Ja fyamilyë Jakoob jyäˈttë Ejiptʉ

JOSEE kyaj tnekymyëmadäˈägany ets kyaj tˈawanët ja myëgaˈaxëty pënën yëˈë, ta tkajxpëtsëëmdääjy ja tyuumbëty. Ko naytyuˈuk ojts wyeˈemy ta jyantsy tyëjkë jëëjy yaxpë. Mbäät nˈokpawinmäˈäyëm wiˈix ja myëgaˈaxëty dëˈënyë jyantsy myonyˈijx jyantsy myonyjäˈäjëdë, mët ko kyaj tnijawëdë tiko ja Josee jyëˈëjy yaˈaxy. Kyum jekynyëm taanëm ja Josee jyënany: Ëjtsën Josee. ¿Jamëts ja ndeety yˈakjukyˈaty?

Ja myëgaˈaxëty kyaj tnijäˈäjëdë wiˈix yˈatsowdët. Ak tsëˈkëdëp. Per ja Josee yˈanmääyëdë: Tunë mayˈäjtënë mëwingoondëgëts. Ets ko myëwingoonëdë ta tˈanmääjy: Ëjtsën Josee, diˈib miitsëty mdoˈktë Ejiptʉ.

Ta tˈanmääjy yuunk naxypy ja myëgaˈaxëty: Katë xypyoky jawëdë kots xytyoˈktë. Dios yëˈëtsë dëˈën diˈib të xykyexy yä Ejiptʉ etsë jäˈäyëty kyaj yˈooktët. Pesë Faraón tëts xykyutujkënë moˈoy, etsëts nˈanaˈamët tëgekyë Ejiptʉ nyax kyäjpn. Pääty jëmbittë mä ndeety, ets tukmëtmaytyäˈäktë tëgekyë tyäˈädë. Ets anëëmë waˈan tminy yä tsënaabyë.

Ta ja Josee dyoˈkmënaanäjxtääjy ja myëgaˈaxëty, ets ttsuˈkxtääjy. Ko ja Faraón tnijäˈäjë ko të Josee myëgaˈaxëty jyäˈttë, ta tˈanmääyë Josee: Waˈanë mëgaˈaxëty tmënëjxtë karretë diˈibë jëyujk pyajëdojtypy ets nëjx tmëtsoondë mdeety etsë fyamilyë. Ets ëjts nmoˈoyëbë naxë mas oybyë diˈib yä Ejiptʉ.

Ets dëˈënën ttuundë. Ok ix mä tyäˈädë dibujë, tyamë Josee nyaygyäjxpoˈxëdë mëdë tyeety ko jyajty Ejiptʉ mët niˈamukë fyamilyë.

Të nety nyimayëndë ja Jakoob fyamilyë ko ojts nyëjxtë tsënaabyë Ejiptʉ. Ja nety wyinëˈattë 70, mët ja yˈuˈunk yˈënäˈk ets ja yˈuˈunk yˈok, ets nandëˈën ja tyuumbë myosëty diˈibë nety myëdäjttëp. Niˈamukë tsyënääytyaknbëjktë Ejiptʉ. Ja yajxëëmooytyë israelitëty, yëˈko Dios të nety txëëmoˈoyë Jakoob, Israel. Ets yëˈë diˈibë netë Dios kyäjpnˈäjt aduˈuk, extëm ok nˈixäˈänëm.