Pënaty kyäjpxtëbë ëxpëjkpajn yëˈë nyijawëyandëp
¿Pënë Dios të yajkojˈyëty?
Tuˈugë uˈunkteety tˈanëëmë yˈuˈunk diˈib jëxtujkë jyëmëjt: “Tëëyëp, Dios ojts dyajkojˈyë Naxwinyëdë ets tukëˈëyë tijaty jaˈäjtp. Nan ojts dyajkojˈyë Xëë, Poˈo etsë mëtsäˈä”. Ta ja mixyuˈunk waanë wyinmay ets dyajtëy: “Tatë... ¿ets pënë Dios të yajkojˈyëty?”.
Ta ja uˈunkteety yˈatsoy: “Nipën, Dios tamyëm yëˈë”. Kom mutsknëm, okjotkujkˈäjtp extëmë tyeety të yˈatsoyëty. Per ko yaˈknë, duˈunyëm tnijawëyaˈany. Tsip tjaygyukët ko Dios kyaj tmëdatyë tsyonëˈk tsyondakën. Pes axtë tsäjp etsë nax myëdäjtë tsyonëˈk tsyondakën. Pääty duˈunyëm nyayajtëyëty: ¿mä tsyoˈonyë Dios?
¿Wiˈixë Biiblyë jyënaˈany? Nanaduˈun extëm ja uˈunkteety diˈib të yajnigajpxy. Moisés tˈanmääyë Jyobaa: “Mä nety kyapëtsëmynyëmë tun kopk mijts ojts xyajminy xyajjäˈtyë naxwinyëdë ets ja nax diˈib ijt windëëp, yëˈko winë xëë winë tiempë ets winë xëë winë tiempë mijts mˈity Dios” (Salmo 90:1, 2). Ja kugajpxy Isaías nanaduˈun jyënany: “¿Ti kyaj xynyijawë, o kyajnëm xymyëdoyˈaty? Jyobaa diˈib tukëˈëyë të dyajkojtäˈäy yä naxwiiny, yëˈë tuˈugë Dios diˈib winë xëë winë tiempë” (Isaías 40:28). Ets mä Judas jyënaˈany ko Dios duˈunyëmë yˈity “winë xëë winë tiempë” (Juudʉs 25).
Tyäˈädë bersikulo yëˈë xytyukˈijxëm ko Dios, yëˈë “rey winë xëë winë tiempë” extëm jyënanyë apostëlë Pablo (1 Timotee 1:17). O ja tuk pëky njënäˈänëm, tamyëm yˈity, oy nuˈun ja tiempë nyaxët. Ets xëmë yajpäädäˈäny (Diˈibʉ Jatanʉp [Apocalipsis] 1:8). Pääty, ko Dios yˈity winë xëë winë tiempë, duˈun tuk pëky dyajnigëxëˈëgyë jyaˈayˈäjtën.
¿Tiko tsyiptaˈaky njaygyujkëm? Yëˈko kyaj jeky njukyˈäjtëm, pääty kyaj duˈunë tiempë nˈijxëm extëmë Jyobaa tˈixy. Extëm nˈokpëjtakëm, parë Dios tuk mil jëmëjt, duˈun tˈixy extëm jeˈeyë tuk xëë, pes yëˈë duˈunyëm jyukyˈaty winë xëë winë tiempë (2 Peedrʉ 3:8). Min nˈokˈijxëm tuˈugë ijxpajtën. Tuˈugë muˈu diˈib të yaˈkˈabety, jeˈeyë yˈakjukyˈaty 50 xëë. ¿Mbäät tjaygyukë ko naxwinyëdë jäˈäy jyukyˈaty 70 o 80 jëmëjt? ¡Kyaj, tsip tjaygyukët! Pes ko ëtsäjtëm nyaˈijxkijpxyëm mëdë Dios, duˈunxyëp extëmë muˈu. Tim yiˈinëm waanë wijyˈäjtënë nmëdäjtëm, kyaj dyuˈunëty extëmë Dios (Isaías 40:22; 55:8, 9). Pääty kyaj mbäät njaygyujkëtyaˈayëm wiˈix yëˈë yˈixëty.
Oy xytsyiptakxëm njaygyujkëm ko Dios winë xëë winë tiempë yˈity, tëyˈäjtënëˈë. Koxyëp pënë Dios ojts yajkojˈyëty, tadë jäˈäy, yëˈëxyëp diˈib tukëˈëyë tijaty të dyajkojtäˈäy. Perë Biiblyë jyënaˈany ko Jyobaa yëˈë të dyajkojtäˈäy “tëgekyë diˈibë ijtp” (Diˈibʉ Jatanʉp 4:11). Ëtsäjtëm nnijäˈäwëm ko tëëyëp kyaj netyë tsäjp etsë nax (Génesis 1:1, 2). ¿Wiˈix ojts kyojy? Pes tamë nety jyukyˈäjnë ja diˈib ojts dyajkojy. Ets nan tamë nety yajpääty mä nituˈuknëmë wijyjyaˈay kyakojy, extëmë ja tim jawyiimbë yˈUˈunk etsë anklësëty (Job 38:4, 7; Kolosʉ 1:15). Tyäˈädë yëˈë yajxon xytyukjaygyujkëm ko Dios naytyuˈugë nety mä tkayajkojynyëm tijaty. Yëˈë kyaj pën ojts yajkojˈyëty, pes nitii nety kyajaˈˈaty ets nipën.
Ko tyam njukyˈäjtëm ets ko të kyojy tukëˈëyë tijaty jaˈäjtp, yëˈë xytyukˈijxëm ko tam tuˈugë Dios diˈib jukyˈäjtp winë xëë winë tiempë. Dios diˈib tukëˈëyë yajˈyuˈkxtaapy tijaty jaˈäjtp yä Naxwiiny ets tsäjpotm ets diˈib të tpëjtaˈagyë anaˈamën wiˈix yˈittët, yëˈë duˈun diˈib jukyˈäjtp winë xëë winë tiempë. Yëˈëyë diˈib të tmoˈoyë jyukyˈäjtën tukëˈëyë diˈib jukyˈäjtp (Job 33:4).