Ja myëgaˈaxëtyë Josee yˈaxëkˈixëdë

¡OK IXË tyäˈädë mixy extëm tyim määjy tyim täjnë ets nitii jotkujkˈäjtënë tkanekymyëdaty! Yëˈë Josee. Tamë myëgaˈaxëty tyim toˈktäˈäyëty ets jap yajmënëjxnë Ejiptʉ, jap yajmosëˈatäˈäny. ¿Tiko axëëk tyuunëdë kyuˈäjtsyëty? Yëˈko tjäˈäjëdë naywyinaxë.

Pesë Jakoob yëˈë mas niˈigyë tsyojkë Josee. Ets dyaˈijxë ko tuˈugë wyit ojts dyajxuuyë jantsy tsuj ets yeny. Ko ja nimäjkpë myëgaˈaxëty tˈijxtë ko ja tyeety yëˈë niˈigyë tsyojkypy Josee, ta tjäˈäjëdë naywyinaxë ets tˈaxëkˈijxtë. Per tamë nety ja tukpeky tidën ko tˈaxëkˈijxtë.

Josee majtsk ok kyumääjy. Mä ja kyumäˈäy tˈijxy ko myëgaˈaxëty nyiwindäˈägëdë. Ets ko ttukmëtmaytyaky ja myëgaˈaxëty wiˈixë nety të kyumäˈäy ta niˈigyë jyantsy jotˈambëjktë.

Tuˈugë xëë Jakoob tkejxyë Josee ets nëjxë myëgaˈaxëty tniˈixy mä nety jam byorreegë kuentˈattë. Ko yˈijxmiinëdë, ta nyayjënanëdë: ¡Min nˈokˈyaˈoˈkëm! Perë Ruben ja kaˈaxkopkpë jyënany: ¡Kyaj, kyaj xyaˈooktët! Ta kyaj dyaˈoˈktë ets jeˈeyë tkujëduˈujëdë mä tuˈugë nëdäjny diˈib të tyëtsnë. Ta nyaxwaˈtstë ets twinmayandë wiˈixë net tˈoktundëdë Josee.

Tamë nety të nyaxwaatstë ko tˈijxmiindë ismaelitëty. Judaa ta tˈanmääyë myëgaˈaxëty: Nˈoktukmëdoˈkëmë ismaelitëty. ¡Ta ttoˈktë ja Josee ets yajkujuujy mët 20 platë meeny! ¡Mëk axëëk dëˈën yˈadëtstë ets ninëˈën tkamëdäjttë paˈayoˈon!

¿Wiˈixë net tˈanmääytyë tyeety? Yëˈë yaˈoˈktë tuˈugë tsyiip ets mä ja tsyiip neˈpyny twinwijtsnäjxtë kanäk ok ja Joseejë wyit. Ta net ojts tmënëjxtë mä ja tyeety ets tˈanmääytyë: Tyäˈädë witëts të nbäättë. Ok ëxkap, ets ok ix pën kyaj yëˈë tjaˈajëtyë Josee.

Ko tˈijxyë Jakoob ko yëˈë Josee wyit ta jyantsy yaxkeky: Yëˈë net tuˈugë awäˈän jëyujkë Josee të yaˈoogyëty. Dëˈënë dëˈën meerë ja myëgaˈaxëty ttsojktë ets ja tyeety wyinmayët. Jakoob tjantsy nyimääjy tjantsy nyidäjˈyë yˈuˈunk, kanäk xëë jyantsy jëëjy jyantsy yaxy. Perë Josee kyaj nety të yˈooky. Min nˈokˈijxëm mä ojts yajmënejxy ets wiˈix jap jyaty.