DIˈIB MIIMP MÄ NYIˈAK

¿Ti Dios të mdukmëdunyëty?

“Jaˈa ko yëˈë Dios nëgoo oj tˈoktsojknë ja naxwinyëdë jäˈäyëty, pääty ttuknigejxy ja tyuˈukˈUˈunk, es pënaty myëbëjktëp jikyˈattëp winë xëë winë tiempë es kyaj kyutëgoytyët.” (Fwank 3:16)

Tyäˈädë tekstë yëˈë diˈib mayë jäˈäy nyijäˈäwëdëp ets kyäjpxtëp mä Biiblyë. Jyënäˈändë ko kyaj jyaˈˈatyë wiinkpë tekstë diˈib “yajxon nyigäjpxëp wiˈixë Dios yˈity mëdë naxwinyëdë jäˈäy ets wiˈix nbatëm ja nitsokën”. Pääty mä näägë paˈis, ta jäˈäy diˈib pyëjtaktëbë tyäˈädë tekstë mä pankartë ko nyëjkxtë mä tuˈugë partiidë, mä jäˈäy yˈëyëˈëk kyuyattë o mä ixy jawë pyëtsëmy, ets ta diˈib pyëjtaktëp mä kyarrë o tkëxjäˈäytyë muum mä potsy.

Tyäˈädë jäˈäyëty ijttëp seguurë ko tsojkëdëbë Dios ets ko mmoˈoyanëdëbë jukyˈäjtënë winë xëë winë tiempë. ¿Wiˈix mijts mwinmay? ¿Waˈandaa ti Dios të ttuny parë mdukˈixyëty ko mtsojkëp?

“NËGOO OJ TˈOKTSOJKNË JA NAXWINYËDË JÄˈÄYËTY”

Mayë jäˈäy myëbëjktëp ko Dios yëˈë diˈib të dyajkojy tukëˈëyë tijaty yä Naxwiiny ets tsäjpotm, ja kojy pëjtaˈaky etsë naxwinyëdë jäˈäy. Jantsy tsip njaygyujkëm wiˈixën të kyojy tukëˈëyë diˈib jukyˈäjtp, pes jantsy oy të kyojy, pääty njënäˈänëm ko tam pën diˈib jantsy kuwijy diˈib duˈun të dyajkojy. Nimayë jäˈäy kyukäjpxëdëp ko jyukyˈattë tuˈuk tuˈugë xëë. Ets nyijäˈäwëdëp ko kyaj këˈëm nyayajjukyˈatëdë, pes yëˈë Dios xymyoˈoyëmë nëë, poj etsë käˈäy ukën, ets yëˈë diˈib tyukniwijtsëtyaay extëm mä wiˈix myinyë nëë tuu ets jyëmbity jatëgok tsäjpotm.

Oy ko nmoˈoyëmë dyoskujuyëmë Dios ko tukëˈëyë tyäˈädë xymyoˈoyëm, pes yëˈë të xyajkojëm ets yëˈë diˈib xyajjukyˈäjtëm (Salmo 104:10-28; 145:15, 16; Apostʉlʉty 4:24). Duˈun tuk pëky xytyukˈijxëm ko xytsyojkëm. Apostëlë Pablo duˈun tkujäˈäyë: “[Dios] yëˈë nidëgekyë xyajxajëm, es xymyoˈoyëm ja njikyˈäjtënˈäjtëm es tëgekyë diˈibë nmëdäjtëm. Jaˈa ko Dioskyëjxm njikyˈäjtëm, nˈyuˈxëm es nˈijtëm” (Apostʉlʉty 17:25, 28).

Perë Diosë tsyojkën, kyaj jaayë nyigëxëˈëky mä xyˈijxˈijt xykyuentˈäjtëm. Të xyajkojëm parë njäˈäwëm ko xytyëgoyˈäjtxëmë “Diosë yˈëxpëjkën” ets xypyudëjkëm parë nbatëm (Mateo 5:3, Traducción del Nuevo Mundo). Ets pën nmëmëdoˈojëm, mbäät xyfyamilyëˈäjtëm ets xyˈuˈunkˈäjtëm (Romanʉs 8:19-21).

Duˈun extëm jyënaˈanyë Fwank 3:16, Dios yajnigëxëˈk ko xytsyojkëm ko tkejxy ja yˈUˈunk yä Naxwiiny. Jesus myiiny parë ojts xytyukniˈˈijxëm pënën diˈib Diosˈäjtypy ets Tyeetyˈajtypy ets parë ojts xykyuˈoˈkëm. Per mayë jäˈäy axtë tyambäät kyaj tjaygyukëdë tiko yˈoˈky ets wiˈixë yˈoˈkën dyajnigëxëˈëky ko xytsyojkëmë Dios. Min nˈokˈijxëm wiˈixë Biiblyë jyënaˈany.

OJTS XYTYUKNIGAJXËM JA “TYUˈUKˈUˈUNK”

Niˈamukë nbäˈämbajtëm, nmëjjäˈäyëm ets nˈoˈkëm, per kyaj duˈunë Dios xyjatukmëtsojkëm. Ko ojts dyajkojy ja tim jawyiimbë yetyëjk etsë toxytyëjk, yëˈë parë jyukyˈattët winë xëë winë tiempë mä tuˈugë lugäärë tsujpë yä Naxwiiny. Per ojts tˈanëëmëdë ko net duˈun jyukyˈattët pën mëdoodëp, pën kyaj, ooktëp (Génesis 2:17). Ja tim jawyiimbë yetyëjk, Adán, kyaj tmëmëdooyë Diosë yˈanaˈamën, pääty yˈoˈktë ets nanduˈun ttukninäjxtë ja tyëëm yˈääts. Apostëlë Pablo tnimaytyaky: “Dëˈën extëm tuˈuk jeˈeyë ja jäˈäy kyaj tmëmëdooy ja Dios es mëdë tyäˈädë pojpëkyëjxm tsyondaky ja oˈkën, pääty nidëgekyë ja jäˈäyëty yˈooktë, mët ko nidëgekyë pyojpëtuundë” (Romanʉs 5:12).

Perë Dios, tyuumbyë tëyˈäjtën (Salmo 37:28). Pääty, oy ttukumëdooy ja tim jawyiimbë yetyëjk etsë toxytyëjk mët ko kyamëmëdoojë, yëˈë kyaj ttuknikäjpxpejtyë naxwinyëdë jäˈäy parë xëmë yˈayowët ets yˈoogët winë xëë winë tiempë. Yëˈë tyuunë tëyˈäjtën parë mbäät jyukyˈaty winë xëë winë tiempë pënaty mëmëdoojëdëp. ¿Wiˈix? Ko jatuˈugë jäˈäy tˈoˈktëgatsët ja jukyˈäjtën (Éxodo 21:23). Adán yajtëgooyë jukyˈäjtënë wäˈätspë, pääty tsojkëbë nety jatuˈugë wäˈäts jäˈäy dyakëdë jyukyˈäjtënë wäˈätspë.

Nipënë nety mbäät tkayakyë jyukyˈäjtënë mä Adángë tyëëm yˈääts, perë Jesus mbäädë nety dyaky (Salmo 49:6-9). Yëˈë wäˈätsjäˈäy myaxuˈunkˈäjty, duˈun extëmë netyë Adán. Pääty ko dyajkyë jyukyˈäjtën, ta dyaˈˈawäˈätspëtsëëmyë naxwinyëdë jäˈäy mä nety ja poky kaytyey yaˈitëdë tsumy matsypyëm, ets mbäädë nety jyukyˈattë ja yˈuˈunk yˈënäˈkë Adán mëdë Eva extëmë nety yëˈëjëty (Romanʉs 3:23, 24; 6:23). ¿Jadaa ti diˈib mbäät nduˈunëm parë ndukˈoyˈäjtëm ko Dios dyajnigëxëˈëgyë tsyojkën?

“PËNATY MYËBËJKTËP”

Fwank 3:16 yˈakjënäˈäny: “Es pënaty myëbëjktëp [Jesus] jikyˈattëp winë xëë winë tiempë es kyaj kyutëgoytyët”. Tyäˈädë yëˈë yˈandijpy ko pën jukyˈatäˈänëm winë xëë winë tiempë, tsojkëp nmëbëjkëmë Jesus ets nmëmëdoˈojëm.

Mbäät pën jyënaˈany: “Perë tyäˈädë bersikulo kyaj yëˈë tmaytyaˈaky parë nmëmëdoˈojëm, pesë Jesus jyënany ko niˈamukë pënaty myëbëjktëp pyäättëbë jukyˈäjtënë winë xëë winë tiempë”. Per ko mä Biiblyë yajmaytyaˈagyë mëbëjkën, kyaj yëˈëyë tmaytyäˈägäˈäny ko ti nëgoobë nmëbëjkojëm. Pes parë Dios xykyupëjkëm kyaj yëˈëyë tsyekyëty nnijäˈäwëm ko Jesus yëˈë diˈib xyajnitsokëm. Tsojkëp nduˈunëmë mëjää parë nguytyuˈunëm tijatyë Jesus tukniˈˈijxë. Pën kyaj nguytyuˈunëm, kyaj tsyobäädäˈäny ko njënäˈänëm ko nmëdäjtëmë mëbëjkën. Pesë Biiblyë jyënaˈany ko mëbëjkën “yˈity extëmë oˈkpë, pën kyaj nduˈunëm ja oybyë” (Santya̱ˈa̱gʉ 2:26). Pën nmëbëjkëmë Jesus, mbäät xypyudëjkëm parë nguytyuˈunëm ets njukyˈäjtëm extëm tijaty nmëbëjkëm.

Apostëlë Pablo duˈun tnimaytyaˈaky: “Yëˈë Jesukristë tsyojkën xytyukmëdijëpts. Mët ko nmëdäjtypyëts ja tëyˈäjtën ko yëˈë yˈeˈky mët yëˈëgyëjxm nidëgekyë jäˈäy [...] es dëˈën kyaj nnakyjyikyˈäjtëm extëmë ngëˈëm winmäˈänyˈäjtëm, jaˈa dëˈën extëm ttseky ja Jesukristë diˈibë oj xykyuˈoˈkëm es oj jyikypyeky mët ëtsäjtëmgyëjxm” (2 Korintʉ 5:14, 15). Pën njantsy myëjjäˈäwëm ko Jesukristë ojts xykyuˈoˈkëm, ta nyajtëgäjtsëmë jukyˈäjtën; kyaj yëˈëyë nduˈunëm tijaty ntsojkënyëˈäjtëm, yëˈë nduˈunëm tijatyë Jesus tsyejpy. O ja tuk pëky njënäˈänëm, yëˈë jëjpˈam nbëjtakëm ko nguytyuˈunëmë Jesusë yˈanaˈamën. Tsojkëp nyajnigëxëˈkëm ko nguytyuˈunëm mä wiˈix tijaty nˈijxëm, nwinmäˈäyëm ets nduˈunëm. ¿Wiˈix ndukˈoyˈatäˈänëm ko nyajnigëxëˈkëmë mëbëjkën mä Jesus?

“JIKYˈATTËP WINË XËË WINË TIEMPË ES KYAJ KYUTËGOYTYËT”

Mä jyëjpkëjxnë Fwank 3:16 tnigajpxyë tyäˈädë Diosë wyandakën: pënaty myëbëjktëp ko Jesus ojts xykyuˈoˈkëm ets pyanëjkxtëbë yˈanaˈamën kyaj yˈoogäˈändë, jukyˈatandëp winë xëë winë tiempë. Per kyaj niˈamukë jäˈäy jyukyˈatäˈändë yä Naxwiiny winë xëë winë tiempë diˈibë Dios tsojkëdëp.

Tuk grupë jam jyukyˈatäˈändë tsäjpotm winë xëë tiempë. ¿Wiˈix nnijäˈäwëm? Yëˈko Jesus duˈun tˈanmääyë yˈëxpëjkpëty ko nëjkxëp tˈixäˈäny tuˈugë lugäär jam tsäjpotm parë mëët yˈanaˈamdët (Fwank 14:2, 3; Filipʉs 3:20, 21). Pënaty jukypyëkandëp tsäjpotm, yëˈë diˈib myëdunandëbë Dios etsë Kristë extëmë saserdotëty “es yˈanaˈamdët mët ja Kristë tuk mil jëmëjt” (Diˈibʉ Jatanʉp [Apocalipsis] 20:6).

Niwaanë jeˈeyë Dios mëduumbëty diˈib yˈaxäjëyandëbë tyäˈädë kumäˈäyën. Jesus jyënany: “Kaˈp mtsëgëëygyëxy, mëtyiibë duˈun nebyë jaˈa boreegëjëny, miity niwaanë miity ajkëxy, perë jaˈa Dios Teety duˈun tsojkp xymyoˈowaangëxy jaˈa anaˈamdaakt jiiby tsajpjooty” (Lucas 12:32, Nuevo Testamento de Mazatlán). ¿Ninäägë tyäˈädë jäˈäy diˈib duˈun extëm ja borreegë diˈib niwaanë? Diˈibʉ Jatanʉp 14:1, 4 jyënaˈany: “Oknëmts nˈijxy ja Borreeguˈunk ko naty jam tyanë mä Syon Kopk. Jamë naty mëët mëgoˈpx ja juxytsyikxymyäjtaxk mil ja jäˈäyëty diˈibë naty tsäˈäy wyimbokkëjxy mët ja syeyë ja Borreeguˈunk esë Dios Teety [...]. Yëˈë dëˈënëty oj nyitsoˈoktë mä naxwinyëdë jäˈäy es ijttëp extëm ja tëëmp diˈibë jawyiin tëëmpˈäjtp es yajtukmëyoxy ja Dios esë Borreeguˈunk”. Jeˈeyë 144, 000 jäˈäy diˈib nëjkxtëp tsäjpotm, tim niwaanë ko nˈijxkijpxyëm mëdë miyonkˈambë jäˈäy diˈib jukyˈäjttëp yä Naxwiiny. Mä tyäˈädë tekstë nanduˈun jyënany ko yˈanaˈamäˈändë. ¿Pënaty yˈanaˈamandëp?

Jesus duˈun tmaytyaky ja myëmajtskpë grupë diˈib nanduˈun tyukˈoyˈataambyë tyäˈädë Anaˈamën diˈib itäämp tsäjpotm: “Nmëdäjtypyëts ja wiinkpëty ja nborreegëts mäts jatuˈugë ngorral, es nyajminëpts nandëˈën mä tyäˈädëty. Xymyëdowdëpts ëj yëˈë, es tuk kajpëˈëk yˈitët yëˈë borreegë es tiˈigyë ja kuentˈäjtpë” (Fwank 10:16). Tyäˈädë wiinkpë borreegëty, yëˈë diˈib jukyˈatandëp winë xëë winë tiempë yä Naxwiiny, duˈun extëmxyëp ojts jyukyˈattë Adán mëdë Eva. ¿Wiˈix nnijäˈäwëm?

Mä Biiblyë kanäkˈok tmaytyaˈaky ko Naxwinyëdë jyëmbitäˈäny extëm tuˈugë it lugäärë tsujpë. Pën myajtëyˈäjtëndëkëyaampy, ëxtäˈäy mä mBiiblyë ets käjpxë tyäˈädë tekstë: Salmo 37:9-11; 46:8, 9; 72:7, 8, 16; Isaías 35:5, 6; 65:21-23; Matewʉ 5:5; Fwank 5:28, 29 etsë Diˈibʉ Jatanʉp 21:4. Mä tyäˈädë tekstë ojts yajnaskäjpxë ko jyëjptëgoyaˈanyë tsip, yuu, päˈäm etsë oˈkën. Ets mä tiempë myiny kyëdaˈaky, ja jäˈäy tkojäˈändë jyëën tyëjk, dyaˈitäˈändë tijaty yä Naxwiiny ets dyajˈyaagäˈändë yˈuˈunk yˈënäˈk agujk jotkujk.a ¿Mjukyˈatäämp duˈun? Ta kanäk pëky tiko mbäät nmëbëjkëm ko seguurë duˈun yˈadëwäˈäny.

MËJWIIN KAJAA TIJATYË DIOS TË XYTYUKMËDUˈUNËM

Ko net duˈun të nˈijxëm, ta yajxon njaygyujkëm ko mëjwiin kajaa tijatyë Dios të xytyukmëduˈunëm. Yëˈë të xymyoˈoyëmë jukyˈäjtën, wijyˈäjtën ets axtë oyˈäjt mëkˈäjtën ets tijaty nijukyˈäjtëm. Per diˈib mas jëjpˈam, yëˈë ko tkejxyë yˈUˈunk parë të xykyuˈoˈkëm ets duˈuntsoo mbäät niˈigyë nyajkunuˈkxëm extëm të nˈijxëm mä Fwank 3:16.

Mëjwiin kajaa xyajxondäˈägäˈänëm ko njukyˈäjtëm winë xëë winë tiempë, agujk jotkujk ets tuˈugyë mä kyaj nyekyjaˈˈatäˈänyë päˈäm, tsip, yuu etsë oˈk tëgoˈoyën. Këˈëm mbäät nduˈunëmë mëjää parë nbatëmë tyäˈädë kunuˈkxën. Per diˈibë net mbäät nnayajtëˈëwëm yëˈë: ¿ti tyam ndukmëduˈunëmë Dios?

[Notë]

[Dibujë diˈib mä pajina 4]

Jesus xondaˈakyˈää xondaˈakyjyot kyëdaky yä Naxwiiny parë ojts xykyuˈoˈkëm ets xyaˈˈawäˈätspëtsëˈëmëm mä ja poky etsë oˈkën