¿Ti tyam mbäät ttundë Dios mëduumbë?

DIOS mëduumbë yëˈë pyanëjkxtëbë Jesusë yˈijxpajtën ets kyaj ttuktëkëdë politikë. Jesus yajxon ojts tnigajpxy: “Kyajts nyajpääty mëdë naxwinyëdë jäˈäy”. Ets ja yˈëxpëjkpëty tˈanmääy: “Miitsëty kyaj myajpäättë mëdë naxwinyëdë jäˈäy” (Juan 15:19; 17:14, NM). ¿Tiko kyaj yˈoyëty etsë Dios mëduumbë ttuktëk ttukwäˈägëdë politikë?

1. Naxwinyëdë jäˈäy waanë mëjää tmëdaty. Biiblyë jyënaˈany ko naxwinyëdë jäˈäy kyaj tmëdatyë madakënë ets nan kyaj nyitëkëty nyayˈanaˈamëdët. Kugajpxy Jeremías jyënany ko “naxwinyëdë jäˈäy kyaj yëˈë tjaˈˈatyë nyëˈë tyuˈu. Ni jeˈeyëp pyäädëdët këˈëm nyaynyëˈëmoˈoy nyaytyuˈumoˈoyëdët” (Jeremías 10:23).

Duˈun extëmë naxwinyëdë jäˈäy kyaj ojts kyojy parë kyaagëditët, nan kyaj ojts kyojy mëdë madakënë parë yˈanaˈamët yajxon. David Fromkin, diˈib tijaty yˈëxpëjkpëtseempy, jyënaˈany ko naxwinyëdë jäˈäy jeˈeyë waanë mëjää tmëdaty, tkujäˈäyë: “Naxwinyëdë jäˈäy yëˈë diˈib anaˈamp, ets kom mbäät tyëgoytyë, ta kyaj syeguurëty tijaty jyawinmääytyëp ko oybyëtsëmëp. Myëdäjttëbë mëjää, per jeˈeyë waanë” (The Question of Government [Gobiernë jyotmay]). ¡Päätyë Biiblyë xyˈanmäˈäyëm ets kyaj ndukˈijxpajtëmë naxwinyëdë jäˈäy! (Salmo 146:3.)

2. Axëëkpë anklës yajtuundëp tyamë myëjää. Ko Satanás tˈawäˈänë Jesus tukëˈëyë ja anaˈamënë diˈib jaˈäjtp yä naxwiiny, Jesus nyijäˈäwëbë nety ko Satanás myëdäjtypy ja madakën parë tˈawanët ja anaˈam kutujkën. Axtë tëgok ojts jyënaˈany ko Mëjkuˈu yëˈë diˈib “anaˈamb ma adayaaba naaxwiinyëny”. Ets ok, ta apostëlë Pablo jyënany ko Mëjkuˈu yëˈë diˈibë yä “naaxwiiny diosˈajtkëxpëny” (Juan 14:30; 2 Corintios 4:4, Nuevo Testamento de Mazatlán). Pablo nanduˈun ojts tnijayë ja myëguˈuktëjk: “Yëˈë nmëtsipˈäjtëm [...] nidëgekyëtyë mëjkuˈu esë kaˈoybyë diˈibë anaˈamdëp es yajkutujktëp kubiˈits kuˈook yä naxwiiny es pënëty jam tsäjpotm diˈibë kyaj tmëmëdowdë Dios” (Éfesʉ 6:12). Päätyë Mëjkuˈu mëdë yˈanklësëty yëˈë diˈib anaˈamdëp yä naxwiiny. Ko duˈun nnijäˈäjëm, ¿wiˈixë net mbäädë Dios mëduumbë tˈixtë politikë winmäˈäny?

Nˈokwinmäˈäyëm tyäˈädë ijxpajtën: Duˈun extëmë mejny, amëjää tmënëjkxy mutskatypyë barkë, nanduˈunë gobiernëtëjk diˈib yä naxwiiny, yëˈë axëëkpë mëjämooyëdëp. Ets duˈun extëm diˈib yajˈyoˈoytyëp ja mutskatypyë barkë kyaj mbäät ti ttundë ko ja mejny myënëjkxyëty, nanduˈunë politikëtëjk kyaj mbäät tjëjpkuwäˈägëdë tyäˈädë axëëkpë mëjää. Tyäˈädë Mëjkuˈu mëdë yˈanklësëty të ttuknibëjtäägëdë parë dyajmäˈädäˈänyë naxwinyëdë jäˈäy ets tˈaxëktunäˈäny nuˈun myadaˈaky (Diˈibʉ Jatanʉp [Apocalipsis] 12:12). Pääty, yëˈë Jyobaa Dios diˈibë mbäät dyajtëgatsyë jukyˈäjtën, mët ko yëˈë diˈib mas niˈigyë mëjää myëdäjtypy ets kyaj dyuˈunëtyë Satanás mëdë kyaˈoybyëty (Salmo 83:18; Jeremías 10:7, 10).

3. Pënaty jantsy Dios mëduundëp yëˈëyë pyuwäˈkëdëbë Diosë Kyutujkën. Jesus mëdë yˈëxpëjkpëty nyijäˈäwëbë nety ko tyukjäˈtaambyë tiempë mä Dios dyajnaxkëdäˈägäˈänyë tuˈugë gobiernë jam tsäjpotm diˈib anaˈamäämp abëtsemy nyaxwinyëdë, diˈib yajtijp Diosë yˈAnaˈam Kyutujkën. Biiblyë jyënaˈany ko Jyobaa yëˈë nyikäjpxpajtë Jesukristë parë tyunët Rey mä tyäˈädë Anaˈamën (Diˈibʉ Jatanʉp 11:15). Komë Jesus nyijäˈäbë nety ko tyäˈädë gobiernë yëˈë pyudëkëyaambyë naxwinyëdë jäˈäy, pääty ojts tkäjpxwaˈkxy ja “oybyë ayuk diˈibë nyigajxypy ja Diosë kyutujkën” (Lukʉs 4:43). Nan ojts ja yˈëxpëjkpëty ttukniˈˈixë ets duˈun nyuˈkxtäˈäktët: “Yajminë mˈanaˈamënë”. ¿Tiko? Yëˈko mä tyäˈädë Anaˈamën ja yajtunäˈäny Diosë tsyojkënë yä naxwiiny duˈun extëm tyam yajtuny jam tsäjpotm (Mateo 6:9, 10, NM).

¿Wiˈix jyatäˈänyë gobiernëtëjk diˈib yä Naxwiiny? Biiblyë jyënaˈany ko kyutëgoyaˈany tukëˈëyë anaˈambëtëjk “mäjatyë naxwinyëdë” (Diˈibʉ Jatanʉp 16:14; 19:19-21). Pääty, pënaty myëbëjktëp ko Diosë Kyutujkën dyajkutëgoyaˈanyë gobiernëtëjk, ninäˈä tkapëjtäˈäktëdë myëbëjkën mä tuˈugë gobiernë. Per pën pyuwäˈkëp niduˈuk, oy tjanijawë ko kyutëgoyaˈany, yëˈë nety pyuwäˈkëbë Diosë myëtsip.

[Letrë diˈib miimp mä dibujë mä pajina 6]

Jyobaa tyestiigëty kyaj ttuktëkëdë mä jäˈäyë yˈanaˈambë dyajtëgatsäˈändë mët ko yëˈë pyuwäˈkëdëbë Diosë Kyutujkën