Josee yajpëjtaˈaky pujxndëgoty

JOSEE 17 netyë jyëmëjt ko ojts yajmënejxy Ejiptʉ. Jap ta yajtukmëdeˈky tuˈugë jäˈäy diˈib xyëˈäjt Potifaar. Potifaar yëˈë nety myëduumpy ja rey diˈib Ejiptʉ, diˈib yajtijp Faraón.

Josee mëk tuumbëjäˈäy yˈijty mä ja wyintsën. Pääty ko tiempë nyajxy, ta ja wyintsën Potifaar tyuknipëjktääyë tëgekyë diˈib mä jyëën tyëjk. Per ¿tidën ko net jap yˈity pujxndëgoty? Yëˈë jap kyuˈijtëbë Potifaarë nyëdoˈoxy.

Ja Josee mëk tsuj yaˈkpejty, päätyë Potifaarë nyëdoˈoxy yˈanmääyë ets mëët nyaygyoˈogëdët. Perë Josee kyaj tkupejky, pes nyijäˈäp ko axëëk ko dëˈën yˈadëˈëtsët. Ta ja nyëdoˈoxyë Potifaar jyantsy jotˈambejky. Pääty ko ja nyaˈay jyajty, ta twinˈëˈëny ets tˈanmääjy: ¡Tadë Josee axëëgë wyinmäˈäny tëts xyˈanëëmë etsëts mëët naygyoˈogëdët! Potifaar myëbëjk extëm ja nyëdoˈoxy yˈanmääyë, ta tjantsy tyukjotˈambejkyë Josee, ta ojts tniˈanaˈamë ets yajpëtäˈägët pujxndëgoty.

Ja pujxndëjk kuentˈäjtpë netyë tˈijxyë Josee ko yëˈë tuˈugë mixy diˈib oyjyaˈay. Pääty ttuknipejky ets tkuentˈatët niˈamukë ja tsimy jyaˈay. Ok ta Faraón ttukjotˈambejky ja diˈibë nety mooyëbë tsäjkaaky ets ja diˈib mooyëbë binë, ta tpëjtaky pujxndëgoty, ta jap kyumäädë nimajtsk, per kyaj tnijäˈäjëdë wiˈix ja kyumäˈäy nyikejy. Ta ja kum bomë Josee yˈanmääyëdë: Tukmëtmaytyakëdëts wiˈix të mgumäˈädë. Ta Josee ojts dyajnikejy ja kumäˈäy mëdë Diosë nyaybyudëkë.

Josee tˈanmääjy ja binë yäjkpë: Ko tyëgëk xëbatët ta mbëtsëmäˈäny pujxndëgoty, ta dëˈënyëmë Faraón xymyëdunäˈäny, per ko mbëtsëmët nimaytyakëts mä Faraón, etsëts mbëtsëmët yä. Per ja diˈibë tsäjkaaky yajkypy ta tˈanmääjy: Ko tyëgëk xëbatët ta Faraón myoˈkpoˈtuˈudäˈänyëty.

Ko tyëgëk xëbejty ta tyuun jyäjtë extëmë Josee jyënany. Faraón dyoˈkpoˈtuty ja diˈib mooyëbë tsäjkaaky, ets ja diˈib mooyëbë binë dyajpëtseemy jap pujxndëgoty ta jatëgok ttuunk moojy. ¡Per jyaˈaytyëgooyë Josee! Kyaj tnimaytyaky mä Faraón, ta ja Josee ojts wyëˈëmnë jap pujxndëgoty.