¿Wiˈixxyëbë Jesus yˈatsoojëmbity?

¿Oy ko relijyonk nyaytyuktëkëdët mëdë politikë? Mayë jäˈäy diˈib tyukˈijtëdëbë relijyonk wyinmaytyë ko oy, jyënäˈändë ko relijyonk kyaj jeˈeyë mbäät ttuktëkë politikë, nan tsojkëp tpudëkët parë dyaˈoyëdë amay jotmay diˈib pyatypyë naxwinyëdë jäˈäy. Ets ta net nääk diˈib jënandëp ko kyaj yˈoyëty etsë relijyonk ttuktëkëdë politikë. Ets mijts, ¿wiˈix mˈokwinmay? ¿Oyëdaa ko nyaybyudëkëdët?

JESUKRISTË “yëˈë diˈib mas mayë jäˈäy panëjkxëp”. Pääty, ¿wiˈixxyëp yˈatsoojëmbity koxyëp nyajtëˈëwëm pën mbäädë relijyonk nyaytyuktëkëty mëdë politikë? Yëˈë ojts tnigajpxy wiˈix wyinmay ets duˈun ttuuny. Extëm nˈokpëjtakëm, mä ja diskursë diˈib xyëˈäjtypy Sermón del Monte, ojts tpudëkë ja yˈëxpëjkpëty parë tˈixtët nuˈun mbäät ttuktëkëdë ja nax käjpn. Min nˈokˈijxëm tuk peky majtsk peky diˈib ojts tnigajpxy.

Yajpäättët mëdë naxwinyëdë jäˈäy parë tpudëkëdët

Jesus ojts tnigajpxy wiˈix mbäät ja yˈëxpëjkpëty jyaˈayˈattë mëdë naxwinyëdë jäˈäy, ko jyënany: “Miitsëtyë duˈun ja kään mä naxwinyëdë; per pën ja kään tëgoopy ja myëkˈäjtën, ¿wiˈix mbäät jatëgok tmëdatyë täˈämtsˈäjtën? Kyaj nyekytyuny niwiˈixtsoo, jeˈeyë duˈun parë nˈëxpëjkëm etsë jäˈäy tnidaan ttuktaandët. Miitsëtyë duˈun ja tëˈkx jäjën mä naxwinyëdë. [...] Nan waˈan miitsëty ja mjäjënë ttëˈkxy tjäjy mä naxwinyëdë jäˈäy parë yëˈëjëty tˈixtët ja mduˈunënë oybyë ets tmëjkumayët ja mDeety diˈib ijtp tsäjpotm” (Mateo 5:13-16, Traducción del Nuevo Mundo [NM]). ¿Tiko Jesus ojts tˈijxkijpxyë ja yˈëxpëjkpëty mëdë kään etsë tëˈkx jäjën?

Ko Jesus tˈanmääy ja yˈëxpëjkpëty ets yˈittët extëmë kään etsë tëˈkx jäjënë “mä naxwinyëdë jäˈäy”, yëˈë yˈandijpy ko yˈittët extëmë kään mä niˈamukë jäˈäy ets tkudëˈkx tkujäjtët pënaty yˈixyˈatandëbë Dios. Yä nbëjkëmë kuentë ko Jesus kyaj ttsejky etsë yˈëxpëjkpëty nyëjkxtët jagam tsënaabyë.

Pes ¿wiˈix mbäädë jeˈxy peky yˈity jeky pën kyaj tmëdatyë kään? ¿O wiˈixën mbäät tuˈugë lamprë tkudëˈkxy tkujäjy ja kootsˈit pën kyaj jam yajpääty? Päätyë Jesus ninäˈä tkaˈˈanmääyë yˈëxpëjkpëty ets nyëjkxtët jagam tsënaabyë mä yajpäättët ak yëˈëjëty. Nan kyaj ojts jyënaˈany ets ja yˈëxpëjkpëty tsyëënëdët kuˈaduky mä tsyäjptëjkëty. Parë mbäädë kään tyuunkpääty, tsojkëp yajxëbinët mëdë jeˈxy peky etsë tëˈkx jäjën tsojkëp kyudëˈkx kyujäjët mä kootsˈit. Nanduˈunë Dios mëduumbë, tsojkëp yajpäädët mëdë naxwinyëdë jäˈäy parë mbäät tpudëkë.

“Kyaj ttuktëk ttukwäˈägëdë naxwinyëdë jäˈäy”

Ko duˈunë Jesus jyënany, ta näägë jäˈäy nyayajtëwëdë pën mbäädë Dios mëduumbë ttuktëkë politikë. ¿Tiko? Yëˈko Jesus duˈun tninuˈkxtakë yˈëxpëjkpëty mä nety yajmatsanë: “Nˈamdoopy nbëjktsoobyëts ets kyaj xyajpëtsëmët mä naxwinyëdë jäˈäy, yëˈë duˈun ets xykyuentˈatët mä axëëkpë. Yëˈëjëty kyaj yajpäättë mëdë naxwinyëdë jäˈäy, duˈun extëm ëjts kyajts nyajpääty mä naxwinyëdë jäˈäy” (Juan 17:15, 16, NM). Per ¿wiˈixë nety ja yˈëxpëjkpëty tpudëkëdët ja naxwinyëdë jäˈäy pën kyaj ttuktëk ttukwäˈägëdë? Parë nnijäˈäwëm tsojkëp nˈatsoˈojëmbijtëmë tyäˈädë tëgëëkpë yajtëˈëwën:

• ¿Wiˈixë Jesus wyinmääy mä politikë?

• ¿Ti tyam mbäät ttundë Dios mëduumbë?