Nimajtskë nmëguˈukˈäjtëm mëdiˈibë të yˈakˈyajwinˈixtë parë twoowˈyeˈeytyëdë Jyobaa tyestiigëty

MIERKËLËS 18 äämbë eneerë mä jëmëjt 2023, ojts yajnigajpxy mä jw.org ko Gage Fleegle etsë Jeffrey Winder të nety yajwinˈixtë parë nanduˈun twoowˈyeˈeytyëdë Jyobaa tyestiigëty. Yäˈädë nmëguˈukˈäjtëm jeky kujk tmëdundë Jyobaa.

Yëˈë nmëguˈukˈäjtëm Fleegle, jap yeˈky pyejty Pensilvania (Estados Unidos). Yëˈë tyääk tyeety tukniˈˈijxëdë ja tëyˈäjtën, ko yaˈkpëtsëëmy ta ojts nyëjkxtë mëdë tyääk mä tuˈugë käjpn mä nety tyëgoyˈatyë ëwäˈkx käjpxwäˈkxpë. Jaa nyëbejty 20 äämbë nobiembrë mä jëmëjt 1988.

Ja tyääk tyeety xëmë pyudëjkëdë parë jyot wyinmäˈäny tpëjktäˈägët ets aduˈuk tmëdunëdë Jyobaa. Xëmë ijtyë tyääk tyeety twowdë mä jyëën tyëjk pënaty tuundëp sirkuitë ets Betel. Yëˈë ta tpëjkyë kuentë ko jantsy agujk jotkujkë netyë yäˈädë nmëguˈukˈäjtëm tmëdundë Jyobaa. Jaa tyuundëkë prekursoor regulaar 1 äämbë septiembrë mä jëmëjt 1989 ets kyum majtsk jëmëjt ta yajwooy Betel, yëˈë japë nety jyantsy tyunäˈäny desde ko jyëmëjt tmëdäjty 12. Ets ja tyuuntsondaky oktuubrë mä jëmëjt 1991 mä Betel mëdiˈibë Brooklyn.

Tuktujk jëmëjt tyuuny mä liibrë nyiˈak yajpëjktaˈaky, ets ok ta tyuuny mä yajtukniwitsë wiˈix tyuˈuyeˈeyë Diosë tyuunk. Mä taabë tiempë ojts yeˈey mä kongregasionk mä yajkajpxyë ayuk ruso. Ets mä jëmëjt 2006, ta pyejky mëdë Nadia, desde jaa duˈun nimajtsk tyundë Betel. Ojts yeˈeytyë nanduˈun mä yajkajpxyë ayuk portugués ets mäjk jëmëjt naxy mä kongregasionk mëdiˈibë amxan. Ta net ok ojts yajkexy parë tyunët mä Komitee mëdiˈibë Tukniˈˈijxëp. Ok, ta tyuuny mä Komitee mëdiˈibë yˈijxypy wiˈix ngäjpxwäˈkxëm. Ets marsë mä jëmëjt 2022, ta yajwinˈijxy parë tyunët mëdë nmëguˈukˈäjtëm mëdiˈibë Wyoowˈyoˈoytyëbë Jyobaa tyestiigëty jap mä Komitee mëdiˈibë yˈijxypy wiˈix ngäjpxwäˈkxëm.

Yëˈë nmëguˈukˈäjtëm Winder jap myaxuˈunkˈäjty California mä tuˈugë lugäär mëdiˈibë xyëwˈäjtypy Murrieta. Yëˈë tyääk tyeety tukniˈˈijxëdë ja tëyˈäjtën ets ja nyëbejty 29 äämbë marsë mä jëmëjt 1986. Ets netyë tyuundëjkë prekursoor ausilyaar, kom nëgooyë ojts ttukxondaknë, ta tyuundëjkë prekursoor regulaar 1 äämbë oktuubrë mä jëmëjt 1986.

Ko myutskˈäjty, ta ojts tkuˈixëdë nimajtsk ja myëgaˈaxëty mëdiˈibë nety tuundëp Betel, yëˈë pudëjkë parë wyinmäˈäny tpëjktäˈägët ets tyunët Betel ko ja jyëmëjt tpäädët. Ets ja yajwooy mayë poˈo mä jëmëjt 1990 mä Betel mëdiˈibë Wallkill.

Yäˈädë nmëguˈukˈäjtëm kanäk pëky ja tuunk mëdiˈibë yajtuknipëjk, jawyiin tyuuny mä ja jëën tëjk wyaˈatsy, ta net mä ja jëyujk animal yajkuentëˈaty ets tim ok, ta tyuuny Mä yaˈijxtäˈäy wiˈix tijaty nyëˈëyeˈey tyuˈuyeˈey Betel. Mä jëmëjt 1997, ta pyejky mëdë Angela ets desde jaa tyundë nimajtsk Betel. Mä jëmëjt 2014, ta ojts yajkaxtë Warwick, etsë Winder jap tyuuny mä netyë Betel yajkojy. Mä jëmëjt 2016, ta yajkajxtë Patterson mä tyunyëtyë eskuelë ets jap tyuuny mä yajgrabaratyë audio etsë bideo. Kyumäjtaxk jëmëjt ta jatëgok jyëmbijttë Warwick ets jap tyuuny mä ja Komitee mëdiˈibë yˈijxypy wiˈix tijaty yajtuny Betel. Marsë mä jëmëjt 2022, ta yajkexy parë tpudëkëdët ja nmëguˈukˈäjtëm mëdiˈibë Wyoowˈyoˈoytyëbë Jyobaa tyestiigëty ets tyunët mä Komitee mëdiˈibë yˈijxypy wiˈix tijaty yajtuny Betel.

Nˈokninuˈkxtakëmë yäˈädë nmëguˈukˈäjtëm mëdiˈibë Jyobaa të tnayaky parë xypyudëjkëm ets duˈunyëm tyuunˈadëˈëtstët ets yajkunuˈkxtët (Éfes. 4:8).