¿Ti Dios kyajxyˈäjttë mëdë Abrään?

JA NATY të nyaxy naa 350 jëmëjt mä yˈAyoˈonduuy, ko jyukyˈajtyë Abrään jam Ur mä tsyëënëdë mëkjäˈäytyëjk, diˈib tyam yajtijp Irak. Mëkë Dios tmëbejky, per yaˈijxmäjts ja myëbëjkën.

Jyobaa ojts yˈanëˈëmxëty ets tsyoonët mä ja nyax kyäjpn ets nyëjxët wiink it wiink naxwinyëdë diˈib xyëˈäjtypy Kanan. Abrään netyë tmëmëdooyë Dios, kyaj tniwinmäˈäyë. Ta tyuˈudëjkë mëdë nyëdoˈoxy Saarë, tsyojmäänk Lot ets niˈamukë ninuˈunë naty yˈittë mä tyëjk. Ko jyäjttë Kanan, ta jam tsyënääyëdijttë ets yëˈë tyuktsënäˈäyëdë witëjk. Jamë Jyobaa ojts tkajxyˈaty mëdë Abrään ko mët yëˈëgyëjxm yajkunuˈxäˈäny niˈamukë ja naxwinyëdë jäˈäy, ets ko ja tyëëm yˈääts jyäˈtäˈäny extëm tuˈugë mëj nasionk diˈib jyaˈˈataampy ja it naxwinyëdë jam Kanan.

Ko Abrään mëdë Lot ojts myayënë tsyäjkää etsë byorreegë, ta Abrään dyaˈijxë oyjyaˈayˈat ko tˈanmääy ja tsyojmäänk ets twinˈixët ja naxwinyëdë mä nyëjxäˈäny. Lot ta twinˈijxy ja nax diˈib jantsy oy mä ja Jordan mëjnëë, ets ta tsyënääytyaknbejky Sodomë. Per ja jäˈäyëty diˈib Sodomë jantsy axëëgë naty jyukyˈattë ets mëjwiin kajaa tmëbokytyundë Jyobaa.

Ko Abrään ojts yoˈoywyäˈxnë mëdë Lot, ta Jyobaa tyukwandakë ko tyëëm yˈääts myayëyaˈany extëmë mëtsäˈä. Abrään myëbëjk extëmë Jyobaa yˈanmääyë, perë Saarë kyaj naty mbäät nyekyˈuˈunkpääty. Ko Abräänë jyëmëjt 99 etsë Saarë naa 90, ta Dios yˈanmääyë ko tpäädäˈändë yˈuˈunk. Ets duˈun tyuun jyäjtë, Saarë pyat ja yˈuˈunk diˈib tyukxëˈäjt Isää. Ets oyë Abrään jyamˈäjtyë wiinkpë yˈuˈunk, ja Yajnitsokpë diˈib yajnigäjx Eden ja naty myinäˈäny mä Isää tyëëm yˈääts.

Oyë natyë Lot mëdë fyamilyë tsyëënëdë Sodomë, kyaj axëëk jyukyˈäjttë extëm ja jäˈäyëty diˈibë naty jam tsënääytyëp. Pääty ko Jyobaa ojts ttukniwinmayë dyajkutëgoyaˈany, ta ojts tkexy majtskë anklës parë nëjx dyajpëtsemyë Lot. Tyäˈädë anklës ta tˈanmääyë Lot ets kyaˈagët mëdë fyamilyë ets kyaj yˈijxëmbittët. Ta netë Dios dyajmiinyë jëënduu etsë asufrë parë kyutëgooytyaˈayët ja axëkjäˈäy diˈib tsënääytyëp Sodomë ets Gomorrë. Lot mët majtskë nyëëx ojts tsyoˈoktë, per ja nyëdoˈoxy waˈan tpaˈˈayooy tijaty nyikak, ta yˈijxëmbijty ets dyajtëgooyë jyukyˈäjtën mët ko kyamëdooy.

(Jap yajnimaytyaˈaky mä Génesis 11:10–19:38.)