Jat wiˈix mas oy xytyunëdë Diosë tyuunk: ko mnaytyukjotmaytyunëdët ja jäˈäy

Tiko jyëjpˈamëty. Jesus naytyukjotmaytyuunë niduˈuk niduˈugë jäˈäy. Tëgok, ojts dyaˈˈagëdaˈaky tuˈugë yetyëjk diˈibë nety nat, ets kom pyëjkë kuentë ko tsëˈkëp, ta ojts dyajnëjkxy wiinktsoo mä jäˈäy kyaj yˈixëdët (Mar. 7:31-35). Jyaygyujkë wiˈix ja yˈëxpëjkpëty yaˈijx yajpattë ets duˈun tijaty ttukmëtmaytyaky nuˈun mbäät tjaygyukëdë (Fwank 16:12). Ets desde jam tsäjpotm, Jesus duˈunyëm nyaytyukjotmaytyunyëtyë jäˈäy (2 Tim. 4:17). Pääty ninuˈun nbanëjkxëmë Kristë, nduˈunëmë mëjää parë njäˈäyˈäjtëm extëm yëˈë (1 Peed. 2:21; 1 Fwank 3:16, 18). Parë yˈoybyëtsëmët tijaty nduˈunëm mä ngäjpxwäˈkxëm, tsojkëp njaygyujkëm wiˈix ja jäˈäy yaˈixy yajpääty, tijaty tsyojkënyëˈajtypy ets tijaty myëmääy myëdajpy. Mas niˈigyë jäˈäy tmëdowäˈänët, pën pyëjktëbë kuentë ko jantsy naytyukjotmaytyuˈunëm ets ko kyaj jeˈeyë të ninëjkxëm parë nmoˈoyäˈänëmë ëxpëjkpajn o jeˈeyë nmëtmaytyäˈägäˈänëm.

Wiˈix nduˈunëm:

Niˈëxpëkë yajxon. Kyaj mtsëˈëgët, it ajiiky amëguˈuk ets xiˈik xon.
Ix tun tijaty. ¿Jam ti diˈib yajnigëxëˈkypy ko ja jäˈäy tamë yˈuˈunk yˈënäˈk, ko tsyojkënyëˈajtypyë pëjy ujts ets ko myëdäjtypy jëyujk animal jyënˈagëˈëy tyëjkˈagëˈëy? ¿Mˈijxypy ko tyukˈijtëp tuˈugë relijyonk? Mbäädë tyäˈädë mbudëkëty ko xyajtsondäˈägëdë maytyaˈaky.
Yajtëw wiˈix ja jäˈäy wyinmay ets mmëdooˈit yajxon, këdii xykyajpxypyoty. Winˈijxpat parë xyajnigëxëˈëgët ko mmëdooˈijtypy. Mmoˈoyë dyoskujuyëm ko tijaty tnigäjpxët ets mëjkumay. Këdii mëët mnaygyajpxytsyiigyëty.
Yajtëgats ja maytyaˈaky. Yëˈë tukmëtmaytyäˈäk ja jäˈäy diˈib myëdowaampy. Kyaj nëgoo tsyiptaˈaky, pesë trataadë, foyetë etsë rebistë kanäk pëky tijaty tmaytyaˈaky. Pën mninëjkxypy ja jäˈäy mä kyaj tmëdatyë tiempë extëm ko jap tyuny, waanë jeˈeyë mëtmaytyakoj.

Tiko duˈun xykyatuny mä tyäˈädë poˈo:

Tuundäˈäk mä mDiosˈawdaty mëdë mfamilyë wiˈix xyajtëgatsäˈändë ja maytyaˈaky diˈibë jäˈäy yˈoymyëdowëp, o mä mgäjpxwäˈkxtë myentrës mnëjkxtë mä ja tuˈugë tëjk.
Ja diˈib jyuˈtypyë grupë parë nëjkxëm tëjkˈayeˈebyë, nan mbäät tnimaytyaˈaky wixaty mbäät naytyukjotmaytyuˈunëmë jäˈäy o dyajnaxët tuˈugë demostrasyonk.