdë, pes kyaj nety mä ja myëtsipëty diˈib atsëˈëk ajawëdëp. Pääty tˈanmääy ja käjpn ets dyajtundët yajxon ja tiempë mä nety jyamˈatyë agujkˈäjt jotkujkˈäjtën. Asá nan yajtuun yajxonë tyäˈädë tiempë parë ojts nyayjëjpˈixyëty mët ja syoldäädëtëjk (2 Crón. 14:8). ¿Päätyëdaa duˈun ttuuny mët ko kyaj ttukˈijxpetyë Jyobaa? Kyaj, tyukˈijxpajt. Per kom reyë nety tyuny, yëˈë diˈibë nety nyikëjxmˈäjtypy parë tpudëkët ja nax käjpn ets nyayjëjpˈixëdët mä ja amay jotmay diˈib mbäät tyukminëdë. Nyijäˈäwëbë nety ko kyaj xëmë jyamˈatäˈänyë agujkˈäjt jotkujkˈäjtën jam Judá, ets duˈunën tyuun jyäjtë. w20.09 paj. 15 parr. 4, 5
Mierkëlës 16 äämbë febreerë
Këdiibë xywyinwäˈknaxtët diˈibë ijtp këxjäˈäy (1 Kor. 4:6).
Ja diˈib tuump mëjjäˈäy waˈan wyinmayäˈänët, ko mbäät dyajnaxkëdaˈagyë anaˈamën parë tkuwäˈänët ja Diosë byorreeguˈunk. Per ta mä mëjwiin kajaa tyëgatsy ja kutujkën diˈib myëdäjttëbë mëjjäˈäytyëjk mët ja yetyëjkëty diˈib nyigëbäjkˈäjttëbë fyamilyë. Tuk pëky, yëˈë ko Jyobaa të ttuknipëkyë mëjjäˈäytyëjk parë tyundët extëmë fes ets tˈëxkaxtët mä nduˈukmujkëm ja pokyjyaˈaytyëjk diˈib kyaj jyodëmbittë (1 Kor. 5:11-13). Ja tuk pëky mä tyëgatsyëty, yëˈë ko Jyobaa të tmoˈoyë kutujkën pënaty nyigëbäjkˈäjttëbë fyamilyë parë ttundët diˈib kyaj mbäät ttundë ja mëjjäˈäytyëjk. Ets ja tuk pëky, yëˈë ko mbäät dyajnaxkëdäˈäktë anaˈamën ets tˈixtët parë yajkuytyunët (Rom. 7:2). Extëm nˈokpëjtakëm, myëdäjtypyë madakën parë tnigäjpxët axtë ti oorë mbäät ja yˈuˈunk yˈënäˈk jyäˈttë ets parë tjëjwijtsëmbittët pën kyaj myëmëdowëdë (Éfes. 6:1). Ja yetyëjk kasäädë diˈib tsyojkypyë fyamilyë, jawyiin dyajtëy ja kyudëjk mä tkayajnaxkëdaˈakynyëm ja anaˈamën, pes nimajtsk ‘tuˈugyë yajpatnëdë’ (Mat. 19:6, TY). w21.02 paj. 16-18 parr. 10-13
Jueebës 17 äämbë febreerë
[Ja wijyˈäjtën] mas niˈigyë yˈoy tsyujëty këdiinëmë tsääjë tsujatypy ets nitii diˈib mtsojkënyëˈajtypy mbäät mëët kyayaˈijxkijpxyë (Prov. 3:15).
Ja tëyˈäjtën diˈib yajpatp mä Diosë yˈAyuk, nan tsobatp mëjwiin kajaa. ¿Tiko duˈun njënäˈänëm? Yëˈko Jyobaa yëˈëyë tyuknijäˈäwëp pënaty yujy tudaˈaky ets “pënaty [jënandëp] ja yˈääw jyot ko kyupëkandëp ja tëyˈäjtën” (Hech. 13:48, TNM). Tyäˈädë jäˈäyëty diˈib yujy tudaˈaky, kyupëjktëp ja tuumbë diˈib kuwijy diˈibë Jyobaa yajtuumpy parë tyam xytyukniˈˈijxëm ja tëyˈäjtën (Mat. 11:25; 24:45). Pes kyaj mbäät njaygyujkëmë Biiblyë pën kyaj pën xypyudëjkëm, ets nitii duˈun kyatsobääty ko njaygyujkëm tijatyë Biiblyë myaytyakypy (Prov. 3:13, 15). Jyobaa nan të xytyuknipëjkëm parë ndukniˈˈijxëmë jäˈäy ja tëyˈäjtën mä pënën yëˈë ets tijaty tyuknibëjtakëp (Mat. 24:14). Nëgooyë tsyobatnë ja ääw ayuk diˈib nˈëwäˈkx ngäjpxwäˈkxëm, pes pyudëjkëbë jäˈäy parë Jyobaa yˈuˈunkˈat yˈënäˈkˈatëdët ets parë mbäät jyukyˈattë winë xëëw winë tiempë (1 Tim. 4:16). Ëtsäjtëm, yëˈë nduˈunëm ja tuunk diˈib tyam mas jëjpˈam yajtuump. Pääty nˈoktuˈunëm, oy yiˈin waanë ets oy mëjwiin kajaa (1 Tim. 2:3, 4). Pes ¡nëgooyë yˈoyˈäjnë ko nduunmujkëm mëdë Dios! (1 Cor. 3:9, TNM). w20.09 paj. 26, 27 parr. 4, 5
Biernës 18 äämbë febreerë
Japëts nbattë nijaˈatyë nmëguˈuktëjkëts diˈibëts xyajwëˈëmdë (Apos. 28:14).
Ko apostëlë Pablo ojts yajmënëjkxy Roma, kanäkˈokë Jyobaa pyudëjkë mët yëˈëgyëjxmë nmëguˈukˈäjtëm. Extëm ko pyatsoˈonë nimajtskë myëtnaymyaayëbë, Aristarco mëdë Lucas. Yëˈëjëty, oˈkën jëjpˈamë jyukyˈäjtën tpëjtaktë ko tpatsoˈondë barkoty. Biiblyë kyaj mä tnigajpxy pënë Aristarco mëdë Lucas tukwandakëdë këˈëmë Jesus ko jäˈtandëbë nety Roma. Jaanëm tnijäˈäwëdë ko kyaj wiˈix jyatäˈändë ko myiiny ja mëk poj tuu. Ko jyäjttë Sidón, ta Julio “tnasmäjtsë Pääblë es nëjx tkuˈixy yëˈë myëtnaymyaayëbëty” (Apos. 27:1, 2). Ets ok, ko jyäjttë Puteoli, ta tpattë ja myëguˈuktëjk diˈib mëktaˈaky anmääyëdë parë jam wyëˈëmdët jëxtujk xëëw. Mientrës myooyëdë tijatyë nety yajtëgoyˈäjttëp, seguurë ko ja Dios mëduumbëty jyantsy tyukxondaktë tijatyë Pablo tukmëtmaytyakëdë (ijxkijpxyë mëdë Apostʉlʉty 15:2, 3). w20.11 paj. 15, 16 parr. 15-17
Sääbëdë 19 äämbë febreerë
Ko nˈawdäjtëm ja Dios es nmëduˈunëm. Taadë dëˈën tsobatp mä tyäˈädë jikyˈäjtën diˈibë tyam es nandëˈën mä tadë jikyˈäjtën diˈibë miimp (1 Tim. 4:8).
Uˈunktääk uˈunkteety, tsojkëp ttukˈixtët ja yˈuˈunk yˈënäˈk nuˈunën ttsoktë Jyobaa mëdë yˈääw yˈayuk ets mët tijaty tyuundëp. Ja mas oybyë kumäˈäyën diˈib mbäät tmoˈoytyë, yëˈë ko tpudëkëdët parë ttsoktëdë Jyobaa. Tuk pëky diˈib mbäät ttukniˈˈixëdë, yëˈë wiˈix xëmë tˈëxpëktëdë Biiblyë, nyuˈkxtäˈäktët, nyëjkxtët reunyonk ets käjpxwäˈkxpë (1 Tim. 6:6). Tëyˈäjtën ko tsojkëp tmoˈoytyët tijaty yajtëgoyˈäjttëp (1 Tim. 5:8). Per jamyatstë ko ja mˈuˈunk mˈënäˈk kyaj yëˈë yajnitsoˈogäˈänëdë meeny sentääbë ko myinët ja kutëgoˈoyën ets nan kyaj yëˈë yajnaxäˈänëdë mä jembyë jukyˈäjtën, yëˈë duˈun ko oy yˈittët mëdë Jyobaa (Ezeq. 7:19). Mayë uˈunktääk uˈunkteety, yëˈë tyuundëp diˈib mbäät ja yˈuˈunk yˈënäˈk pyudëkëdë parë tmëwingondëdë Jyobaa, ets ¡njantsy tyukxondakëm ko duˈun nˈijxëm! Pënaty të yaak të pyattë mä duˈumbë familyë, duˈunyëm ttundë tijaty yajtukniˈˈijxëdë ko myutskˈäjttë, ets kyuˈëˈëw kyukäjpxëdëp ko duˈun ja tyääk tyeety yajˈyaˈk yajpajtëdë (Prov. 10:22). w20.10 paj. 29 parr. 10, 11
Domingë 20 äämbë febreerë
¡Ni tkatsokët ja Dios, es ninäˈä dëˈën mgajatët! (Mat. 16:22).
Apostëlë Pedro kyaj näˈäty tniwinmäˈäyë wiˈix ojts yˈëy kyajpxy. Ko duˈun jyaˈayˈajty, yëˈë diˈibë net ok axëëk yajnayjyäˈäwë. Extëm nˈokpëjtakëm, ko Jesus tˈanmääy ja yˈapostëlëtëjk ko yaˈˈayowanëbë jäˈäy ets yaˈooganëp, Pedro, ta ojts tˈooyë Jesus ets tˈanmääy: “¡Ninäˈä dëˈën mgajatët!”. Perë Jesus, ta jyëjwijtsëmbijtë (Mat. 16:21-23). Ets ko ja mayjyaˈay nyimiinëdë Jesus parë myatsäˈänëdë, ta netyë Pedro ttatsktsujktuty niduˈuk ja tyuumbë saserdotë wintsën (Fwank 18:10, 11). Jesus ta jatëgok tjëjwijtsëmbijty. Pedro, nan të nety tˈanëëmë Jesus ko pën nikaktääyëbë yˈapostëlëtëjk, yëˈë ninäˈä duˈun kyaˈˈadëˈëtsäˈäny (Mat. 26:33). Per kyaj nety jyotmëkëty extëm wyinmay. Pes mä taabë koots, ta tyuktëjkë mëk tsëˈëgë ets tëgëkˈok jyënany ko kyaj tˈixyˈaty ja Wyintsën. Ko duˈun yˈadëtsy, mëk mon mëk tuk nyayjyäˈäwë, ta pyëtsëëmy ets jyantsy jyëëy jyantsy yaxy (Mat. 26:69-75). Seguurë ko nyayajtëëwë: “¿Waˈantsëdaa Jesus xypyokymyaˈkxët?”. Pedro kyaj nyaytyukmëmadakë moˈon tujkën, duˈunyëm tmëduunˈadëtsyë Jyobaa mët ja myëˈapostëlëtëjk oyë nety duˈun të tyëgoy (Fwank 21:1-3; Apos. 1:15, 16). w20.12 paj. 20 parr. 17, 18
Lunës 21 äämbë febreerë
Miits yeˈetyëjkëty, wintsëˈëkëdë ja mdoˈoxytyëjkëty. Mëjˈaampy xyajnaxëtëty ixtëm pyaatyën. Mnijäˈäwëdëp ko yëˈëjëty ëmääy yajpäättë (1 Ped. 3:7, TY).
Pën yujy tudaˈaky ja diˈib nyigëbäjkˈäjtypyë fyamilyë, kanäk pëky dyajnigëxëˈëgäˈäny. Extëm nˈokpëjtakëm, kyaj tjëjpˈixäˈäny ets ja kyudëjk o ja yˈuˈunk yˈënäˈk ttundët diˈib kyaj tmëmadäˈäktët. Nan myëdoowˈitaampy wiˈix wyinmaytyë oy tkaˈoymyëdowët. Tuˈugë yetyëjk diˈib yujy tudaˈaky, nan tuump jyënoty tyëgoty, oy ja jäˈäy wyinmaytyë ko diˈib tyuumpy, toxytyëjktuungëˈë. Per mbäät tsyiptaˈaky. ¿Tiko? Tuˈugë nmëguˈukˈäjtëm diˈib xyëwˈäjtypy Rachel, jyënaˈany: “Mätsë nˈit nlugäär, ko tuˈugë yetyëjk tpudëkë ja kyudëjk parë pyujmuky jyaˈtsmuky o dyajwäˈätsy ja jëën tëjk, mbäät ja myëjënbäˈä myëdëjkpäˈä o ja jyiiky myëguˈuk jyënäˈändë ko waˈan kyaj jyantsy yetyëjkëty. Ets wyinmayäˈändë ko kyaj tjaty tˈanaˈamët ja kyudëjk”. Pën duˈun mayë jäˈäy wyinmaytyë mä mtsëënë, jamyats ko Jesus ojts dyajtekypyujy ja yˈëxpëjkpëty, oyë nety mayë jäˈäy wyinmaytyë ko tyäˈädë tuunk, yëˈë tyuumpy ja tuumbë mosë. Ja diˈib oy nyigëbäjkˈäjtypyë fyamilyë, kyaj jeˈeyë tpudëkëyaˈany parë oy wyëˈëmäˈäny jäˈäy windum, yëˈë duˈun parë dyajjotkujkˈatäˈäny ja kyudëjk ets ja yˈuˈunk yˈënäˈk. w21.02 paj. 2 parr. 3; paj. 4 parr. 11
Martës 22 äämbë febreerë
Ta tuˈuk diˈibëts tëyˈäjtën [nduumpy]. Nˈokjäˈäytyëgoyëts diˈibë të nyäjxnë, esë nmëjää nyajtuny mabäädëts nmëdaˈaky es nmëmëdäˈägëdët diˈibë miimpnëm. Dëˈënëts ëj extëmë jäˈäy diˈibë mëk pëyëˈkp es jawyiin jyäˈtäˈäny mä kyugëxë ja pëyëˈkn (Filip. 3:13, 14).
Ko njamyajtsëm diˈib oy yëˈë Jyobaa ryegalë; per oy nuˈun jantsy oy të njukyˈäjtëm, mas niˈigyë yˈoyˈatäˈäny ja jembyë jukyˈäjtën diˈib nˈawijx njëjpˈijxëm. Mbäät pën axëëk xytyuˈunëm, per ko kyaj nbëjkëˈkëmë akë, ta kyaj xynyaxkuwoonëyäˈänëm. Ets ko njantsy pyokyjyäˈäwëm ti të nduˈunëm, mbäädë net kyaj nekymyëduˈunëmë Jyobaa agujk jotkujk. Per tsojkëp nˈijtëm seguurë ko Jyobaa të xypyokymyaˈkxëm, duˈun extëmë ttuunyë apostëlë Pablo (1 Tim. 1:12-15). Ja jembyë jukyˈäjtën diˈib nˈawijx njëjpˈijxëm, yˈitäˈäny winë xëëw winë tiempë. Ets jam, kyaj nyekymyinäˈäny mä jot winmäˈäny tijaty tyam axëëk xyajnayjyäˈäwëm. Pesë Biiblyë jyënaˈany ko mä taabë tiempë, “tijaty të nyaxy kyaj pën tnekyjyamyatsäˈäny” (Is. 65:17). Ta nmëguˈukˈäjtëm diˈib jantsy kanäk jëmëjt kujk tmëduunëdë Jyobaa ets të myëjjäˈäyëndë, per mä ja jembyë jukyˈäjtën, ta jatëgok jyëmbitäˈändë ënäˈk (Job 33:25). Pääty, nˈokpëjtakëm ja jot winmäˈäny mä ja jembyë jukyˈäjtën ets nˈoktuˈunëm tyam nuˈun nmadakëm parë mbäät jam nyajpatëm. w20.11 paj. 24 parr. 4; paj. 29 parr. 18, 19
Mierkëlës 23 äämbë febreerë
Oknëmts nˈijxy [...] nidëgekyë yaxkaktë mëk: “Yëˈë nitsokën myiny mä yëˈë Nintsënˈäjtëm Dios [...] es nandëˈën myiny mä yëˈë Borreeguˈunk” (Diˈibʉ Jat. 7:9, 10).
¿Ti tunan jatanëp mä tiempë myiny kyëdaˈaky? Ko myinët ja mëj ayoˈon, Jyobaa xyaˈˈawäˈätspëtsëmäˈänëm. Min nˈokˈijxëm majtsk pëky mäjaty xyaˈˈawäˈätspëtsëmäˈänëm. Myëduˈuk, yaˈˈawäˈätspëtsëmaampy pënaty mëduundëp ko nety “ja naxwinyëdë ryeyëty” dyajkutëgoytyë ja Mëj Babilonia, jaˈa njënäˈänëm, tëgokyë ja relijyonk diˈib kyaj tyëyˈäjtënëty (Diˈibʉ Jat. 17:16-18; 18:2, 4). Ets myëmajtsk, yaˈˈawäˈätspëtsëmaampy ja nyax kyäjpn ko nety dyajkutëgooytyaˈay nuˈun yˈakwëˈëmy ja Satanásë jyaˈay mä Armajedon (Diˈibʉ Jat. 16:14, 16). Pën nnayaˈijtëm wingon mä Jyobaa, Satanás kyaj mbäät xyaˈoˈkëm winë xëëw winë tiempë, pes yëˈë duˈun diˈib kutëgoyäämp winë xëëw (Rom. 16:20). Pääty, nˈoktuktëjkëm ja pujxnwit ets ninäˈä nganasjaˈanëm. Kyaj ntsiptuˈunëm naytyuˈuk, waˈan xypyudëjkëm ja nmëguˈukˈäjtëm ets nˈokpanëjkxëm wiˈixë Jyobaa xynyëˈëmoˈoy xytyuˈumoˈoyëm. Ko duˈun nduˈunëm, ta nëjkx nˈijtëm seguurë ko ja nDeetyˈäjtëmë tsäjpotmëdë, xypyudëkëyäˈänëm ets xykyuwäˈänäˈänëm (Is. 41:10). w21.03 paj. 30 parr. 16, 17
Jueebës 24 äämbë febreerë
Ja mjot mëjääw xypyëkäˈändë pën kyaj ti xymyëmay xymyëdäjtë ets kots xytyukˈijxpattët (Is. 30:15).
¿Wiˈix mbäät nyajnigëxëˈkëm ko ndukˈijxpajtëmë Jyobaa? Ko nduˈunëm extëm xynyëˈëmoˈoy xytyuˈumoˈoyëm. Mä Biiblyë yajmaytyakp mayë ijxpajtën duˈun diˈib oy ets diˈib kyaj yˈoyëty. Tapë ijxpajtën diˈib xytyukˈijxëm ko jëjpˈam parë kyaj nëgoo ti nmëmäˈäy nmëdäjëm ets parë ndukˈijxpajtëmë Jyobaa. Ko xyˈëxpëkëdë oybyë ijxpajtën, ix ti pudëjkëdë ja Dios mëduumbëty parë kyaj nëgoo ojts tmëmay tmëdäjtë ko mëktaˈaky yajnibëdëˈktë. Extëm nˈokpëjtakëm, ja apostëlëtëjk kyaj tsyëˈkëdë ko ja yajkutujkpëty ojts tniˈanaˈamëdë parë kyaj nyekyˈëwäˈkx nyekykyäjpxwäˈkxtët. Niˈigyë jyënandë amëk jotmëk: “Tsojkëp nmëmëdoˈowëmë Dios extëmë anaˈambë ets kyaj dyuˈunëtyë naxwinyëdë jäˈäy” (Hech. 5:29, TNM). Ets ni jaa kyatsëˈkëdë ko nety të yajwojptäˈäy të yajkäˈtstäˈäytyë. ¿Tiko? Yëˈko nyijäˈäwëdëbë nety ko Jyobaa yëˈë pudëjkëdëp ets tukjotkëdakëdëp. Pääty, duˈunyëm ojts tˈëwäˈkx tkäjpxwäˈkxtë ja oybyë ayuk (Apos. 5:40-42). Duˈun extëmë Esteban, ko netyë jäˈäy yaˈooganënë, kyaj tyuktëjkë moˈon tujkën, niˈigyë kyëxëˈky ja “wyiin jyëjp extëm tuˈugë anklës” (Apos. 6:12-15). ¿Tiko? Yëˈko ijtpë nety seguurë ko Jyobaa tukjotkëdakëp. w21.01 paj. 4 parr. 10, 11
Biernës 25 äämbë febreerë
Diˈibë të dyajwäˈätstë es të dyajpoobë ja wyit mët ja Borreeguˈungë nyeˈpyny (Diˈibʉ Jat. 7:14).
Yëˈë yˈandijpy ko wäˈäts ja jyot wyinmäˈäny tmëdattë ets ko kupëjkëdëbë Jyobaa (Is. 1:18). Të nyaywyandäˈägëdë ets të nyëbattë, myëbëjktëp ko Jesus ojts xykyuˈoˈkëm ets oy yˈittë mëdë Jyobaa (Fwank 3:36; 1 Ped. 3:21, TNM). Päätyënë Diosteety tyukjotkëdäˈägëdë ets mbäädë net tmëdundë “xëëny koots” yä Naxwiiny (Diˈibʉ Jat. 7:15). Yëˈë diˈib mas kajaa tuundëp ets tjantsy jyotmoˈoytyë mä yajkäjpxwaˈkxyë oybyë ayuk ets mä jäˈäy yˈëxpëktë, ets yëˈë mas jëjpˈam pyëjtaktëp ja Diosë yˈAnaˈam Kyutujkën (Mat. 6:33; 24:14; 28:19, 20). Ja tëgoy myayjyaˈay diˈibë nety të tsyokwëˈëmdë, ijttëp seguurë ko Jyobaa duˈunyëm kyuentëˈatäˈänëdë ko nety të nyaxy ja mëj ayoˈon, pesë Biiblyë jyënaˈany ko “yëˈë kuentëˈatanëdëp es yˈitët mä yëˈë”. Ets nan jam yˈadëwäˈänyë tyäˈädë wandakën diˈib nëgooyë të tˈawijx të tjëjpˈijxnëdë ja wiinkpë borreegëty: “Dios yajtëtsxëdët tëgekyë ja wyinnëë” (Diˈibʉ Jat. 21:3, 4). w21.01 paj. 16 parr. 9, 10
Sääbëdë 26 äämbë febreerë
Tatsë nmëjääw nduknigaxäˈäny oytyim pënëty. Ja nyëëxëty ets ja myäängëty tnaskäjpxëyäˈändë tijaty (Hech. 2:17, TNM).
Jantsy agujk jotkujk nnayjyäˈäwëm ko nyajpatëm mä Diosë kyäjpn. Pes niˈamukë nduˈunëmë mëjääw parë nwintsëˈkëm ja kutujkën diˈibë Jyobaa të dyajnaxkëdaˈaky. Biiblyë jyënaˈany ko Jyobaa tuknax dyajtsobäätyë yetyëjk etsë toxytyëjk. Extëm nˈokpëjtakëm, ja tiempë mä jyukyˈäjttë apostëlëtëjk, Jyobaa tyuknigajxë yˈespiritë santë duˈunë yetyëjk etsë toxytyëjk parë ttundëdë miläägrë, extëm kyäjpxtët kanäk ayuk (Apos. 2:1-4, 15-18). Ets pënaty anaˈamandëp mëdë Jesus, jamˈatäämbë yetyëjk etsë toxytyëjk (Gal. 3:26-29). Jyobaa nan tuknax tmoˈoyaˈanyë kyumäˈäyënë duˈunë yetyëjk etsë toxytyëjk parë jyukyˈattët winë xëëw winë tiempë yä Naxwiiny (Diˈibʉ Jat. 7:9, 10, 13-15). Etsë Jesus, nan tyukˈanaˈam duˈunë yetyëjk etsë toxytyëjk parë nëjkx tˈëwäˈkx tkäjpxwäˈkxtë ja oybyë ayuk ets dyaˈëxpëktëdë jäˈäy (Mat. 28:19, 20). Extëm nˈokpëjtakëm, mä liibrë diˈibë xyëwˈäjtypy Apostʉlʉty, jap yajmaytyaˈaky tuˈugë toxytyëjkjäˈäy diˈib xëwˈäjt Priscila. Yëˈë mëdë myëmëjjäˈäy Áquila, wyoowdë Apolos mä tyëjk, tuˈugë wijyjyaˈay, parë ‘ja Dios ja nyëˈë tyuˈu waanë kaˈpxy’ ttukmëtmaytyaktë (Hech. 18:24-26, TY). w21.02 paj. 14 parr. 1; paj. 15 parr. 4
Domingë 27 äämbë febreerë
Naygyuentëˈatëdë, es nandëˈën kuentëˈattë ja mëbëjkpëtëjk [...] es xykyuentëˈattët nidëgekyë ja jäˈäy (Apos. 20:28).
Mëjjäˈäytyëjkëty, mijtsën mnikëjxmˈäjttëp parë xypyudëkëdët ja nmëguˈukˈäjtëm ets yajxon yˈëwäˈkx kyäjpxwäˈkxtët ets dyaˈëxpëktëdë jäˈäy. Ko xyjamyëdattët tuˈugë nmëguˈukˈäjtëm mä jäˈäy dyaˈëxpëky, ets pën mbëjktëbë kuentë ko tsëˈkëdëp, nayˈawanëdë parë mijts xyaˈëxpëkët. Mëjjäˈäytyëjk, mbäät mëjwiin kajaa tpudëkëdë ja nmëguˈukˈäjtëm diˈib yaˈëxpëjktëbë jäˈäy parë kyaj yˈëxtëkëwäˈäktët (1 Tes. 5:11). Pën tyam kyaj nyaˈëxpëjkëm tuˈugë jäˈäy, mbäät nbudëjkëm ja diˈibë nmëguˈukˈäjtëm yaˈëxpëjkypy parë Diosmëdunët. Extëm nˈokpëjtakëm, ko njamyëdäjtëm tuˈugë nmëguˈukˈäjtëm mä nëjkxë jäˈäy dyaˈëxpëkäˈäny, mbäät yajxon niwinmäˈäyëm wiˈixë jäˈäy nmëtmaytyäˈägäˈänëm tukˈääw majtskˈääw. Nˈoknaymyaaybyëjkëm mët ja jäˈäy ko jyäˈtët mä salonk ets nˈokmoˈoyëmë oybyë ijxpajtën. Pënaty tuundëp mëjjäˈäy, nan mbäät tmëjääwmoˈoytyë, ko tjuudëdë tiempë parë mëët yajpäättët. Ets ¿wiˈix mbäät tpudëkëdë ja nmëguˈukˈäjtëm diˈibë jäˈäy yaˈëxpëjktëp? Ko ttukniˈˈixëdët wiˈixë tyäˈädë tuunk yajtunäˈäny ets ko tˈanëëmëdët ko jantsy oy duˈun tyundë. Nitii duˈun xykyamoˈoyëmë xondakën extëm ko nbudëjkëm tuˈugë jäˈäy, oy yiˈin waanë parë ttsokëdë Jyobaa ets tmëdunët. w21.03 paj. 13 parr. 18, 19
Lunës 28 äämbë febreerë
Jantsy oy mëdë Jyobaa nyaymyayëty pënaty tsëˈkëdëp (Sal. 25:14).
David yajnigëxëˈk ko mbäädë nety yajtukjotkujkˈaty ets ko tyuumbyë nety tijaty yajtuknipëjkp. Extëm nˈokpëjtakëm, ko myutskˈäjty, yajtuknipëjk parë tkuentëˈatët ja tyeetyë byorreegë ets yajxon ojts tˈijxˈity tkuentëˈaty oyë nety kyutsëˈëgëty. Ko tiempë nyajxy, duˈun ttukmëtmaytyaky ja rey Saúl: “Wintsën, ëjts yëˈëtsë nety nguentëˈäjtëbë ndeetyë byorreegë, ta myiiny tuˈugë kää ets tuˈugë osë, ets këjktuˈuk ojts ttsëëmgaˈaktë ja borreegë. Tats nbatsoˈony etsëts naxkujëduˈuwë, etsëts ojts nbëjkë yˈääwoty” (1 Sam. 17:34, 35). David, kyuentëˈäjt ja borreegë diˈibë nety të yajtuknipëky. Yaˈayˈënäˈkuˈungëty, miitsëty nan mbäät xypyanëjkxëdë yˈijxpajtënë David ko xytyundët yajxon ja tuunk diˈib myajtuknipëjktëp. Desde mutsknëmë David nyaymyaaybyëjkë mas niˈigyë mëdë Jyobaa ets yëˈë diˈib jëjpˈam pyëjtak, kyaj ko tmëdäjtyë jotmëkˈäjtën o ko tjäjty ttukowët ja arpë. David kyaj jeˈeyë Dyiosˈäjtyë Jyobaa, jyantsy myëtnaymyaayëbëˈäjttë duˈun. Miitsëty yaˈayˈënäˈkuˈunk, diˈib mas jëjpˈam mbäät xytyundë, yëˈë mnaymyaaybyëkëdët niˈigyë mëdë Jyobaa. w21.03 paj. 3 parr. 4, 5