Mä kyojtsondaky tijaty axtë mä myiinyë Ayoˈonduu

¿Mä të tsyoonyë tsäjp etsë Naxwinyëdë? ¿Wiˈix ojts kyojyë Xëë, Poˈo etsë mëtsäˈä ets tijaty jaˈäjtp yä Naxwiiny? Biiblyë tëyˈäjtën tˈatsoojëmbity ko jyënaˈany, Dios yëˈë tëgekyë të dyajkojtäˈäy. Päätyë tyäˈädë liibrë yëˈë nyimaytyaktsoˈompy wiˈixë Biiblyë jyënaˈany mä wiˈix tijaty ojts kyojy.

Xytyuknijäˈäjëm ko diˈib jayëjpë Dios yajkoj yëˈë anklësëty diˈib kyaj mbäät nˈijxëm dëˈën extëm yëˈë. Etsë Naxwinyëdë ojts kyojy parë jäˈäyëty. Päätyë Dios ojts dyajkojy ja yetyëjk ets ja toxytyëjk diˈib xyëˈäjt Adán mëdë Eevʉ ets tpëjtaky mä tuˈugë it lugäärë tsujpë. Per yëˈëjëty kyaj tmëmëdoodë Dios pääty kyaj tnekymyëdäjttë madakën ets jyukyˈattët winë xëë winë tiempë.

Mä Adán ojts kyojy axtë mä ja Ayoˈonduu myiiny, ja nyajxyë 1,656 jëmëjt. Nëˈënë tadë tiempë nyajxy, jyukyˈäjttë mayë axëkjäˈäy. Jam tsäjpotm tamë netyë Satanás mëdë yˈaxëk anklësëty. Ets yä Naxwiiny jyukyˈajtyë Kaín ets nandëˈënë wiingatypyë axëkjäˈäy. Nääk tim tëgatsy kyëxëˈktë mët ko yˈijttë jantsy kumëjääjëty. Per jukyˈäjttë nandëˈënë oyjyaˈay, extëmë Abel, Enok etsë Noˈee. Mä tyäˈädë MYËDUK Peky nijawëyäˈänëm wiˈix jyukyˈäjttë tyäˈädë jäˈäyëty ets tijaty tuun jäjtë.