Tuˈugë yetyëjkë jotmëkpë

KO JA jäˈäy ojts myayëndë yä Naxwiiny, nimaybyë axëëk yˈadëtstë dëˈën extëmë Kaín. Per tuˈugë yetyëjk yˈijty tëgatsy, ja txëˈäjty Enok. Tyäˈädë yetyëjk yˈijty jotmëk. Ja jäˈäy diˈibë nety jam jukyˈäjttëp mä tadë tiempë ak tim axëëk jyaˈayˈäjttë, perë Enok xëmë tmëduunyë Dios.

¿Mnijäˈäp tiko ja jäˈäy tjantsy tyuundë axëkˈäjtën? Ok winmayë tyäˈädë: ¿Pën yajtuundëgooyë Adán mëdë Eevʉ ets ojts tyukjëˈxëdë ja ujts tëëmp diˈibë Dios anmääyëdë ko kyaj tjëˈxtët? Yëˈë tuˈugë anklësë axëkjäˈäybyë. Biiblyë ja txëëmoˈoy Satanás. Ets yëˈë jyatsojkypy ets niˈamukë njëmbijtäˈäyëm axëkjäˈäy.

Tuˈugë xëë, Jyobaa tˈanmääyë Enok ets tˈanëëmëdë jäˈäyëty ko yajkutëgoyaampy niˈamukë axëkjäˈäy. Per ja jäˈäy kyaj tmëdowandë, waˈan jyotˈambëjktë ets dyaˈoogandë Enok. Päätyë Enok tsojkëbë nety yˈitët jotmëk ets tˈanëëmëdë jäˈäy ti netyë Dios tyunaampy.

Dios kyaj tnaˈijxy etsë Enok jyukyˈatët jeky mëdë axëkjäˈäyëty. Jeˈeyë jyëmëjt tmëdäjty 365. ¿Tiko njënäˈänëm ko “jeˈeyë 365”? Yëˈko mä tadë tiempë mëkatyëty ijtyë jäˈäy ets niˈigyë jeky jyukyˈattë kyaj dyëˈënëty extëm tyam. ¡Pesë Matusalén ja myäängë Enok ja jyëmëjt tmëdäjty 969!

Ok, ko ja Enok ojts yˈoˈknë, ja jäˈäy niˈigyë ojts yˈoˈktëënëdë. Biiblyë jyënaˈany ko tëgekyë diˈib ja jäˈäy xëmë wyinmäˈänyˈäjttë yëˈë axëkˈäjtënë, ta ja Naxwinyëdë tyuktijky mëdë axëkˈäjtënë etsë naytsyiik naygyoxë.

¿Mnijäˈäp tidën ko jyamˈäjty mëjwiin kajaajë amay jotmay mä tadë tiempë? Yëˈë dëˈën ko Satanás tˈëxtääjy tuˈugë winmäˈäny wiˈixë jäˈäy ttuktunëdë axëkˈäjtënë. Min nˈokˈijxëm ti tyuun.