Nˈokkuentˈäjtëm ti tyunaambyë korasoon

Biiblyë jyënaˈany: “Nitii duˈun kyawinˈëëny extëmë korasoon, ets ninuˈun kyamaˈkxtuky” (Jer. 17:9). Ko ti korasoon tjantsy tsyeky, ¿këdii tiiyëm ndukäjpxëm parë nyajjotkujkˈäjtëm?

Diosë yˈAyuk xyˈanmäˈäyëm: “Mët ko jodoty winmäˈänyotyë dëˈën pyëtsemy yëˈë axëk winmäˈäny, yëˈë yajjäˈäyˈoˈk, ko yëˈë jäˈäy dyajtëgoy ja pëjk ukënë wyintsëˈkën, yëˈë mëˈinduunk, yëˈë maˈtsk, yëˈë andakën es yëˈë niˈoˈo niyaxëk” (Mat. 15:19). Ngorasoonˈäjtëm, o wiˈix nyajpatëm jodoty, mbäät xywyinˈëˈënëm ets naynyikäjpxtutëm ko nduˈunëm diˈibë Dios yajkubojkypy. Mbäät oknëm nbëjkëmë kuentë ko kyajtëm yˈoyëty diˈib të nduˈunëm. ¿Ti mbäät xypyudëjkëm parë nnijäˈäwëm ti tyunaambyë korasoon mä kyajnëm nduˈunëm diˈib axëëk?

¿WIˈIX NNIJÄˈÄWËM TI TYUNAAMBYË KORASOON?

Nˈokkäjpxëm jabom jabomë Biiblyë ets nˈokpawinmäˈäyëm. Apostëlë Pablo tkujäˈäyë ko “Dios ja yˈayuk myëdäjtypy ja mëkˈäjtën [...]. Tyuktëjkëtyaapy mä ni tuˈugë espäädë diˈibë majtskë yˈää mbäät kyatëkë, tëjkëp mä ti ja jäˈäy wyinmääytyëp o tsyojktëp”. Ko ngäjpxëmë Biiblyë yëˈë “yajnigëxeˈkypy nidëgekyë ja jäˈäyë jyaˈayˈäjtën” (Eb. 4:12). Ko nˈëxpëjkëmë Biiblyë, tsojkëp nˈijxëm ti japˈäjtp mä jot winmäˈäny ets tijaty nduˈunëm, ko duˈun nduˈunëm, ta nëjkx nnijäˈäwëm ti japˈäjtp mä korasoon. Pääty, jëjpˈam ngäjpxëmë Biiblyë jabom jabom ets nbawinmäˈäyëm, duˈuntsoo nëjkx nˈijxëm tijaty extëmë Jyobaa tˈixy.

Ko ngupëjkëm ets nbaduˈunëmë Biiblyë kyäjpxwijën, ta ndukniˈˈijxëmë jot winmäˈäny parë ttunët diˈib oy. Ko duˈun nduˈunëm, ta mbäädë jot winmäˈäny xyˈanmäˈäyëm ko axëëk diˈib ndunäˈänëm ets kyaj nnaynyikäjpxtutëm ko nety të nduˈunëm diˈib kyaj yˈoyëty (Rom. 9:1). Biiblyë nan myëmiimbyë ijxpajtën diˈib mbäät xypyudëjkëm parë kyaj nduˈunëm diˈib axëëk (1 Kor. 10:11). Ko nˈëxpëjkëm, mbäät xypyudëjkëm parë kyaj nduˈundëgoˈoyëm. Ets mbäät niˈamukë duˈun nduˈunëm.

Nˈokˈamdoˈojëmë naybyudëkë ko nuˈkxtakëm. Jyobaa yëˈë diˈib tyukˈijxëtyaabyë korasoon (1 Crón. 29:17). “Dios niˈigyë myëjëty es këdiinëm ëtsäjtëmë njotˈäjt nwinmäˈänyˈäjtëm, nyijäˈäp yëˈë tëgekyë.” (1 Fwank 3:20.) Pääty, kyaj mbäät nwinˈëˈënëm. Pën ndukmëtmaytyaktäˈäyëm tijaty nmëmäˈäy nmëdäjëm, tijaty njäˈäwëm ets tijaty ntsojkënyëˈäjtëm, ta nëjkx xypyudëjkëm parë nˈijxëm ti nmëdäjtëm jodoty. Axtë mbäät nˈamdoˈojëm ets xymyoˈoyëm “tuˈugë korasoon diˈib wäˈäts” (Sal. 51:10). Ko nuˈkxtakëm, mbäät xypyudëjkëm parë nnijäˈäwëm ti korasoon tyunaampy.

Nˈokmëdooˈijtëm yajxon tijaty näjxp mä naymyujkën. Ko duˈun nduˈunëm, ta nëjkx nˈijxëm yajxon ti japˈäjtp mä korasoon. Tëgok tëgok nëjkxëm mä naymyujkën, oy ko yajxon nmëdooˈijtëm, oy yëˈëyëm yaˈëxpëky diˈib nnijäˈäwëm. ¿Tiko? Yëˈko xypyudëjkëm parë njaygyujkëm yajxon ja käjpxwijënë diˈib yajpatp mä Biiblyë, ets nan xypyudëjkëm parë këˈëm nayˈijx naytyuˈunëm ets nyajtëgäjtsëmë jukyˈäjtën. Nan mëjwiin kajaa xypyudëjkëm ko nmëguˈukˈäjtëm kyomentarattë (Prov. 27:17). Per pën kyaj nnaymyujkëm mëdë nmëguˈukˈäjtëm, ta yëˈëyë nëjkx nmëmäˈäy nmëdäjëmë amay jotmay ets kyaj nëjkx oy tijaty nduˈunëm (Prov. 18:1). Pääty, oy ko nnayajtëˈëwëm: “¿Xëmëts nëjkxy mä naymyujkën ets xypyudëjkëbëts?” (Eb. 10:24, 25).

¿TI XYTYUKTUNÄˈÄNËMË KORASOON?

Korasoon mbäät xywyinˈëˈënëm ets xytyuktuˈunëm tijaty. Min nˈokˈijxëm taxk pëky: ko nbaˈoˈktëˈëwëmë meeny sentääbë, ko nˈukëmë nëë diˈib yajmukp, mä nwinˈijxëmë mëtnaymyaayëbë ets mä nyajtuˈunëmë xëë tiempë.

Ko nbaˈoˈktëˈëwëmë meeny sentääbë. Kyaj yˈaxëëgëty ko nduˈunëm parë oyë xëë tiempë nyajnäjxëm. Perë Jesus ojts tnigajpxy ko kujotmay ko jëjpˈam nbëjtakëmë jukyˈäjt madakën. Yëˈë pyëjtak tuˈugë ijxpajtën mä tuˈugë mëkjäˈäy diˈibë nety të dyaˈujtstäˈäyë tsyaˈx ets kom kyaj tnekymyëdaty mä tpëjtäˈägëdë kyojy pyëjtaˈaky ko jatëgok dyajmukët. Ta tjijtääy ja tsyaˈx parë tkojäˈänyë mas mëjatypyë, yëˈë wyinmääy: “Japëts nbëjkëˈktäˈäyët tëgekyë diˈibëts tyam të nyajpëdeˈeky es tëgekyë diˈibëts nmëdäjtypy. Netëts nnayˈanëëmëdët: Mmëdäjtypy may pëjkeˈeky diˈibë myajtunëp kanäk jëmëjt. Poˈx. Kay uuk. Jotkujkˈat”. Tyäˈädë jäˈäy kyaj wyinmääy ko tadë ux, mbäädë nety yˈooky (Luk. 12:16-20).

Ko xëë jëmëjt wyimbajnë, mbäät nmëmäˈäy nmëdäjëm ja meeny sentääbë diˈib nyajtuˈunäˈänëm ko nety nmëjjäˈäyënë. Ets mbäädë net yëˈë ndukäjpxëm parë nduˈunˈadëtsëm ets kyaj nëjkxëm mä naymyujkën, o mbäät kyaj nekytyuˈunëm tijaty nikëjxmˈäjtëm extëmë Dios mëduumbë. Kutsëˈëgë ko duˈun nˈadëtsëm. Ets pën ënäˈkˈäjtëm ets nnijäˈäwëm ko diˈib mas oy, yëˈë ko nduˈunëm prekursoor, ¿winmäˈäyëm ko ja ok duˈun nduˈunëm mët ko jawyiin nikoombatäˈänëmë meeny sentääbë? Oyxyëp ko nduˈunëmë mëjää parë Jyobaa nmoˈoyëm diˈib mas oy. Pes kyaj pën tnijawë pën ja nety jakumbom njukyˈäjtëm.

Ko nˈukëmë nëë diˈib yajmukp. Proverbios 23:20 xykyäjpxwijëm: “Këdii mduˈukmuktë mëdë jäˈäy diˈib mëˈuktëp”. Pën tuˈugë jäˈäy jantsy uugäämp, mbäät yˈuuky janäämëty ets jyënaˈany ko kyaj nyayajmuktëgoyaˈanyëty, jeˈeyë parë oy nyayjawëyaˈanyëty. Per pën tim uugäämp parë oy nyayjawëdët, oy ko tˈixët ti ja kyorasoon tuktunanëp.

Mä nwinˈijxëmë mëtnaymyaayëbë. Xëmë mëdë jäˈäy nnaybyatëm diˈib kyaj mëdë mëbëjkënë tyuˈugyë, extëm diˈib mëët nˈeskuelëˈäjtëm, diˈib mëët nduˈunëm o pënaty nmëtmaytyakëm ko ngäjpxwäˈkxëm. Per diˈib tëgatsy, yëˈë ko mëët nduˈukmujkëm o nˈëxtäˈäyëm parë mëët nnaymyaˈayëm. Mbäät nnaynyikäjpxtutëm ets njënäˈänëm ko oy jyaˈayˈaty. Perë Biiblyë yajxon tnigajpxy: “[Këdii] mnayakyëty myajwinˈëënët. Tëyˈäjtën extëm jyënaˈany tuˈugë ayuk: Yëˈë axëëkpë jamyëët yajmäˈtypy ja oyjyaˈayˈat ” (1 Kor. 15:33). Ko nnaymyaˈayëm mëdë jäˈäy diˈib kyaj tmëdunyë Jyobaa, mbäät xyajmäˈtëm mä nDiosmëduˈunëm, duˈun extëm ko axëk nëë kyuxaˈkxë mä yˈityë wäˈäts nëë. Ets mbäädë net ok duˈun njäˈäyˈäjtëm, nwinmäˈäyëm, ngäjpx nmaytyakëm ets nnaywyit nnayxyojxëm.

Mä nyajtuˈunëmë xëë tiempë. Kajaa tyam xyaˈijx xyajjäˈäwëm tijaty jembyëtsëëmp, per may kyaj yˈoyëty parë Dios mëduumbë. Apostëlë Pablo jyënany ko ni jeˈeyë mbäät ngaˈëbëtsëˈëm ngakäjpxpëtsëˈëmëm tijaty axëëk (Efes. 5:3). Ets ¿pën ja ngorasoonˈäjtëm yˈixaampy o myëdowaampy diˈib axëëk? Mbäät nwinmäˈäyëm ko niˈamukë jäˈäy yˈixäˈän jyawëyäˈändë näˈäganäˈäty ets ko yëˈë patëdëp ti yˈixandëp ets ti tyunandëp. Per diˈib mas oy, yëˈë ko njaygyujkëm ja käjpxwijën diˈibë Pablo yäjk ets kyaj nasˈijxëm parë nmëdoˈojëm ets nˈijxëmë axëkˈäjtën.

MBÄÄT NNAYAJTËGÄJTSËM

Mbäät nnayajtëgäjtsëm oy ja korasoon të xywyinˈëˈënëm ets oy të ngostumbrëpëjkëm nnaynyikäjpxtutëm ko nduˈunëm diˈib kyaj yˈoyëty (Éfes. 4:22-24). Min nˈokˈijxëm majtskë ijxpajtën.

Miguel,a yajtëgäjtsë jyot wyinmäˈäny mä wiˈixë nety tˈixyë jukyˈäjt madakën. Yëˈë jyënaˈany: “Nˈityëts mä tuˈugë paˈis mëdëtsë nëdoˈoxy etsëtsë nmäänk mä jäˈäy agujk jotkujk jyukyˈatäˈändë ets tmëdatäˈändë tijaty jembyëtsëëmp. Nan nmëdatandëts tijaty, per kyajts ndimwinmääy nbaˈoˈktëwëdëtsë meeny sentääbë. Per tajëts nbëjkyë kuentë ko nbaˈoˈktëˈëwëmë meeny sentääbë duˈun extëm ko nëjkxëm mä tuˈugë karreteerë diˈib kyaj jyëjpkëxy. Nˈanmääyëtsë Jyobaa parëts xypyudëkët ets nyajtëgatsëdëtsë njot nwinmäˈäny, njot ngorasoon ets nˈanmääyëts ko nmëdunaambyëtsë nety mëdëtsë nfamilyë nuˈunëts nmadäˈäktë. Ojtsëts ndukniwinmayëdë parëts adëyë njukyˈatäˈändë etsëts nnëjkxäˈändë mä tyëgoyˈatyë käjpxwäˈkxpë. Ko waanë yˈijty, tajëts ndëjkëdë tuumbë prekursoor, ets tëjëts nbëktë kuentë ko kyaj jyëjpˈamëty nmëdäjtëm mëjwiin kajaa tijaty parë agujk jotkujk njukyˈäjtëm”.

Leo, yëˈë nanduˈun xytyukˈijxëm ko jëjpˈam nbëjkëmë kuentë ti korasoon xytyuktunäˈänëm. Yëˈë pyëjkë kuentë ets myastut ja axëëkpë myëtnaymyaayëbë. Leo tnimaytyaˈaky: “Mët kojëts nduny, kuanëts kojëts ijty nduˈukmuktë mëdë jäˈäyëty diˈib tsoˈondëp wiink paˈis. Oyëtsë nety njanijawë ko uktëp mä tyuˈukmuktë, jantsy nëjkxäämbëtsë nety. Kanäk okëts njamuktëgooy, ets axëëgëts ok nnayjäˈäwë. Tajëts nwinmääy ko tsojkëbëtsë nety nˈixët wiˈix yajpäätyëtsë ngorasoon. Per yëˈëts xypyudëjkë Biiblyë kyäjpxwijën etsë mëjjäˈäytyëjk, yëˈëts diˈib xytyukˈijxtë ko diˈibëtsë nety njotmayˈajtypy, yëˈë kojëts naymyayëty mëdë jäˈäy diˈib kyaj ttsekyë Jyobaa. Tyam, yëˈëts nyajtuumbyë telefënë kojëtsë negosyë nduny parëts kyaj nëgoo mëdë jäˈäy nnaybyäädëdë”.

Nan oy ko nˈijxëm wiˈix yajpääty ja korasoon ets kyaj nnaywyinˈëˈënëm. Ets parë nnijäˈäwëm, tsojkëp nˈamdoˈojëmë Jyobaa nyaybyudëkë, “yëˈko yëˈë nyijäˈäwëtyaapy ti japˈäjtp mä korasoon” (Sal. 44:21). Nan nmëdäjtëmë Biiblyë, diˈib duˈun extëmë ijxn, diˈib mbäät xytyukˈijxëm wiˈix jodoty njäˈäyˈäjtëm (Sant. 1:22-25). Nan yajmoˈoyëmë oyatypyë käjpxwijën mët yëˈëgyëjxm ja ëxpëjkpajn etsë naymyujkën. Mët tukëˈëyë tyäˈädë naybyudëkë, mbäät nguentˈäjtëmë korasoon ets nduˈunëm ti Jyobaa tyukjotkëdakypy.

[Notë]

[Dibujë diˈib mä pajina 28]

[Dibujë diˈib mä pajina 29]

¿Wiˈix xypyudëjkëm ko ngäjpxëmë Biiblyë jabom jabom parë nˈijxëm wiˈixë korasoon yajpääty?

[Dibujë diˈib mä pajina 29]

Ko nuˈkxtakëm xypyudëjkëm parë nnijäˈäwëm wiˈix nyajpatëm jodoty

[Dibujë diˈib mä pajina 29]

Ko nnaymyujkëm xypyudëjkëm parë nnijäˈäwëm ti korasoon tyunaampy