Ja nyëdoˈoxyë Lot yˈijxëmbijty

JAM Kanán, jam tsyënääyë Lot mëdë yˈuˈunk yˈënäˈk ets nan jam tsyënääyë Abra̱a̱n. Tuˈugë xëë Abra̱a̱n tˈanmääyë Lot: Yä kyaj nëgoo nax mä tyanëdë jëyujk animal. Tunë mayˈäjtënë, min nˈoknaywyäˈxëm, pën mijts mnëjxp xitsoo tats ëjts nëjxët yatsoo.

Net ja Lot tkuyˈijxë nëˈën ja nyaxë Jordán mëjnëë. Tˈijxy ko jantsy oy ja nax ets ko tamë jëyujk jeˈxy. Ta jam ojts nyëjxnë tsënaabyë mëdë yˈuˈunk yˈënäˈk ets mëdë jyëyujk yˈanimal. Ok taanëmë tyëjk ojts tkojtë jam Sodomʉ.

Ja jäˈäy mëk axëkjäˈäyëty diˈib jam tsënääytyëp Sodomʉ. Lot axëëk nyayjäˈäjë yëˈko yëˈë oyjyaˈay. Dios nan axëëk nyayjäˈäjë, pääty tkejxy majtskë anklës ets nëjx tˈawanë ja Lot ko yajkutëgoyaambyë Sodomʉ käjpn ets nandëˈënë Gomorrʉ käjpn, yëˈko ja jäˈäy diˈib jam tsënääytyëp ak tim axëkjäˈäy.

Ja anklësëty tˈanmääytyë Lot: ¡Jotëgoy! ¡Mëbëtsëmë mnëdoˈoxy etsë mnëëxëty ets tukpëtsëëmduˈudë tyäˈädë käjpn! Perë Lot mëdë yˈuˈunk yˈënäˈk kyaj jyotëgooytyë, päätyë anklës kyëˈëmëmäjtsëdë ets wyijtspëtsëëmëdë mä ja käjpn. Ta yˈanmääyëdë: ¡Mëgaˈaktë mjukyˈäjtënë! Katë mˈijxëmbittë. Nëjxtë tunoty kopkoty këdiibë mˈooktët.

Lot mëdë nyëëxëty mëdoodë ets tyukpëtsëëmduttë ja Sodomʉ käjpn. Nimää kyawäˈkˈäˈäjëdë, ets ni kyaˈijxëmbijttë. Per ja nyëdoˈoxyë Lot kyaj myëdoojy. Pes waanë nety kujk tmëjagamgaˈaktë ja Sodomʉ käjpn, ko ojts wyäˈkˈawë ets yˈijxëmbijty. Ta jyëmbijty käänbotsy. Extëm yam xyˈixy mä dibujë.

Extëm jyajty ja nyëdoˈoxyë Lot, yëˈë xytyukniˈijxëm ko Dios yajtsokypy pënaty mëmëdoojëp, per pënaty kyaj myëmëdoyëty yajkutëgoopy.