Jat wiˈix oy xytyunëdë Diosë tyuunk: ko xynyijawët wiˈixë jäˈäy xyˈatsoojëmbitët diˈib jotˈambëjkp

Tiko jyëjpˈamëty. Mä ngäjpxwäˈkxëm mayë jäˈäy nbatëm diˈib xyˈatsoˈowëm wintsëˈkën myëët. Perë Jesus jyënany ko jaˈˈatäämp diˈib xyˈaxëkˈixäˈänëm (Fwank 17:14). Pääty kyaj tiko mëjˈixy mëjmëdoy njäˈäwëm ko jäˈäy xytyukjotˈambëjkëm. Pën yajtukjotˈambëjkëm, tsojkëp njäˈäyˈäjtëm extëmë Jyobaa ttukjotkëdäˈägët, pes yëˈë diˈib ngudënäˈäyëm (Rom. 12:17-21; 1 Peed. 3:15). Ko yajxon nˈatsoˈojëm, ta ja jäˈäy kyaj niˈigyë jyotˈambëkët, ets nëjkxëp tpëkyë kuentë ko oy njäˈäyˈäjtëm ets nanduˈun pënaty xyˈijxëm. Ets nëjkxëp tmëdooˈity ko jatëgok nyaxtëdë nmëguˈukˈäjtëm (2 Kor. 6:3).

Wiˈix nduˈunëm:

Këdii mjotˈambëky ets it ajiiky amëguˈuk, net kyaj niˈigyë ja jäˈäy jyotˈambëkët. Këdii xyjawë ko mijtsën myajnibëdëˈkp (Ecl. 7:9). Waˈan ja jäˈäy tmëdaty mëjwiin kajaa amay jotmay o të mjäˈty mä kyaj tiempë tmëdaty. Ets pën kyaj tmëdowäˈäny ti ndukmëtmaytyäˈägäˈänëm, waˈan yëˈëjëty mët ko të tmëdoy axëëk nyajnimaytyakëm (2 Kor. 4:4).
Tsuj yajxon xyˈatsowët ja jäˈäy (Prov. 15:1). ¿Waˈan të xyˈyuxy? ¿O të xytyukmastuˈuty ti nety jap tyuumpy? Mbäät xyˈamdoyë maˈkxënë mët ko të mjäˈty mä kyaj tiempë tmëdaty. Per kyaj nˈamdoˈojëmë maˈkxën ko ngäjpxwäˈkxëm diˈib të nyajtuknipëjkëm. ¿Ets pën ja jäˈäy aˈˈakë xyˈatsoˈowëm mët ko tmëdoyˈaty axëëk yajnimaytyaˈagyë Testiigëty? Mbäät nˈanmäˈäyëm: “Njaygyujkëbëts tiko axëëk mnayjawëty. Per extëmëts nyajnimaytyäˈäktë kyaj tukëˈëyë tyëyˈäjtënëty. ¿Mbäät ndukmëtmaytyaˈaky wiˈix yˈixëty?”. Pën ja jäˈäy yëˈë kyaj tˈoyˈixy extëm ko kyaj oy nˈijtëm mët diˈib të yaˈëxkexy mä naymyujkën o ko kyaj ngupëjkëmë neˈpyny, mbäät nˈanmäˈäyëm: “Njaygyujkëbëts. Nan tëjëtsë wiink jäˈäy duˈun xyˈanëëmëdë. Per ¿mbäät ndukˈixy mëdë Biiblyë tikots duˈun ndundë?”.
Ko ja jäˈäy jyantsy jyotˈambëkët, oy ko nwinwäˈktutëm ets kyaj wiˈix nekyˈanmäˈäyëm. Ets pën jënäämp ko kyaj tnekytsyeky ets nyiminëdëdë Jyobaa tyestiigëty, oy ko nˈanmäˈäyëm ko yajwintsëˈëgëyäämp extëm jyënaˈany.

Tiko duˈun xykyatuny mä tyäˈädë poˈo:

Tuundäˈäk mä mDiosˈawdaty mëdë mfamilyë.
Ko nety të mnayjëgajpxyëty mët ja jäˈäy diˈib të jyantsy jyotˈambëky, ta xyajtëwët ja mëguˈuk diˈib mëët mgäjpxwaˈkxy pën mbäätxyëp mas oy të xyˈatsoy.