Tuˈugë tuumbë mosë diˈib myëmëdoowë Dios

José yëˈë niduˈugë yˈuˈungë Jacob diˈib mutsk. Ja myëgaˈaxëtyë José pyëjktë kuentë ko yëˈë diˈib niˈigyë tsojkëbë tyeety. ¿Wiˈix mˈokwinmay nyayjäˈäwëdë? Ojts tjawëdë naywyinaxë ets yˈaxëkˈijxtë. Tëgok, naa tëgatsyë José ojts wyingumäˈäy ets ta ttukmëtmaytyaky ja myëgaˈaxëty. Ta ja myëgaˈaxëty wyinmääytyë ko José kyumäˈäy yëˈë yˈandijpy ko pyäädaambyë tiempë mä twingoxtanëyäˈändë. Pääty niˈigyë tˈaxëkˈijxtë.

Tëgok ja José myëgaˈaxëty tamë nety byorreegë tkuentˈattë naa jamyë mä käjpn Siquem. Ta Jacob tkejxyë José parë nëjkx tˈixy ja myëgaˈaxëty. Ko tˈijxmiindë jagam, ta jyënandë: “Tëxii myiny ja wingumääbë. ¡Min nˈokˈyaˈoˈkëm!”. Ta tmäjtstë ets ojts tkujëbipëdë mä tuˈugë këk jut. Per ta niduˈugë myëgaˈax diˈib xyëwˈäjtypy Judá, jyënany: “Kyaj xyaˈooktët. Nik oy ko ndoˈkëm ets waˈan nëjkx dyajtuumbëˈaty”. Ets duˈunën ttuundë. Yëˈë tyukmëdoˈktë ja ajuuy adoˈkpëty diˈib tsoˈondëp Madián diˈibë nety nëjkxtëp Egipto, ja yajkujuuy mët 20 platë meeny.

Ok, ta ojts ttukpadijëdë wyitë José ja tsyiibë neˈpyny ets ta ojts tmënëjkxtë mä ja tyeety ets dyajtëëwdë: “¿Këdii yëˈë tyäˈädë ja mˈuˈungë wyit?”. Jacob ta wyinmääy ko José yëˈë nety të yaˈoogyëty tuˈugë awäˈän jëyujk ets ta tjantsy nyimoony tjantsy nyidujky, nipënë nety mbäät kyajotkujkmoˈoyëty.

Ko José yajmëjäjty Egipto, ta yajtukmëdoˈky tuˈugë jäˈäy diˈib yajtijp Potifar, wintsënë nety tyuny ets yëˈë diˈib tuumbëˈäjtë. Perë Jyobaa kyaj tmastutyë José. Potifar pyëjkë kuentë ko José jantsy tuumbë jäˈäy ets ko mbäät yajtukjotkujkˈaty. Ok, ta Potifar tyuknipëjktääyë tijatyë nety myëdäjtypy.

Ja kyudëjkë Potifar yˈijx ko José jantsy oy jantsy tsuj ets mëk, pääty janääm jatsojk tˈanmääy parë myëttsëënëdët. ¿Ti tyuunë José? Kyugak ets ta tˈanmääy: “Kyaj, yëˈko axëëgë taˈadë. Xytyukjotkujkˈäjtpëtsë nwintsën ets yëˈë mgudëjkˈäjtëp. Ets pën ijt tsënäˈäyëm, yëˈëtsë netyë Dios nmëbokytyuumpy”.

Tëgok, ta kyudëjkë Potifar kanäkˈok tˈanmääyë José parë myëttsëënëdët. Ta tmäjtsy wyitkëjxy, per ta kyugakë. Ko Potifar jyajty mä tyëjk, ta ja kyudëjk wyinˈëˈënë ets jyënany ko José të jyamëttsënëyaˈanyëty. Potifar ta jyantsy jotˈambëjky ets ta ojts tniˈanaˈamë parë yajtsumët. Perë Jyobaa kyaj tjäˈäytyëgooyë José.