Nˈoknimaytyakëmë Diosë yˈayuk extëm mbäädë jäˈäy tˈoymyëdoy
1. Pënaty ojts tpanëjkxtë Kristë, ¿ti xytyukniˈˈijxëm ko wiˈixëmë jäˈäy tmëtmaytyaktë?
1 Pënaty ojts tpanëjkxtë Kristë tyukmëtmaytyaktë jäˈäy ja oybyë ayuk oy mä tsyoˈondë ets oy wiˈixëm ja mëbëjkën tmëdäjttë (Kol. 1:23). Oyë nety yëˈëyëm tmaytyäˈäktë Diosë Kyutujkën, per wiˈixëm ja jäˈäy tmëtmaytyaktë, yëˈë yˈijxtë pënatyë nety mëët yajpäättë. Extëm nˈokpëjtakëm, ko Pedro tmëtmaytyaky näägë judiyë jäˈäy diˈib wyintsëˈkëdëbë Diosë yˈAyuk, yëˈë ojts ttukmëtmaytyaktsoony diˈib kyujäˈäyë kugajpxy Joel (Apos. 2:14-17). Per mä Apostʉlʉty 17:22-31 jap nˈijxëm wiˈixë Pablo tëgatsy tmëtmaytyaky tuk grupë grieegë jäˈäyëty. Tyam, nan ta lugäär mä ngäjpxwäˈkxëm mä jäˈäy twintsëˈëgë Biiblyë ets mbäät ndukˈijxëm ko nëjkxëm tëjkmdëjkm. Per pën ja jäˈäy kyaj tmëbëkyë Kristë o kyaj ttsojkënyëˈatyë Biiblyë o ja relijyonk, oy ko kyaj netyë ndukˈijxëmë Biiblyë ko nmëtmaytyakëm.
2. ¿Wiˈix mbäät nyajtuˈunëmë ëxpëjkpajn diˈibë nety yajkëyäämp parë nbudëjkëmë jäˈäy diˈib myëbëjktëbë Biiblyë ets diˈib kyaj?
2 Nˈokˈyajtuˈunëm yajxonë ëxpëjkpajn diˈib yajkëyakäämp. Mä tsyondaˈagyë septiembrë 2012 axtë agostë 2013, ja win majtsk poˈojëty tyëgatsäˈäny ja ëxpëjkpajn diˈib yajkëyakäämp mä ngäjpxwäˈkxëm, ets nan yajkëyakäämbë rebistë, trataadë etsë foyetë. Ets oyë jäˈäy tkamëdowäˈänëdë Biiblyë mä ngäjpxwäˈkxëm, mbäät yëˈë ndukmëtmaytyakëm diˈib yˈoymyëdowëp. Ets pën näägë jäˈäy yˈoymyëdoopy oyë nety ja Biiblyë të ngatukmëtmaytyakëm o të ngakäjpxëm nituˈugë tekstë, tsojkëp jatëgok nnijëmbijtëm parë nbudëjkëm ets tmëbëkëdë Dios ets ja yˈAyuk. Per ko net nmëtmaytyakëmë jäˈäy diˈib wyintsëˈkëbë Biiblyë, mbäät yëˈë ndukmëtmaytyakëm o nyajtuˈunëmë ëxpëjkpajn diˈib myaytyakypyë Biiblyë. Mbäät nmoˈoyëmë liibrë ¿Ti tukniˈijxëbë Biiblyë? etsë foyetë Mëdow ko Dios mmëgajpxyëty o Mëdow ko Dios mmëgajpxyëty ets mjukyˈatët winë xëë, oyë nety yëˈë kyayajkëyaky mä tadë poˈo. Diˈib jëjpˈam, yëˈë ko nmëtmaytyakëmë jäˈäy extëm mbäät tˈoymyëdoy.
3. ¿Wiˈix yaˈijxkijpxyë korasoon mëdë nax mä yajniˈipy ja tëëm?
3 Nˈokjotjäjtëmë jäˈäy. Ja jäˈäyë kyorasoon duˈun yajpääty extëm ja nax mä yajniˈipy ja tëëm (Luk. 8:15). Ets duˈun extëm näägë nax niˈigyë yajniduungë, nanduˈun näägë jäˈäyë kyorasoon, tsojkëp niˈigyë nduˈunëm parë jyotjäˈtëdët ja Diosë yˈAyuk ets tpëkët ja yˈääts tyikts parë yonët. Ja Dios mëduumbëty diˈib mä primer siiglë ojts yˈoybyëtsëˈëmxëdë ko tniptë ja Diosë yˈAyuk mä jäˈäyë kyorasoon diˈib wiˈixëm yajpat, ets yëˈë diˈib yajxondakëdë ets yajjotkujkˈäjtëdë (Apos. 13:48, 52). Ëtsäjtëm, nan mbäät jotkujk nnayjäˈäwëm pën nˈijxëm yajxon wiˈixë jäˈäy nmëtmaytyakëm.