Jat wiˈix mas oy xytyunëdë Diosë tyuunk: kujayë mä rejistrë pënaty të tˈoymyëdoyë Diosë yˈayuk

“Kuentëˈat ja mjikyˈäjtën es ja mˈëxpëjkën.” (1 Tim. 4:16.) Tyäˈädë käjpxwijën diˈibë Pablo myooyë Timoteo, yëˈë xytyukˈijxëm ko oy näämnëm o tëëyëp ndëjkëm ëxpëjkpë, tsojkëp nduˈunëmë mëjää parë mas oy nduˈunëm. Pääty mä Wiˈix nduˈunëmë Diosë Tyuunk myëminaampy tuˈugë jembyë artikulo, diˈib xëˈäjtp “Jat wiˈix mas oy xytyunëdë Diosë tyuunk”. Tuˈuk tuˈugë artikulo tuk pëkyaty tnigäjpxäˈäny diˈib mas jëjpˈam mbäät nduˈunëm ets wiˈix. Yaˈˈanmäˈäyëm niˈamukë ets duˈun nduˈunëm mä tadë poˈo. Ets ko kyëxët tuˈugë poˈo, ta yajnimaytyäˈägäˈäny wiˈix të xypyudëjkëm mä Yajniˈëxpëkë wiˈix ngäjpxwäˈkxëm. Mä tyäˈädë artikulo yëˈë tyam yajnimaytyäˈägäämp wiˈix mbäät ngujäˈäyëm mä rejistrë pënaty të tˈoymyëdoyë Diosë yˈayuk.

¿Tiko jyëjpˈamëty? Yëˈë tuunk diˈib nikëjxmˈäjtëm kyaj jeˈeyë tˈandijy ngäjpxwäˈkxëm, nanduˈun nnijëmbijtëm jatëgok pënaty yˈoymyëdoodëbë Diosë yˈayuk ets ndukniˈˈijxëm ja tëyˈäjtën, duˈunë nety nyajxoˈkëm ja tëëm diˈib të nnipëm (Mat. 28:19, 20; 1 Kor. 3:6-9). Pääty, tsojkëp ets jatëgok nbatëm ja jäˈäy, ndukmëtmaytyakëm diˈib yˈoymyëdowëp ets nˈakˈyajnëjkxëm ja maytyaˈaky mä ojts nyajwëˈëmëm. Päätyën jyëjpˈamëty ets ngujäˈäyëm ko nbatëm tuˈugë jäˈäy diˈib yˈoymyëdoobyë Diosë yˈayuk.