Jyobaa kyaj tjäˈäytyëgooyë José

Tapë netyë José yˈity pujxndëgoty ko faraon, ja rey diˈib Egipto wyingumääy, ets nipën mbäät ojts tkayajnikejy ja kumäˈäy. Per ta tuˈugë tyuumbë faraon yˈanmääyë ko José mbäät tnimaytyaˈaky wiˈixë nety nyikejy. Ta ja rey pojënë ojts tnigaxë etsë José yajmëminët.

Ta ja faraon yajtëëwë: “¿Mbäädëts xytyukmëtmaytyaˈaky wiˈix nyikejˈyëtsë ntsuu ngumäˈäy?”. Ta José yˈatsooy: “Yä Egipto jëxtujk jëmëjt yˈitäˈäny mayë jëˈxy pëky, ets ok, ta yˈitäˈänyë yuu jëxtujk jëmëjt. Winˈix tuˈugë jäˈäy diˈib kuwijy diˈib mbäät dyajnipetyë jëˈxy pëky parë kyaj ja nax käjpn yuuˈooktët”. Ta ja faraon jyënany: “¡Mijts nwinˈijxypy! Mijts diˈib mˈitäämp ja myëmajtskpë anaˈamp yä Egipto”. Per ¿tiko José tnijäˈäwë wiˈixë nety nyikejy ja kyumäˈäyë faraon? Yëˈko, yëˈë Jyobaa pudëjkë.

José yajnipajt mayë jëˈxy pëky nuˈun nyajxy jëxtujk jëmëjt. Ko yˈabejty, ta net tsyondakyë yuu abëtsemy nyaxwinyëdë, duˈun extëmë netyë José të jyënaˈany. Ets määyëmë jäˈäy tsyoˈondë parë ojts jap tjuytyë jëˈxy pëky. Jacob ta tnijäˈäwë ko Egipto tapë jëˈxy pëky, pääty tkejxy nimäjkë yˈuˈunk parë nëjkx nanduˈun jap jyuytyë.

Ta ja yˈuˈunk yˈënäˈkë Jacob nyaybyatëdë mëdë José, yëˈë netyë tˈëxkajpy, per ja myëgaˈaxëty kyaj yˈëxkäjpëdë. Ta yajniwindaky, duˈun extëmë José wyingumääy ko myutskˈäjty. José nyijawëyaambyë nety pën duˈunyëm ja myëgaˈax yˈaxëkˈixëdë, pääty tˈanmääy: “Miitsëty jeˈeyë të mindë parë xyˈixäˈändë wiˈixëtsë nax ngäjpn yajpääty”. Yëˈëjëty ta yˈatsoowdë: “¡Kyajts ëëtsëty ngäjpn niˈˈixtë! Jamëts ntsoondë Canaán. Jatsë nety ndukkaˈaxˈattë nimäjmajtsk, per tuˈuk ojts ja yˈoˈknë ets ja tim mutskpë, tam të wyeˈemy mëdëtsë ndeety”. José ta jyënany: “Yajmindë ja mˈutsyë tim mutskpë netëts nmëbëkët”. Ta ja myëgaˈaxëty jyëmbijttë mä ja tyeety.

Ta jatëgokë fyamilyë Jacob yˈagëjxëdë jyëˈxy pyeky, ets tkejxy jatëgokë yˈuˈunk yˈënäˈk jap Egipto. Per ta ojts twoonëjkxtë Benjamín, ja myëgaˈaxë tim mutskpë. José yëˈë nety wyinmäˈänyˈixaampy ja myëgaˈaxëty, ta ojts dyuˈutsy ja kyopë diˈib platë mä ja xyäˈkë Benjamín ets ta tniwäämbejty ko të nety tmaatstë. Ko José tyuumbëtëjk ojts tpäättë ja kopë mä xyäˈkë Benjamín kyaj ja myëgaˈaxëty tmëbëkandë. Ta tmënuˈkxtaktë José parë yëˈë yajtukumëdowdët ets kyaj yëˈëjëtyë Benjamín.

Duˈunë José tpëjkyë kuentë ko ja myëgaˈaxëty të nety tyëgatstë. Kyaj tnekymyëmadäˈägany, ta tyëjkë jëëy yaxpë ets jyënany: “Ëjts José, ja mmëgaˈaxëty. ¿Jam yˈakjukyˈaty ja ndeety?”. Ja myëgaˈaxëty duˈunyë ojts wyëˈëmëdë. Ta José yˈanmääyëdë: “Këdii axëëk mnayjawëdë extëmëts xytyuundë. Yëˈëtsë Dios yä xyyajmiin parë kyaj mˈooktët. ¡Jëmbittë! ¡Jotëgoytyë! Nëjkx yajtsoondë ndeety”.

Ta ja myëgaˈaxëtyë José jyëmbijttë mä ja tyëjk ets ttukmëtmaytyaktë ja tyeety ti nety të tyuny të jyatyëty, ta ojts twoownëjkxtë Egipto. Kanäk jëmëjtë nety të nyäjxnë mä José tˈakˈijxyë tyeety ko jatëgok mëët nyaybyatë.