Ënäˈktëjk, tundë mëjääw parë xytyundët diˈib oy

Mä ja neky diˈibë Pablo tyuknijäˈäyë Tito, duˈun jap tˈanmääyë Tito ets nanduˈun niˈamukë ënäˈktëjk parë ttundëdë mëjääw ets dyaktët “tuˈugë oybyë [...] ijxpajtën mä oytyim tiity” (Titʉ 2:6, 7). Ets nanduˈun jyënany ko Jyobaa kyäjpn dyajwäˈätsäˈäny parë “nduˈunëm tëgekyë diˈibë oy” (Titʉ 2:14). Tuk pëky tyäˈädë tuunk diˈibë oy, yëˈë ko ngäjpxwäˈkxëm ets ndukniˈˈijxëmë jäˈäy ja Diosë Kyutujkën. Ënäˈktëjk, ¿mbäät xyyajtundë mjot mëjääw parë mdundët prekursoor ausilyaar o regulaar? (Prov. 20:29).

Pën mdunäämp prekursoor, oy ko yajxon xytyukniwitsët wiˈix mdunäˈäny (Luk. 14:28-30). Extëm nˈokpëjtakëm, ¿wiˈix mnayˈixäˈänyëty? ¿Wiˈix ja mˈoorë xyajkäˈpxäˈäny? Oy ko Jyobaa xytyukmëtmaytyäˈägët (Sal. 37:5). Nan tukmëtmaytyäˈägë mdääk mdeety ti mdunaampy etsë nmëguˈukˈäjtëm diˈib jeky kujk tyuunëdë prekursoor. Ets ok, ta xytyuuntsondäˈägët extëm të xytyukniwinmayë. Mbäät mˈity seguurë ko Jyobaa kyunuˈkxaampy extëm tijaty të xytyukniwitsë.

KO NETY TË YAˈIJXTÄˈÄYË BIDEO ËNÄˈKTËJK DIˈIB YAJMËJPËTSËËMDËBË JYOBAA, TA NET XYAJTËWËT:

• ¿Tijaty jotmay ojts twinguwäˈägëdë näägë nmëguˈukˈäjtëm parë tyundët prekursoor, ets ti tyuundë?

• ¿Wiˈix mbäädë tääk teety tpudëkëdë yˈuˈunk yˈënäˈk ets tyundët prekursoor regulaar?

• ¿Tiko jyëjpˈamëty xytyukniwitsët näˈäjaty mnëjkxäˈäny käjpxwäˈkxpë?

• ¿Wiˈix mbäät nbudëjkëmë prekursoorëty ets nmëjääwmoˈoyëm?

• ¿Wixaty yajkunuˈkxtë prekursoorëty?